Mbali 7
Ana Ŵani Ŵakukuya Dini Jakuwona?
1. Ana tukuŵajilwa kutenda cici kuti tumsangalasye Mlungu?
KUTI tusangalale ni unasi wambone ni Mlungu, tukuŵajilwa kulilekanganya ni dini jaunami. Tukusosekwa kuya dini jakuwona. Moŵa agano ŵandu ŵajinji kusyungulila cilambo cosope cino akukuya dini jakuwonajo.
2. Ana ŵa Mboni sya Yehova mpakana asimanice kwapi, soni ana masengo gawo gali gatuli?
2 Mujasalile cile Baibulo, ŵandu ŵakulambila kusyesyene ni ŵele ŵali ‘likuga lyalikulungwa . . . lya ŵandu’ ŵatyocele ‘ku lukosyo lulilose lwa ŵandu, ni mitundu josope, nipo ali ŵa yiŵeceto yosope.’ (Cibvumbulutso 7:9) M’yilambo yakwana 235, Mboni sya Yehova syejinji mwacangu sikwakamucisya ŵane kuti alijiganye ya ndamo syacinonyelo sya Yehova ni yakusaka jwalakwejo.
Kwamanya Ŵakulambila Ŵasyesyene
3. Ana Mboni sya Yehova sikusalambilaga nduni, nipo kalambile kapi kakukana kutenda?
3 Mboni sya Yehova sikusamanyilila kuti Yehova ali jikape jwakuŵajilwa kumlambila. Akusakana kuyitindiŵalila yiwanicisyo kapena yitusitusi ya dini. (1 Yohane 5:21) Ngakusatenda yitendo yakupeleka ucimbicimbi kwa mundu jwam’we mwakucesya pa malilo kapena yitendo yine yayikusalimbikasya yikulupi ya dini jaunami ni “majiganyo gakutyocela ku masoka gakusakala.” (1 Timoteo 4:1) Nambope akusiŵatondosya ŵakuwilwa, acalongosolelaga pakwamba yasimicisye Mlungu kuti kuciŵa kwimuka kwa ŵandu ŵawe mu cilambo capasi casambano ca paladaiso.—Yohane 5:28, 29; Masengo 24:15.
4. Ana ŵandu ŵa Mlungu akusauwonaga wuli ukomasi?
4 Mboni sya Yehova syangatenda ya ukomasi, kapena yausaŵi, ligongo akusamanyilila kuti yeleyi yili yakutyocela kwa Satana. Ngakusakamulicisya masengo ya ukomasi kuti yacinjilicisye. Akusajegamilaga pa Yehova.—Miyambo 18:10.
5. Ana Mboni sya Yehova ‘nganisiŵa wuli sya cilambo capasi’?
5 Yesu ŵatite kuti ŵakulupilila ŵakwe “nganaŵa ŵa cilambo capasi.” (Yohane 17:16) Yesu msyenejo ŵakanile kujigala mbali mu ndale sya moŵa gelego. (Yohane 6:15) Nombe nasyo Mboni sya Yehova ngasikusajigala nawo mbali mu ndale, syangali ndamo jakuliwona kuŵa ŵakupunda ligongo lya cilambo cakutyocela. Soni syangajinjilila nawo mu kukangana kwa ngosyo kwakuwandile mcilambo capasici. Nambope akusakomaga msongo, nipo akusapikanilaga malamusi ga cilambo cakutamaco.—Yohane 15:19; Aloma 13:1, 7.
6. Ana malamusi gapi gakusakuya ŵakutumicila Mlungu pakwamba ya kulombela ni kumala kwa ulombela?
6 Ligongo lyakuti sikusapikanila malamusi ga boma, Mboni sya Yehova sikusalolecesya kuti ulombela wawo uli welembesye ku boma. (Tito 3:1) Ngasikusalombela mitala, ligongo lyakuti sikusapikanilaga malamusi ga Mlungu. (1 Timoteo 3:2) Soni ligongo lyakuti ŵakutumicila Mlungu’ŵa akusakuya malamusi ga Baibulo pa umi wawo, maŵasa gawo ngaŵa kaŵilikaŵili kumala.
