Mbali 8
Mjikaneje Dini Jaunami, Mcikuyaga Dini Jakuwona
1. Pakwamba ya kulambila, ana ŵandu moŵa gano akuŵajilwa kusagula cici?
YESU ŵatite kuti: “Mundu jwele jwangakwiticisyana none, akusasisyana none.” (Matayo 12:30) Pana mbali siŵilipe syampaka tukombolece kuŵa. Mbali ja Yehova kapena ja Satana. Ŵandu ŵajinji akusaganisya kuti akutumicila Mlungu mwakwenelela, nambo Baibulo jikuti Satana ‘akucilambusya cilambo cosope capasi.’ (Cibvumbulutso 12:9) Ŵandu ŵajinji akukulupilila kuti akulambila Mlungu, nambo kusyesyene akutumicila Satana Jwakulambusya! Moŵa gano ŵandu akusosekwa kulisagulila. Akuŵajilwa kusagula kuti cinga akusaka kutumicila Yehova, “Mlungu jwa usyesyene,” kapena Satana, “Atati jwa wosope ŵaunami.”—Salmo 31:5; Yohane 8:44.
Mlilekanganye ku Dini Jaunami
2. Ana katende kamo kapi kele kakukamulicisya masengo Satana pakulinga kwalekasya ŵandu kulambila Yehova?
2 Kusagula kumtumicila Yehova kuli kusagula kwambone. Kali kasagule kampaka katutendekasye kuti Mlungu atuwoneje kuŵa ŵakuŵajilwa. Nambo Satana ngakusasangalala acim’bonaga jwine ali mkutumicila Mlungu. Jwalakwejo akusaŵawonesya yipwetesi yejinji ŵele ŵakutumicila Mlungu’ŵa. Katende kamo kakukamulicisya masengo niko kwatendekasya ŵane, atamose acimjakwe ŵa ugwe kapena ŵa peŵasa ŵetu kuti atuseceje kapena kutulekasya kutumicila Yehova. Yesu ŵakalamucisye cile kuti: “Amagongo ŵakwe ŵa mundu taciŵa ŵa mwiŵasa lyakwe pemo.”—Matayo 10:36.
3. Ana naga ŵapeŵasa ŵenu kapena acimjenu ali mkumlekasya kulambila Mlungu, ana mpaka mtende cici?
3 Naga yeleyi yili yitendekwe kwenumwe ana cici campaka mtende? Ŵandu ŵajinji akusamanyilila kuti kalambile kawoko nganikaŵa kakuwona, nambopetu yikusayalema kuti alilekanganye ku kalambile keleko? Akusaganisya kuti kutenda yeleyo mpaka kuwonesye kuti ali ŵangakulupicika kwa acanasi ŵawo. Ana yeleyi yili yakupikanika? Ana naga mli mpikene kuti ŵapeŵasa ŵenu akumwaga mitela jakogoya, ana ngamkanimwakalamusya kuti mitela jelejo jicawulasya? Ana mpaka mtande nomwe kumwa nawo mitela jakogoyajo? Yakuwona ngaŵa mkutenda yeleyo.
4. Ana moŵa ga Yoswa, jwalakwejo ŵasalile cici Ayisilayeli pakwamba ya kulambila?
4 Yoswa ŵalimbikasisye Ayisilayeli kuti alece yitendo ya dini syakusakala ni misyungu ja acinangolo ŵawo. Jwalakwejo ŵatite kuti: “Sambano mumjogope Yehova ni kumtumicila ni mtima wakongoka ni wakuwona, nipo jityosyani milungu jele acinangolo ŵenu jaŵajitumicilaga lisi lusulo lula, ni mu Eguputo; nipo mumtumicileje Yehova.” (Yoswa 24:14) Yoswa ŵaliji ŵakulupicika kwa Mlungu, nipo Yehova ŵampele upile. Naga tukuŵa ŵakulupicika kwa Yehova, nikuti jwalakwejo soni cacitupa upile.—2 Samueli 22:26.
