Patukulaga ni Ulwele Wekulungwa

Linda, jwa yaka 71 jwatite, “Paŵagambile kusalila kuti ngwete kansa ja m’mapapu soni m’matumbo nayiweni kuti chimbwe basi. Panawujile kunyumba kutyochela kwa adokotala naliŵechetele jika kuti, ‘Nganinjembecheyaga yeleyi. Nambope, chimbate matala gakungamuchisya kuti mbilile.’”

Elise jwa yaka 49 jwatite, “Mbali jakumchiji ja ngope jangu jakamwilwe ni ulwele wa m’mitasi. Ululu wanapikanaga pandaŵi jeleji wandendekasyaga kulagasika nganisyo. Ndaŵi syejinji nalipikanaga kuti ndili jikajikape soni nasakaga kuliwulaga.”

Mundu jwakulwala jwakusajenda pa njinga ja ŵalemale ali pampepe ni ŵachibale ŵakwe

NAGA WAWOJO kapena mundu jwakusamnonyela asimanikwe ni ulwele wakuti asigele panandi kuwa, akumanyilila yayikusati pakumlagasya mundu nganisyo. Konjechesya pa ulwelewo, akumanyilila yakusati pakulagasika nganisyo msyenejo kapena ŵandu ŵam’liŵasa lyakwe. Woga ni kulagasika nganisyo mnope mpaka kumtendekasye mundu kuti ajogopeje kwawula kuchipatala, kupochela kapena kulipila chikamuchisyo chilichose cha mtela kapena yakuyichisya yampaka yipagwe panyuma pakupata chikamuchisyocho. Kulagasika nganisyo ligongo lya ulwele wekulungwa kukusamtengusyaga mundu.

Ana mpaka tupate kwapi chikamuchisyo? Ŵajinji apatile kuti chikamuchisyo chekulungwa chili kupopela kwa Mlungu soni kuŵalanga maloŵe gakulimbikasya gagakusasimanikwa m’Baibulo. Chikamuchisyo chine mpaka tupate kwa ŵandu ŵakusatunonyela, ŵamwiŵasa mwetu soni achimjetu

ANA CHICHI CHAMPAKA CHITUKAMUCHISYE KUPILILA?

Robert jwa yaka 58, jwasasile yindu yakamuchisya pajwatite, “Naga akukulupilila Mlungu ni kuti chachakamuchisya kuti apilile ulwele wawo. Tumsalileje Yehofa mwatukupikanila mumtima. Tumŵendeje kuti atupe machili gakutukamuchisya kuti liŵasa lyetu liŵe lyakulimba soni kuti tupilile ulwele wetu mwakuwusimana mtima.”

Robert jwasasilesoni kuti, “Yikusaŵa yambone naga ŵamwiŵasa mwawo ali ŵakoseka kwakamuchisya pakulagasika nganisyo. Lisiku lililyose, ŵandu ŵanjimbilaga foni ni kumbusyaga kuti, ‘Ana apano mkusimana wuli?’ Achimjangu ŵaŵatamaga m’madela gakulekanganalekangana ŵalimbikasyaga. Jemanjaji ŵandendekasyaga kulipikana chenene soni ŵangamuchisyaga kuti ngajasa mtima.”

Naga tupite kukumlola mjetu jwakulwala, tukumbuchileje yajwaŵechete Linda. Jwalakwe jwatite, “Jwakulwala akusasakaga umi wakwe uli mpela muwaŵelele pandanda soni jwangasaka kuti agambeje kutamila kuŵecheta ya ulwele wakwe. Tuŵecheteje yindu yatukusanonyela kuŵechetana najo ndaŵi syosope.”

Ni machili ga Mlungu soni chikamuchisyo cha m’Malemba nambosoni chinonyelo cha ŵamwiŵasa mwetu kupwatikapo achimjetu, mpaka tusimichisye kuti umi uli wakusosekwa atamose kuti tukupilila ulwele wekulungwa.

Malemba ga M’Baibulo Gampaka Gatukamuchisye

Tumdalileje Mlungu.

‘Napopesile kwa AMBUJE, ni ŵanjanjile, ŵangulupwisye une ku yosope yinayijogopaga. Mundu jwakulaga jwalisile, nipo AMBUJE ŵampikene.’—Salimo 34:4, 6.

Linda, jwatumkolasile kundanda kula jwatite, “Pangupopela ngangusamsalila Yehofa kuti, ‘Ambosye ulwelewu.’ Nambo ndaŵi syosyope ngusamsalila kuti, ‘Angamuchisye kuti mbe jwakulimba soni kuti ngombole kupilila ulwele wangu.’”

Maloŵe ga Mlungu mpaka gatukamuchisye kuŵa ŵakulimba.

“Pangali atamose jumo mchilambomo jutachiŵecheta kuti, ‘Une ngulwala.’”—Yesaya 33:24.

Kuganichisya yachachitenda Mlungu kusogolo yikusatukamuchisya kola chembecheyo chachikusatupa machili kuti tukombole kupilila.

Twaŵendeje ŵamwiŵasa mwetu soni achimjetu kuti atukamuchisyeje.

“M’mbusanga [kapena kuti mjakwe] akusakunonyela ndaŵi ni ndaŵi, soni mlongo mjakwe ŵapagwile kuti atukamuchisyeje pa ndaŵi ja yisawusyo.”—Misyungu 17:17.

Elise jwatumkolasile kundanda kula jwatite, “Ngakusosekwa kutama pajika soni akundeje kuti achimjawo ŵakamuchisyeje. Ndaŵi sine mpaka alipikaneje kuti ali jikajikape soni kuyiwona kuti Mlungu ngakwapikanila, nambo akalipatulaga.”