MTWE 17

Kwajiganya Ŵakutumicila ŵa Ucimwene

CAKULINGA CA MTWEWU

Yagatesile ma sukulu ga undumetume pakwakamucisya ŵakutumicila ŵa Ucimwene wa Mlungu kutenda ma undumetume gawo

1-3. Ana Yesu jwatesile yamtuli kuti masengo gakulalicila gajawuleje pasogolo? (b) Ana yaŵatesileyi yikuyikasya yiwusyo yapi?

YESU ŵalalicile mumsinda wosope wa Galileya kwa yaka yiŵili. (Aŵalanje Mateyu 9:35-38.) Jwalakwe jwalalicile soni kwiganya ngani syambone syakwamba ya Ucimwene wa Mlungu m’misinda soni m’misi jejinji nambosoni m’nyumba syakupopelela. Kulikose kwaŵalalicilaga, ŵandu ŵajinji ŵayikaga kukupikanila. Mwamti Yesu jwamanyilile kuti “yagowola yipali yejinji,” soni kuti pasosekwaga ŵamasengo ŵajinji.

² Ana Yesu jwatesile yamtuli kuti masengo gakulalicila gajawuleje pasogolo? Jwalakwe jwatesile yeleyi mwakwatumisya ŵandumetume ŵakwe 12 kuti “akalalicile ya Ucimwene wa Mlungu.” (Luk. 9:1, 2) Komboleka kuti ŵandumetumeŵa ŵaliwusyaga mwampaka akamulile masengoga. Yesu mkaniŵatumisye ŵandumetumeŵa, ŵajiganyisye kaje yiŵajiganyidwe ni Atati ŵakwe ŵakwinani.

³ Pelepa mpaka tuliwusyeje kuti, Ana Yesu ŵajiganyidwe cici ni Atati ŵakwe? Nambi Yesu ŵajiganyisye yamtuli ŵandumetume ŵakwe? Ana masiku agano, Mwenye jwa Umesiya akwajiganya camtuli ŵakumkuya ŵakwe kuti akomboleje cenene kutenda ma undumetume gawo?

‘Ngusaŵeceta Yasalile Atati’

4. Ana Yesu jwajiganyidwe ni Atati ŵakwe cakaci, soni kwapi?

⁴ Yiŵatendaga Yesu yalosyaga kuti ŵajiganyidwe ni Atati ŵakwe. Pa undumetume wakwe Yesu jwatite, “Ngusaŵeceta yele peyo yasalile Atati kuti nayiŵecete.” (Yoh. 8: 28) Ana Yesu jwajiganyidwe yeleyi cakaci soni kwapi? Kwiganyidwa kwakwe kwatandite ali agambile kupanganyidwa kwene kwinani. (Akolo. 1:15) Yesu jwatemi ni Atati ŵakwe kwinani kwa yaka yangaŵalanjika ali mkupikanila soni kulijiganya kutyocela kwa “Mkwiganya Jwamkulungwa.” (Yes. 30:20, NW) Yakuyicisya yakwe, Mwanaceju jwalijiganyisye yejinji yakwamba ndamo, masengo soni yakulinga ya Atatigwe.

5. Ana Yehofa ŵamjiganyisye yindu yapi Mwanace jwakwe yayamkamucisye pa undumetume uŵajembeceyaga kukamula ali pacilambo capasi?

⁵ Kaneko Yehofa ŵamjiganyisye Mwanace jwakwe ya undumetume uŵasosekwaga kuwukamula pacilambo capasi. Kwende tulole unasi wawupali pasikati pa Mkwiganya Jwamkulungwa ni Mwanace jwakwe jwandanda kupagwa. (Aŵalanje Yesaya 50:4, 5.) Yehofa ŵamjimusyaga Mwanace jwakweju “kundaŵi kulikose,” gakusala m’yoyo maloŵe gakulocesyaga. Maloŵega gakulandana ni yakusatenda ticala pakumjimusya mwanace jwakwe kundaŵi kulikose ni cakulinga cakuti amjiganye. Buku jine jakulondesya ya Baibulo jasasile kuti, “Mpela mwayikusaŵela ni mwanace jwa sukulu, Yehofa . . . ŵamjigalaga Yesu ni kumjiganya yakusosekwa kulalicila soni mwampaka alalicilile.” “Sukulu” jakwinaniji, Yehofa ŵamjiganyisye Mwanace jwakwe “yakuŵajilwa kuyisala ni kuyiŵeceta.” (Yoh. 12:49) Atati ŵampelesoni Mwanace jwakweju malamusi gakajiganye.a M’yoyo, Yesu ali pacilambo capasi, jwakamulicisye masengo majiganyoga kuti akomboleje kutenda cenene masengo gakulalicila. Jwakamulicisyesoni masengo majiganyoga pakwajiganya ŵakumkuya ŵakwe kuti nombe nawo akamuleje cenene masengo gakulalicilaga.