Jasani Yindu Yosope Yakamulicisya Masengo pa Kulambila Kwaunami
5. Ana ligongo cici tukusosekwa kwasa yindu yaukomasi?
5 Kulilekanganya ni dini jaunami kukupwatikasoni kwasa yindu yosope yaukomasi yatukwete, cisawu yisasi, yibangili yamasenga, ni yine yati m’yoyo. Kutenda yeleyi kuli kwakusosekwa ligongo lyakuti kukusawonesya kuti tukwegamila mnope pa Yehova.
6. Ana Aklistu ŵandanda ŵatesile nago cici mabuku gawo ga yaukomasi?
6 Mlole yaŵatesile Aklistu ŵane ŵandanda paŵasacile kukuya dini jakuwona. Baibulo jikuti: “Ŵajinji ŵane soni ŵaŵatendaga yaukomasi ŵajigele mabuku gawo ni koca pamoto pa luŵala papopo.”—Masengo 19:19.
7. Ana mpaka tutende cici naga yili mkutulagasya yiŵanda?
7 Ŵane ŵaŵaliji mkutenda yausaŵi kapena yaukomasi, ni sambano atandite kutumicila Yehova, mpaka yiŵe mkwalagasya yiŵanda. Naga yeleyi yili yimtendecele, popelani kwa Yehova mwakulimbika, mcilisalaga lina lyakwe. Jwalakwejo cacimkamucisya.—Miyambo 18:10; Yakobo 4:7.
8. Ana Aklistu akusayiwona wuli yiwanicisyo ni yitusitusi yakamulicisya masengo pakulambila kwaunami?
8 Ŵele ŵakusaka kutumicila Yehova ngakuŵajilwa kuŵa mkusunga kapena kamulicisya masengo yiŵanicisyo, kapena yitusitusi yayili ya dini jaunami. Aklistu ŵakuwona “akusaŵika mtima pa cikulupi, ngaŵa pa yindu yakuwoneka ni meso.” (2 Akolinto 5:7, NW) Akusakuwona kusosekwa kwa kukuya lilamusi lya Mlungu lyalikusalekasyaga yakamulicisya masengo yiwanicisyo ya mtundu wuliwose pakulambila.—Eksodo 20:4, 5.
Mkamulaneje Nawo Ŵandu ŵa Yehova
9. Ana Baibulo jikusala cici pakwamba ya kuŵa jwalunda?
9 Baibulo jikuti: “Naga mkwenda ni ŵalunda, cimciŵa ŵalunda.” (Miyambo 13:20) Naga tukusaka kuŵa ŵalunda, tukusosekwa kwenda, kapena kamulana, ni Mboni sya Yehova. Ŵeleŵa ni ŵandu ŵakwenda mu litala lyalikulongolela ku umi.—Matayo 7:14.
10. Ana Mboni sya Yehova komboleka kumkamucisya catuli pakutumicila Mlungu?
10 Mboni sya Yehova sikusaganicisyaga mnope ya ŵandu ŵane. Jemanjajo masengo gawo nigo kwakamucisya ŵele ŵali ŵakuwona mtima kuti ayimanyilile yakuwona yayili m’Baibulo yayikusalongolela ku umi wangamala. Komboleka jemanjajo kumkamucisya, mwakulijiganya namwe Baibulo mwawulele. Cacijanga mawusyo gamkwete. Soni cacimkamucisya kuti m’manyilile yakuti pakuyikamulicisya masengo yajikwiganya Baibulo.—Yohane 17:3.
11. Ana misongano ja Ciklistu jicimkamucisya wuli?
11 Pa misongano jawo, jele moŵa gejinji jakusatendelaga mu Nyumba ja Ucimwene, cimkalijiganye yejinji pakwamba ya ndamo sya Yehova. Yeleyi yicilimbikasya cakulinga cenu cakukuya dini jakuwona. Soni kweleko cimkalijiganye yakuti pakwakamucisya ŵane kuti ayimanye yakuwona ya m’Baibulo.—Ahebeli 10:24, 25.
