Kamuchisya pa Masengo ga Uchimwene Gakumangwawo Soni Gapachilambo Chosope

PAKWANILISYA yaŵalochesye Yesu pakwamba ya masiku gambesi, Mboni sya Yehofa silalichile ngani syambone mpaka “kumbesi kwa chilambo.” (Mase. 1:8; Mat. 24:14) Kuti yeleyi yikomboleche, jemanjaji akusamalila ndaŵi soni machili gawo pakutenda yindu yausimu. Ligongo lyakulupilila kuti Yehofa ni jwakusakamuchisya ŵamasengo ŵakwe, jemanjaji akusasosasosa Uchimwene wa Mlungu chandanda pa umi wawo. (Mat. 6:25-34; 1 Akoli. 3:5-9) Yakuyichisya yakwe yili yakuti Yehofa akusiŵanonyela soni kwajaliwa.

KAMUCHISYA PA MASENGO GA UCHIMWENE PACHILAMBO CHOSOPE

² Ligongo lyakuti ŵandu akusamanyilila matala gatukusalalichilila soni kuti tukusawandisya Mabaibulo soni mabuku gakusala ya m’Baibulo mwangalamula mtengo, ŵane akusasimonga kuti yeleyi yikusakomboleka chamtuli. Yili yisyene kuti pakusasosekwa mbiya kuti tupanganye Mabaibulo, soni mabuku gakusala ya m’Baibulo. Pakusasosekwasoni mbiya kuti tutaŵe soni kulinganya nyumba sya Beteli syakutama ŵakutumichila ŵakusapanganya mabuku, ŵakusalolela masengo gakulalichila, soni ŵakutumichila m’ma utumiki gane gakwawusya pasogolo ngani syambone. Konjechesya pelepa, ŵakulolela dela, amishonale, apayiniya ŵapajika, soni ŵane ŵakutumichila m’ma utumiki gandaŵi syosope akusapochela chikamuchisyo chakuchilu pakusaka kuti apitilisye kamula masengo gawo. Kusala yisyene, masiku agano masengo gakulalichila ngani syambone gakusasaka mbiya syapawinji, chinga kumangwawoko kapena pachilambo chosope. Nambo ana mbiyasi sikusapatikana chamtuli?

³ Ŵandu ŵajinji ŵakusayamichila masengo gasikutenda Mboni sya Yehofa gakwiganya Baibulo, akusapeleka mbiya mwakusangalala kuti sikamuchisye pamasengo gapachilambo chosopega. Nambope, chikamuchisyo chekulungwa pamasengoga chikusatyochela kwa achimisyene ŵa Mboni sya Yehofa. Ŵane mwa jemanjaji akusatumisya yakupeleka yawo ku ofesi ja nyambi ja Mboni sya Yehofa jakumangwawo, soni akusalosya mtima wakulipeleka mpela muŵatendele ŵakutumichila Mlungu ŵakala, ŵaŵapeleche mwakoloŵa magasa pakamuchisya masengo gakutaŵa malo gakulambilila Yehofa. (Eks. 35:20-29; 1 Mbi. 29:9) Ŵane akusalemba chikalata chakusala kuti pachachiwapo chipanje chawo chachipeleche ku ofesi ja nyambi. Yakupeleka yine yikusatyochela kwa ŵandu, m’mipingo, soni m’madela. Yakupeleka yosopeyi yikusakamuchisya kuti masengo gakulalichila gajawuleje pasogolo.