6, 7. (a) Ana Yesu ŵajiganyisye yamtuli ŵandumetume ŵakwe, soni ana yakamucisye kutenda cici? (b) Ana Yesu alolecesye kuti ŵakumkuya ŵakwe apocele majiganyo gamtuli masiku agano?

⁶ Ana Yesu ŵajiganyisye yamtuli ŵandumetume ŵakwe? Mwakamulana ni caputala 10 ca buku ja Mateyu, jwalakwe jwasalile ŵandumetumeŵa yakusosekwa kuya pa undumetume wawo. Yindu yakwe ni ayi, kwaŵasosekwaga kulalicila (ndime 5, 6), utenga wacakalalicile (ndime 7), kusosekwa kwa kumdalila Yehofa (ndime 9, 10), mwampaka ŵayicilile acimsyene nyumba (ndime 11-13), mwampaka atendele ni ŵakukana kupocela utengawo (ndime 14, 15), soni yakusosekwa kutenda pakulagasidwa (ndime 16-23).b Yaŵajiganyisye Yesuyi, yakamucisye ŵandumetumewo kuti akomboleje kulongolela masengo gakulalicila ngani syambone mu yaka 100 yandanda.

⁷ Nambi uli pakwamba ya masiku agano? Yesu jwali Mwenye jwa Ucimwene wa Mlungu, ŵapele ŵakumkuya ŵakwe ŵa masiku agano undumetume wakusosekwa mnope wawuli kulalicila ‘ngani syambone syakwamba ya Ucimwene wa Mlungu . . . pacilambo cosope capasi, kuti ŵandu ŵa mitundu josope asipikane.’ (Mat. 24:14) Ana Mwenyeju atujiganyisye kuti tupakombole kukamula masengo gakusosekwa mnopega? Elo atujiganyisye. Atamose kuti ali kwinani, Mwenyeju akulolecesya kuti ŵakumkuya ŵakwe akupocela majiganyo gakwakamucisya pamasengo gakulalicila soni maundumetume gane ga mumpingo.

Kwajiganya Ŵakutumicila Kuti Aŵe Ŵakulalicila

8, 9. (a) Ana cakulinga cekulungwa ca sukulu ja Undumetume wa Mlungu caliji cici? (b) Ana msongano wamkati mwa wiki wutukamucisye camtuli kulalicila mwakamula mtima?

⁸ Likuga lya Yehofa liŵele lili mkukamulicisya masengo misongano jamkuli, jaupande soni misongano jampingo mpela Msongano wa Undumetume, pakwajiganya ŵandu ŵa Mlungu masengo gakulalicila. Nambosoni kutandila m’yaka ya m’ma 1940, abale ŵakulongolela ku likulu lya Mboni sya Yehofa ŵatandite kulinganya ya kwajiganya ŵakutumicila ŵa Mlungu kupitila m’sukulu syakulekanganalekangana.

⁹ Sukulu ja Undumetume wa Mlungu. Mpela mwatuyiwonele mu mtwe wawupitewu, sukulu jeleji jatandite mu 1943. Ana cakulinga ca sukuluji cagambile kuŵa kwakamucisya ŵakulijiganya kuti akomboleje kuŵeceta ngani mwakamula mtima pamisongano? Iyayi. Cakulinga cekulungwa ca sukuluji caliji kwajiganya ŵandu ŵa Mlungu kuti akamulicisyeje masengo mtuka wakuŵeceta pakumcimbicisya Yehofa pakulalicila. (Sal. 150:6) Sukuluji jakamucisye abale ni alongoŵa kuŵa ŵakulalicila ŵa Ucimwene wa Mlungu ŵakamula mtima. Majiganyo gelega masiku agano gakutendekwa kupitila mumsongano wamkati mwa wiki.

10, 11. Ana sambano ni ŵandu ŵapi ŵakusosekwa kwinjila nawo Sukulu ja Gileadi? (b) Ana cakulinga ca majiganyoga cili cici?

¹⁰ Sukulu ja Gileadi Jakwiganya Baibulo ja Watchtower. Sukuluji jatandite Lyakulemba, pa February 1, 1943. Sukuluji ŵajitamilikasisye kuti jakamucisyeje apayiniya soni ŵane mwa ŵakutumicila ŵandaŵi syosope kuti akatumicileje m’yilambo yine mpela amishonale. Nambo kutandila mu October 2011 papali kucenga. Ŵakwinjila mu sukuluji akusosekwa kuti aŵe apayiniya ŵapajika, ŵakwendela mikuli ni aciŵamkwawo, ŵakutumicila ŵa pa Beteli soni amishonale ŵanganajinjileje sukuluji.