12. Ana lipopelo mpaka likamucisye wuli pakutumicila kwenu Mlungu?
12 Mcilijiganyaga yejinji pakwamba ya lisosa lya Yehova, mwangakayicila cimcipunda kumanyilila ni kuyamicila ndamo sya cinonyelo sya Yehova. Soni cimcipunda kuŵa ŵakusaka kutenda yakumsangalasya jwalakwejo, mciyiŵambalaga yele yayikusamsakalisyaga. Mkumbucilesoni kuti kuli kwakomboleka kupopela kwa Yehova, mciŵendaga kuti amkamucisye kutenda yambone, ni kuti mkatendaga yakusakala.—1 Akolinto 6:9, 10; Afilipi 4:6.
13. Ana mpaka mumsangalasye wuli Yehova?
13 Mwangakayicila mkupita kwa ndaŵi, mcikulaga mwausimu, cimcikuwona kusosekwa kwa kulipeleka kutumicila Yehova monga Mboni jakwe jebatisidwe. Mwakuŵa nawo mu likuga lya ŵandu ŵa Yehova, cimcitendekasya Yehova kuŵa jwakusengwa. (Miyambo 27:11) Cimciŵa pasikati pa ŵandu ŵakusangalala. Pakwamba ya ŵandu ŵeleŵa, Mlungu akuti: “Tinjitama mwa ŵelewo, ni tinjijendajenda mwa ŵelewo. Nipo tinjiŵa Mlungu jwawo, ni taciŵa ŵandu ŵanguŵangupe.”—2 Akolinto 6:16.
Yakuwona ni Yaunami Pakwamba ya Yijiganyo ya Dini
● Utatu: Dini syejinji sikusajiganya kuti Mlungu ali jutatu. Akusati kuti “Atati ali Mlungu, Mwanace[Yesu] alisoni Mlungu, soni Msimu Weswela wuli Mlungu, nikutisoni nganaŵa Acimlungu ŵatatu nambo Mlungu jumo.”
Baibulo nikusala kose maloŵe gakuti “Utatu,” ngajikusala. Soni ngajikusajiganya kuti Yehova ali ŵandu ŵatatu mu jumo. Yehova’pe ni jwali Mlungu. Pa 1 Akolinto 8:6 akuti: “Tukwete Mlungu jumope jika, ŵali Atati.” Yehova ali Jwaulamusi Wosope. Yesu nganaŵa Mlungu, nambo kuti ali “Mwanagwawo Mlungu.” (1 Yohane 4:15) Soni msimu weswela nganiuŵa Mlungu kapena mundu. Msimu weswela uli macili gakamula masengo ga Mlungu.—Masengo 1:8; Aefeso 5:18.
● Msimu: Dini syejinji sikusajiganyaga kuti msimu uli cindu cine cakwe cacili mwa mundu, nipo ngacikusawaga. Baibulo jikusajiganya kuti msimu uli macili ga umi gagakusakamucisya cilu kuti ciŵe ca umi, nambo uli wangakomboleka kutenda cilicose naga uli nganiuŵa mcilu. Soni Baibulo jikusajiganya kuti ŵandu ŵawe ngakusayikombola kutenda cilicose.—Mlaliki 9:10; Yakobo 2:26.
● Moto wa Helo: Dini jaunami jikusajiganya kuti misimu ja ŵandu ŵakusakala jikusaja kwiwona yipwetesi yangamala ku moto wa helo. Baibulo jikulongosola kuti ŵandu ŵawe “pangalikose cakusacimanyilila.” (Mlaliki 9:5) Soni Baibulo jikwiganya kuti “Mlungu ali unonyelo wene.” (1 Yohane 4:8) Yehova Mlungu jwaunonyelo, ngaŵa mkwawonesya ŵandu yipwetesi acikamulicisyaga masengo moto.
[Wusyo]
Libokosi: Ana Baibulo jikwiganya cici pakwamba ya Utatu, msimu ni moto wa helo?