⁴ Mboni sya Yehofa sikusawuwona kuŵa upile wawo kupeleka mbiya soni yindu yine pakwawusya pasogolo masengo gakulalichila. Yesu ni ŵakulijiganya ŵakwe ŵakwete libokosi lya mbiya lyaŵalikamulichisyaga masengo kulipilila yakusosechela yine. (Yoh. 13:29) Baibulo jikusatusalilasoni ya achakongwe ŵaŵamtumichilaga Yesu yalumo ni ŵakulijiganya ŵakwe. (Maliko 15:40, 41; Luk. 8:3) Ndumetume Paulo ŵayamichilaga chikamuchisyo chakuchilu chiŵapochelaga kutyochela kwa ŵandu ŵaŵakwete chidwi chakwawusya pasogolo ngani syambone, soni ŵaŵasakaga kumkamuchisya pa utumiki wakwe. (Afi. 4:14-16; 1 Ates. 2:9) Nombe nasyo Mboni sya Yehofa sikusakuya chisyasyo cha ŵakutumichila ŵakala ŵaŵaliji ŵakulimbichila pakutumichila Mlungu soni ŵakoloŵa magasa. Yeleyi yikusakamuchisya kuti ŵandu ŵambone mitima kulikose kwali apochele “mwalulele mesi gakupeleka umi.”—Chiw. 22:17.

KAMUCHISYA PA YAKUSOSEKWA YA PA MPINGO

⁵ Yakupeleka yikusakamuchisyasoni kusumila yindu yakusosekwa ya pampingo. Ngapakusaŵa kulokotela mbiya mwakwendesya mbale, soni kwasalila ŵandu winji wa mbiya syakusosekwa kupeleka, kapena kwaŵendaga ŵandu mbiya. Pamalo gakusongana pakusaŵa mabokosi gayakupeleka kuti mundu jwalijose mpaka apeleche mpela “yiŵatite pa kuganisya mumtima mwakwe.”—2 Akoli. 9:7.

⁶ Chandanda, mbiya syasipelechedwesyo akusasikamulichisya masengo pakusamalila Nyumba ja Uchimwene. Achakulungwa wosope ŵa mumpingo mpaka asagule winji wa mbiya syachatumisye ku ofesi ja nyambi ja Mboni sya Yehofa kuti sikakamuchisye kwawusya pasogolo masengo ga pachilambo chosope. Nambo mpingo ukusosekwa kwitichisya kaje yeleyi. Ligongo lya yeleyi mipingo jejinji jikusapeleka mwakutamilichika yakupeleka yakamuchisya masengo ga pachilambo chosope. Naga ŵandu wosope mumpingomo ndaŵi ni katema akusakola chidwi pa yakusosekwa ya pampingopo, ngasipasosekwa kusalaga chimanyisyo chakwamba yakupeleka ndaŵi ni katema.

KUSAMALILA YAKUPELEKA

⁷ Pambesi pa msongano uliwose, abale ŵaŵili akusatyosa mbiya syasipelechedwe m’mabokosi ga yakupeleka ni kulemba winji wakwe. (2 Ayi. 12:9, 10; 2 Akoli. 8:20) Achakulungwa wosope ŵa mumpingo chachilinganya yakuti mbiyasi sisunjidwe chenene mpaka pandaŵi syachasitumisye ku ofesi ja nyambi kapena kusikamulichisya masengo pa yakusosekwa ya pampingo. Abale ŵakusasamalila yakupeleka ya pa mpingo akusalinganya yakuti mwesi uliwose awumanyisyeje mpingo ya mwasijendele mbiya. Pa miyesi jitatu jilijose, jwakulondesya masengo ga achakulungwa akusalinganya yakuti aŵalanjile mwasijendele mbiya.

MBIYA SYAKWENDECHESYA MSONGANO WA DELA

⁸ Mbiya syakamuchisya kwendesya msongano wa dela soni yakusosekwa yine ya mu dela sikusatyochela mu yakupeleka ya Mboni sya Yehofa sya mu delajo. Pamsongano uliwose wa dela pakusaŵa mabokosi ga yakupeleka kuti ŵandu apelecheje yakupeleka yakulisosela yakamuchisya delajo. Konjechesya pelepa, mipingo jikusapelekasoni mbiya ndaŵi sine pakamuchisya yakusosekwa yine ya mu delajo.

