Kulinganya Malo Gakulambilila

ŴAKULAMBILA ŵasyesyene ŵa Yehofa alamulidwe kuti asonganeje pampepe kuti alijiganyeje malamusi soni kulimbikasyana jwine ni mjakwe. (Ahe. 10:23-25) Malo gandanda gaŵalambililaga ŵandu ŵakusagulidwa ni Mlungu, Aisalaeli, gakolanjikwaga kuti “chitenti chakusimanilana.” (Eks. 39:32, 40) Pakusaka kumlumba Mlungu, Solomoni mwanache jwa Daudi, ŵataŵile nyumba ja Mlungu. (1 Ayi. 9:3) Nyumbaji ali ajijonasile m’chaka cha 607 B.C.E., Ayuda ŵalinganyisye yakuti asimaneje m’nyumba syakupopelela syamwanamwana pakusaka kumlambila Mlungu. Jili jipite ndaŵi, nyumba ja Mlungu jila ŵajitaŵilesoni ni jaŵele likulu lya kulambila kusyesyene. Yesu ŵajiganyaga ku nyumba syakupopelela syamwanamwana soni ku nyumba ja Mlungu. (Luk. 4:16; Yoh. 18:20) Yesu ŵatendesyesoni msongano petumbi.—Mat. 5:1–7:29.

² Yesu ali ajimwiche kwa ŵawe, Aklistu ŵasonganaga mmalo gakuti mundu jwalijose komboleka kusimanikwapo, soni m’nyumba sya abale. Ŵatendaga yeleyi kuti akajiganyeje Malemba soni kusongana ni ŵakulupilila achimjawo. (Mase. 19:8, 9; Alo. 16:3, 5; Akolo. 4:15; Fil. 2) Ndaŵi sine yaliji yakuŵajilwa kuti Aklistu ŵandanda asimaneje mmalo gapakasyepela pakusaka kuti ŵandu ŵakwalagasya akapata. Kusala yisyene, ŵakutumichila ŵakulupichika ŵa Mlungu ŵakala ŵasachililaga kusongana mmalo gakulambilila pakusaka ‘kwiganyidwa ni Mlungu.’—Yes. 54:13.

³ Lelo jinosoni misongano ja Chiklistu jikusatendechela mmalo gakuti mundu jwalijose mpaka asimanikwepo, soni m’nyumba sya abale. Ndaŵi syejinji msongano wakosechela utumiki wa mumgunda ukusatendechela m’nyumba sya abale. Abale ŵakusapeleka malo gakutendela misonganoji msimangwawo akusawuwona welewu kuŵa upile wawo. Ŵajinji ŵapeleche malo gakutendela misonganoji ayiweni kuti kutenda yeleyi kwakamuchisye mwausimu.

NYUMBA JA UCHIMWENE

⁴ Nyumba ja Uchimwene gali malo gakusosekwa mnope ga Mboni sya Yehofa gakutendela misongano. Ndaŵi syejinji, akusasuma malo ni kutaŵapo Nyumba ja Uchimwene kapena akusasuma nyumba ni kujilinganya. Naga yili yakomboleka, mipingo jine jikusakamulichisya masengo Nyumba ja Uchimwene jimo pakusaka kuti pakajonanjikwaga mbiya syejinji, soni kuti Nyumba ja Uchimwenejo jikamuleje masengo mwakwanila. Mmadela gane, pakusasosekwa kutenda lendi nyumba jakuti atendelejemo misongano. Pamasile kutaŵa Nyumba ja Uchimwene jasambano kapena pamasile kukamula masengo gekulungwa gakulinganya yejonasiche pa Nyumba ja Uchimwene, yikusaŵa yakusosekwa kuti paŵechetedwe ngani jakupelechela nyumbajo kwa Yehofa. Nambo yeleyi ngaŵa mkutendekwa naga yindu yakusosekwa kulinganya pa Nyumba ja Uchimwene yili yamwanamwana.

⁵ Nyumba ja Uchimwene ngajikusosekwa kutaŵidwa mwakwasimonjesya ŵandu. Atamose kuti utaŵe mpaka uŵe wakulekangana m’madela gakulekanganalekangana, nambo chakulinga chakwe chili chimpepe. (Mase. 17:24) Mwakamulana ni kumaloko, Nyumba ja Uchimwene jikusosekwa kuŵa malo gambone kutendela misongano ja Chiklistu, soni jiŵe pamalo gakuti jwalijose mpaka ayichejepo mwangasawusya.