Nagopwece ku Yiŵanda
Lisiku line cilo, nili cigonele pa bedi ni ŵalume ŵangu, nagapikene maloŵe gaciŵilangaga lina lyangu katema kakwana katatu. Kaneko ni nawuweni msakasa wuli uwugwice. Nipo cindu cine cakwe cati cisawu mpila, cakolela moto, cangwilile pa lutumbo. Ŵamkwanguwo nganayiwonaga yayatendekwagayi. Nambotu, papite miyesi jejinji nili mkupikana koca moto mcilu.
Jili jipite miyesi msano ni umo, maloŵe gala nagapikenesoni galimkumbilanga. Mwangapita ndaŵi, nyumba josopejo jagambile kuwoneka cisawu kuti jitekutiŵila m’mesi. Cikasa msato catulwice m’mesimo, nipo cawusyengenye mkono wangu. Nalinjile kuti nacikung’undile pasi, nambo nganiyikomboleka. Ni wangwete woga ngaŵa wamasanje. Kaneko mesi ni sato’jo yagambile kusoŵa, ngawonekasoni. Ni ŵangwisisye pasi mwakumbulasya. Natemi ndaŵi jekulungwa nili cikomocele. Kaneko maloŵe gala ni gasalile kuti mbujile ku nyumba jakupolecesya ŵakulwala mwa macili ga misimu jajaliji ku musi. Panawuwusisye msimuwo lina lyakwe, wasalile lina lyakugopolela kuti “jwakola cipanje nambo ngakola mwanace.” Wasimicisye kuti cucingombolekasya kuŵa jwakusicila kutyocela mu macili ga kupolesya yilwele.
Ŵandu ŵakulwala ŵayikaga kwa une kutyocela m’mikuli jakulekanganalekangana. Nkanayice pa nyumba jangujo, jemanjaji ŵawonecelaga pa ligalasi lyangu lyanakamulicisyaga masengo. Pati ayice, naliputisyaga ligasa lyangu pa ligasa lya mundujo. Nipo ulwele kapena cikamucisyo cakusaka mundujo, nayimanyililaga ndaŵi jijojo. Msimuwo soni wasalilaga winji wa mbiya syaŵaŵajilwaga kulipila ŵanduwo.
Napataga mbiya ni kupocela mituka jejinji ligongo lyakuti naposyaga cenene ŵandu ŵakulwala. Naŵele “jwakola cipanje,” nambo nakumanyililesoni gopolela kwa maloŵe gakuti “ngakola mwanace.” Katema kalikose kele kanakolaga mwanace, jwakulundana najojo jwajasikaga. Yeleyi yambwetekaga mnope. Pa yaka likumi kwisa yiŵili yanaŵele mkutenda yawasalilaga msimu welewu, ŵanace ŵangu ŵakwana msano ni jumo ŵajasice.
Natandite kupopela kwa Mlungu kuti angamucisye. Napopesile mwakulimbika. Line lisiku Mboni sya Yehova syawodisye pa mlango pangu. Atamose kuti moŵa gose natopolaga, lyele lisikulyo naganisisye kuti mbikane yakuti. Mu kukambilana kwetuko, nayimanyilile kuti natumicilaga ciŵanda! Nasimicisye kuleka kutenda yamisimu.
Panawusalile msimuwo yakuti nguleka kutenda yamisimu, wanjogoyisye kuti ngaleka. Nambo nawusalile kuti: “M’mwejo ni une tumalene.”
Najocice yindu yosope yanakamulicisyaga masengo pakutenda yamisimuyo. Natandite kulijiganya Baibulo ni Mboni sya Yehova, naŵele jwakutumicila Yehova, nipo nabatisidwe mu caka ca 1973. Utendewu, ngwete ŵanace ŵakwana msano ŵambonembonepe. Soni ni ŵamkwangu ŵakwe ŵaŵele Mboni jebatisidwe.—Mwaŵalongosolele Josephine Ikezu.
[Wusyo]
Libokosi: Ana jwamkongwe jwine jwayikombwele wuli kulilekanganya ku yiŵanda?
[Ciwulili pa peji 26]
Ana mpaka mkuye wuli dini jakuwona?