⁹ Myoyo, madela gakusosekwa kulipila yakusosechela ya mu delamo soni mbiya sine ku masengo ga pa chilambo chosope. Nambo naga delajo nganijikola mbiya syakwanila syakulipilila yindu yakusosekwa pamsonganopo, soni syakamulichisya masengo pamsongano wakuyichisya, mpela kupatila chile malo gakutendela msongano, jwakulolela dela mpaka ajiŵende mipingo kuti jikamuchisye. Achakulungwa wosope ŵa mumpingo mu mpingo uliwose mpaka akambilane nganiji ni kusagula winji wa mbiya syampaka mpingo wawo ukombole kupeleka kumsaku wa mbiya sya delajo. Achakulungwawo chachiŵenda mpingo kuti ujitichisye winji wa mbiya syasagwilesyo.

¹⁰ Naga mu delajo mwana yindu yine yayikusosechela mbiya achakulungwa ŵa mu delajo akusosekwa kusimana pa msongano wa dela kuti akambilane. Naga asagwile yakuti mbiya sine asikamulichisye masengo pa yindu yangakwayana ni msongano, achakulungwa ŵa mu delajo akusosekwa kwitichisya yeleyi. Akusosekwa kulemba chiŵalanjilo chisyesyene cha mbiya syasagwile kuti asikamulichisye masengo. Ndaŵi jilijose jakusaka kamulichisya masengo mbiya sya dela, achakulungwa ŵa mu delajo akusosekwa kwitichisya kaje

¹¹ Pakusalinganyidwa dongosolo ja kuŵalanjila mwasijendele mbiya sya dela panyuma pa msongano wa dela.

KAMUCHISYA ŴANDU ŴAKULAGA

¹² Chakulinga chine cha mbiya syaŵasungaga Yesu ni ŵakulijiganya ŵakwe chaliji kwakamuchisya ŵakulaga. (Maliko 14: 3-5; Yoh. 13:29) Pakuŵa Yesu ŵasasile kuti “ŵandu ŵakulaga timtameje nawo ndaŵi syosope,” myoyo kamuchisya ŵakulaga uli udindo wa Chiklistu wawatandite kalakala. (Maliko 14:7) Ana Mboni sya Yehofa sikusakamuchisya chamtuli ŵakulaga masiku agano?

¹³ Ndaŵi sine, Aklistu mumpingo mpaka asosekwe chikamuchisyo chakuchilu, ligongo lya uchekulu, kulwala, soni mwine ligongo lya yakusawusya yakuti ngaŵa mkumalana nayo jika. Ŵandu ŵamwiŵasa mwawo, achanasi ŵawo, soni ŵandu ŵane ŵayimanyi kuti mlongo mjawo akulaga mpaka asachilile kamuchisya. Yeleyi yikamulana ni maloŵe ga ndumetume Yohane juŵatite, “Naga mundu akukola yipanje, ni akum’wona mjakwe kuti ali jwakusoŵa, ni akumjumulila mtima pakumjima, ana chinonyelo cha Mlungu mpaka chiŵemo uli mu mtima mwakwemo? Jemanja ŵanache, chinonyelo chakwe chikagambaga kuŵa chapakamwa, nambo chiwonecheje pa yitendo yenu.” (1 Yoh. 3:17, 18; 2 Ates. 3:6-12) Kulambila kusyesyene kukusasaka kuti twakamuchisyeje ŵakulupilila achimjetu ŵakusosekwa chikamuchisyo chakuchilu.—Yak. 1:27; 2:14-17.

