Imagination World/stock.adobe.com
Utenga Wakutyochela m’Maloŵe ga Mlungu Uli Chembecheyo kwa Ŵandu Ŵatisile Kumangwawo
Chaka chilichose ŵandu ŵajinji akusatila msimangwawo. Ana wawojo akulaga ni ngani jeleji? Naga yili myoyo, amanyilile kuti nganaŵa jika. Sonitu Mlungu akusatusalila kutyochela m’Maloŵe gakwe kuti kusogoloku umi uchiŵa wambone.
“Ŵandu ŵatisile kumangwawo akusasosekwa yejinji ngaŵape kwamba kwapa chikamuchisyo chachitemachitema . . . Jemanjaji akusasosekwasoni kwasimichisya kuti kusogolo yindu yichiŵa chenene.”a Yeleyi yaŵechetedwe ni jumo mwa achakulungwakulungwa wa bungwe ja European Union,b Che Christos Stylianides. Ŵandu ŵakwete chembecheyo akusakolaga magongo gambone gakwakamuchisya kuti ayiwoneje yindu yakusogolo mwakuŵajilwa. Konjechesya pakola chembecheyo, jemanjaji akusasosekwa kwalimbikasya kuti akalagasikaga mnope nganisyo.
“Panamanyile kuti ngusosekwa kutila m’chilambo chetu, natengwiche mnope. Ŵangamwile mnope woga, naliji jwachanasa soni nalagasikaga nganisyo.”—Emmanuel, jwa ku Haiti.
Ana mwelemu ni mwayiŵelele ni wawojo? Naga atisile m’chilambo mwawo nikuti akusosechela mundu jwakuti ŵalimbikasye soni kwapa chembecheyo. Ana Baibulo gagali Maloŵe ga Mlungu, mpaka gakamuchisye chamti uli?
Maloŵe ga Mlungu mpaka galimbikasye
Baibulo jikusati: ‘Yehofac . . . akumsamnonyela mundu jwamtundu wine jwakutama pasikati penu.’—Detulonomo 10:17, 18.
Yeleyi yikugopolela kuti nganaŵa jika. Yehofa, jwali Mlungu juŵalembile Baibulo, akusapikanichisya mwayiŵelele yindu pa umi wawo, akusiŵanonyela nambosoni akusasamala ya wawojo.
Baibulo jikusati: “Yehofa ali pakuŵandika ni wosope ŵakusaŵilanga pa jwalakwejo.”—Salimo 145:18.
Yeleyi yikulosya kuti pakupopela, Yehofa akusiŵapikanaga Jwalakwe mpaka ŵakamuchisye kupata mtendele wa mumtima. Kupwatika pelepa mpaka ŵapesoni lunda lwakutyochela m’Baibulo kuti akombole kupilila.
Baibulo jikusati: “Yili yangakomboleka kuti Mlungu atende yakusakala . . . Jwamachiligosopejo jwangapindimasya chilungamo.”—Yobu 34:10, 12.
Yeleyi yikugopolela kuti Mlungu jwangatendakasya kuti wawojo alajeje. Jwalakwe ngakwapa wawojo chilango kapena kwalinga mwakutendekasya kuti umi wawo uŵe wakupweteka.
Maloŵe ga Mlungu mpaka galimbikasye kola chembecheyo
Baibulo jikusalondesya yindu yachachitutendela Mlungu kusogoloku. Alole mwachitendele chembecheyochi pakwakamuchisya ŵandu ŵaŵatisile kumangwawo.
Baibulo jikusati: “[Mlungu] chachipukuta misosi josope m’meso mwa ŵanduwo, mwamti chiwa ngasichipagwasoni. Ngasipapagwasoni yakutesya chanasa, kulila kapena kupikana kupweteka.”—Chiwunukuko 21:4.
Yeleyi yikugopolela kuti ngasitulagagasoni. Mlungu jwasasile kuti chachityosya yakusawusya yosope yayikusiyatendekasya ŵandu kuti aliwoneje kuŵa ŵangali chembecheyo.
