Tupitilisye Kuŵa Paujakwe ni Aklistu Achimjetu

1. Ana achimjetu ŵasyesyene mpaka twapate kwapi?

M’MASIKU gakumalisya gano, umi uli wakusawusya mnope soni mpaka uŵe wakupweteka naga nganitukola achimjetu ŵasyesyene. Yehofa akusamanyilila yeleyi ni ligongo lyakwe ŵatupele achimjetu ŵasyesyene kutyochela mu gulu jakwe. (Sal. 119:63) Wosopewe tuli m’liŵasa lya ŵandu ŵakusamlambila Yehofa soni ŵakusanonyelana.

2. Ana tukusasosekwa kutenda chichi kuti tukole achimjetu?

² Kuti tuŵe paujakwe wambone ni abale ni alongo ŵetu, tukusosekwa kwamanyilila chenene. Kuti yeleyi yikomboleche, tukungulucheje nawo soni tuŵeje ŵakulupichika kwa jemanjaji. Tuli m’liŵasa lya ŵandu ŵakusamnonyela Yehofa soni Yesu, mwamti chinonyelo chelechi chikusatutendekasya kuŵa ŵakamulana. (Yoh. 13:35) Nambo kuti tuŵe paujakwe wambone ni Aklistu achimjetu ngayikusagamba kutendekwa mwajika, tukusasosekwa kulimbichila mnope. Ni pakuŵapo tuli ŵangali umlama, ndaŵi sine mpaka yiŵe yakusawusya kupitilisya kuŵa paujakwe ni achimjetuŵa.

3. Ligongo chichi mpaka yiŵe yakusawusya kuŵa paujakwe ni ŵandu ŵane?

³ Wosopewe tukwete ŵandu ŵatukusakamulana nawo mnope kulekangana ni mwatukusatendela ni ŵane. Ligongo chichi yili myoyo? Ligongo lyakuti ni ŵanduwo tukusanonyela yindu yakulandana kapena tukwete ndamo sine syakulandana. Nambope, ndaŵi sine mpaka tuyiwoneje kuŵa yakusawusya kuŵa paujakwe ni abale ni alongo ŵane. Mpaka yitusawusyeje kwanonyela jemanjaji naga ndaŵi jine twatindene nganisyo. Mwinesoni ngatukusasangalala kukunguluka ni jemanjaji ligongo lyakuti tukusalekangana ndamo soni mwatukusayiwonela yindu. Kombolekasoni ndaŵi sine, mpaka yitusawusyeje kukunguluka ni m’bale kapena mlongo jwakulwala kapena jwakulagasika nganisyo. Myoyo munganiji, chitukambilane chisyasyo cha Yesu champaka chitukamuchisye kuti tupitilisye kuŵa paujakwe ni Aklistu achimjetu patusimene ni yakusawusya. Nambo chandanda, kwende tulole ndamo syakwete Mlungu syampaka situkamuchisye kuti tupitilisye kuŵa paujakwe ni Aklistu achimjetu.

TUMSYASYEJE MLUNGU KUTI TUPITILISYE KUŴA PAUJAKWE NI AKLISTU ACHIMJETU

4. Ana mpaka tutende yamti uli kuti tuŵe paujakwe wambone ni Aklistu achimjetu?

⁴ Kuti tuŵe paujakwe wambone ni Aklistu achimjetu, tukusosekwa tumanyilileje ndamo syambone syakwete jemanjajo. Kuti yeleyi yikomboleche, tupateje ndaŵi jakunguluka nawo. Ndumetume Paulo jwasachililaga ali awonegene ni abale ni alongo. Jwalakwe jwawulembele mpingo wa kwa Atesalonika kuti: “Twatesile yiliyose yakomboleka kuti tuwoneganesoni ni jemanja pameso ni pameso.” (1 Ates. 2:17) Abale ni alongo ŵajinji akusayiwona kuti kupata ndaŵi jakunguluka ni Aklistu achimjawo lili litala lyambone mnope lyakwakamuchisya kuti aŵe paujakwe wambone ni jemanjajo. Mpaka tutende yeleyi, patukukamula masengo gakulalichila, patukusimanikwa pa misongano ja mpingo, ja dela, soni ja chigawo. Nambope, naga mundu jwine tukwete najo magongo, kwamba kuŵa yimpepe ni mundujo nganikuŵa kumasisye chakusawusyacho.

