‘Mtendeje Yosope Kuti Mumchimbichisye Mlungu’

MPELA ŵakutumichila ŵatwalipeleche kwa Mlungu, tukwete udindo wakulosya uchimbichimbi kwa Yehofa mu yosope yatukusaŵecheta soni kutenda. Ndumetume Paulo ŵalembile lilamusi lyakutulongola lyakuti, “Kanga mkulya kapena mkumwa, kapena mkutenda chilichose, mtendeje yeleyo kuti mumchimbichisye Mlungu.” (1 Akoli. 10:31) Kuti tutende yeleyi, tukusosekwa kuya malamusi gakulungama ga Yehofa, gagakusalosya umundu wakwe wamlama. (Akolo. 3:10) Tukusosekwa kumsyasya Mlungu mpela ŵandu ŵaswela.—Aef. 5:1, 2.

² Pakusaka kwakumbusya Aklistu yeleyi, ndumetume Petulo ŵalembile kuti, “M’ŵeje ŵakumpikanila jwalakwejo, ngakuyaga yimwayikumbilaga pandaŵi jimwaliji ŵangamanyilila. Nambo m’ŵeje ŵaswela mtima mu yosope yimkusatenda mpela Mlungu jwenu juŵam’ŵilasile jemanja ali jwamswela. Paja yilembedwe m’malemba kuti, ‘M’ŵeje ŵaswela mtima pakuti une ndili jwamswela mtima.’” (1 Pet. 1:14-16) Mpela muyaŵelele kala ni Aisalaeli, Aklistu akusasosekwasoni kuŵa ŵaswela. Yeleyi yikugopolela kuti akusosekwa kuŵa ŵaswela mu yitendo, soni ŵakulilekasya ku yakutendekwa ya m’chilambochi. Pakutenda yeleyi akusaŵa ŵakuŵajilwa kutenda utumiki wapajika.—Eks. 20:5.

³ Tukusaŵa ŵaswela patukukuya malamusi ga Yehofa gakusagasala mwakupikanika chenene m’Malemba Geswela. (2 Tim. 3:16) Kupitila mu lijiganyo lya Baibulo, ŵatujiganyisye yakwamba Yehofa ni matala gakwe, soni yatukamuchisye kumŵandichila jwalakwe. Kulijiganyaku kwatulimbikasisye kuti tusosesoseje Uchimwene wa Mlungu chandanda, soni kuti tukuwoneje kutenda yakusasaka Yehofa kuŵa kwakusosekwa mnope pa umi wetu. (Mat. 6:33; Alo. 12:2) Kuti tutende yeleyi twakusosekwa kuwala umundu wasambano.—Aef. 4:22-24.

KUŴA ŴACHASA MWAUSIMU SONI MUNDAMO

⁴ Kuya malamusi gakulungama ga Yehofa kuli kwakusawusya ndaŵi sine. Mmagongo jwetu Satana, akusasaka kuti atusepusye mu usyesyene. Yakutendekwa yakusakala ya m’chilambochi soni yisyoŵe yetu yakulemwecheka, yikusatendekasya kuti yindu yitusawusyeje ndaŵi sine. Kuti tupitilisye kuŵa ŵakulipeleka tukusosekwa kuputa ngondo jausimu jakulimbana ni yosopeyi. Malemba gakusatusalila kuti tukasimongaga naga ŵane akutusisya kapena naga tukusimana ni yakulingwa. Tukusosekwa kulagasidwa ligongo lya chilungamo. (2 Tim. 3:12) Patukusimana ni yakulingwa, mpaka tuŵe ŵakusengwa ligongo tukusamanyilila kuti yakulingwayo yikusalosya kuti tukutenda chakulinga cha Mlungu.—1 Pet. 3:14-16; 4:12, 14-16.