¹¹ Ana cakulinga ca majiganyo ga Sukulu ja Gileadi cili cici? M’bale jwaŵele ali mkwiganya mu sukuluji kwa ndaŵi jelewu pakulondesya ya cakulingaci, ŵatite, “Cili kulimbisya cikulupi ca ŵakulijiganya, mwakulijiganya Maloŵe ga Mlungu mwakusamala. Nambosoni sukuluji jikusakamucisya ŵakulijiganya kola ndamo syambone syausimu syampaka syakamucisye kumalana ni yakusawusya yampaka asimane nayo mu undumetume wawo. Nambosoni cakulinga cekulungwa mnope ca sukuluji cili kwakamucisya ŵakulijiganya kuti aŵeje ŵakusacilila mnope kamula masengo gakulalicila.”—Aef. 4:11.

12, 13. Ana majiganyo ga Sukulu ja Gileadi gakamucisye camtuli pa masengo gakulalicila pacilambo cosope? Apelece cisyasyo.

¹² Ana majiganyo ga Sukulu ja Gileadi gakwayiye camtuli masengo gakulalicila pacilambo cosope? Kutandila mu 1943, abale ni alongo ŵakupunda 8,500 ajinjile nawo sukuluji,c soni ŵane ŵaŵalijiganyisye sukuluji akutumicila mpela amishonale m’yilambo yakupunda 170 pacilambo cosope. Amishonaleŵa akusakamulicisya cenene masengo majiganyoga mwakuŵa yisyasyo yambone pamasengo gakulalicila soni akusiŵajiganya ŵane kuŵa ŵakulimbicila pamasengoga. Mu yakutendekwa yejinji, amishonaleŵa akusalongolela masengoga m’mikuli jele mwana ŵakulalicila ŵamnono kapena mwangali kwene ŵakulalicila ya Ucimwene.

¹³ Aganicisye yiyatendekwe ku Japan kwele masengo gakulalicila gajimi ligongo lya Ngondo Jaŵili ja Pacilambo Cosope. Pakwika mu August 1949, m’cilamboci mwasigele ŵakulalicila ŵangakwana 10. Nambo kumbesi kwa cakaci, amishonale ŵakwana 13, ŵakutyocela ku Sukulu ja Gileadi ŵalipelece kuja kulalicila m’cilamboci. Mkupita kwa ndaŵi, amishonale ŵane ŵajinji ŵatumisye m’cilamboci. Kundanda amishonaleŵa ŵalalicilaga m’misinda jekulungwa, kaneko ŵajawulaga ku misinda jamwana. Amishonaleŵa ŵalimbikasyaga ŵakulijiganya Baibulo ŵawo soni ŵakutumicila ŵane kuti atande undumetume wa upayiniya. Kulipeleka mnope pamasengo gakulalicila kwa amishonaleŵa kwayikasisye yakuyicisya yambone mnope. Apano ku Japan kwana ŵakulalicila ya Ucimwene ŵakupunda 216,000, soni ciŵandika ŵakulalicila 83,000 akutumicila mpela apayiniya.d

14. Ana Sukulu sya m’likuga lya Mlungu sikusapeleka umboni wamtuli? (Alolesoni libokosi lyakuti “Sukulu Syasikwajiganya Ŵakutumicila ŵa Ucimwene,” peji 188.)

¹⁴ Sukulu sine sya mu likuga lya Mlungu. Sukulu ja Undumetume wa Upayiniya, Sukulu Jakwiganya Baibulo ja Maŵasa ga Ciklistu soni Sukulu Jakwiganya Baibulo ja Abale Ŵangalombela, syakamucisye abale ni alongo kwawula pasogolo mwausimu soni kulipeleka mnope pamasengo gakulalicila.e Sukulu syelesi sikupeleka umboni wamacili wakusimicisya kuti Mwenye jwetu Yesu, akwakamucisya ŵakumkuya ŵakwe kuti akomboleje kukamula cenene masengo gakulalicila.—2 Tim. 4:5.

Kwajiganya Abale Mwampaka Asamalilile Maudindo Gapajika

15. Ana acalume ŵakwete maudindo mpaka amsyasye Yesu m’litala lyapi?

¹⁵ Kwende tuganicisye ya cakulocesya ca Yesaya cacikusasala ya Yesu ali mkwiganyidwa ni Mlungu. Pa “Sukulu” jakwinaniji, Mwanaceju jwalijiganyisye ‘yakwenela kuŵeceta, kuti agamanye maloŵe gakulimbikasya mtima ŵandu ŵangali macili.’ (Yes. 50:4) Yesu jwakamulicisyaga masengo yaŵalijiganyisyeyi paŵaliji pacilambo capasi. Jwalakwe jwalimbikasyaga “ŵakupela ni ŵakusitopelwa.” (Mat. 11:28-30) Abale wosope ŵakwete udindo akusosekwa kumsyasyaga Yesu mwakwalimbikasya abale ni alongo. Pakusaka kwanilisya cakulingaci, likuga litamilikasisye sukulu syakulekanganalekangana kuti syakamucisye abale ŵakuŵajilwa kwatumicila cenene ŵakulupilila acimjawo.

