Lijiganyo 10

Mwakujipatila Dini Jakuwona

Naga mkusaka kuŵa mjakwe jwa Mlungu, mkuŵajilwa kukuya dini jakwiticisya Mlungu. Yesu ŵatite kuti “ŵandu ŵakulambila kusyesyene” cacimlambila Mlungu “mu usyesyene.” (Yohane 4:23, 24) Lipali litala limope lyakulondola lyakulambilila Mlungu. (Aefeso 4:4-6) Dini jakuwona jikulongolela ku umi wangamala, nipo dini jaunami jikulongolela ku konasika.—Matayo 7:13, 14.

Mpaka mjimanye dini jakuwona mwakwalolecesya cenene ŵandu ŵakukuya dinijo. Pakuŵa kuti Yehova ali jwambone, ŵandu ŵele ŵali ŵakulambila ŵakwe ŵakuwona akuŵajilwa kuŵa ŵandu ŵambone. Cisawu mwayikusaŵela kuti mlalanje wambone ukusasogola malalanje gambone, nombe najo dini jakuwona ŵandu ŵakwe ali ŵambone.—Matayo 7:15-20.

Acimjakwe ŵa Yehova akusajicimbicisya Baibulo. Akusamanyilila kuti Baibulo jili jakutyocela kwa Mlungu. Akusakuyaga yajikuti, acijiwonaga kuŵa jakwalongolela pa umi wawo, pakumasya yakusawusya yawo, soni ni kwakamucisya pakulijiganya ya Mlungu. (2 Timoteo 3:16) Akusalimbicila kutenda yakusalalicilayo.

Acimjakwe ŵa Yehova akusanonyelana. Yesu ŵalosisye kwanonyela kwakwe ŵandu, acajiganyaga pakwamba ya Mlungu, ni kwaposya ŵakulwala. Ŵele ŵakukuya dini jakuwona akusaŵanonyelasoni ŵane. Cisawu mwaŵatendelaga Yesu, ngakusaŵanyosya ŵandu ŵali ŵakulaga, kapena ŵali ŵakulekangana nawo mtundu. Yesu ŵatite kuti ŵandu cacamanyilila ŵakulupilila ŵakwe ligongo lyakunonyelana kwawo.—Yohane 13:35.

Acimjakwe ŵa Mlungu akusalicimbicisya lina lya Mlungu, lyakuti Yehova. Naga jwine alimkukana kulisala lina lyenu, ana jwalakwejo mpaka aŵe mjenu jwakusyoŵekana najo? Ngwamba! Tuli tukwete mjetu, tukusalikamulicisya masengo lina lyakwelyo, soni tukusatwasalila ŵane pakwamba ya umbone wa mjetujo. Ni sambano ŵele ŵakusaka kuŵa acimjakwe ŵa Mlungu, akuŵajilwa kulikamulicisya masengo linalyo ni kwasalila ŵane pakwamba ya jwalakwejo. Yehova akusaka kuti m’wejo tutendeje yeleyo.—Matayo 6:9; Aloma 10:13, 14.

Cisawu mwaŵatendelaga Yesu, acimjakwe ŵa Mlungu akusaŵajiganya ŵandu pakwamba ya Ucimwene wa Mlungu. Ucimwene wa Mlungu uli boma jakwinani jajicitendesya cilambo capasici kuŵa paladaiso. Acimjakwe ŵa Mlungu akusaŵasalila ŵane ngani syambonesi syakwamba ya Ucimwene wa Mlungu.—Matayo 24:14.

Mboni sya Yehova sikusatenda yakamucisya kuti siŵe acimjakwe ŵa Mlungu. Akusajicimbicisya Baibulo, nipo akusanonyelana. Akusalisala ni kulicimbicisya lina lya Mlungu. Soni akusaŵajiganya ŵane pakwamba ya Ucimwene wa Mlungu. Moŵa agano pacilambo cino capasi, Mboni sya Yehova sikukuya dini jakuwona.