Lijiganyo 11
Mliŵambasye ku Dini Jaunami!
Satana ni yiŵanda yakwe ngakusaka kuti mumtumicileje Mlungu. Akusaka kuti naga yili yakomboleka ŵatendekasye ŵandu wosope kumleka Mlungu. Ana akusatenda mwatuli yeleyi? Cindu cimo cakusakamulicisya masengo Satana’jo ni dini jaunami. (2 Akolinto 11:13-15) Dini jikusaŵa jaunami naga ngajikwiganya yakuwona yakutyocela m’Baibulo. Dini jaunami jili cisawu mbiya jaunami—jikusawoneka cisawu jisyesyene, nambo jili cindu cangali mate, cakomboleka kum’ŵika pa yakusawusya.
Unami wa dini ngaŵa mkumsangalasya Yehova, jwali Mlungu jwausyesyene. Paŵaliji Yesu pacilambo capasi, kapali kakuga kane kadini kakasosaga kum’bulaga jwalakwejo. Ŵaganisyaga kuti kalambile kawoko kaliji kakulondola. Ŵatite kuti: “Tukwete Atati ŵamope, niwo Mlungu.” Ana Yesu ŵajiticisye yeleyi? Ngwamba! Ŵasalile kuti: “Ŵanganyamwe mli ŵanace ŵa Satana. Jwelejo nijo jwali atati ŵenu.” (Yohane 8:41, 44) Moŵa agano ŵandu ŵajinji akuganisya kuti akulambila Mlungu, nambo kusyesyene akutumicila Satana ni yiŵanda yakwe!—1 Akolinto 10:20.
Mwayikusaŵela kuti citela cangalumbana cikusasogola yisogosi yangalumbana, dini jaunami ŵandu ŵakwe akusatenda yangalumbana. Cilambo capasici yakusawusya yitupile ligongo lya yakusakala yakwitenda ŵandu. Yitendo yakusakala cisawu cisembwele, kumenyana, wiyi, kulamulila mwangalwe, kuwulaga ŵandu, ni kamulila cikululu, yiwandile kusa kuno. Ŵajinji ŵakusatenda yakusakalayi akwete dini, nambo dini jawojo ngajikwakamucisya kuti atendeje yambone. Jemanjaji ngaŵa mkuŵa acimjakwe ŵa Mlungu, akaŵe nambo naga ali alesile kutenda yakusakalayo.—Matayo 7:17, 18.
Dini jaunami jikusajajiganya ŵandu kuti apopeleje ku yiwanicisyo. Mlungu akusakanya kupopela ku yiwanicisyo. Yeleyi yili yakupikanika. Ana mpaka yimsangalasye naga jwine ali ngakuŵecetana namwe, m’malo mwakwe jwalakwejo nikwambaga kuŵeceta kwa cipikica cenu? Ana jweleju mpaka aŵe mjenu msyesyene? Ngwamba. Jwalakwejo ngaŵa mkuŵa mjenu. Yehova akusaka kuti ŵandu aŵeceteje kwa jwalakwejo, ngaŵa ku cakusema kapena cipikica cacili cangali umi.—Eksodo 20:4, 5.
Dini jaunami jikusajiganya kuti; kuwulaga ŵandu pandema ja ngondo yili yangali kandu. Yesu ŵatite kuti, acimjakwe ŵa Mlungu caciŵa ŵakunonyelana. Ŵandu ŵatukwanonyela ngaŵa mkwawulaga. (Yohane 13:35) Kulisoni kulemwa kuti twawulaje ŵandu ŵakusakala. Acimmagongo ŵa Yesu paŵayice kukumtaŵa, jwalakwejo nganiŵalecelela ŵakukulupilila ŵakwe kuti atande kumenyana nawo jemanjawo pakumcenjela jwalakwejo.—Matayo 26:51, 52.
Dini jaunami jikusajiganya kuti ŵakutenda yakusakala cakalaje ku moto wa Helo. Nambo Baibulo jikwinganya kuti ulemwa ukusalongolela ku ciwa. (Aloma 6:23) Yehova ali Mlungu jwacinonyelo. Ana Mlungu jwacinonyelo mpaka ŵalagasye ŵandu ni yipwetesi yangalwe yangamala? Mwaciwonecele ngaŵa mkutenda yeleyo! Mu paladaiso muciŵa dini jimope, jakujijiticisya Yehova. (Cibvumbulutso 15:4) Dini syosope syakujigalila unami wa Satana kuciŵa kwangali.