5. Ana mpaka tutende chichi kuti tuŵe paujakwe ni mundu jwine atamose yili mkuwoneka kuŵa yakusawusya kutenda yeleyo? Apeleche chisyasyo. (Akolose 3:12)

⁵ Naga tukukola ndamo syakwete Mlungu yichiŵa yangasawusya kuŵa paujakwe ni ŵane atamose yili mkuwoneka kuŵa yakusawusya kutenda yeleyo. (Aŵalanje Akolose 3:12.) Ndamo mpela kulinandiya, kuwusimana mtima, chanasa, soni umbone mtima, mpaka situkamuchisye kuti tumalene ni yakusawusya yampaka yitutendekaye kuti tukaŵa paujakwe wambone ni ŵane. Mwachisyasyo, mpela mwayikusaŵela kuti injeni ja galimoto jikusasosechela oyilo kuti galimotojo jijendeje chenene nombe m’weji naga tukukola ndamo syakwete Mlungu mpaka situkamuchisye kuti tuŵe paujakwe wambone ni ŵane. Sambano, kwende tukambilane yindu yitatu yampaka yitendekasye kuti yiŵe yakusawusya kuŵa paujakwe wambone ni Aklistu achimjetu. Patukambilana chituyiwone kuti kujigalila yaŵatendaga Yesu pakulosya kulinandiya, kuwusimana mtima, umbone mtima, soni chanasa mpaka yitukamuchisye kuti tupitilisye kuŵa paujakwe wambone ni abale ni alongo ŵetu.

PATUTINDENE NGANISYO NI ŴANE

6. Ligongo chichi mpaka yiŵe yakusawusya kuŵa paujakwe ni mundu jwatutindene najo nganisyo?

⁶ Ligongo chichi chili chakusawusya? Ŵandu patindene nganisyo, jwalijose akusayiwona kuti nganisyo syakwe sili syakuŵajilwa kulekangana ni sya mjakwejo. Mwachisyasyo, abale ŵaŵili mpaka alekangane nganisyo pakwamba ya litala lyambone lyampaka akuye kuti akombole kulalichila gawo ja kagulu kawo ka utumiki. Jwalijose mpaka ayiwoneje kuti nganisyo syakwe ni syampaka sikamuchisye. Chakutendekwa chamwana mpela chelechi mpaka chikule nikwika pakwatendekasya abaleŵa kuleka kukunguluka. Jwalijose mpaka aganisyeje kuti nganisyo syakwe sili syakulondola mmalo mwakuganichisya yampaka atende kuti apitilisye kuŵa ŵakamulana. Naga nganijo ngakukambilana ni kujimasya mwachitema mpaka aleche kumwelana mesi. Mkupita kwa ndaŵi, mpaka awoneganeje mpela likoswe ni chome mwamti kaneko mpaka aleche kukunguluchila yalumo. Yosopeyi mpaka yitendekwe ligongo lya ngani jamwana.

7. Ana Yesu ŵatesile chichi pakwajiganya ŵakulijiganya ŵakwe kumanyilila kuti kuŵa ŵakulinandiya mpaka kukamuchisye kumasya kulekangana nganisyo?

⁷ Yampaka tulijiganye kutyochela kwa Yesu pangani jakulinandiya. Jwalakwe ŵajiganyisye ŵakulijiganya ŵakwe kuti akusosekwa kuŵa ŵakulinandiya kuti akombole kumasya kulekangana nganisyo. Ndaŵi syejinji ŵakulijiganyaŵa ŵakanganaga pakwamba juŵaliji jwamkulungwa pasikati pawo. Pakusaka kwakamuchisya kumalana ni chakusawusyachi, Yesu ŵasalile kuti akusosekwa kwawonaga ŵane kuŵa ŵakwapunda. (Mat. 20:​25-28) Kusala yisyene, Yesu ŵajiganyaga yampaka atende kuti aŵe ŵakulinandiya. Atamose chilo cha lisiku lyakuti chawulajidwe malaŵi gakwe, jwalakwe ‘ŵapele chisyasyo’ chakuŵa jwakulinandiya paŵajojesye sajo syawo. Yesu jwakamwile masengo gagasosekwaga kukamulidwa ni mundu juŵaliji kapolo. (Yoh. 13:​3-5, 12-16) Pelepatu, jwakamuchisyaga ŵakulijiganyaŵa kumanyilila yaŵasosekwaga kutenda kuti apitilisye kuŵa paujakwe wambone ni ŵane. Yikaŵe kuti jemanjaji ŵawonaga ŵane kuŵa ŵakwapunda, yikatendekasisye kuti patindene nganisyo aŵeje ŵakundilila. Kutenda yeleyi kukakamuchisye kuti apitilisye kuŵa paujakwe.

8. Patindene nganisyo ni Mklistu mjawo, ana kulinandiya mpaka kwakamuchisye wuli kuti apitilisye kuŵa paujakwe? (Akolose 3:13) (Alolesoni yiwulili.)