16, 17. Ana cakulinga ca Sukulu ja Undumetume wa Ucimwene cili cici? (Alolesoni maloŵe gamwiŵanda)

¹⁶ Sukulu ja Undumetume wa Ucimwene. Sukuluji jatandite pa March 9, 1959 ku South Lansing mumsinda wa New York. Ŵakulolela mikuli soni atumiki ŵa mpingo (masiku agano akusakolanjidwa kuti ŵakulondesya masengo ga acakulungwa), ŵaŵilanjidwe kuti akatende sukuluji kwa mwesi umo. Pandanda sukuluji jatendekwaga m’Cisungu, nambo kaneko jatandite kutendekwa m’yiŵeceto yine, mwamti mkupita kwandaŵi abale pacilambo cosope ŵatandite kulijiganya sukuluji.f

Lloyd Barry akwajiganya abale pa Sukulu ja Undumetume wa Ucimwene ku Japan mu 1970 — M’bale Lloyd Barry ali mkwiganya pa Sukulu ja Undumetume wa Ucimwene ku Japan, mu 1970

¹⁷ Pakusala ya cakulinga ca Sukulu ja Undumetume wa Ucimwene, buku jine ja Mboni sya Yehofa (1962 Yearbook of Jehovah’s Witnesses) jasasile kuti, “Pacilambopa, ŵandu akusakola yakutenda yejinji. M’yoyo jwakulolela mpingo jwa Mboni sya Yehofa, akusosekwa kuŵa jwamlume jwampaka atendeje yindu mwakulondeka paumi wakwe ni cakulinga cakuti ŵakamucisyeje cenene ŵandu wosope mumpingo. Pakutenda yeleyi, ngakusosekwa kulepela kulisamalila liŵasa lyakwe ligongo lyakusamalila mpingo, nambo akusosekwa kutendaga yindu mwaganisya cenene. Kusala yisyene uli upile wekulungwa kuti atumiki ŵampingo pacilambo cosope akusatenda Sukulu ja Undumetume ja Ucimweneji kuti alijiganye yampaka yakamucisye kwanilisya yajikusasala Baibulo kwa jwakulolela mpingo.”—1 Tim. 3:1-7; Tit. 1:5-9.

18. Ana Sukulu ja Undumetume wa Mlungu jikamucisye camtuli ŵandu wosope ŵa Mlungu?

¹⁸ Sukulu ja Undumetume wa Ucimweneji, jakamucisye ŵandu wosope ŵa Mlungu. Mwamtuli? Naga acakulungwa ŵa mumpingo soni ŵakutumicila ŵakamucisya akukamulicisya masengo yalijiganyisye kusukuluji, nikuti cacipakombola kwalimbikasya ŵane mpela muŵatendelaga Yesu. Ana akusayamicila yakusatenda jemanjaji pakuŵeceta maloŵe gakwalimbikasya, pakulingalinga kupikanicisya yakusawusya yawo soni payice kumangwawo kukwalimbikasya? (1 Ates. 5:11) Kusala yisyene, ukusaŵa upile wekulungwa kola acalumeŵa mumpingo.

19. Ana Komiti Jakwiganya jikusalolela sukulu sine syapi, soni ana sukulusi ŵasilinganyisye ni cakulinga camtuli?

¹⁹ Sukulu sine sya mu likuga lya Mlungu. Komiti Jakwiganya ja Likuga Lyakulongolela ni jajikusalolela sukulu syasikusajiganya abale ŵakwete maudindo m’likuga lya Mlungu. Sukulusi sikusakamucisya abale ŵa udindo mpela acakulungwa ŵa mumpingo, ŵakulolela ŵakwendajenda, soni abale ŵa mu Komiti ja Nyambi kuti akomboleje kutenda cenene masengo gawo. Majiganyo gakutyocela m’Baibuloga, gakusigakamucisya abaleŵa kulimbisya usimu wawo soni kamulicisya masengo yiwundo yausimu pakusamalila ngondolo syakusosekwa mnope syaŵapele Yehofa kuti asisamalileje.—1 Pet. 5:1-3.

