Ana Mpayiniya Ali Nduni?

Liloŵe lyakuti “mpayiniya” likusagopolela ŵandu ŵakusatanda kukopocela pamalo gasambano, soni kuwugula litala lyakuti ŵane ŵakuyeje. Yesu ŵaliji mpela mpayiniya, ligongo ŵamtumile pacilambo capasi kukutenda undumetume wakwakamucisya ŵane kola umi ni kwapa ŵandu upile wa cikulupusyo. (Matayo 20:28) Lelo jino, ŵakumkuya ŵakwe, akukumkuya mwakumalila ndaŵi jampaka akombole ali ‘mkwajiganya ŵandu.’ (Matayo 28:19, 20) Ŵane akombwele kutenda nawo upayiniya.

Mpayiniya ali mundu jwakusalalicila ndaŵi syosope. Mboni sya Yehofa syosope sili ŵakuwandisya ngani syambone. Nambope ŵane ŵalingenye yakuti paumi wawo atumicileje mpela Apayiniya ŵakutamilicika, acimalilaga ma awala 70 mwesi uliwose pamasengo gakulalicila. Kuti akombole kutenda yeleyi, ŵajinji akusagamba kamula maganyu. Ŵane akusasagula kuja kutumicila mpela Apayiniya ŵapajika m’mikuli mwamukusosekwa ŵakulalicila Ucimwene ŵajinji, acimalilaga ma awala 130 pa mwesi uliwose mu undumetume. Apayiniya akusajikutila ni umi wangasaka yejinji, acikulupililaga kuti Yehofa cacapa yakusosekwa ya paumi. (Matayo 6:31-33; 1 Timoteo 6:6-8) Ŵampaka akakombola kutenda upayiniya wandaŵi syosope, komboleka kutenda upayiniya wakamucisya mwakonjecesya masengo gawo gakulalicila ni ma awala 30 kapena 50 pa mwesi.

Kumnonyela Mlungu soni ŵandu ni kwakukusamtendekasya mundu kutenda upayiniya. Mpela Yesu, nombe tukumanyilila ndamo jakusawusya ja usimu jali ŵandu ŵajinji lelo. (Maliko 6:34) Nambo tukwete umanyilisi wampaka wakamucisye jemanjaji sambano jino, wampaka wakamucisye kola cimbeceyo camacili ca m’bujo. Kumnonyela mjawo ni kwakukusamlimbikasya mpayiniya kupeleka ndaŵi ni macili gakwe mwakoloŵa magasa pakwakamucisya ŵane kumanyilila ngani syambone. (Matayo 22:39; 1 Atesalonika 2:8) Yakuyicisya yakwe jwalakwe akusam’ŵandicila Mlungu, soni akusaŵa jwakusengwa mnope.—Masengo 20:35.

• Ana mpaka asale cici pakwamba ya mpayiniya?

• Ana cici cacikusatendakasya ŵane kutenda upayiniya wandaŵi syosope?