LIJIGANYO 06
Ana Yaumi Yapali Chamtuli?
“Umi wosope uli wakutyochela kwa [Mlungu].” (Salimo 36:9) Ana wawojo akusakulupilila yeleyi? Ŵane akusaganisya kuti yaumi yapali mwajikape. Naga yeleyi yili yisyene, ni kuti ŵanduwe twagambile kusimanikwa mwangosi. Nambo naga Yehofa Mlungu ni juŵapanganyisye yaumi, nikuti jwayipanganyisye ni chakulinga.a Kwende tulole yajikusasala Baibulo pakwamba mwayatandile yaumi soni ligongo lyakwe kukulupilila yeleyi kuli kwakupikanika.
1. Ana kwinani soni chilambochi yapali chamtuli?
Baibulo jikusasala kuti: “Pandanda Mlungu ŵapanganyisye kwinani ni chilambo chapasi.” (Genesesi 1:1) Ŵasayansi akusajitichisya kuti chilambochi soni kwinani pana juŵayipanganyisye. Ana Mlungu ŵayipanganyisye chamtuli yeleyi? Jwalakwe jwakamulichisye masengo machili gakwe kapena kuti “Msimu” wakwe weswela pakupanganya yindu yosope.—Genesesi 1:2.
2. Ligongo chichi Mlungu ŵapanganyisye chilambo chapasi?
Yehofa “nganachipanganya [chilambochi] kuti chiŵe changali kandu, nambo kuti chiŵe malo gakutama ŵandu.” (Yesaya 45:18) Chilambochi ŵachipanganyisye kuti chiŵe malo gambone gakutama ŵandu mpaka kalakala. (Aŵalanje Yesaya 40:28; 42:5.) Ŵasayansi akusaŵecheta kuti chilambochi chili chapadela mnope ligongo ni kwakusatama ŵandu.
3. Ana ŵandu akusalekangana chamtuli ni yinyama?
Mlungu paŵapanganyisye chilambo chapasi, ŵapanganyisyesoni yindu yaumi. Chandanda ŵapanganyisye yakumela soni yinyama. Kaneko, ‘Mlungu ŵapanganyisye mundu m’chiwanichisyo chakwe.’ (Aŵalanje Genesesi 1:27.) Ana ŵandu akusalekangana chamtuli ni yinyama? Ligongo lyakuti Mlungu ŵatupanganyisye m’chiwanichisyo chakwe, yili yakomboleka kujigalila ndamo syakwe mpela chinonyelo soni chilungamo. Jwalakwe ŵatupanganyisyesoni m’litala lyakuti tupakomboleje kulijiganya chiŵecheto, kukumbila yindu yambone soni kusangalala ni nyimbo. Nambosoni tuli ŵakulekangana ni yinyama ligongo tukusamlambila juŵatupanganyisye.
KULIJIGANYA YEJINJI
Chitulole maumboni gakulosya kuti yaumi yatesile kupanganyidwa soni kuti yajikusasala Baibulo panganiji yili yakupikanika. Nambosoni kuti ndamo syakusalosya ŵandu mpaka situjiganye yakwamba Mlungu.
4. Yaumi ŵatesile kuyipanganya
Ŵandu akusapochela uchimbichimbi papanganyisye yindu pakujigalila yindu ya m’chilengedwe. Nambi ŵani ŵakusosekwa kupochelaga uchimbichimbi ligongo lya yindu ya m’chilengedwe? Alolele FIDIYO, kaneko akambilane chiwusyo achi.
Ana ŵandu apanganyisye yindu yapi pakujigalila ya m’chilengedwe?
Nyumba jilijose jataŵidwe ni jwine jwakwe. Nambo ana ŵani ŵiŵapanganyisye yindu yosope yachilengedwe? Aŵalanje Ahebeli 3:4, kaneko akambilane yiwusyo ayi:
Ana akusasangalala ni yindu yapi ya m’chilengedwe?
Ana yili yakupikanika kukulupilila kuti yindu yosope yatesile kupanganyidwa?