Sukulu Jwakwiganya Undumetume jandanda jijatendekwe m’Malawi, mu 2007

20. Ligongo cici Yesu ŵasasile kuti “Mlungu ni jutacajiganya wosope,” soni ana wawojo ali ŵakusimicisya kutenda cici?

²⁰ Kusala yisyene, Mwenye jwa Umesiya akulolecesya kuti ŵakumkuya ŵakwe akwiganyidwa cenene. Majiganyo gosopega gatyocele kwinani. Yehofa ŵamjiganyisye Mwanace jwakwe, nombe Mwanace jwakwe ŵajiganyisye ŵakumkuya ŵakwe. Ni ligongo lyakwe Yesu ŵasasile kuti, “Mlungu ni jutacajiganya wosope.” (Yoh. 6:45; Yes. 54:13) M’yoyo, kwende tuŵe ŵakusimicisya kamulicisya masengo majiganyo gakupeleka Mwenye jwetu Yesu. Soni tukumbucileje kuti cakulinga ca majiganyo gosopega, cili kutukamucisya kuti tuŵe ŵakulimba mwausimu kuti tupakombole kwanilisya undumetume wetu.

a Ana tukusamanyilila camtuli kuti Atati ŵamjiganyisye Mwanace jwakwe mwampaka ajiganyile? Aganicisye ayi, Yakuwanicisya yejinji yaŵakamulicisyaga masengo Yesu pakwiganya, yakwanilisye yakulocesya yiyalembedwe kalakala jwalakwe mkanapagwe. (Sal. 78:2; Mat. 13:34, 35) Yeleyi yikulosya cenene kuti Mkulemba jwa yakulocesyayi, jwali Yehofa jwalinganyisye mkanipaŵe kuti Mwanace jwakwe cajiganyeje kupitila m’yiwanicisyo kapena m’yitagu.—2 Tim. 3:16, 17.

b Pali pamasile miyesi, Yesu “ŵasagwile ŵandu 70 ni kwatumisya ŵaŵili ŵaŵili” kuti akalalicile. Nambosoni mkaniŵatumisye kukulalicilaku, ŵajiganyisye kaje.—Luk. 10:1-16, NW.

c Abale ni alongo ŵane ajinjile Sukulu ja Gileadi kupunda kamo.

d Kuti amanyilile yejinji mwele masengo gakulalicila ga amishonale ŵaŵalijiganyisye ku sukulu ja Gileadi mugakwayile pacilambo cosope, alole mtwe 23 wa buku jakuti Jehovah’s Witnesses—Proclaimers of God’s Kingdom.

e Sukulu Jakwiganya Baibulo ja Maŵasa ga Ciklistu soni Sukulu Jakwiganya Baibulo ja Abale Ŵangalombela, ŵasipwatikenye nikuŵa sukulu jimo jajikukolanjidwa kuti Sukulu ja Ŵakulalicila ya Ucimwene.

f Masiku agano acakulungwa wosope akusakola upile wakwinjila nawo Sukulu ja Undumetume wa Ucimwene jajikusatendekwa kwa ulewu ŵandaŵi syakulekanganalekangana soni jikusatendekwa panyuma pa yaka yakuŵalanjika yiliyose. Kutandila mu 1984, ŵakutumicila ŵakamucisya nombe nawo aŵele ali mkwinjila nawo m’sukuluji.

SUKULU SYASIKWAJIGANYA ŴAKUTUMICILA ŴA UCIMWENE

UNDUMETUME NI UMI WETU WA CIKLISTU

Cakulinga: Kwajiganya ŵakulalicila kuti alalicileje soni kwiganya ngani syambone mwakamula mtima.

Ndaŵi: Jikusatendekwa wiki jilijose.

Malo: Pa Nyumba ja Ucimwene.

Ŵakwinjila Sukuluji: Wosope mpaka ajinjile nawo sukuluji naga akusasongana mwakutamilicika soni kwiticisya yajikusajiganya Baibulo, nambosoni naga akwete ndamo syakukamulana ni yiwundo ya Ciklistu. Kuti ajinjile nawo sukuluji, akusosekwa kumsalila jwakulolela Undumetume ni Umi Wetu wa Ciklistu.

Umbone wa Sukuluji: Msongano wamkati mwa wikiwu ukusatujiganya kuwungunya ngani soni kujiŵeceta mwakupikanika cenene. Ukusatujiganyasoni kwapikanila ŵane pakuŵeceta soni kuganicisya yakusosecela yawo yausimu m’malo mwakwamba kuganicisya yetupe.

Jwakulolela mkuli, jwaŵele pa undumetumewu kwandaŵi jelewu, lina lyakwe Arnie, pakuŵicila ndemanga ya msonganowu jwasasile kuti, “Nakusile ndili jwasooni nambosoni jwacimeme. Msonganowu ungamucisye kumalana ni kulikayicila. Kupitila m’majiganyoga,Yehofa angamucisye kuŵeceta mwakuwusimana mtima soni kuŵika nganisyo syangu pangani jinguŵecetajo. Ndili jwakuyamicila mnope ligongo lyakuti ngusakombola kumcimbicisya Mlungu pandili pamisongano ja mpingo soni mu undumetume wa mumgunda.”