⁶ Mpingo uliwose wa Mboni sya Yehofa ukusakamuchisya kulinganya Nyumba ja Uchimwene jakumangwawo kuti jikamuleje masengo chenene. Ngapakusaŵa kulokotela kapena kuŵenda mbiya. Pakusaŵa libokosi lya yakupeleka, kuti ŵandu ŵasongenewo mwakusaka kwawo apelecheje mbiya syakamuchisya pakusamalila malogo. Jemanjaji akusapeleka mwakusachilila soni kutyochela mumtima.—2 Akoli. 9:7.

⁷ Wosope mumpingo akusawuwona kuŵa upile pakupeleka yakupeleka yakamuchisya kusamalila Nyumba ja Uchimwene, soni pakukamula masengo gakulipeleka gakuswejesya ni kulinganya mwejonasiche. Jwamkulungwa jwa mumpingo kapena jwakutumichila jwakamuchisya akusapegwa masengo gakuti alinganyeje ndandanda ja kusamalila panyumbajo. Ndaŵi syejinji masengo gakusamalila Nyumba ja Uchimwene gakusatendekwa ni kagulu ka utumiki. Jwakulolela kagulu kapena jwakamuchisya jwakwe ni jwakusalongolela masengoga. Nyumba ja Uchimwene jikusosekwa jiwonecheje chenene kusa ni mkati mwakwe kuti jichimbichisyeje Mlungu ni gulu jakwe.

⁸ Naga Nyumba ja Uchimwenejo jikusakamulichisidwa masengo ni mpingo wakupunda umo, achakulungwa ŵa m’mipingojo akusasagula Komiti Jakulolela pa Nyumba ja Uchimwene jajikusalolela masengo gakusamalila pa Nyumba ja Uchimwene soni yindu yakamuchilisya masengo pa nyumbajo. Magulu ga achakulungwa gakusasagula m’bale jwakusatumichila mpela jwakulondesya masengo ga komitijo. Komitiji jikusakamula masengo gakwe mwakulongoledwa ni magulu ga achakulungwa ga m’mipingojo. Jikusalolechesya kuti Nyumba ja Uchimwenejo jili jachasa, jikulinganyidwa, soni kuti pana yindu yakwanila yakamulichisya masengo pakusamalila nyumbajo. Kuti yeleyi yikomboleche pakusasosekwa kuti paŵeje mkamulano wambone pasikati pa mipingojo.

⁹ Naga mipingo jikusakamulichisya masengo Nyumba ja Uchimwene jimo, mipingoji jikusosekwa jichenganeje ndaŵi jajikusatendela misongano jawo. Achakulungwa ŵa m’mipingoji chachitenda yeleyi paganichisyana mwachinonyelo. (Afi. 2:2-4; 1 Pet. 3:8) Pangali mpingo wawukusosekwa kusagulaga jika yakutenda mmalo mwa mipingo jinejo. Naga jwakulolela dela akwendela mpingo umo mwa mipingo jajikusakamulichisya masengo Nyumba ja Uchimwene jimo, mipingo jinejo jichisosekwa kuchenga ndaŵi ja misongano jawo mwakamulana ni mwayiŵelele yindu mu wikijo.

¹⁰ Nyumba ja Uchimwene kombolekasoni kujikamulichisya masengo kuŵechetelamo ngani sya ulombela soni sya malilo naga Komiti ja Utumiki ja Mpingo jijitichisye. Mundu paŵendile kamulichisya masengo Nyumba ja Uchimwene pa yakutendekwayi, achakulungwa akusajiganichisya nganijo mwakusamala ni kusagula yakutenda mwakamulana ni malamusi gakutyochela ku ofesi ja nyambi.