⁵ Atamose kuti Yesu ŵaliji jwamlama, jwalakwe ŵalijiganyisye kupikanila kupitila mu yindu yakusawusya yaŵasimene nayo. Jwalakwe nganalinga atamose kamo kose kupikanila yakusaka ya Satana, kapena kola mtima wakusaka kupikanika wa m’chilambochi. (Mat. 4:1-11; Yoh. 6:15) Yesu paŵasimanaga ni yakulingwa nganaganichisya yakuwujila munyuma atapanandi. Jwalakwe ŵapitilisye kuŵa jwakulupichika ku ndamo syakulungama sya Yehofa, atamose kuti kutenda yeleyi kwatendekasisye kuti aŵe pa uŵengani ni chilambo. Jili jisigele ndaŵi japanandi kuti awe, Yesu ŵakalamwise ŵakulijiganya ŵakwe kuti nombenawo chilambo tichichaŵenga. Kutandila ndaŵi jelejo, ŵakumkuya ŵakwe asimene ni yipwetesi yejinji, nambo aŵele ali mkulimba mtima ligongo lyakumanyilila kuti Mwanache jwa Mlungu ŵachipundile chilambochi.—Yoh. 15:19; 16:33; 17:16.

⁶ Kuti tukaŵa ku mbali ja chilambochi, tukusosekwa kuya malamusi gakulungama ga Yehofa mpela muŵatendele Yesu. Konjechesya pa kuŵambala kwinjilila mu ndale soni mu yakutendekwa yine ya m’chilambo, tukusosekwasoni kana ndamo syakwe syakusakala. Tukusagawona maloŵe ga pa Yakobo 1:21 kuŵa gakusosekwa mnope. Lilembali likusati, “Myoyo, mleche yisyowelo yiliyose yakunyalaya, soni ndamo silisyose syachabe. Mpochele mwakulinondiya maloŵe ga Mlungu gagapandidwe mwa jemanja, gampaka gapakombole kumkulupusya.” Kulijiganya Baibulo soni kusimanikwa pamisongano, mpaka kutendekasye kuti ‘maloŵe ga Mlungu gapandidwe’ munganisyo ni mumtima mwetu, soni ngasitutanda kumbila yindu yachikusapeleka chilambochi. Jwakulijiganya Yakobo ŵalembile kuti, “Ana ngamkumanyilila kuti naga mkutenda uganja ni chilambo chapasi uli uŵengani ni Mlungu? Myoyo mundu jwalijose jwakusaka kuŵa pauganja ni chilambo chapasi akusalitenda jika kuŵa m’magongo jwa Mlungu.”(Maloŵega tugombelechesye m’weji). (Yak. 4:4) Pa ligongoli, Baibulo jikusatukalamusya mwamachili kuti tukuyeje ndamo syakulungama sya Yehofa, soni kuti tuŵe ŵakulekangana ni chilambochi.

⁷ Maloŵe ga Mlungu gakusatukalamusya kuti tukatendaga nawo ndamo syakutesya sooni, soni syakusakala. Maloŵega gakusatusalila kuti, “Pakuŵa kuti mli ŵandu ŵa Mlungu, ni mkasimtenda chikululu kapena yakunyalaya kapena mitulo soni yikasiyikolanjidwa kose yosopeyi pasikati penu.” (Aef. 5:3) Myoyo tukusosekwa kuŵambasya nganisyo syetu pa yindu yakusakala ni yakutesya sooni, soni ngatukusosekwa kukunda kuti tuŵecheteje ya yeleyi. Kutenda yeleyi kuchilosya kuti tukusaka kukuya malamusi geswela soni gakulungama ga Yehofa pa ngani jakola ndamo syambone.

KUŴA ŴACHASA MWAKUCHILU

⁸ Konjechesya pa kuŵa ŵachasa mwausimu soni mundamo, Aklistu akusamanyililasoni kusosekwa kwa kuŵa ŵachasa mwakuchilu. Mu ndaŵi ja Aisalaeli, Mlungu jwali jwamswela ŵasakaga kuti m’masakasa ga Aisalaeliwo muŵeje mwachasa. M’wejisoni tukusosekwa kuŵa ŵachasa pakusaka kuti Yehofa ‘akasatulola tuli mkutenda kandu kalikose kakusakala.’—Det. 23:14.

⁹ Baibulo jikusalosya kuti kuŵa ŵaswela soni kuŵa ŵachasa mwakuchilu kuli kwakamulana. Mwachisyasyo, Paulo ŵalembile kuti, “Achalongo achimjangu,  . . . kwende tutyosye yindu yosope yakusakasya chilu chetu kapena mtima wetu. Nipo pakogopa Mlungu tuliswejesye kuŵa ŵaswela mtima.” (2 Akoli. 7:1) Myoyo, Aklistu akusosekwa kusamalila yilu yawo mwakoga soni kuchapa yakuwala yawo ndaŵi syosope. Atamose kuti yindu yikusalekangana m’chilambo chine ni chijakwe, nambo mpaka tukombolejepe kupata sopo ni mesi yakusamalilila yilu yetu soni ŵanache ŵetu.