SUKULU JA ACAKULUNGWA ŴA MUMPINGOg

Cakulinga: Kwakamucisya acakulungwa ŵa mumpingo kuti aŵe ŵakomangale mwausimu soni kuti asamalileje cenene maudindo gawo mumpingo.

Ndaŵi: Masiku msano.

Malo: Ofesi ja nyambi ni jajikusasagulaga. Kaŵilikaŵili pakusaŵa pa Nyumba ja Ucimwene kapena pa malo ga msongano.

Ŵakwinjila Sukuluji: Ofesi ja nyambi ni jele jikusaŵilanga acakulungwaŵa kuti akajinjile sukulu.

Umbone wa Sukuluji: Abale ŵaŵajinjile kalasi nambala 92 ja sukuluji ku Patterson, mu msinda wa New York, m’cilambo ca United States ŵaŵecete yakuyicisyayi:

“Sukuluji jingamucisye mnope, ligongo jilimbikasisye kuliwungunya soni kulola mwampaka samalilile ngondolo sya Yehofa.”

“Majiganyoga cigangamucisye kwa umi wangu wosope wene.”

SUKULU JA UNDUMETUME WA UPAYINIYA

Cakulinga: Kwakamucisya apayiniya kuti ‘akamule masengo gawo gosope’ mpela ŵakutumicila.—2 Tim. 4:5.

Ndaŵi: Masiku 6.

Malo: Ofesi ja nyambi ni jajikusasagulaga. Kaŵilikaŵili pakusaŵa pa Nyumba ja Ucimwene.

Ŵakwinjila Sukuluji: Jwakulolela mkuli ni jwakusiŵamanyisya apayiniya ŵatumicile kwa caka camtundu kuti akajinjile sukuluji. Apayiniya ŵakutamilicika ŵakwanisye yaka msano citendele sukuluji mpaka aŵilanjidwesoni kuti akatende nawo sukuluji.

Umbone wa Sukuluji: Lily jwatite, “Sukuluji jingamucisye kumalana ni yakusawusya ya mu undumetume soni paumi wangu. Jingamucisye kongolela kalijiganye, mwampakasoni najiganyile ŵane, soni kakamulicisye masengo ka Baibulo. Ndili jwakoseka kwakamucisya ŵane, kwakamucisya acakulungwa ŵa mumpingo, soni kuwutendekasya mpingo kwawula pasogolo mwausimu.”

Brenda, juŵajinjile sukuluji maulendo gaŵili, jwatite, “Sukuluji jingamucisye kuyinonyela mnope yindu yausimu, kulimbisya cikumbumtima cangu, soni kola lung’wanu lwakwakamucisya ŵane. Kusala yisyene, Yehofa ali jwakoloŵa magasa.”

SUKULU JA ŴAKWIKA KWENE PA BETELI

Cakulinga: Kwakamucisya ŵandu ŵagambile kwika kwene kuti atendeje cenene undumetume wawo wa pa Beteli.

Ndaŵi: Jikusatendekwa kwa maawala mcece palisiku, kwa masiku mcece.

Malo: Pa Beteli.

Ŵakwinjila Sukuluji: Ŵakutumicila pa Beteli ŵakutamilicika soni ŵakutumicila mwakulipeleka kwandaŵi jelewu (kwa caka cimo kapena kupunda) akusajinjila sukuluji.

Umbone wa Sukuluji: Demetrius juŵajinjile sukuluji ca m’ma 1980 jwasasile kuti, “Sukuluji jingamucisye kuti njongolele kalijiganye kangu ka maloŵe ga Mlungu soni kuti mbe jwakoseka kutumicila kwandaŵi jelewu pa Beteli. Ŵakwiganya sukuluji, majiganyo gambatile, soni yiwundo yakusosekwa kuyikuya yingamucisye kumanyilila kuti Yehofa akusanonyela soni kuti ali jwakusacilila kuti napakombole kutumicila cenene pa Beteli.”

SUKULU JA ŴAKULALICILA YA UCIMWENEh

Cakulinga: Kwakamucisya ŵali pa undumetume wandaŵi syosope (ŵalombane, soni abale ni alongo ŵanganaŵa paulombela) kupata majiganyo gapajika kuti Yehofa soni likuga lyakwe ŵakamulicisyeje masengo mwakwanila. Ŵajinji ŵamalisisye majiganyoga akusiŵatumisya kuti akalalicile kwakukusosekwa ŵakulalicila ŵajinji m’cilambo cawo pemo. Ŵamalisye majiganyoga ŵangapunda yaka 50 mpaka atumicile mpela apayiniya ŵapajika ŵakandaŵi m’mikuli jakutalicila pakusaka kutandikasya soni kwawusya pasogolo masengo gakulalicila.

Ndaŵi: Miyesi jiŵili.