¹¹ Ŵandu ŵakusiŵakunda kamulichisya masengo Nyumba ja Uchimwene mu yakutendekwayi akusasosekwa kola ndamo syakuŵajilwa Aklistu ŵasyesyene. Ngapakusosekwa kutendekwa yindu yampaka yikuŵasye mpingo kapena kusakasya lina lya Yehofa soni mbili jambone ja mpingo. (Afi. 2:14, 15) Ofesi ja nyambi mpaka jilinganye yakuti Nyumba ja Uchimwene ajikamulichisye masengo pa yakutendekwa yine yausimu, mpela kutendalamo Sukulu ja Utumiki wa Uchimwene soni Sukulu ja Apayiniya.

¹² Ndaŵi syosope mpingo ukusosekwa kuchimbichisyaga malo gakwe gakulambilila. Kawale soni kalisalalisye ketu kakusosekwa kalosyeje uchimbichimbi wawukusakamulana ni kalambile ketu Yehofa. (Jwak. 5:1; 1 Tim. 2:9, 10) Patukukuya yeleyi tukusalosya kuti tukusayamichilaga misongano jetu ja Chiklistu.

¹³ Yili yakusosekwa kuti pandaŵi jamisongano pakapagwaga yakusokonasya. Myoyo achinangolo akusasosekwa kutamaga yalumo ni ŵanache ŵawo. Achinangolo ŵakwete ŵanache ŵachinondipile mpaka atame pamalo gakuti ngasokonasya ŵandu ŵajinji pa ndaŵi jakusaka kopoka nawo ŵanachewo pasa kukwajamuka kapena kukwasamalila.

¹⁴ Abale ŵakuŵajilwa akusatumichila mpela ŵakupochela achalendo pamisongano ku Nyumba ja Uchimwene. Jemanjaji akusosekwa kuŵa ŵakulolechesya yayikutendekwa, ŵakunguluchika, soni ŵaganisya chenene. Masengo gawo gali kwakomasya achalendo soni kwakamuchisya kuti alipikaneje kuti apocheledwe, kwakamuchisya ŵakuchelewa kupata malo gakutama, kulemba yiŵalanjilo ya ŵakusongana, soni kulolechesya kuti m’Nyumba ja Uchimwenemo mukwinjila kambepo. Ndaŵi sine, ŵakupochela achalendo chachakumbusya achinangolo kuti ŵaloleleje chenene ŵanache ŵawo kuti akawutukagawutukaga misongano mkanijitande kapena pajimasile soni akang’andaga ku pulatifomu. Mwachinonyelo soni mwakalamuka, jwakupochela achalendo mpaka amsalile nangolo kuti akopoche ni mwanache jwakwe jwakusawusya kuti akasasokonasya mnope ŵakupikanilawo. Masengo ga ŵakupochela achalendo gakusakamuchisya kuti wosope asangalaleje ni misongano. Mpaka yiŵe chenene kuti achakulungwa ni ŵakutumichila ŵakamuchisya aŵeje ŵakupochela achalendo.

KUTAŴA NYUMBA JA UCHIMWENE

¹⁵ Mu yaka 100 yandanda, Aklistu ŵane ŵaliji ŵakusichila kulekangana ni ŵane. Myoyo ndumetume Paulo ŵalembile kuti, “Nambo ngusaka kuti yindu yejinji yimkwete yikamuchisye pa yakuyisoŵa jemanjajo, soni yejinji yakwete jemanjajo yikamuchisye pa yamkusoŵa jemanja, kuti paŵe kulandana.” (2 Akoli. 8:14, NWT) Masiku aganosoni pakusaŵa “kulandana” kweleku. Mbiya syasikusapelechedwa ni mipingo kusyungulila pachilambo chosope akusasisonganganya pampepe kuti sikamuchisye pa masengo gakutaŵa Nyumba sya Uchimwene soni kusilinganya naga sijonasiche. Gulu soni mipingo jajikusapochela chikamuchisyo, jikusayamichila mnope abale pachilambo chosope ligongo lyakupeleka chikamuchisyochi mwakoloŵa magasa.

¹⁶ Mwakamulana ni mwayiŵelele yindu ku delajo, ofesi ja nyambi jikusajisalila mipingo Nyumba ja Uchimwene jakusosekwa kuti asonganeje. Ofesi ja nyambi jikusawungunyasoni kwakukusosechela kutaŵa Nyumba sya Uchimwene soni kulinganya nyumba syasijonasiche mu dela ja nyambijo. Naga patendekwe ngosi syachilengedwe, akusalinganya yakuti Nyumba sya Uchimwene syasijonasiche silinganyidwe. Ndaŵi sine akusalinganyasoni nyumba sya abale.