¹⁰ Tukusamanyika mnope kumalo kwatukusatama ligongo lya masengo getu gakulalichila. Kusamalila panyumba petu mkati ni kusa kwakwe, pajika kukusatendela umboni kwa ŵandu ŵatuŵandikene nawo. Liŵasa lyosope mpaka lijigale mbali pakusamalila panyumba pawo. Abale akusosekwa kulolechesya kuti malo gakusyungulila nyumba jawo gakuwoneka gachasa, pakumanyilila kuti ŵandu akusaŵecheta yambone ya m’weji naga tukusamalila malo getu. Kutenda yeleyi, soni kulongolela maŵasa gawo pa yindu yausimu kukusalosya kuti mitwe ja maŵasa jikusalongolela chenene maŵasa gawo. (1 Tim. 3:4, 12) Nombenawo alongo akwete udindo wakusamalila yindu, mnopemnope ya m’nyumba. (Tito 2:4, 5) Ŵanache ŵajiganyidwe chenene masengo akusalingalinga kulisamalila soni kusamalila yipinda yawo. Myoyo liŵasa lyalikusakamula masengo mwakamulana pakutenda yindu mwachasa likusaŵa kuti likutenda mwakamulana ni mwayichiŵela m’chilambo chasambano pasi pa Uchimwene wa Mlungu.

¹¹ Masiku agano, ŵandu ŵa Yehofa ŵajinji akusajenda panjinga kapena pagalimoto pakwawula ku misongano. M’madela gane, abale ni alongo akusasosekwa kamulichisya masengo njinga kapena galimoto pakwawula mu utumiki. Yinduyi yikusosekwa yiwonecheje yachasa soni akusosekwa kuyilinganya payijonasiche. Malo getu gakutama soni yindu yatukusajendela yilosyeje kuti tuli ŵandu ŵa Yehofa, ŵachasa soni ŵaswela. Yeleyi yikwayasoni chikwama chetu cha mu utumiki soni Baibulo.

¹² Kawale soni kalisalalisye ketu kakusosekwa kaŵeje kakamulana ni malamusi gakutulongola ga Mlungu. Nganituŵa tuganichisye ya kuja kusimana ni mundu jwapenani mnope tuli tuwete yakuwala yangaŵajilwa. Nambi kuliwuli patukumjimila Yehofa mu utumiki kapena pa pulatifomu! Ŵandu mpaka akuwoneje kulambila Yehofa mwakuŵajilwa kapena iyayi ligongo lya kawale soni kalisalalisye ketu. Myoyo, mpaka yiŵe yangaŵajilwa kuwala kapena kulisalalisya mwangaganichisya ŵane. (Mika 6:8; 1 Akoli. 10:31-33; 1 Tim. 2:9, 10) Patukosechela kwawula mu utumiki kapena ku misongano jampingo, ja dela, kapena ja chigawo, tukusosekwa tuganichisyeje yagakusasala Malemba pangani ja kuŵa ŵachasa mwakuchilu soni kalisalalisye ketu. Ndaŵi syosope tukusosekwa kumchimbichisya soni kumlumba Yehofa.

¹³ Tukusosekwa ganichisyasoni yeleyi patukwawula kukulola likulu, kapena ofesi ja nyambi ja Mboni sya Yehofa. Akumbuchileje kuti lina lyakuti Beteli likusagopolela “Nyumba ja Mlungu.” Myoyo tukusosekwa kuwala soni kutenda yindu mpela mwatukusatendela patukwawula ku Nyumba ja Uchimwene.

¹⁴ Atamose pandaŵi jakunguluka, tukusosekwa kulolechesya kuti tuwete soni tulisalalisye mwakuŵajilwa. Tuliwusyeje kuti, ‘Ana mpaka ndende sooni kulalichila mwaupile ligongo lya kawale kangu?’