Malo: Ofesi ja nyambi ni jajikusasagulaga. Kaŵilikaŵili pakusaŵa pa Nyumba ja Ucimwene kapena pa malo ga msongano.

ukulu sya mu likuga lya Mlungu sikwakamucisya abale ni alongo

Ŵakwinjila Sukuluji: Akusosekwa aŵeje ŵa yaka yakutandila pa 23 mpaka 65 ŵakutenda undumetume wandaŵi syosope. Nambosoni akusosekwa kola cilu cambone, ŵampaka akombole kwawula kumalo kwakusosecela ŵakulalicila ŵajinji. Soni aŵeje ŵakwete mtima mpela wa Yesaya wakuti “Une ndili apano, andume!” (Yes. 6:8) Maŵasa soni abale ni alongo ŵanganaŵa peŵasa, ŵakusajinjilaga sukuluji akusosekwa kuŵa kuti atesile undumetume wandaŵi syosope kwa yaka yiŵili mwangalecesya. Abale ni Alongo ŵali peŵasa akusosekwa kuti aŵeje ŵakuti atemi mwiŵasa ciŵandika kwa yaka yiŵili. Abale ŵakusajinjila sukuluji akusosekwa aŵeje ŵakuti atumicile mpela mkulu kapena jwakutumicila jwakamucisya kwa yaka ciŵandika yiŵili mwangalecesya. Naga mumkuli wa nyambi jawo mukusatendekwa sukuluji, ŵandu ŵakusaka kwinjila sukuluji akusakola msongano wawo wakwasalila yejinji yakwayana ni sukuluji pa msongano wawo waupande.

Umbone wa Sukuluji: Ofesi ja nyambi jipocele malipoti gakulosya kuyamicila kutyocela kwa Abale ni Alongo ŵaŵajinjile Sukulu Jakwiganya Baibulo ja Abale Ŵangalombela, soni Sukulu Jakwiganya Baibulo ja Maŵasa ga Ciklistu. Mu 2013 Likuga Lyakulongolela lyajiticisye yakupwatikanya sukulu siŵilisi ni kuŵa jimo jajikukolajinjidwa kuti Sukulu ja Ŵakulalicila ya Ucimwene. Sambano sukuluji cijakamucisyeje apayiniya ŵakulupicika ŵajinji kupwatikapo alongo ŵanginaŵa peŵasa.

SUKULU JA GILEADI JAKWIGANYA BAIBULO

Cakulinga: Pamalisisye majiganyo gawo, ŵakulijiganyaŵa akusaŵa ŵakulolela mikuli, amishonale soni ŵane akusatumicila pa Beteli. Ŵakulijiganyaŵa pakukamulicisya masengo cenene yalijiganisye, yindu mumpingo soni pa nyambi yikusajenda cenene.

Ndaŵi: Miyesi msano.

Malo: Malo ga Sukulu Syakwiganya Baibulo, ku Patterson, mumsinda wa New York.

Kalasi ja Gileadi ku Patterson mumsinda wa New York

Ŵakwinjila Sukuluji: Maŵasa kapena abale ni alongo ŵangalombela ŵaŵele mkutenda maundumetume gane gapajika gandaŵi syosope. Amishonale ŵanganajinjileje sukuluji, apayiniya ŵapajika, ŵakutumicila pa Beteli, soni ŵakulolela mkuli ni aciŵamkwawo ŵanganajinjileje sukuluji. Komiti ja nyambi ni jampaka jaŵende kuti akajinjile nawo sukuluji. Ŵakwinjila sukuluji aŵeje ŵakuti akusakombola kuŵeceta Cisungu soni kulemba.

Umbone wa Sukuluji: Liŵasa line lya ku United States (Lade ni Monique) lyalitumicile mpela amishonale kwa yaka yejinji, lyaŵecete yakuyicisyayi:

Lade jwatite, “Sukulu ja Gileadi jitukamucisye kuŵa ŵakoseka kwawula kulikose pacilambopa soni kamula masengo mwakulimbicila yalumo ni abale ŵetu ŵakunonyelwa.”

Monique jwaŵecetesoni kuti, “Ngusaŵa jwakusangalala mnope ni undumetume pangukamulicisya masengo yanalijiganyisye kutyocela m’Maloŵe ga Mlungu. Yeleyi yikusasimicisya kuti Yehofa akusanonyela.”

SUKULU JA UNDUMETUME WA UCIMWENE

Cakulinga: Kwajiganya ŵakulolela mkuli, acakulungwa ŵa mumpingo soni ŵakutumicila ŵakamucisya kuti atendeje cenene masengo gawo gakulongolela mpingo soni kajendesye ka yindu m’likuga. (Mase. 20:28) Kwakamucisya acakulungwa pa yampaka atende ni mwayiŵelele yindu pandaŵijo. Sukuluji jikusatendekwa panyuma pa yaka yakuŵalanjika. Likuga Lyakulongolela ni lyalikusasagula yeleyi.