“Pangakaŵapa, Mlungu chamasye yakusakala soni yindu yangali chilungamo yosope yayikusatutendechela. Chembecheyo chelechi chikusangamuchisya kuti nganichisyeje mnope ya ndaŵi jele kulaga kuchiŵa kwangali.”—Karla, jwa ku El Salvador.
Baibulo jikusati: “Yiyatendeche kalakala ngasayikumbuchila soni, tiyichiliŵalichika nditu.”—Yesaya 65:17.
Yeleyi yikugopolela kuti ngasitulagaga nganisyo ni yindu yitwasimene nayo. Mlungu chachitenda yakuti akalagasikaga nganisyo ni yakusakala yaŵasimene nayo mpaka kalakala.
“Baibulo jikusaŵecheta kuti ngasituyikumbuchila yindu yakupweteka yatwasimene nayo. Chembecheyo chelechi chikusangamuchisya kuti mbilileje yakusawusya yangu pakumunyilila kuti pangakaŵapa yakusawusyayi chiyimale.”—Natalia, jwa ku Ukraine.
Baibulo jikusati: ““Mlungu jwakwinani tachitamilisya uchimwene wele . . . tiwuchikasanya ni kugamasya ma uchimwene gane gosopego.”—Daniyele 2:44.
Yeleyi yikugopolela kuti boma jambone mnope jakwinani jichilamulilaga pachilambo chapasi. Pachangakaŵapa, Mlungu chatyosye ma boma gosope ga ŵandu ni kwikasya boma jakwe jakwinani. Bomaji jichiyikasya mtendele usyesyene, chiteteyo, chilungamo soni kutyosya usawuchi.—Mika 4:3, 4.
“Ngusalimbaga mtima kumanyilila kuti Uchimwene wa Yehofa chiwumasye yakusawusya yosope mpela kulagasyana, lusagu soni kayichilana.”—Mustafa, jwa ku Middle East.
Apate chikamuchisyo kutyochela mu utenga wakulimbikasya wakutyochela m’Baibulo
Lunda lwakamuchisya kutyochela m’Maloŵe ga Mlungu
Lunda lwakutyochela m’Baibulo lukusilwakamuchisya kupilila yakusawusya yayiyatendechele paumi wawo. Lundalu mpaka lwakamuchisyesoni kumanyilila yakutenda naga yindu yichenjile paumi wawo kapena naga alusile katundu jwine jwa paumi. Alole mwasikuti kwakamuchisya mfundo sya m’Baibulo syakuyichisyasyi ŵandu ŵatisile msimangwawo:
Baibulo jikusati: “Atamose mundu ali akwete yejinji, umi wakwe wangatyochela mu yindu yakweteyo.”—Luka 12:15.
Ana maloŵe gelega mpaka gakamuchisye chamtuli kupilila? Mwangakayichila naga tulusile katundu, tukusatenguka soni kusoŵa chitela chakamula. Nambo patutemi ni kuganichisya mfundo jakuti umi wetu ni wawuli wakusosekwa mnope kupunda yindu yampaka tuluse, tukusatanda kuyiwona yindu mwakuŵajilwa.
“Umi uli wakusosekwa mnope kupunda kutundu jwetu. Mwamti muyakutendekwa yine chipanje soni mbiya syetu nganiyiŵa yitukamuchisye.”—Natalia, jwa ku Ukraine.
Baibulo jikusati: “Mkawusyaga kuti, “Ligongo chichi masiku gakala yindu yaliji chenene kulekangana ni masiku agano?”—Jwakulalichila 7:10.
Ana maloŵe gelega mpaka gakamuchisye chamtuli kupilila? Komboleka kuti apano yindu paumi wawo nganiyiŵa chenene atapanandi, nambo patukuŵambala kulandanya muyaŵelele yindu munyuma ni apanopano, yikusatukamuchisya kuti tukadandawulaga.
“Kwitichisya mwayiŵelele yindu apano kukusangamuchisya kuti nayiwoneje yindu mwakuŵajilwa.”—El, jwa ku Rwanda.
