Baibulo Jili Utenga Wakutyochela kwa Mlungu

Yehofa atupele chindu chambone mnope chachili Baibulo. Nambo mwine mpaka aliwusyeje kuti ‘Ana Baibulo jasimanikwe chamtuli? Ana ŵani ŵaŵalembile Baibulo?’ Kuti apate kwanga kwa yiwusyoyi, kwende tukambilane yayatendekwe kuti tukole Baibulo.

1. Naga Baibulo jalembedwe ni ŵandu, ligongo chichi tukusati jatyochele kwa Mlungu?

Baibulo jalembedwe ni ŵandu ŵakwana 40. Buku jandanda jalembedwe yaka chiŵandika 3,500 yipiteyo soni buku jakumalisya jalembedwe yaka chiŵandika 1,900 yipiteyo. Baibuloji jalembedwe ni ŵandu ŵakulekanganalekangana. Atamose yili myoyo, yaŵalembileyi ngayikusasisyana. Ana yeleyi yakomboleche chamtuli? Yakomboleche ligongo lyakuti Baibulo jili maloŵe ga Mlungu. (Aŵalanje 1 Atesalonika 2:13) Ŵandu ŵaŵalembile Baibulo nganalemba nganisyo syawo. M’malo mwakwe ‘msimu weswela ŵaŵechetekasisye jemanjajo maloŵe gakutyochela kwa Mlungu.’a (2 Petulo 1:21) Mlungu ŵakamulichisye masengo msimu weswela kuti ŵandu alembe maloŵe gakwe.—2 Timoteo 3:16.

2. Ana Baibulo mpaka jakamuchisye ŵani?

Ngani syambone sya m’Baibulo mpaka syakamuchisye “Ŵandu wamtundu uliwose, ŵa lukosyo lululose, ni ŵa chiŵecheto chilichose.” (Aŵalanje Chiwunukuko 14:6) Mlungu jwalolechesye kuti Baibulo jiŵe m’yiŵecheto yejinji kupunda buku jilijose. Jwalijose masiku agano akwete upile wakuŵalanga maloŵe ga Mlungu. Yeleyi yili yisyene mwangasamala kandu kuti ŵanduwo akutama kwapi soni kuti akusaŵecheta chiŵecheto chamtuli.

3. Ana Yehofa ŵatesile yamtuli kuti tukole Baibulo?

Baibulo jalembedwe pa yindu yangakaŵa konasika mpela mapende ga nyama soni pa yindu yine. Nambo ŵandu ŵaŵajinonyelaga Baibulo, ŵajikopelagasoni pa yindu yine mwakusamala. Atamose kuti papali ŵandu ŵane ŵaŵasakaga kuti ajijonanje, nambo ŵane ŵaŵisile umi wawo pangosi kuti ajikulupusye. Yehofa nganakunda chilichose kumlepelekasya kuŵechetana ni m’weji. Baibulo jikusasala kuti “maloŵe ga Mlungu jwetu tigachiŵa chitamile mpaka kalakala.”—Yesaya 40:8.

KULIJIGANYA YEJINJI

4. Baibulo jikusatusalila ŵaŵajilembile

Alolele FIDIYO. Kaneko aŵalanje 2 Timoteo 3:16, ni akambilane yiwusyo ayi.

FIDIYO: Ana Ŵani Juŵalembile Baibulo?—Kambali ka fidiyo (2:48)

• Naga Baibulo jalembedwe ni ŵandu, ligongo chichi tukusati jatyochele kwa Mlungu?

• Ana yili yakupikanika kujila kuti Mlungu ni juŵatendekasisye ŵandu kuti alembe nganisyo syakwe?

5. Baibulo jikulupwiche mu yakusawusya yejinji

FIDIYO: Jwachimbichisyaga Mnope Baibulo—Kambali ka Fidiyo (William Tyndale) (6:17)

• Ana yaŵatesile ŵandu ŵane kuti ajikulupusye Baibulo, ngayikwatendekasya kuti ajiŵalanjeje?

Aŵalanje Salimo 119:97, kaneko akambilane chiwusyo achi:

• Ligongo chichi ŵandu ŵane ŵaŵisile umi wawo pangosi kuti agopolele Baibulo?

6. Buku ja ŵandu wosope

Baibulo jili buku jajiwandile mnope pachilambo chapasi kupunda buku jilijose. Soni jigopoleledwe mu yiŵecheto yejinji. Aŵalanje Masengo 10:34, 35, kaneko akambilane yiwusyo ayi:

• Ligongo chichi Mlungu akusasaka kuti maloŵe gakwe gagopoleledwe m’yiŵecheto yosope?

• Ana chichi chachikwatendekasya chidwi ni Baibulo?

YALIJIGANYISYE

Baibulo jili Maloŵe ga Mlungu soni jikusimanikwa kwa ŵandu wosope.

Yiwusyo Yakuwilisya

• Ana yikusagopelelaga chichi patukuŵecheta kuti Mlungu ŵasalile ŵandu kuti alembe Baibulo?

• Ana chichi chachikwasangalasya pakwamba Baibulo?

• Ana kumanyilila yatesile Mlungu kuti aŵechetaneje ni m’weji kwakwayiye uli?

YAKULINGA YINESONI

Aŵalanje yajitite Baibulo pakukulupuka.

“Mwajakulupuchile Baibulo” (Ajimuche!, Nofemba 2007)

Alijiganye mwajakulupuchile Baibulo ku yindu yitatu.

“Baibulo—Jakulupwice Mwakusimonjesya” (Sanja ja Mlonda Na. 4 2016)

Alole yaŵatesile ŵandu ŵane pakuŵika umi wawo pangosi kuti agopolele Baibulo.

Ŵajichimbichisyaga Mnope Baibulo (14:26)

Ŵandu aŵele ali mkujikopela Baibulo soni kujigopolela maulendo gejinji. Ana chichi champaka chasimichisye kuti utenga wawuli m’Baibulo nganiwuchenga?

“Ana Baibulo Ŵajichenjile Kapena Kujisokonasya?” (Ngani ja pa intaneti)