YAMPAKA TUTENDE KUTI TUMALANE NI NDAMO JA KWAŴENGA ŴANE

3 | Atyosyeje Nganisyo Syakwaŵenga Ŵane

Yajikusajiganya Baibulo:

“Mlungu agalawusye umi wenu wosope pakumpa jemanja mitima ja sambano. Pelepo timchipakombola kumanyilila yakusaka Mlungu, nipo timchimanyilila yele yili yambone ni yakumsangalasya jwalakwejo.”—ALOMA 12:2.

Ana Yeleyi Yikugopolela Chichi?

Yatukusaganisya yikusamkwaya Mlungu. (Yelemiya 17:10) Tukusosekwa kutenda yejinji mmalo mwagamba kuŵambala kuŵecheta kapena kutenda yindu yakulosya kuti tukwaŵenga ŵane. Kwaŵenga ŵane kukusatyochela mumtima soni munganisyo. Myoyo tukusosekwa kutyosya mwachitema nganisyo silisyose syampaka situtendekasye kutanda kwaŵenga ŵane. Kutenda yeleyi kuchilosya kuti ‘tugalawisye umi wetu wosope’ soni yichitukamuchisya kuti tukaŵengaga ŵane.

Yakusosekwa Kutenda:

Akusosekwa kuliwungunya mwakusiŵawonela ŵandu ŵane mnopemnope ŵali ŵakulekangana nawo mtundu kapena chilambo chakutyochela. Aliwusye kuti, ‘Ana ngusinawona mwamtuli? Ana yangusaganisya yakwamba jemanjaji yikujigalila payangumanyilila kapena ligongo lya lusagu?’ Aŵambaleje kulola yindu pa intaneti, kulolela mafidiyo, kapena yindu yine yayikusalimbikasya kwaŵenga ŵane soni yindu yachiwawa.

Maloŵe ga Mlungu mpaka gatukamuchisye kuti tuleche kwaŵenga ŵane

Yikusaŵa yakusawusya kuti tuliwungunye mwakuwona mtima ni chakulinga chakuti tumanyilile nganisyo syetu soni mwatukupikanila mumtima. Maloŵe ga Mlungu mpaka gatukamuchisye kuti tumanyilile ‘yatukusaganisya ni yatukusayisakaga m’mitima jetu.’ (Ahebeli 4:12) Myoyo apitilisye kulijiganya Baibulo. Awanichisyeje yajikusajiganya Baibulo ni mwakaŵelele kaganisye kawo. Kaneko atendeje yakomboleka kuti kaganisye kawo kakamulaneje ni yajikusajiganya Baibulo. Maloŵe ga Mlungu mpaka gatukamuchisye kutyosya nganisyo syakwaŵenga ŵane syasitamilichiche mumtima soni munganisyo mwetu.—2 Akolinto 10:4, 5.

Yayamtendechele Mundu Jwine—STEPHEN

Jwachenjile Kaganisye Kakwe

Stephen pampepe ni ŵandu ŵa mwiŵasa mwakwe ŵatendeledwaga yindu yangasa ni asungu. Yeleyi yamtendekasisye Stephen kwinjila mu kagulu kandale kakaputilaga ufulu wa ŵandu. Kupwatika pelepa jwatandite kwalagasya ŵandu ŵamitundu jine. Stephen jwatite, “Ulendo wine une ni achimjangu twalolelele fidiyo jajalosyaga mwaŵalajilaga ŵandu ŵa ku Africa pandaŵi jiŵaliji achikapolo ku United States. Patwayiweni yindu yangali chilungamoyi twatumbile mnope, mwamti twatandite kwaputa asungu ŵaŵaliji ŵachinyamata ŵele twaliji nawo yimpepe m’malo gakulochesya fidiyoga. Kaneko twajawile m’milango ja asungu kuti tukapute.”

Stephen jwachenjile nganisyo syakwe pajwatandite kulijiganya Baibulo ni ŵa Mboni sya Yehofa. Jwalakwe jwatite, “Pakuŵa nayiweni yindu yalusagu yejinji yili mkutendekwa, nasimonjile mnope panayiweni yakusatenda ŵa Mboni sya Yehofa kwa jwine ni mjakwe. Mwachisyasyo, liŵasa line lya asungu palyajawulaga ku chilambo chakusa lyajigele ŵanache ŵawo ni kuja kwaleka ku liŵasa line lya ŵandu ŵachapiliwu. Nambosoni liŵasa line lya asungu lyamjigele mwanache ja ŵandu ŵachapiliwu kuti akatameje najo ligongo jwasoŵaga malo gakutama.” Stephen jwayiweni kuti ŵa Mboni sya Yehofa akusanonyelana yisyesyene. Yeleyi yamkamuchisye kumanyilila yaŵasasile Yesu kuti ŵakumkuya ŵakwe chachinonyelanaga yisyesyene.—Yohane 13:35.

Ana chichi chachamkamuchisye Stephen kuleka yachiwawa soni kwaŵenga ŵane? Lilemba lya Aloma 12:2 ni lyalyamkamuchisye. Jwalakwe jwatite, “Nayiweni kuti ngusosekwa kuchenga nganisyo syangu. Nasosekwaga kuleka yachiwawa soni nalijiganyisye kuti ngusosekwa kutenda yindu mwamtendele ni ŵandu ŵane.” Apano pamasile yaka 40, Stephen ali ngakwaŵenga ŵandu ŵane. Yeleyi yimkamuchisye kuti aŵeje jwakusangalala.