KUTENDA YAKUSANGALASYA YAKUŴAJILWA

¹⁵ Kupumula soni kutenda yakusangalasya kukusakamuchisya kuti tutamilichicheje mu nganisyo soni kuti tukole chilu chambone. Ndaŵi jine Yesu ŵasalile ŵakulijiganya ŵakwe kuti ajawule kumalo kwajika kuti ‘akapumule panandi.’ (Maliko 6:31) Kupumula soni kutenda yakusangalasya yakuŵajilwa kukusatukamuchisya kuti tuŵeje ŵakusangalala. Mpaka yitukamuchisye kola machili kuti tupitilisye kamula chenene masengo getu.

¹⁶ Pakuŵa masiku agano kwana yakusangalasya yejinji, Aklistu akusosekwa kusagula mwakusamala yakusangalasyayo soni kutenda yindu mwakulongoleledwa ni lunda lwa Mlungu. Atamose kuti tukusasosekwa kutenda yakusangalasya, nambo tukayiwonaga kuŵa yakusosekwa mnope pa umi wetu. Baibulo jikusatukalamusya kuti “masiku gambesi,” ŵandu chachiŵa “ŵakunonyela yakusangalasya m’malo mwakumnonyela Mlungu.” (2 Tim. 3:1, 4) Yakusangalasya yejinji yikusaŵa yakusakala kwa ŵandu ŵakusasaka kukuya malamusi gakulungama ga Yehofa.

¹⁷ Aklistu ŵandanda ŵasosekwaga kana yakutendekwa yangaŵajilwa ya ŵandu ŵakunonyela yakusangalasya ŵaŵasyungulile. Pa maseŵela ga Chiloma, ŵandu ŵasangalalaga pakwawona achimjawo ali mkulagasidwa. Patendekwagasoni yakuwulasyana soni yamsese kuti yasangalasyeje ŵandu, nambo Aklistu ŵandandawo ŵayiŵambalaga yeleyi. Masiku aganosoni yakusangalasya yejinji yikusalosya yindu yakulandanayo pakusaka kwasangalasya ŵandu. Tukusosekwa ‘kusamalila’ utame wetu, mwakuŵambala yakusangalasya yangaŵajilwa. (Aef. 5:15, 16; Sal. 11:5) Atamose kuti yakusangalasya yine komboleka kuŵa yakuŵajilwa, nambo yayikusatendekwa pa yakusangalasyayo mpaka yiŵe yangaŵajilwa.—1 Pet. 4:1-4.

¹⁸ Pana yakusangalasya yine yakuŵajilwa yele Aklistu mpaka asangalale nayo. Kuya yagakusasala Malemba soni yine yayikusasimanikwa m’mabuku getu, kwakamuchisye ŵandu ŵajinji.

¹⁹ Ndaŵi sine, komboleka kuŵilanga maŵasa gane ga Chiklistu kunyumba kwawo kuti akakunguluche. Kombolekasoni kwaŵilanjila abale ni alongo ku pwando ja ulombela kapena ku chakutendekwa chine chakusangalasya. (Yoh. 2:2) Mundu jwaŵilasile ŵanduwo akwete udindo wakulolechesya yosope yachiyitendekweje. Kusala yisyene, pakusasosekwa kusamala mnope naga pa yakusangalasyayo pana ŵandu ŵajinji. Kutenda yindu mwakulilechelela kwatendekasisye ŵane kutenda yindu yangakamulana ni ndamo sya Chiklistu, mpela kulya ni kumwa mnope, soni kutenda yakulemwecheka yekulungwa. Paganichisya yeleyi, Aklistu ŵalunda akusasagula kutenda yakusangalasya yakola ŵandu ŵamnono soni kwandaŵi japanandi. Naga pa yakusangalasyayo pachiŵa ukana, akusosekwa kulolechesya kuti ŵandu chamwe mwangapundanganya malile. (Afil. 4:5) Naga akulingalinga kutenda yampaka akombole kuti yakusangalasya yakusatenda yiŵeje yakuŵajilwa soni yakulimbikasya mwausimu, ngasaganichisyaga mnope ya yakulya soni yakumwa.

²⁰ Kwapochela achalendo kuli kwambone. (1 Pet. 4:9) Tukusosekwa kwaganichisya ŵandu ŵakulaga, patukwaŵilanjila Aklistu achimjetu ku nyumba kwetu kuti tukalye pampepe, kusangalala soni kunguluka. (Luk. 14:12-14) Naga atuŵilasile ku yakutendekwayi, tukusosekwa kutenda yindu mwakamulana ni yayili pa Maliko 12:31. Ndaŵi syosope yikusaŵa yambone kuyamichila yindu yambone yatutendele achimjetu.

