YINDU PACHILAMBOPA NGAYIKWENDA

3 | Alimbisyeje Unasi Wawo

LIGONGO CHICHI KUTENDA YELEYI KULI KWAKUSOSEKWA?

Ligongo lyakuti yindu yisawisye mnope pachilambopa, ŵandu ŵajinji yikwasawusyaga kulimbisya unasi wawo.

Ŵandu ŵanganonyelaga kutama yimpepe ni achimjawo.
Ŵalombane akusatenda yindu mwangaganichisyana.
Achinangolo ŵangayikosyaga yindu yayikwalagasya nganisyo ŵanache ŵawo.

Yakusosekwa Kumanyilila Pangani ja Kulimbisya Unasi Wawo

Naga mundu akwete achimjakwe yikusamkamuchisyaga kuti akole chilu chambone soni kuti atamilichiche nganisyo mnopemnope pandaŵi jakusimana ni yakusawusya.
Kulagasika nganisyo kwakukusatanda ligongo lya yindu yakusawusya yayikutendekwa kuchilamboku mpaka kusokonasye liŵasa lyawo m’litala lyele nganalijembecheyaga.
Ŵanache ŵawo mpaka atendeje mnope woga papikene kapena kulolela nyusi syakogoya.

Yampaka Atende Kuti Alimbisyeje Unasi Wawo

Baibulo jikusati: “M’mbusanga akusakunonyela ndaŵi ni ndaŵi, soni mlongo mjakwe ŵapagwile kuti atukamuchisye pandawi ja yisawusyo.”—Misyungu 17:17.

Achimjetu mpaka atukamuchisye kapena kutupa malangiso gakamuchisya. Achimjetuŵa akusatukamuchisya kupilila patukusimana ni yakusawusya.

ANA NI YINDU YAPI YAMPAKA YAKAMUCHISYE? Yindu Yampaka Atende

Naga yindu ngayikwenda mpaka atende yindu yakuyichisyayi kuti alimbisye unasi wawo

ALIMBISYEJE ULOMBELA WAWO

Alimbisyeje ulombela wawo

Baibulo jikusati: “Kuli kwambone kutama ŵandu ŵaŵili kulekangana ni kutama jikape . . . Pakuti jemanjajo naga akugwa, jwine tachimjimusya mjakwe.” (Jwakulalichila 4:9, 10) Ŵalombane atendeje yindu mwakamulana mpela mwakusatendela ŵakuputa mpila ŵali timu jimpepe kuti awine. Nambo akatendaga yindu mpela ŵakuputa mpila ŵali mmatimu gakulekangana.

Kulagasika nganisyo kukatendekasyaga kwaŵecheta ŵamkwawo mwawukali. Mmalomwakwe aŵeje ŵakuwusimana mtima.
Wiki jilijose aloleje naga pana yindu yakusawusya yakusosekwa kambilana. Pakutenda yeleyi aŵambaleje kulanjilana yala, agambeje kulimbana ni chakusawusyacho.
Apateje ndaŵi jakutendela yindu yimpepe yele jwalijose akusasangalala nayo.
Akumbusyaneje yindu yine yakusangalasya yaŵatendele yimpepe. Mwachisyasyo, mpaka aloleje yiwulili yaŵajambulisye palisiku lya ŵalombene. Kapena yaŵajambulisye payakutendekwa yine yakusangalasya.

“Ŵalombane ngaŵa kuti mpaka agambeje kukamulana pachilichose. Nambo yeleyi ngayikugopolela kuti jemanjaji nganaŵa akombwele kutenda yindu mwakamulana. Ŵalombane mpaka asagule yimpepe kutenda chinachakwe. Nambo kuti yasagwileyi yikomboleche akusosekwa kutenda yindu mwakamulana.”—Jwaŵechete myoyo David.

AŴEJE PAUNASI WAMBONE NI ACHIMJAWO

Alimbisyeje unasi wawo ni achimjawo

Akagambaga kwembecheya kuti achimjawo ŵakamuchisyeje. Wawojosoni aloleje yampaka atende kuti ŵakamuchisye achimjawo. Pakwalimbikasya achimjawo yikusiyalimbikasyasoni wawojo.
Lisiku lililyose aŵechetaneje ni achimjawo kuti amanyilile mwayiŵelele yindu paumi wawo.
Naga akusimana ni yakusawusya yine yakwe ŵawusyeje achimjawo ŵaŵasimene ni yakusawusya yakulandana ni yawo kuti ŵasalile yayakamuchisye.

“Pakusimana ni yakusawusya yekulungwa mpela chimbungo chamachili, achimjawo mpaka ŵakamuchisye. Komboleka kuti jemanjaji mpaka agambe kwakumbusya yindu yine yakuyimanyilila kala. Achimjawoŵa akusiŵanonyela, soni akusamanyilila kuti wawojo akusiŵanonyelasoni jemanjajo.”—Jwaŵechete myoyo Nicole.

ŴAKAMUCHISYEJE ŴANACHE ŴAWO

Ŵakamuchisyeje ŵanache ŵawo

Baibulo jikusati: “Jwalijose akwenela kuŵa jwachitema kupikana, jwakokoŵa kuŵecheta.” (Yakobo 1:19) Ŵanache mpaka yasawusyeje kwasalila mwakupikanila mumtima mwawo. Nambo naga akwapikanila mwakuwusimana mtima yeleyi mpaka yakamuchisye. Kaneko mpaka atande kwasalila yindu mwagopoka.

Atendeje yakuti ŵanache ŵawo aŵeje ŵagopoka kwasalila ya ku mtima kwawo. Ŵanache ŵane yikusiyasawusya kulilondesya naga achinangolo ŵawo agambile kwaŵilanga ni kutanda kwawusya yiwusyo. Nambo jemanjaji mpaka agopoche kulilondesya pakutenda yindu yine yakusangalasya. Mpela pajawile kukongola ngongolo kapena pakwesile m’galimoto.
Alolechesyeje kuti ŵanache ŵawo ngakulolela kapena kupikanila nyusi syampaka syasokonasye.
Ŵasalileje ŵanache ŵawo yindu yasagwile kuti alichenjele liŵasa lyawo.
Ŵasalileje ŵanache ŵawo yampaka atende pasitendekwe ngosi soni alinjilileje yasasileyo.

“Aŵechetaneje ni ŵanache ŵawo, soni atendeje yakuti ŵanacheŵa aŵeje ŵagopoka kwasalila mwakupikanila. Jemanjaji mpaka asiseje yindu yayikwajogoya, kwalagasya nganisyo, kapena kwatumbilikasya. Ŵasalileje kuti nombenawo akusasimana ni yeleyi, soni yaŵatesile kuti akombole kumalana nayo.”—Jwaŵechete myoyo Bethany.