YINDU PACHILAMBOPA NGAYIKWENDA

4 | Alimbisyeje Chembecheyo Chawo

LIGONGO CHICHI KUTENDA YELEYI KULI KWAKUSOSEKWA?

Yindu yayikutendekwa pachilambopa mpaka yatendekasyeje ŵandu kuti akasangalalaga. Sonitu ŵajinji akusaganisya kuti yindu nganiyiŵa yichenjile nikuŵa chenene. Ana jemanjaji akusatenda yamtuli?

Ŵane ngakusayikosya yakuti aganichisyeje yindu yayichitendekwa msogolo.
Ŵanesoni akusakolelwa kapena kukamulichisya masengo mitela jakusokonasya mtwe kuti akaganichisyaga yakusawusya yawo.
Pele ŵamnono akusaganisya yagamba kuliwulaga. Jemanjaji akusayiwona kuti umi uli wangali mate.

Yakusosekwa Kuyimanyilila Pangani ja Kulimbisya Chembecheyo Chawo

Amanyilileje kuti yakusawusya yine yakusasimana nayo nganiyiŵa yijigele ndaŵi jelewu mwamti mpaka yimale m’litala lyakuti wawojo nganalijembecheyaga.
Atamose kuti yakusawusya yakusimana nayo ngayikumala, nambope pana yindu yine yampaka atende kuti akombole kuyipilila.
Baibulo jikusatusalila kuti yakusawusya yatukusimana nayo yichimala. Chelechitu chili chembecheyo chambone.

Yampaka Atende Kuti Alimbisyeje Chembecheyo Chawo

Baibulo jikusati: “Mkaŵaga ŵakusingalilwa ni kuganisya ya malaŵi. Ya malaŵi ni ya malaŵi. Lisiku lili lyose lyana yakusawusya yakwe yakwepe.”—Mateyu 6:34.

Amalaneje ni yakusawusya ya palisikulyo. Akakundaga kuti kuganichisya yindu yakusogolo kwalepelekasyeje kukamula masengo ga pa lisikulyo.

Mpaka alagasicheje mnope nganisyo naga akusatamila kuganichisya yindu yakusawusya yakusayiwona kuti mpaka yatendechele msogolo. Yeleyi mpaka yalepelekasyeje kuganichisya yindu yambone yayichitendekwa msogolo.

ANA NI YINDU YAPI YAMPAKA YAKAMUCHISYE? Yindu Yampaka Atende

AGANICHISYEJE YINDU YAKULIMBIKASYA

Baibulo jikusati: “Masiku gosope ga mundu jwakulagasika gakusaŵa gakusakala, nambo mtima wakusangalala ukusaŵaga wakondwa ndaŵi josope.” (Misyungu 15:15) Naga tukusatamila kuganichisya yakusawusya yatukusimana nayo mpaka yitusawusyeje kupata litala lyakumalana ni yakusawusyayo atamose lili lipali. Nambo naga tukuganichisya yindu yakulimbikasya mpaka tupate matala gakumalana ni yakusawusya yatukusimana nayo.

Anandiye ndaŵi jawo jakusamalila ali mkupikanila kapena kuŵalanga nyusi.
Kumbesi kwa lisiku lililyose alembeje yindu yambone yiŵili kapena yitatu yayatendechele.
Lisiku lililyose alembeje yindu yakusaka kutenda palisikulyo. Naga akwete masengo gejinji agagaŵeje chenene ni kugakamulaga panandipanandi ni chakulinga chakuti pakumala kwa lisikulyo aloleje yakombwele kutenda.

AŴENDEJE KUTI ŴANE ŴAKAMUCHISYE

Baibulo jikusati: “Mundu jwakusalityosya mwikuga lya achimjakwe . . . akusagambaga kukuya yakumnonyela jwalakwe jika.” (Misyungu 18:1) Mpaka yiŵe yakusawusya kuti mundu akopoche jika mwisimbo lyesokoche mnope. Nambo naga mundu jwine akumkamuchisya mpaka akopoche mwangasawusya.

Ŵaŵendeje achimjawo kapena ŵachibale ŵawo kuti ŵakamuchisye.
Ŵakamuchisyejesoni ŵane. Kutenda yeleyi kuchakamuchisya kuti akagambaga kuganichisya yakusawusya yawo.
Naga ajasile mtima, soni akuyiwona kuti umi wawo uli wangali mate mpaka luŵe lunda kwawula kuchipatala. Ndaŵi sine kwasa mtima chikusaŵa chimanyilo chakuti mundujo akulwala. Mwine mpaka uŵe ulwele wamunganisyo. Ŵandu ŵajinji ŵamalene ni yeleyi ni chikamuchisyo cha ku chipatala.a

a Magasini ja Ajimuche! jangamsagulila mundu chikamuchisyo cha mtela.

Baibulo Jikusasala ya Chembecheyo Chisyesyene

Mundu jwine jwakala juŵalembile nawo buku ja masalimo, jwapopesile kwa Mlungu kuti, ‘Maloŵe gawo gali nyali ja kusajo syangu [soni lilanguka, NWT.] lyakumulichila litala lyangu.’ (Salimo 119:105) Kwende tulole kuti ana Baibulo jajili maloŵe ga Mlungu jili mpela nyali soni lilanguka m’litala lyamtuli?

Nyali jikusatukamuchisya chilo kuti tuloleje mwatukusosekwa kupita. Mwakulandana ni yeleyi, Baibulo jikwete malangiso gakusosekwa mnope gampaka gatukamuchisye pandaŵi jatukusagula yindu yakusawusya mnope.

Patukwenda, lilanguka mpaka litukamuchisye kuti tulole yindu yayili kusogolo kwetu. Mwakulandana ni yeleyi, Baibulo jikusatukamuchisya kumanyilila kuti kusogoloku kwana yindu yambone yachiyitendekwe.

Baibulo jajili buku jeswela, jikusasala ya mbili ja ŵandu kutandila pandanda pene. Nambosoni jikusasala yindu yambone yachitendekwe kusogoloku. Baibulo jikusajanga yiwusyo yakuyichisyayi:

1

Ligongo chichi ŵanduwe tukusasimana ni yipwetesi? Baibulo jikusati, “ulemwa wayiche pa chilambo chapasi ligongo lya mundu jumo, nipo ulemwawo wayiche nayo chiwa. Myoyo chiwa chijendelechele kwa ŵandu wosope ligongo jwalijose alemwisye.”—Aloma 5:12.

2

Ligongo chichi maboma ga ŵandu galepele kumasya yakusawusya? Baibulo jikusatusalila kuti, “mundu ngaŵa mkomboleka kulilongolela jikape.” (Yelemiya 10:23) Myoyo yakusawusya yayikutendekwa pachilambopa, yikulosya kuti yalikusala lilembali yili yisyene.

3

Ana Mlungu chachitenda chichi pakumasya yakusawusya yetu? Baibulo jikuti Mlungu “tachapukuta misosi josope m’meso mwawo. Ngasipapagwa chiwa, chanasa, kulila, kapena kupikana yipwetesi. Yindu yakala yosope yeneyi yimasile.”—Chiwunukuko 21:4.