¹⁴ Mu chikalata chakwe chandanda chakwawula kwa Timoteo, ndumetume Paulo ŵasasile mwampaka twakamuchisye ŵakulaga. Komboleka kuŵalanga yaŵasasileyi pa 1 Timoteo 5:3-21. Mklistu jwalijose akwete udindo wakwasamalila ŵandu ŵamwiŵasa mwakwe. Aklistu ŵachekulupe, soni ŵakulwala akusosekwa kupochela chikamuchisyo kutyochela kwa ŵanache ŵawo, yisukulu yawo, soni ŵachibale ŵawo. Ndaŵi sine, boma soni yiwanja yine yikusakamuchisya ŵandu, akusakamuchisya ŵakulaga, myoyo ŵachibale kapena ŵandu ŵane mpaka ŵakamuchisye ŵakulaga kuti apateje chikamuchisyo kutyochela ku boma kapena ku yiwanjayi. Nambo ndaŵi sine mpaka patendekwe yine yampaka yisosekwe kuti mpingo wosope ukamuchisye abale ni alongo ŵane ŵaŵele ŵakulupichika kwandaŵi jelewu. Naga jemanjaji ŵangali ŵachibale ŵampaka ŵakamuchisye, soni ŵangapochela chikamuchisyo kutyochela ku boma kapena yiwanja yakamuchisya ŵandu, achakulungwa wosope ŵa mumpingo mpaka aganichisye yakuti jemanjaji apocheleje chikamuchisyo. Aklistu akusawuwona kuŵa upile kwagaŵila ŵakulaga yindu yakuchilu yakwete.

¹⁵ Abale ni alongo ŵajinji mpaka aŵe ŵakulaga ligongo lyakulagasidwa, ngondo, yifomelesi, kusewuchila kwa mesi, sala, kapena yakutendekwa yine yakusawusya yayiwandile m’masiku gakusawusyaga. (Mat. 24:7-9) Ndaŵi sine, mipingo ngaŵa mkomboleka kola yindu yakwakamuchisya achimjawo. Myoyo, Likuga Lyakulongolela likusaŵenda abale pachilambo chosope kuti akamuchisye. Mwakulandana ni yeleyi, Aklistu ŵa ku Asia Minor ŵakamuchisye achimjawo ŵa ku Yudeya pandaŵi ja sala. (1 Akoli. 16:1-4; 2 Akoli. 9:1-5) Patukuya chisyasyo chawo, tukusaŵa tuli mkulosya kuti tukusanonyela yisyesyene abale ŵetu, soni kuti tuli ŵakulijiganya ŵasyesyene ŵa Yesu Klistu.—Yoh. 13:35.

KUGAŴILA MABUKU

¹⁶ Mabaibulo soni mabuku gakusala ya m’Baibulo gakusakamuchisya mnope kuwandisya utenga wa Uchimwene. Ndaŵi syejinji achakulungwa wosope ŵa mumpingo akusasagula jwakutumichila jwakamuchisya jwakuti alolechesyeje kuti mumpingomo mwana mabuku. Abale ŵakusatenda masengoga akusosekwa kuŵa ŵakulipeleka mnope pamasengo gawo. Jemanjaji akusalolechesya kuti mumpingo muŵeje mabuku gakwanila kamulichisya masengo.

¹⁷ Mpela Aklistu ŵabatisidwe, tukusamanyilila kuti ndaŵi, lunda, machili, yatukusakombola kutenda, yipanje yetu, atamose umi wetu, yosopeyi yili mituka jatupele Mlungu kuti tumtumichileje najo. (Luk. 17:10; 1 Akoli. 4:7) Patukamulichisya masengo yipanje yetu mwakuŵajilwa, tukusalosya kuti tukusamnonyela mnope Yehofa. Chili chakulinga chetu kuti tumchimbichisyeje Yehofa ni yipanje yetu, ligongo tukusamanyilila kuti jwalakwe akusasangalala ni mtuka uliwose watupeleche ni mtima wetu wosope. (Mis. 3:9; Maliko 14:3-9; Luk. 21:1-4; Akolo. 3:23, 24) Yesu ŵatite, “mwapochele mwalulele, myoyo kapelecheni soni mwalulele.” (Mat. 10:8) Patukulipeleka ni mtima wosope, soni kamulichisya masengo yipanje yetu mu utumiki wa Yehofa, tuchiŵa ŵakusangalala mnope.—Mase. 20:35.