Ana Undumetume wa Umishonale Uli Cici?

Ana mpaka akombole kulileka liŵasa lyawo ni cilambo cakumangwawo kuti ajawule kukulalicila ngani syambone ku cilambo cine? Mboni syejinji sitesile yeleyi, yili mpela akuŵeceta kuti “Une apano! Andumisye une.” (Yesaya 6:8) Jemanjaji atesile yaŵatesile Mmishonale jwamkulungwa, Yesu Klistu.—Yohane 7:2

Undumetume wa Umishonale lili litala lyakuya sajo sya Yesu. Mlungu ŵamtumile Yesu pacilambo capasi kutyocela kwinani kukutama pasikati pa ŵandu ŵakulemwa. Atamose kuti ŵayiwonaga yindu yangali cilungamo, Yesu nganalinga kuyisinda yindu ya m’cilambo. Jwalakwe nganisyo syakwe syaliji pa masengo ga “kulalicila ngani syambone sya ucimwene wa Mlungu,” wawucimasya yakusawusya ya ŵandu. (Luka 4:43) Amishonale ŵasyesyene ŵa Ciklistu akusakuyaga cisyasyo cakwe.

Umishonale uli umi wakulipeleka. M’mishonale akusosekwa kusyoŵelela katame ka umi kakumaloko, ndamilo ja ŵandu ŵakumaloko, nyengo jakumaloko, soni cakulya yampaka yiŵe yakulekangana mnope ni yaŵasyoŵelele. Akusosekwasoni kuti alijiganye ciŵeceto casambano kuti akomboleceje kuŵeceta ni ŵandu ŵa kumaloko. Ndaŵi sine kajende mpaka kaŵe kakusawusya kuti akayice mikuli jajili kwakutalika. Kuti mmishonale atende yeleyi akusosekwa kwanonyela mnope ŵandu ŵakwatumicilawo.

Umishonale ukusasosekwa kulijiganya cenene. Mboni syejinji syasikusatenda undumetume wa umishonale sikusajawula ku majiganyo gagakusaŵa ga miyesi msano ku Sukulu ja Gileadi ja Watchtower jakwiganya Baibulo. Majiganyoga gakusalimbikasya kuti akulupilileje Yehofa, Maloŵe gakwe, soni likuga lyakwe. (Miyambo 3:5, 6) Jikusakamucisya kola mnope ndamo sya Ciklistu syakusosekwa pa undumetume wa umishonale, soni lunda lwakwakamucisya kwiganya Baibulo mwakuŵajilwa. Jemanjaji akusaŵa ŵakuŵajilwa cenene kwiganya “mpaka kumbesi kwa cilambo.”—Masengo 1:8.

• Ana mmishonale akusasosekwa kutenda cici?

• Ana majiganyo gapajika gatuli gakusapocela amishonale ŵetu?