1 Apopeleje kwa Yehofa “Mumtulileje Jwalakwe Yakudandawulisya Yenu Yosope”
BAIBULO JIKUSATI: “Mumtulileje [Mlungu] yakudandawulisya yenu yosope, ligongo jwalakwe akusasamala mnope ya jemanja.”—1 PETULO 5:7.
Ana Yeleyi Yikusagopolela Chichi?
Yehofa Mlungu akusasaka kuti tumsalileje chilichose chachikutulagasya nganisyo. (Salimo 55:22) Myoyo patukupopela mpaka tumsalileje yakusawusya yiliyose atamose yatukuyiwona kuti yili yamwana. Yili myoyo ligongo lyakuti Yehofa akusasamala ya m’weji. Kupopela kwa jwalakwe kuli kwakusosekwa mnope ligongo kuchitukamuchisya kukola mtendele wamumtima.—Afilipi 4:6, 7.
Ana Lipopelo Likusatukamuchisya Chamtuli?
Naga tukulagasika nganisyo mpaka tutendeje lipowo. Sonitu ŵandu ŵane nganaŵa amanyilile yindu yatukusimana nayo. (Misyungu 14:10) Myoyo tupopeleje kwa Yehofa ni kumsalila mwatukupikanila. Jwalakwe chachipikana lipopelo lyetu mwachinonyelo. Yehofa akusalola chilichose, soni jwalakwe akusamanyilila yayikusatupweteka soni kutulagasya. Myoyo akusasaka kuti tumsalileje chilichose chachikutulagasya nganisyo.—2 Mbili 6:29, 30.
Kupopela kwa Yehofa kukusatukamuchisya kuti tukulupilileje kuti jwalakwe akusasamala ya m’weji. Mpaka tupikane mpela mwa jwapikanile jwamasalimo juŵapopesile kuti, “Ŵalakwe ayiweni yisawusyo yangu; ni ayimanyilile yisawusyo yangu kuti yili yekulungwa.” (Salimo 31:7) Kumanyilila kuti Yehofa akusalola yakusawusya yatukusimana nayo, mpaka kututendekasye kuti tukakayichilaga yakuti chachitukamuchisya patukupilila yakusawusya. Kupwatika pakumanyilila yakusawusya yatukusasimana nayo, panasoni yindu yine yakusatenda Yehofa. Jwalakwe akusatulimbikasya soni kutukamuchisya pakamulichisya masengo Baibulo. Yakusatenda Yehofayi yili yakulekangana ni yampaka atende mundu jwine jwalijose.