Baibulo jikusati: “Naga tukwete yakulya soni yakuwala, tukusosekwa tujikutileje ni yindu yeleyi.”—1 Timoteyo 6:8.
Ana maloŵe gelega mpaka gakamuchisye chamtuli kupilila? Alinjejelinjeje kuŵa ŵakwikutila ni yindu yakusosekwa mnope yakwete paumi wawo. Kwikutila kuchakamuchisya kuti akajasaga mtima soni kuti akaŵaga ŵakudandawula mnope.
“Baibulo jikusangamuchisya kuti nayiwoneje yindu mwakulekangana ni mwangusaganichisyaga soni kuti ngaŵikaga nganisyo syangu pa yindu yalusile. Une ni ŵamkwangu tuli ŵakusangalala kuti tuli ni umi soni kuti tuli kumalo ga mtendele.”—Ivan, jwa ku Ukraine.
Baibulo jikusati: “Yindu yosope yimkusaka kuti ŵandu amtendele, jemanjasoni mwatendeleje yeleyo.”—Mateyu 7:12.
Ana maloŵe gelega mpaka gakamuchisye chamtuli kupilila? Gachakamuchisya kuŵa pamtendele ni ŵane naga akulingalinga kuŵa ŵakuwusimana mtima soni naga akusatendaga yindu mwakwaganichisya ŵane. Kutenda yeleyi kuchakamuchisyasoni kuti akaŵaga ŵalusagu. Pambesi pakwe, chachiŵa pamkamulano wambone ni ŵane mu dela jawo.
“Ŵandu ŵajinji akusasaka kuti twachimbichisyeje, kwaganichisyaga soni kwanonyela. Yeleyi yikusakamuchisya kuti aŵeje paunasi wambone ni ŵane.”—Angelo, jwa ku Sri Lanka.
Baibulo jikusati: “Mumsalileje Mlungu yakuŵenda yenu yosope mwipopelo . . . Pambesi pakwe, mtendele wa Mlungu . . . wuchichenjela mitima jenu soni nganisyo syenu.”—Afilipi 4:6, 7.
Ana maloŵe gelega mpaka gakamuchisye chamtuli kupilila? Amsalileje Mlungu mwakupikanila mumtima, yindu yakusosechela, yayikwatesya woga, soni yakuyidandawula. Kutenda yeleyi kuchakamuchisya kuti akatamilaga kudandawula ni yayikwatendechelayo.
“Naga ngwete yakusawusya, ngusapopela kwa Mlungu soni jwalakwe akusanjanga. Sonitu yanalijiganyisye m’Baibulo yikusangamuchisya kuti mbate mtendele usyesyene.”—Yol, jwa ku South Sudan.
“Yajikusasalaga Baibulo yikusangamuchisya kuti ngole mtendele wa mumtima wawukusangamuchisya kupilila yakusawusya.”—Valentina, jwa ku Ukraine.
“Kumanyilila yasasile Yehofa Mlungu yakwamba umi wambone kusogolo kukusalimbikasya.”—Emmanuel, jwa ku Haiti
Ana akusaka kumanyilila yindu yakulimbikasya yajikusasalaga Baibulo soni yindu yambone yatukwembecheya kusogoloku soni ligongo lyakwe tukusosekwa kulupilila yeleyi? Aŵende jwa Mboni sya Yehofa kuti ŵajendele. Jwalakwe chachiŵa jwakusangalala kwakamuchisya.
a Mbali ja UN jakulola ya ŵandu ŵatisile kumangwawo (UN Refugee Agency) jikusasalaga kuti ŵakutila kumangwawowa akusapwatikapo ŵatisile kumangwawo nambo akutamape m’chilambo chawopecho soni ŵatilile m’yilambo yakusa atamose kuti lilamusi nganiliŵe kwajitisya kwakolanga kuti ŵakutila kumangwawo.
b European Union Commissioner for Humanitarian Aid and Crisis Management.
c Yehofa lili lina lisyesyene lya Mlungu. (Salimo 83:18) Aŵalanje ngani jakuti “Ana Yehofa Ali Ŵani?”