7. Ana Mboni sya Yehova sikusalosya catuli cinonyelo cawo?
7 Mboni sya Yehova sili syakunonyelana. Cinonyelo celeci, yimpepe ni kumnonyela kwawo Mlungu, kukusikwatendesya kuŵa ŵakamulana mu unasi ŵakulandana, atamose kuti ali ŵangosyo ni ŵamitundu jakulekanganalekangana. Naga pali patendece yakusawusya kapena pali pana kulaga kwine kwakwe, Mboni sya Yehova sikusakamusyana. Mbonisyo sikusalosya cinonyelo mkatame kawo.—Yohane 13:35.
8. Ana yitendo yakusakala yapi yakusayiŵambalaga ŵandu ŵa Mlungu?
8 Mboni sya Yehova sikusalolecesya kuti sikutenda yindu mwakuwona mtima ni mwakulungamika. Akusayiŵambalaga yitendo ayi: unami, wiyi, cikululu, kolelwa, ni bisinesi syangalumbana. Acalume ngakusiŵaputaga aciŵamkwawo. Mkanaŵe Mboni, ŵane ŵaliji mkutenda yeleyi, nambo mwacikamucisyo ca Yehova, jemanjaji yeleyi ŵalesile. “Ŵaswejesye” pameso pa Mlungu.—1 Akolinto 6:9-11.
Ŵakutenda Lisosa lya Mlungu
9. Ana buku jine jatite cici pakwamba ya macalici gamisimu ga mu Africa?
9 Yakuwona kuti dini syejinji sikusati kuti sikumanyilila yisyesyene. Akusaŵeceta yeleyi mwine ligongo lya yakusimonjesya yakusatenda. Pakwamba ya macalici ga mu Africa gakugatenda kuti gamisimu, buku jine jikuti: “Masengo ga jwaukomasi kapena kuti jwamtela kusyesyene ŵajinjile m’malo mwakwe ni [makuga gasambano ga Ciklistu]. . . . Akusati kuti akwete macili gakuyimanyila yindu yamtemela, ni kutenda yakusimonjesya. Ŵakulocesya ŵawo akusalocesya ni kugopolela sagamisi. Akusakamulicisya masengo mesi geswela, mawuta gapajika, liwu, makandulo, soni ni yindu yine yaliwungo, pakuposya yilwele ni kuti ukalwala.”
10, 11. Ana ligongo cici moŵa agano yakuyitenda kuti yakusimonjesya ngaŵa mkulosya kuti dini jili jakutyocela kwa Mlungu?
10 Ŵandu ŵa mu dini syelesi akusaŵeceta kuti yakusimonjesya yakusatendayo yikusalosya kuti dini jawojo Mlungu akujijiticisya. Nambope yele yakusatiyo kuti yakusimonjesya ngaŵa kuti yikusalosya kuti dini jawojo Yehova akujijiticisya. Satana akusiŵakombolekasya ŵakulambila kwaunami ŵane kuti atendeje “yakusimonjesya.” (2 Atesalonika 2:9) Baibulo jasalile cile kuti yakuŵa ni macili gakutyocela kwa Mlungu gakutendela yakusimonjesya monga kulocesya, kuŵeceta yiŵeceto yacilendo, ni kuŵa ni umanyisi wapajika, “tiyicilecekwa.”—1 Akolinto 13:8.
11 Yesu ŵakalamucisye cile kuti: ‘Ngaŵa mundu jwalijose jwele jwakusangolanga une kuti, “Ambuje, Ambuje,” tacijinjila mu Ucimwene wa kwinani, ngwamba. Nambo ŵatacijinjila ni ŵele pewo ŵakusatenda lisosa lya Atati ŵangu ŵa kwinani. Pa lyele lyuŵalyo ŵandu ŵajinji tacitiji kuti, “Ambuje, Ambuje! ana ngati uwe twaliji mkulalicila maloŵe ga Mlungu mlina lyenu? Ngati uweji twaliji mkukoposya masoka gangalumbana tucilikolangaga lina lyenu?” Pelepo tinjasalila pakulanguka, “Ngwamba ngangummanyilila kose. Tyokani apano, ŵanganyamwe ŵandu ŵayitendo yangalumbana.”’—Matayo 7:21-23.
