Ana Ngani Syambone Sikusasala Yamtuli Pakwamba ya Dini?

1. Ana dini syosope sili syambone?

Apali ŵandu ŵachilungamo mu dini syosope. Ngani jambone jili jakuti Mlungu akusawonaga ŵandu ŵeleŵa, soni akusiŵanonyela. Nambo yakutesya chanasa yili yakuti, yindu yakusakala yiŵele mkutendekwa mu lina lya dini. (2 Akolinto 4:3, 4; 11:13-15) Mwakamulana ni malipoti gane, dini sine sikusatendaga nawo ya uchiswamba, kuwulaga mtundu wa ŵandu, ngondo, soni kwatendela ngalwe ŵanache. Yeleyi yiŵele mkwatumbilikasya ŵandu ŵambone mtima ŵakusakulupilila Mlungu.​—Aŵalanje Mateyu 24:3-5, 11, 12.

Nambo dini jisyesyene jikusamchimbichisyaga Mlungu. Dini jakusakala jikusamtumbilikasya. Diniji jikusajiganya yijiganyo yangatyochela m’Baibulo, mpela yijiganyo ya unami pakwamba ya Mlungu, soni ŵandu ŵawe. Nambo Yehofa akusaka kuti ŵandu amanyilile yisyesyene yakwamba jwalakwe.​—Aŵalanje Esekiele 18:4; 1 Timoteo 2:3-5.

2. Ana ngani syambone sikusasala yamtuli pakwambaya dini?

Yili yakusangalasya kumanyilila kuti dini syasikusanonyela chilambo cha Satanachi nganisiŵa simlambwisye Mlungu kuti sikusamnonyela. (Yakobo 4:4) Maloŵe ga Mlungu gakusasikolanga dini syosope syawunami kuŵa “Babulo Jwamkulungwa.” Babulo waliji msinda wakala kwajatandile dini jawunami chili chigambile kumala Chikumba kapena kuti chigumula cha mundaŵi ja Nowa. Pachangakaŵa, Mlungu mwakusisimuchisya chachimasya dini jaunami jajikwalagasya ŵandu.​—Aŵalanje Chiwunukuko 17:1, 2, 5, 16, 17; 18:8.

Panasoni ngani syambone sine. Yehofa ngaŵa mkwaliŵalila ŵandu ŵachilungamo ŵali mu dini syawunami pachilambo chosope. Jwalakwe akwasonganganya pampepe ŵandu mwakwajiganya usyesyene.​—Aŵalanje Mika 4:2, 5.

3. Ana ŵandu ŵakusachilila kumtumichila Mlungu jwakuwona akusosekwa kutenda chichi?

Yehofa akusiŵanonyela ŵandu ŵakusanonyela yindu yakuŵajilwa. Jwalakwe akwalimbikasya ŵandu kuti atyoche mu dini syawunami. Ŵandu ŵakusamnonyela Mlungu akusaŵa ŵakusachilila kuchenga umi wawo kuti amsangalasyeje.​—Aŵalanje Chiwunukuko 18:4.

Yaka 100 yandanda, ŵandu ŵambone mtima paŵapikene ngani syambone kwa ŵandumetume, ŵasangalele. Jemanjaji ŵalijiganyisye kutyochela kwa Yehofa katame kasambano ka umi wakusangalasya, wakola chakulinga, soni chembecheyo. Jemanjaji ali chisyasyo chambone kwa m’weji ligongo paŵapikene ngani syambone ŵapikanichisye kuti kumpikanila Yehofa kuli kwakusosekwa mnope paumi wawo.​—Aŵalanje 1 Atesalonika 1:8, 9; 2:13.

Ŵandu ŵalesile dini syaunami, Yehofa akwaŵilanjila mu liŵasa lya ŵakulambila ŵakwe. Naga akwika mu likuga lya Yehofa, chachipata achimjawo ŵa muliŵasa lya ŵandu ŵakunonyelana ŵakusalambila Yehofa, soni chachipata umi wangamala.​—Aŵalanje Maliko 10:29, 30; 2 Akolinto 6:17, 18.

4. Ana Mlungu chachitenda yamtuli kuti ŵandu aŵe ŵakusangalala pachilambo chosope?

Ngani jambone jili jakuti dini jawunami chajijonanje. Ŵandu chachipumula ku ulamusi wangalwe pachilambo chosope. Ngasijipagwasoni dini jawunami jakwalambusya ni kwagaŵanya ŵandu. Ŵandu wosope chachikamulana pakulambila Mlungu jumpepe jwali jusyesyene.​—Aŵalanje Chiwunukuko 18:20, 21; 21:3, 4.