²¹ Aklistu akusasangalala ni yindu yambone yejinji yakutyochela kwa Mlungu, soni akusamanyilila kuti mpaka ‘alye, amwe, ni kusangalala pa masengo gosope gakusatenda.’ (Jwak. 3:12, 13) ‘Patukutenda yosope kuti tumchimbichisye Mlungu,’ ŵandu ŵakusaŵilanga soni ŵakusaŵilanjidwa ku yakutendekwa yakusangalasya, mpaka akumbuchileje yakutendekwayo ni kusangalalaga ligongo lyakulimbikasidwa mwausimu.

YAKUTENDEKWA YA KUSUKULU

²² Ŵanache ŵa Mboni sya Yehofa akusapata umbone ligongo lyakulijiganya sukulu. Pali ku sukulu, jemanjaji akusalijiganya kuŵalanga soni kulemba. Majiganyo gane gakusalijiganya, mpaka gakamuchisye ŵanacheŵa pakulingalinga kwanilisya yakulinga yausimu. Pa ndaŵi jakulijiganya sukulu, akusosekwa kulingalinga kuti ‘amkumbuchileje Mlungu juŵapanganyisye’ mwakuŵika yindu yausimu pa malo gandanda.—Jwak. 12:1.

²³ Naga wawojo ali Mklistu jwachinyamata jwali pasukulu, akusosekwa kusamala kuti akasyoŵekanaga mwangaŵajilwa ni ŵachinyamata ŵane ŵakusanonyela yakuchilambo. (2 Tim. 3:1, 2) Pakuŵa Yehofa atupele yindu yejinji yakutuchenjela, mpaka atende yindu yejinji kuti aŵambale yakutendekwa ya m’chilambochi. (Sal. 23:4; 91:1,  2) Myoyo, akamulichisyeje masengo yindu yosope yapeleche Yehofa kuti alichenjele.—Sal. 23:5.

²⁴ Kuti aŵe ŵakulekangana ni chilambo pali kusukulu, ŵachinyamata ŵajinji ŵa Mboni akusasagula kuti akatendaga nawo yindu yine yakutendekwa kusukulu yangakwayana ni majiganyo. Achimjawo ŵa m’kalasi soni ŵakwiganya mpaka yasawusye kupikanichisya ligongo lyakwe ngakusatenda nawo yindu yine. Nambope, kumsangalasya Mlungu chili chindu chakusosekwa mnope. Yeleyi yigopolela kuti akusosekwa kamulichisya masengo chikumbumtima chechijiganye Baibulo kuti akasatendaga nawo mipikisano ja kuchilambo kapena yakutendekwa yakuchinonyela chilambo chawo. (Aga. 5:19, 26) Ŵachinyamatamwe, naga mkupikanila chamuko cha m’Malemba cha achinangolo ŵenu ŵakogopa Mlungu, soni kunguluka ni ŵandu ŵambone ŵa mumpingo, yichimkamuchisya kuti mkuyeje ndamo syakulungama sya Yehofa.

MASENGO SONI ŴAKUNGULUKA NAWO

²⁵ Mwakamulana ni Malemba, mitwe ja maŵasa ni jajikwete udindo wakupatila yakusosechela ya maŵasa gawo. (1 Tim. 5:8) Atamose kuti yili myoyo, ŵakutumichila ŵa Mlungu akusamanyilila kuti masengo nganigaŵa gakusosekwa mnope kupunda yindu ya Uchimwene. (Mat. 6:33; Alo. 11:13) Ligongo lyakuŵa ŵakulipeleka kwa Mlungu, soni kwikutila ni yakulya soni yakuwala yakusapataga, akusaŵambala kulaga ni nganisyo soni yitega ya paumi yakunonyela yipanje.—1 Tim. 6:6-10.