12. Ana ŵani ŵatacijinjila mu Ucimwene wa kwinani?
12 Ana sambano ŵatacijinjila mu Ucimwene wa kwinani ŵani? Ali ŵele ŵakutenda lisosa lya Yehova.
Ŵakulalicila Ucimwene wa Mlungu
13. Ana gali masengoci gele Mlungu galamwile kuti ŵandu ŵakwe atendeje moŵa agano, soni ana ŵani ŵakutenda masengogo?
13 Ana cakulinga ca Mlungu pakwamba ya ŵandu ŵakwe moŵa agano cili catuli? Yesu ŵatite kuti: “Ngani syambonesi syakwambaga ya Ucimwene wa Mlungu tisicilalicikwa pacilambo capasi kuti ŵandu ŵangosyo syosope asipikane.” (Matayo 24:14) Gelega ni masengo gasikukamula Mboni sya Yehova mwakulimbika.
14. Ana Ucimwene wa Mlungu uli cici, nipo ana ŵani ŵacaciŵa mkulamula mu Ucimwenewo?
14 Kusyungulila “pacilambo capasi,” Mboni sya Yehova sikulalicila kuti Ucimwene wa Mlungu uli boma jakwinani jajicilamulila pacilambo cosope capasi cino mwakulungamika. Akusajiganyaga kuti Yehova amsagwile Yesu Klistu kuti aŵe Mwenye jwa Ucimwene welewu, pampepe ni ŵakumkamucisya kulamulila ŵakwana 144,000, ŵiŵatesile kwasagula kutyocela pa cilambo capasi.—Danieli 7:14, 18; Cibvumbulutso 14:1, 4.
15. Ana Ucimwene wa Mlungu ucijonanga cici?
15 Sicikamulicisyaga masengo Baibulo, Mboni sya Yehova sikusaŵamanyisya ŵandu kuti Ucimwene wa Mlungu ciucijonanga ukoto wosope wa Satana. Dini jaunami ni yijiganyo yakwe yangayikusacimbicisya Mlungu akaŵe nambo Satana, kuciŵa kwangali! (Cibvumbulutso 18:8) Soni maboma gosope ga ŵandu, gagakusalimbanaga ni Mlungu kuciŵa kwangali!—Danieli 2:44.
16. Ana ŵani ŵacaciŵa pasi pa ulamusi wa Yesu Klistu, nipo ana cacitamaga kwapi?
16 Soni Mboni sya Yehova sikusaŵamanyisyaga ŵandu kuti Yesu Klistu caciyikasya mapindu gambone mnope kwa ŵandu wosope ŵakutenda yele yakusaka Mlungu. Ŵele ŵanduŵa caciŵa pasi pa ulamusi wa jwalakwejo pacilambo capasi. Baibulo jikusimicisya kuti: “Cacimkulupusya jwausawuci jwakulilajo. Soni jwele jwakulaga jwanganakola jwakumkamucisya. Cacimtendela canasa jwausawuci ni jwakulaga. Cacikulupusya umi wa jwausawuci.”—Salmo 72:12, 13.
17. Ana ŵanipe basi ŵakulalicila ya Ucimwene wa Mlungu?
17 Pangalisoni likuga line lya ŵandu lilikusatenda mwakamulana ni lisosa lya Mlungu, mwakulalicila ngani syambone sya Ucimwene wa Mlungu. Mboni sya Yehova pesyo ni syasikwamanyisya ŵandu ya Ucimwene wa Mlungu kusyungulila pacilambo cosope capasi.
[Ciwulili pa peji 23]
Mboni sya Yehova sili syakamulana mu unasi wakulandana wa pacilambo cosope capasi