Ana akumanyilila?
Mpaka apate ngani soni mafidiyo gakwamba nganiji pa jw.org pa mtwe wakuti “Ana Apali Juŵayipanganyisye?” soni wakuti “Muwatandile Umi.”
“Nyumba jilijose jikusataŵidwa ni mundu jwamtijwamti, nambo ŵaŵapanganyisye yosope ni Mlungu”
5. Yajikusasala Baibulo pakwamba ya chilengedwe yili yisyene
Pa Genesesi chaputala 1, Baibulo jikusasala kuti Mlungu ŵapanganyisye chilambo chapasi soni yaumi yosope. Ana wawojo mpaka akulupilile yeleyi kapena jigambile kuŵa adisi? Alolele Fidiyo, kaneko akambilane yiwusyo ayi.
Ana Baibulo jikusajiganya kuti chilambo soni yaumi ŵayipanganyisye m’masiku 6 gasyesyene?
Ana yajikusasala Baibulo pakwamba ya chilengedwe yili yisyesyene? Ligongo chichi akwanga myoyo?
Aŵalanje Genesesi 1:1, kaneko akambilane chiwusyo achi:
Ŵasayansi akusasala kuti chilambochi soni kwinani yatesile kupanganyidwa. Ana yakusasalayi yikamulana chamtuli ni yajikusala Baibuloyi?
Ŵane akusaganisya kuti yaumi yatesile kuchenga kutyochela ku chindu chine chiŵapanganyisye Mlungu. Aŵalanje Genesesi 1:21, 25, 27, kaneko akambilane yiwusyo ayi:
Ana Baibulo jikusati Mlungu ŵapanganyisye chindu chimo kaneko ni kuchengaga kuŵa somba, yinyama soni ŵandu? Kapena jwapanganyisye “mitundu mitundu” ja yindu yaumi?
6. Mlungu ŵapanganyisye ŵandu mwakulekangana ni yinyama
Ŵanduwe tuli ŵakulekangana ni yinyama. Aŵalanje Genesesi 1:26, kaneko akambilane chiwusyo achi:
Pakuŵa Mlungu ŵatupanganyisye m’chiwanichisyo chakwe, ana patukulosya chinonyelo soni chanasa yikusatujiganya chichi pakwamba ya Yehofa?
YAKUSAŴECHETA ŴANDU ŴANE: “Yajikusasala Baibulo pakwamba ya chilengedwe yili yaunami.”
Wawojo akuganisya wuli? Ligongo chichi akuti myoyo?
YALIJIGANYISYE
Yehofa jwapanganyisye kwinani soni chilambo ni yaumi yosope.
Yiwusyo Yakuwilisya
Ana Baibulo jikusajiganya kuti kwinani soni chilambo yatyochele kwapi?
Ana yaumi yosope yatesile kuchenga kutyochela ku yindu yine kapena Mlungu ni juŵayipanganyisye?
Ana ŵandu ali ŵakulekangana chamtuli ni yinyama?
YAKULINGA YINESONI
Alole yindu ya m’chilengedwe yayikulosya kuti pana juŵayipanganyisye.
“Ana Yindu ya M’chilengedwe Yikusatujiganya Chichi?” (Ajimuche!, Sepetemba 2006)
Alole yakutenda nangolo pakumsalila mwanache yajikusasala Baibulo pakwamba yachilengedwe.
Alole naga yajikusasala Baibulo yikusakamulana ni yakuti yaumi yatesile kuchenga.
“Ana Mlungu Ŵachenjile Yaumi Yine Pakupanganya Yaumi Yine?” (Ngani ja pa intaneti)
Alole naga yapatile ŵasayansi yikulosya kuti yaumi yagambile kusimanikwa mwangosi kapena yatesile kupanganyidwa.
Yiwusyo Msano Yakusosekwa Kuliwusya Yakwamba Kuwatyocele Umi (kabuku)
a Lijiganyo 25 lichisala chakulinga cha Mlungu kwa ŵandu.