Patukuyiwona Kuti Bola Kwamba Kuwa

Adriana, jwakusatama ku Brazil jwatite, “Kulagasika nganisyo, ungali chembecheyo soni kuŵa jwakudandawula, yapitilisyagape mwamti naganisyaga yakwamba kuliwulaga.”

ANA WAWOJO pakwete paganisisye yakwamba kuwa, yindu payiyiche pakusawusya? Naga yili myoyo mpaka apikanichisye mwaŵapikanilaga Adriana. Jwalakwe jwalagasikaga nganisyo, kudandawula soni kulipikana kuti jwangali chembecheyo. Adriana ŵamsimene ni ulwele wanganisyo.

Kwende tuganichisyesoni ya jwamlume jwine jwa ku Japan lina lyakwe Kaoru, jwaŵasamalilaga achinangolo ŵakwe ŵachekulupe ŵaŵalijisoni ŵakulwala. Jwalakwe jwatite, “Pandaŵiji natengukaga ni yindu yayatendekwaga kumasengo, nganisakaga kulya soni nganinalupataga lugono. Natandite kuganisya kuti bola ngagambile kuwa.”

Mundu jwine (Ojebode) jwa ku Nigeria jwatite, “Natamilaga kudandawula yayandendekasyaga kuti ngambeje kulila, kaneko natandite kusosa matala gakuti ngambe kuliwulaga.” Chakusangalasya ni chakuti ŵandu wosope ŵatwakolasileŵa nganaliwulaga (Ojebode, Kaoru, soni Adriana). Nambope, chaka chilichose ŵandu ŵajinji akusaliwulaga.

ANA KWAPI KWAMPAKA TUPATE CHIKAMUCHISYO?

Ŵandu ŵajinji ŵakusaliwulaga akusaŵaga achalume. Jemanjaji akusatenda sooni kwasalila ŵane mwakupikanila mumtima. Yesu jwaŵechete kuti jwakulwala ni jwakusamsosa dokotala. (Luka 5:31) Naga tukulagasika nganisyo mpaka kwika pakusaka kuliwulaga, chonde tukatenda sooni kwasalila ŵane kuti atukamuchisye. Ŵandu ŵajinji ŵakulagasika nganisyo ayiweni kuti chikamuchisyo chakusapeleka dokotala chikusakamuchisya kuti akombole kupilila. Ŵandu ŵatwakolasile ŵala, ŵapochele chikamuchisyo mwamti apano ali chenene.

Madokotala mpaka gapeleche mtela kapena kwamba kuŵechetana ni jwakulagasika nganisyo pakusaka kumkamuchisya. Ŵandu ŵakulagasika nganisyo akusasaka kuti ŵamwiŵasa mwawo soni achimjawo ŵakamuchisyeje, kwapikanichisya mwakuwusimana mtima soni kwasamalila. Mjetu jwambone jwele jwalijose akusosekwa kola ali Yehofa Mlungu, jwakusatupa chikamuchisyo chambone mnope kutyochela m’Baibulo.

ANA PANA LITALA LYAKUDALILICHIKA MNOPE?

Ŵandu ŵakulagasika nganisyo mpaka asosekwe kupochela chikamuchisyo cha madokotala kwandaŵi jelewu soni kuchenga mwakusatendela yindu paumi wawo. Naga akulagasika ni ulwele wa nganisyo mpaka aganichisyeje yakusangalasya yayichitendekwa msogolo mpela muŵatendele Ojebode. Jwalakwe jwatite, “Ngwembecheya kuti chinakuwone kwanilichikwa kwa maloŵe gagali pa Yesaya 33:24 papakusasala yandaŵi jele pachilambo chapasi pangali juchachiŵecheta kuti, ‘Une ngulwala.’” Mwakulandana ni Ojebode, tukusosekwa kulimbikasidwa ni yaŵasasile Mlungu pakwamba ya “chilambo chapasi chasambano” mwamuchiŵa mwangali “yipwetesi.” (Chiwunukuko 21:1, 4) Yaŵasasileyi yikugopolelasoni kuti kulagasika nganisyo soni yakupweteka yosope yichimala. Yipwetesi yetu yosope ngasiyipagwasoni mpaka kalakala. Yakupweteka yosope ‘ngasituyikumbuchila soni tiyichiliŵalichika nditu.’—Yesaya 65:17.

Malemba ga M’Baibulo Gampaka Gatukamuchisye

Mlungu akusapikanichisyaga mwatukusapikanila mumtima.

“Une Ambuje Mlungu jwenu, . . . ngumsalila kuti, ‘Mkatenda woga; chinjimkamuchisya.’”—Yesaya 41:13.

Yehofa akusasachilila kutukamuchisya soni jwalakwe akusatupikanichisya mwatukusapikanila mumtima kupunda yampaka ajile pakutupikachisya mundu jwalijose.

Tugaganichisyeje mnope Maloŵe ga Mlungu.

“[Eliya] ŵaŵendile kwa Ambuje kuti awe, ŵatite, ‘ . . . Ŵalakwe Ambuje angunde kuti ngambe kuwa.’”—1 Ayimwene 19:4.

Jwamlume jwine lina lyakwe Ojebode jwatite, “Kugaganichisya mnope Maloŵe ga Mlungu kwangamuchisye soni nayiweni kuti nganiyitandila mwa une ligongo nombe najo jwakulochesya Eliya jwalipikene mpela une.”

Tulijiganyeje kutyochela mu yisyasyo ya m’Baibulo.

“Nambo une [Yesu] nimpopelele m’mwejo [Petulo] kuti mkaleka kungulupilila une.”—Luka 22:32

Petulo ali amkanile Yesu kakwana katatu, jwalagasiche mnope nganisyo mwamti jwalisile. Kaoru jwatite, “Kuganichisya yaŵatesile Petulo soni yaŵatite Yesu pakumkamuchisya jwalakwe, yangamuchisye kuyiwona kuti Yehofa soni Yesu ŵapikanichisye mwaŵapikanilaga Petulo mumtima. Yeleyi yalimbikasisye kwabasi.”

Yakupweteka yosope ‘ngasituyikumbuchila soni tiyichiliŵalichika nditu.’—Yesaya 65:17