LIJIGANYO 10
Ana Mpaka Ajimanyilile Chamtuli Dini Jisyesyene?
1. Ana pana dini jisyesyene jimo?
“Mligose ni ŵakulochesya ŵawunami.”—MATAYO 7:15.
Yesu ŵajiganyisye ŵakulijiganya ŵakwe pakwamba ya dini jisyesyene jimope. Jili mpela litala lyakulongolela ku umi wangamala. Yesu ŵaŵechete kuti, ‘Ŵandu ŵakulipata ali ŵakuŵalanjika.’ (Mateyu 7:14) Mlungu akusajitichisya kulambila kwakamulana ni Maloŵe gakwe Baibulo. Ŵandu ŵali mu dini jisyesyene akusakola chikulupi chimpepe.—Aŵalanje Yohane 4:23, 24; 14:6; Aefeso 4:4, 5.
Alolele fidiyo jakuti Ana Mlungu Akusajitichisya Kulambila Kulikose?
2. Ana Yesu ŵasasile yamtuli pakwamba ya Aklistu ŵawunami?
“Akwitichisya kuti akummanyilila Mlungu, nambo ni yitendo akusamkanaga.”—TITO 1:16.
Yesu ŵakalamwisye kuti ŵakulochesya ŵawunami chachisokonasya mpingo wa Chiklistu. Ŵakulochesya ŵawunamiŵa akusawoneka kusa kwawo mpela kuti akumtumichila Mlungu yisyesyene. Machalichi gawo akusagakolanga kuŵa ga Chiklistu. Nambo mpaka ŵamanyilile jemanjaji ligongo lya yitendo yawo. Chamtuli? Dini jisyesyene jikusijakamuchisya ŵandu ŵakwe kuŵa Aklistu ŵasyesyene ŵakola ndamo syambone.—Aŵalanje Mateyu 7:13-23.
3. Ana mpaka ŵamanyilile chamtuli ŵakutumichila Mlungu ŵasyesyene?
Alole yindu msano yakuyichisyayi:
Ŵakutumichila ŵasyesyene akusajiwona Baibulo kuŵa Maloŵe ga Mlungu. Akusatamaga mwakuya malamusi ga m’Baibulo. Myoyo dini jisyesyene jikusalekanganaga ni dini syasikusakuyaga nganisyo sya ŵandu. (Mateyu 15:7-9) Jemanjaji ngakusalalichila yindu yakulekangana ni yitendo yawo.—Aŵalanje Yohane 17:17; 2 Timoteo 3:16, 17.
Ŵakumkuya Yesu ŵasyesyene akusachimbichisya lina lya Mlungu lyalili Yehofa. Yesu ŵachimbichisyaga lina lya Mlungu mwakuliwandisya. Jwalakwe ŵakamuchisye ŵandu kummanyilila Mlungu. Ŵajiganyisyesoni kuti apopeleje kuti lina lya Mlungu liswejesyedwe. (Mateyu 6:9) Ana dini japi jajikwamanyisya ŵandu lina lya Mlungu kumangwawoko?—Aŵalanje Yohane 17:26; Aloma 10:13, 14.
Aklistu ŵasyesyene akusalalichila ya Uchimwene wa Mlungu. Mlungu ŵamtumisye Yesu kukulalichila ngani syambone sya Uchimwene. Chembecheyope cha ŵandu chili Uchimwene wa Mlungu. Yesu ŵajendelechele kuŵecheta yakwamba Uchimwenewo mpaka chiwa chakwe. (Luka 4:43; 8:1; 23:42, 43) Jwalakwe ŵasasile kuti ŵakumkuya ŵakwe chachilalichila ya Uchimwenewo. Naga jwine akwayichila ni kuŵechetaga yakwamba Uchimwene wa Mlungu, ana jwalakwejo akusaŵaga jwa dini japi? —Aŵalanje Mateyu 24:14.
Ŵakumkuya Yesu nganaŵa mbali ja chilambo chakusakalachi. Jemanjaji mpaka ŵamanyilile ligongo ngakusajigala nawo mbali mu ndale kapena ukangani wa m’chilambo. (Yohane 17:16) Ngakusakuyaga yitendo ni nganisyo syakusakala sya chilambochi.—Aŵalanje Yakobo 4:4.
Aklistu ŵasyesyene akusanonyelanaga mnope. Jemanjaji akusalijiganya kutyochela m’Baibulo kuchimbichisya mitundu josope ja ŵandu. Dini syawunami siŵele sili mkulimbikasya ngondo sya mitundu, nambo Aklistu ŵasyesyene ngakusatenda yeleyi. (Mika 4:1-3) Jemanjaji mwangalikwesya akusakamulichisya masengo ndaŵi jawo pakwakamuchisya, soni kwalimbikasya ŵandu.—Aŵalanje Yohane 13:34, 35; 1 Yohane 4:20.
4. Ana sambano akujimanyilila dini jisyesyene?
Ana dini japi jajikusajigala yijiganyo yawo yosope m’Baibulo, jajikusachimbisya lina lya Mlungu, soni jikusalalichilaga ya Uchimwene wa Mlungu kuti ni wawuli chembecheyope cha ŵandu? Ana likuga lyapi lyalikusalosya chinonyelo, soni lyalikusaŵambala ngondo? Akuganisya wuli?—Aŵalanje 1 Yohane 3:10-12.