²⁶ Aklistu wosope ŵaŵalipeleche kwa Mlungu ŵali pamasengo, ndaŵi syosope akusosekwa kumbuchilaga malamusi gakutulongola ga m’Malemba. Kuti tupateje yakusosechela yetu mwakuŵajilwa, tukusosekwa tukaneje kutenda nawo yindu yakasa malamusi ga Mlungu kapena ga boma. (Alo. 13:1, 2; 1 Akoli. 6:9, 10) Tukusosekwa tukumbuchileje kogoya kwa kunguluka ni ŵandu ŵakusakala. Pakuŵa tuli asilikali ŵa Klistu, tukusaŵambala kutenda malonda galigose gakasa malamusi ga Mlungu, soni gampaka gatutendekasye kwinjilila mu yakutendekwa yandale, kapena gampaka gajonanje usimu wetu. (Yes. 2:4; 2 Tim. 2:4) Tukusaŵambalasoni kutenda mkamulano ni “Babiloni jwakupikanika,” gopolela dini syosope syele Mlungu akusasiŵenga.—Chiw. 18:2,  4; 2 Akoli. 6:14-17.

²⁷ Naga tukuya malamusi gakulungama ga Mlungu, tuchiŵambala kuwuwona mkamulano wetu wa Chiklistu kuŵa mpela litala lyakupatila yakusaka yetu kapena lyakwawuchisya pasogolo bisinesi jetu. Patuli ku misongano jampingo, ja dela, soni ja chigawo, chakulinga chetu chekulungwa chili kulambila Yehofa. Tukusapochela chakulya chausimu pa tebulo jakwe soni kusangalala ni ‘kulimbikasyana jwine ni mjakwe.’ (Alo. 1:11, 12; Ahe. 10:24, 25) Kunguluka kweleku kukusosekwa kuŵeje kwausimu basi.

MKAMULANO WACHIKLISTU

²⁸ Ndamo syakulungama sya Yehofa sikusasakasoni kuti ŵandu ŵakwe ‘aŵeje ŵakulinjilila kusunga umpepe wa msimu pa kamulana mu mtendele.’ (Aef. 4:1-3) Mmalo mwakutenda yindu yakulinonyelesya msyene, mundu jwalijose akusalingalinga kwatendela ŵane yambone. (1 Ates. 5:15) Mwangakayichila msimu welewu awuweni pakusongana ni mpingo wawo. Mwangasamala kandu ya kulekangana mtundu, chilambo, umi, kapate, kapena majinganyo gatukwete, wosopewe tukusalongoleledwa ni ndamo syakulungama syakulandana. Atamose ŵandu ŵakusa akusasiwona ndamo sya ŵandu ŵa Yehofasi.—1 Pet. 2:12.

²⁹ Pagombelechesya ya mkamulano welewu, ndumetume Paulo ŵalembile kuti, ‘chipali chilu chimo, msimu weswela umope, nipo soni chipali chembecheyo chimo chiŵam’ŵilanjile Mlungu. Apali Ambuje ŵamo, chikulupi chimo, ubatiso umo, apali Mlungu jumo jwele jwali Atati jwa ŵandu wosope. Jwalakwe ali penani pa wosope, akusakamula masengo kupitila mwa wosope nipo ali mwa wosope.’ (Aef. 4:4-6) Mkamulanowu ukusakomboleka ligongo lyakupikanichisya yijiganyo yandanda ya Baibulo soni yijiganyo yakusokoka patukumanyilila ulamusi wekulungwa wa Yehofa. Kusala yisyene, Yehofa ŵapitikwisye ŵandu mwakwapa chiŵecheto cheswela cha usyesyene pakwakamuchisya kuti atumichileje mwakamulana.—Sef. 3:9.

³⁰ Mkamulano soni mtendele wawukusasimanikwa mumpingo wa Chiklistu ukusatendekasya kuti wosope ŵakusalambila Yehofa asangalaleje. Tukuweni kwanilichikwa kwa chilanga cha Yehofa chakuti, “tinjimsonganya pamo mpela mkuchinga mwakusasonganyichisya pamo ngondolo.” (Mika 2:12) Tukusosekwa kuwuchenjela mkamulanowu pakuya malamusi gakulungama ga Yehofa.

³¹ Wosope ŵakundidwe kuŵa mumpingo weswela wa Yehofa, akusaŵa ŵakusangalala. Kolanjidwa ni lina lya Yehofa kuli kwakusosekwa mnope kupunda chilichose. Patukuwuchenjela unasi wetu ni Yehofa, tupitilisye kuya malamusi gakwe gakulungama soni kwasalilaga ŵane ya malamusigo.—2 Akoli. 3:18.