Ndaŵi: Ulewu wandaŵi ja sukuluji uŵele wakulekanganalekangana mu yaka yapacangakaŵapa.

Malo: Kaŵilikaŵili jikusatendecela pa Nyumba ja Ucimwene kapena pa malo gakutendela misongano.

Ŵakwinjila Sukuluji: Jwakulolela mkuli ni jwakusiŵamanyisya acakulungwa ŵa mumpingo soni ŵakutumicila ŵakamucisya ya sukuluji. Ofesi ja nyambi jikusijaŵilanga ŵakulolela mkuli kuti ŵasalile yakwayana ni sukulujo.

Umbone wa Sukuluji: Quinn jwatite, “Atamose kuti sukuluji jikusatendekwa masiku gamnono, nambo akusalijiganya yejinji. Jikusijakamucisya acakulungwa ŵa mumpingo kuti atumicileje mwakusangalala soni mwakulipeleka. Acakulungwa ŵakala soni ŵacasambano akusalijiganya mwampaka akamulile masengo gakucinga mwakamula mtima soni yampaka atende kuti aŵe ŵakamulana pa cindu cimo.”

Michael jwatite, “Majiganyoga gatukamucisye kuti tuyamicileje yindu yausimu, kutukalamusya pa yindu yakogoya, soni kutukamucisya kumanyilila yampaka tutende pakusisamalila ngondolo sya Mlungu.”

SUKULU JA ŴAKULOLELA MKULI NI ACIŴAMKWAWOi

Cakulinga: Kwakamucisya ŵakulolela mikuli kuti asamalileje cenene mipingo, kuti alimbicileje “kamula masengo gakulalicila ni kwiganya,” soni kusamalila ngondolo syasili m’miyala mwawo.—1 Tim. 5:17; 1 Pet. 5:2, 3.

Ndaŵi: Mwesi umo.

Malo: Ofesi ja nyambi ni jajikusasagula.

Ŵakwinjila Sukuluji: Ofesi ja nyambi ni jajikusijaŵilanga ŵakulolela mikuli yalumo ni aciŵamkwawo ku sukuluji.

Umbone wa Sukuluji: Joel ni ŵamkwakwe ŵaŵajinjile kalasi jawo jandanda mu 1999 ŵatite,“Jikusatukamucisya kuti tuyamicileje mnope umtwe wa Yesu pa mpingo wa Ciklistu. Tukusakuwona kusosekwa kwakwalimbikasya abale ŵatukusitwatumicila soni kulimbikasya mkamulano mumpingo uliwose. Sukuluji jikusatukamucisya kumanyilila kuti atamose kuti ŵakulolela mikuli mpaka apeleceje camuko soni kwajongolela abale pandaŵi sine, nambo cakulinga cetu cekulungwa cili kwakamucisya abale kumanyilila kuti Yehofa akusiŵanonyela jemanjajo.”

SUKULU JA ABALE ŴA M’KOMITI JA NYAMBI NI ACIŴAMKWAWO

Cakulinga: Kwakamucisya abale ŵa m’komiti ja nyambi kuti alongoleleje cenene masengo ga pa Beteli, kuti asamalileje yakutendekwa ya m’mipingo, soni kulolela masengo ga ŵakulolela mikuli soni mwayikwendela yindu m’mikuli jawo.—Luk. 12:48b.

Ndaŵi: Miyesi jiŵili.

Malo: Malo ga Sukulu Syakwiganya Baibulo ku Patterson mumsinda wa New York.

Ŵakwinjila Sukuluji: Komiti ja Undumetume ja Likuga Lyakulongolela ni jajikusijaŵilanga abale ŵam’Makomiti ga Nyambi kapena m’Makomiti ga Cilambo ni aciŵamkwawo ku sukuluji.

Umbone wa Sukuluji: Lowell ni Cara ŵaŵajinjile kalasi nambala 25, ŵele sambano akutumicila ku Nigeria ŵatite:

Lowell jwatite, “Sukuluji jangamucisye kumanyilila kuti atamose ndili ngwete yakutenda yejinji soni ali ambele masengo gamtuli kuti ngamule, nambo cakusosekwa mnope kuti namsangalasye Yehofa cili kuŵa mundu jwausimu.”

Nombenajo Cara pakusala yaŵalijiganyisye pasukuluji jwatite, “Naga mpaka yileme kulondesya cenene ciwundo cinecakwe, nikuti ngusosekwa kulijiganya cenene nganijo mkaninjawule kukwajiganya ŵane.”

g Sukuluji nganijiŵe kutanda kutendekwa m’yilambo yine.

h Sukuluji nganijiŵe kutanda kutendekwa m’yilambo yine.

i Sukuluji nganijiŵe kutanda kutendekwa m’yilambo yine.