Lijiganyo 9

Ana Ŵani Ŵali Acimjakwe ŵa Mlungu?

Yesu Klistu ali Mwanace jwa Yehova, soni mjawo jwakusyoŵekana najo mnope. Mkanayice kukutama cisawu mundu jwapacilambo capasi, Yesu ŵaliji lilayika lyamacili kwinani. (Yohane 17:5) Kaneko ni ŵayice pacilambo capasi kukwajiganya ŵandu yisyesyene pakwamba ya Mlungu. (Yohane 18:37) Jwalakwejosoni ŵapelece umi wakwe kuti ŵandu ŵele ŵali ŵakupikanila, ŵakulupusye ku ulemwa ni ciwa. (Aloma 6:23) Yesu sambano ali Mwenye jwa Ucimwene wa Mlungu, wawuli boma jakwinani jajicitendesya kuti pacilambo capasi paŵe Paladaiso.—Cibvumbulutso 19:16.

Malayika galisoni acimjakwe ŵa Mlungu. Malayika gelega ngaŵa kuti pandandapo galiji ŵandu ŵapacilambo capasi. Mlungu ŵagapanganyisye malayikaga kwinani, mkanapanganye cilambo capasi. (Yobu 38:4-7) Kwana mikutulamikutula ja malayika. (Danieli 7:10) Malayika gagali acimjakwe ŵa Mlungu ŵakwinaniga, gakusaka kuti ŵandu alijiganye yisyesyene pakwamba ya Yehova.—Cibvumbulutso 14:6, 7.

Mlungu akwetesoni acimjakwe pacilambo capasi; akusaŵatenda kuti mboni syakwe. Mboni pajikuŵa kunganya, jikusaŵeceta yakumanyilila pakwamba ya mundu kapena cindu cine cakwe. Mboni sya Yehova sikusaŵasalilaga ŵane yakuyimanyilila pakwamba ya Yehova ni lisosa lyakwe. (Yesaya 43:10) Mboni syelesi sikusaka kumkamucisya kuti mlijiganye yisyesyene pakwamba ya Yehova, mwagakutendela malayika. Akusaka kuti nomwe ŵakwe m’ŵe mjakwe jwa Mlungu.