¹⁷ Ofesi ja nyambi ni jajikusalolela masengo ga ŵandu ŵakusakamula mwakulipeleka mpela kusuma malo, kulinganya mapulani ga Nyumba sya Uchimwene, kulolechesya kuti pana yikalata yakutyochela ku boma yakwitichisya kutaŵa nyumbasyo, masengo gakutaŵa ni gakulinganya yejonasiche. Ligongo lyakuti m’yilambo yejinji mukusosekwa Nyumba sya Uchimwene syejinji, pakusosekwasoni ŵamasengo ŵakulipeleka ŵajinji. Ŵakulalichila ŵabatisidwe wosope ŵali ŵakuŵajilwa soni ŵakusachilila kukamuchisya nawo masengoga, akusosekwa kulemba fomu jakuwuchisya utumikiwu ni kujipeleka ku Komiti ja Utumiki ja Mpingo wa kumangwawoko.

MALO GA MISONGANO

¹⁸ Aklistu ŵa m’yaka 100 yandanda ŵasonganaga mtumagulu twamwana. Nambope, ndaŵi sine ŵasonganaga “ŵandu ŵajinji.” (Mase. 11:26) Mwakulandana ni jemanjaji, ŵandu ŵa Yehofa lelo jino akusachingangana m’misongano jekulungwa mpela, ja dela soni ja chigawo. Ndaŵi syejinji malo gakutendela misonganoji akusatendaga lendi, nambo naga pangali malo gakuŵajilwa, pakusasosekwa kutaŵa Malo ga Misongano.

¹⁹ Ndaŵi sine, akusasuma nyumba ni kujilinganya, kaneko ni kujikamulichisyaga masengo mpela Malo ga Misongano. Nambo kaŵilikaŵili, akusasumaga malo ni kutaŵapo kuti atendelejepo misongano. Malo ga Misongano gakusaŵa gakulekanganalekangana mwakamulana ni mwakuŵelele kumaloko. Ofesi ja nyambi ni jajikusasagula kuti jisume kapena kutaŵa malo gamisongano paganichisya mwakusamala winji wa mbiya syampaka sisosekwe, soni kuti malogo gachikamulaga masengo mnope mwamtuli.

²⁰ Ofesi ja nyambi jikusalinganya yakuti paŵe ŵandu ŵakulolela masengo gakusamalila soni kulinganya Malo ga Msonganogo. Akusalinganyasoni kuti mipingo ja mu delajo jiswejesyeje pamaloga mwakutamilichika, soni kulinganya yindu pakusaka kuŵambala ngosi. Yikusaŵa yakamuchisya kwa abale pakulipeleka kamula masengoga. Myoyo, yili yakusosekwa mnope kuti mipingo jikamuchisyeje masengoga ni mtima wosope.—Sal. 110:3; Mal. 1:10.

²¹ Ndaŵi sine, Malo ga Msongano mpaka agakamulichesyesoni masengo payakutendekwa yine yausimu, mpela sukulu syakwiganya Baibulo soni misongano japajika ja ŵakulolela dela. Mpela mwajiŵelele Nyumba ja Uchimwene, nombenago Malo ga Msongano gali malo gakulambilila Yehofa. Patusongangene pamaloga, ndamo jetu, kawale, soni kalisalalisye ketu, yikusosekwa yiŵe ya uchimbichimbi mpela mwatukusatendela patuli ku Nyumba ja Uchimwene.

²² M’masiku gambesiga, ŵandu ŵajinji ŵasambano akwinjila mwachitema m’gulu ja Mlungu. Yeleyi yikulosya kuti Yehofa akujijaliwa gulu jakwe. (Yes. 60:8, 10, 11, 22) Myoyo, tukusosekwa kukamuchisyaga nawo kutaŵa, soni kusamalila malo gakulambililaga kuti gaŵe gambone. Patukutenda yeleyi, tukusalosya kuti tukusayamichila kusosekwa kwa maloga, gagakusatukamuchisya kulimbisyana mitima jwine ni mjakwe mnopemnope pakulola kuti lisiku lya Ambuje likuŵandichila.