YAMPAKA TUTENDE KUTI TUMALANE NI NDAMO JA KWAŴENGA ŴANE

4 | Mlungu Mpaka Atukamuchisye Kuti Tuleche Kwaŵenga Ŵane

Yajikusajiganya Baibulo:

“Msimu wa Mlungu ukusatutendekasya uwe kuti tuŵe ŵa: Chinonyelo, lukondwa, mtendele, kuwusimana mtima, umbone mtima, kwatendela ŵane yambone, kulupichika, kulisinga nambo soni kuligosa.”—AGALATIYA 5:22, 23.

Ana Yeleyi Yikugopolela Chichi?

Mlungu ni jwampaka atukamuchisye kuti tuleche kwaŵenga ŵane. Msimu wakwe weswela mpaka utukamuchisye kuti tukole ndamo syambone syele yili yangakomboleka kuti tukole pajika jetu. Mmalo mwakulingalinga pajika kuti tumalane ni ndamo ja kwaŵenga ŵane, tukusosekwa kumdalila Yehofa kuti atukamuchisye. Naga tukutenda yeleyi nikuti nombe m’we mpaka tuŵechete maloŵe gagakusasimanikwa m’buku ja Yesaya gakuti, “Mlungu ali mkulupusyo jwangu, tinjakulupilila ŵalakwe, soni ngisinjogopa. Machili gangu gakusatyochela kwa AMBUJE Mlungu.” (Yesaya 12:2) Kusala yisyene, mpaka tuŵechetesoni kuti, “Chikamuchisyo changu chikutyochela kwa AMBUJE.”—Salimo 121:2.

Yakusosekwa Kutenda:

“Yehofa angamuchisye kuti njenje mwakuleka kutenda yachiwawa ni kuŵa mundu jwakutenda yindu mwamtendele.”—WALDO

Amŵendeje Yehofa kuti ŵakamuchisye ni msimu wakwe weswela. (Luka 11:13) Amŵendejesoni jwalakwe kuti ŵakamuchisye kukola ndamo syambone. Alijiganyeje yajikusasala Baibulo pakwamba ya ndamo syampaka syakamuchisye kuti akaŵengaga ŵane. Ndamo syakwe sili mpela chinonyelo, mtendele, kuwusimana mtima soni kuligosa. Awungunyeje yampaka atende kuti akole ndamosi soni akungulucheje ni ŵandu ŵakusalingalinga kulosya ndamo syelesi. Jemanjaji chachakamuchisya kuti ‘ŵanonyeleje [ŵane] ni kutenda yambone.’—Ahebeli 10:24.

Yayamtendechele Mundu Jwine—WALDO

Jwalesile Kwaŵenga Ŵane Soni Kutenda Yachiwawa

Waldo jwakusile ni umi wakupweteka, mwamti yamtendekasyaga kuti ŵaŵenjeje ŵandu ŵane. Jwalakwe ŵatite, “Ndaŵi syejinji najawulaga m’misika kukumenyana ni ŵandu ŵaŵasumisyaga mitela jakusokonasya mtwe . . . Lisiku line gulu jine ja yigaŵenga yanalimbanaga nayo, jamlembile ganyu mundu jwine jwakogoya mnope kuti ambulaje. Pandaŵiji nakombwele kutila, nambo ŵaliji ali andotile ni chipula.”

Waldo nganasangalala paŵayiweni kuti ŵamkwakwe atandite kulijiganya Baibulo ni ŵa Mboni sya Yehofa. Jwalakwe ŵatite, “Naŵengaga mnope ŵa Mboni sya Yehofa, mwamti ndaŵi syejinji nayikaga pakwatukana kwene. Nambo ndaŵi syosope jemanjaji ŵajangaga mwamtendele.”

Pali papitile ndaŵi, Waldo ŵatandite kulijiganya Baibulo. Jwalakwe ŵatite, “Yaliji yakusawusya kuti ndendeje yindu mwakamulana ni yanalijiganya. Nayiwonaga kuti nganiyiŵa yikomboleche kuleka ndamo jangu jakutenda yindu mwachiwawa.” Nambope yindu yiŵalijiganyisye m’Baibulo yamkamuchisye kuti achenje mnope ndamo syakwe.

Waldo ŵasasilesoni kuti, “Lisiku line mundu juŵanjiganyaga Baibulo lina lyakwe, Alejandro ŵasalile kuti mbalanje lilemba lya Agalatiya 5:22, 23. . . . Jwalakwe ŵasalile kuti yili yangakomboleka kuti ngole ndamo syambonesi mwa machili gangu. Mmalomwakwe ngusosekwa kumdalila Mlungu kuti angamuchisye ni msimu wakwe weswela. Yeleyi yangamuchisye kuyiwona kuti yili yakomboleka kuchenga ndamo syangu.”

Waldo ŵakombwele kuleka kwaŵenga ŵane ligongo lyakuti jwamdalile Mlungu kuti amkamuchisye. Jwalakwe ŵatite, “Ŵachibale ŵangu soni achimjangu ŵanakungulukaga nawo kalakala nganaŵa akulupilile yandite pakuchenga. Yehofa angamuchisye kuti njenje mwakuleka kutenda yachiwawa ni kuŵa mundu jwakutenda yindu mwamtendele.”