Ana Yisyene Kuti Ngani Syambone Sikutyochela kwa Mlungu?

1. Ana Mkulemba jwa Baibulo ali ŵani?

Ngani syambone syakuti ŵandu chachitama kwangamala pachilambo chapasi silembedwe m’Baibulo. (Salimo 37:29) M’Baibulo mwana mabuku gamwanamwana gakwana 66. Mlungu ŵakamulichisye masengo ŵandu ŵakwana 40 kuti alembe mabukuga. Mabuku gandanda ga m’Baibulo ŵalembile Mose chiŵandika yaka 3,500 yipiteyo. Buku jakumalisya ŵalembile ndumetume Yohane yaka yakupunda 1,900 yipiteyo. Ana ŵaŵalembaga Baibulo, ŵalembile nganisyo sya ŵani? Mlungu ŵaŵechetaga ni ŵaŵalembaga Baibulo kupitila mu msimu weswela. (2 Samueli 23:2) Jemanjaji ŵalembile nganisyo sya Mlungu, ngaŵaga syawo. Myoyo Yehofa ali Mkulemba jwa Baibulo.​—Aŵalanje 2 Timoteo 3:16; 2 Petulo 1:20, 21.

Alolele fidiyo jakuti Ana Ŵani Juŵalembile Baibulo?

2. Ana mpaka tusimichisye chamtuli kuti Baibulo jikusasala yisyesyene?

Tukumanyilila kuti Baibulo jili jakutyochela kwa Mlungu ligongo jikusalochesya chenene ya msogolo. Pangali mundu jwalijose jwampaka atende yeleyo. (Yoswa 23:14) Mlungupe Jwamachiligose ni jwampaka amanyilile yayili msogolo mwa ŵandu.​—Aŵalanje Yesaya 42:9; 46:10.

Buku jakutyochela kwa Mlungu jili japajika. Mabiliyoni ga Mabaibulo agawandisye mu yiŵecheto yejinji. Atamose kuti Baibulo jili jakala, nambo jikusakamulana ni sayansi jisyesyene. Soni yaŵalembile ŵakulemba Baibulo ŵakwana 40 yangasisyana.a Yajikusaŵecheta Baibulo pangani ja chinonyelo ngaŵa mkutyochela kwine kulikose nambo kwa Mlungu jusyesyene, jwali Mlungu jwachinonyelo. Soni Baibulo jikwete machili gakusinda umi wa ŵandu kuti uŵe wambone. Yeleyi yikusiyatendekasya ŵajinji kulupilila kuti Baibulo jili Maloŵe ga Mlungu.​—Aŵalanje 1 Atesalonika 2:13.

Alole fidiyo jakuti Ana Mpaka Tusimichisye Chamtuli Kuti Baibulo Jikusasala Yisyesyene?

3. Ana m’Baibulo mwana chichi?

Ngani jine jekulungwa jajikusimanikwa m’Baibulo jili jakuti Mlungu akwete chakulinga chambone kwa ŵandu. Malemba gakusatusalila yayatendekwe kuti mundu akapitilisya kutama mu paladaiso pachilambo chapasi. Gakusatusalilasoni mwajichiyichila paladaiso.​—Aŵalanje Chiwunukuko 21:4, 5.

M’Maloŵe ga Mlungu mwanamosoni malamusi, ­maloŵe gakutulongola, soni gakutukamuchisya. Baibulo jikusasalasoni yaŵele mkutenda Mlungu ni ŵandu. Yeleyi yikusatukamuchisya kumanyilila ndamo sya Mlungu. Myoyo Baibulo mpaka jakamuchisye kummanyilila Mlungu. Jikusasala yampaka atende kuti aŵe mjakwe jwa Mlungu.​—Aŵalanje Salimo 19:7, 11; Yakobo 2:23; 4:8.

4. Ana mpaka atende chichi kuti ajipikanichisyeje Baibulo?

Kabukuka chikakamuchisye kujipikanichisya Baibulo pakamulichisya masengo litala lyaŵakamulichisye masengo Yesu. Jwalakwe ŵakolangaga malemba ga m’Baibulo kaneko jwalondesyaga ‘gopolela kwa Malembago.’​—Aŵalanje Luka 24:27, 45.

Ngani syambone syakutyochela kwa Mlungu sili syakusangalasya mnope. Nambo ŵandu ŵane ŵangasinonyela, soni ŵane sikusanyalaya. Nambo yeleyi yikatengusya. Ligongo wawojo kuti akapate umi wangamala, akusosekwa kummanyilila Mlungu.​—Aŵalanje Yohane 17:3.