⁸ Yampaka atende kuti apitilisye kuŵa paujakwe. Kuŵa ŵakulinandiya mpaka kwakamuchisye kuti ŵakululuchileje ŵane mmalo mwakutamila ganichisya yindu yamwanamwana yele ngakukamulana. (Aŵalanje Akolose 3:13.) Patindene nganisyo ni mjawo, kulinandiya mpaka kwakamuchisye kuti akatumbila chitema kapena kuŵecheta maloŵe gampaka gamkuŵasye mjawo. (Sal. 4:4) Naga mjawojo ŵaŵechetele maloŵe gakupweteka, akumbuchileje kuti wosopewe pakwete patuŵechete yindu yele panyuma pakwe twalijimbile nayo magambo. (Jwak. 7:​21, 22) Myoyo aliwusyeje kuti, ‘Ana chakusosekwa mnope ni chapi, kuŵa paunasi wambone ni mjanguju kapena kumlosya kuti nganisyo syangu sili syakuŵajilwa?’ Mpaka atende chenene kwamba kukunda nganisyo sya mjawojo. Nambosonitu mpaka akole mtendele wa mumtima naga akujiliŵalila nganijo soni kuŵambala kumkumbusya mjawojo.

9. Naga yikwasawusya kukamulana chindu chimpepe ni mjawo, ana kuŵa ŵakulinandiya mpaka kwakamuchisye chamti uli? (Misyungu 17:9)

⁹ Kuŵa ŵakulinandiya mpaka kwakamuchisyesoni naga yikwasawusya kukamulana chindu chimpepe ni mjawo. Ngakusosekwa kukangana ni mjawojo pakusaka kulosya kuti nganisyo syawo sili syakulondola. (Aŵalanje Misyungu 17:9; 1 Akoli. 6:7) Chakulinga chawo chiŵeje kusaka kuŵa paunasi wambone ni mjawojo. Ŵandu ŵajinji ayiweni kuti kupata ndaŵi ni kambilana ya chakusawusya chachipalicho kuli kwakamuchisya. (Sal. 34:14) Pakukambilana mpaka aŵechete kuti: ‘Tuŵele tuli paujakwe kwa ndaŵi jelewu. Ana yili yakomboleka kuti tukambilane yayitendekweyi?’ Aŵeje ŵakoseka kwitichisya kuti wawojo atendekasisye kuti akakamulana pa chindu chimpepe soni kuti amkuŵesye mjawojo. Kaneko ampepesye mwachitema. Soni naga mjawojo akwaŵenda kuti amkululuchile, mwakulinandiya akusosekwa kumkululuchila. (Luk. 17:​3, 4) Akumbuchileje kuti chakulinga chawo nganichiŵa kupata jwalemwisye kapena jwanganalemwa nambo chili kumasya ungakamulanawo soni kupitilisya kuŵa paunasi wambone.—Mis. 18:24.

KULEKANGANA YINDU YAKUSANONYELA

10. Ligongo chichi mpaka yiŵe yakusawusya kuŵa paujakwe ni achimjetu?

¹⁰ Ligongo chichi chili chakusawusya? Mpaka tuyiwoneje kuŵa yakusawusya kuŵa paujakwe wambone ni abale ni alongo ŵatukusalekangana nawo yindu yatukusanonyela. Yeleyi mpaka yitendekwe ligongo lyakuti ŵane akusatenda yindu yayikusatusakalisya. Ŵandu ŵane akusatenda yindu yangatusangalasya ligongo lyakuti munyumamu ŵatendeledwe yindu yangali chilungamo kapena ŵakulile ku dela jele ŵandu ŵakwe ŵanganonyela kusala nganisyo syawo kapena akusaŵa ŵagopoka mnope. Pele pane mpaka yitusawusyeje kukunguluka ni Mklistu mjetu ligongo lyakuti jumo mwa m’weji akusanonyela kukunguluka mnope ni ŵandu pele jwine akusanonyela kuŵa pajika.

11. Ana Yesu ŵakombwele chamti uli kupitilisya kuŵa paujakwe ni ŵandu ŵaŵalekanganaga nawo yindu yakusanonyela?

¹¹ Yampaka tulijiganye kutyochela kwa Yesu pangani ja kuwusimana mtima. Yesu jwapitilisye kuŵa paujakwe ni ŵandu ŵaŵalekanganaga nawo yindu yakusanonyela. Mwachisyasyo, ndumetume Yakobo soni Yohane ŵalosisye kuti ali ŵakulikwesya paŵamŵendile Yesu kuti chiŵape udindo wapenani mu Uchimwene wa Mlungu. (Mak. 10:​35-37) Mwakulekangana ni jemanjaji, Yesu jwalosisye kuti ali jwakulinandiya paŵalesile udindo wakwe wekulungwa kwinani soni masengo gakusosekwa gaŵakamulana ni kwika pachilambopa. (Afil. 2:​5-8) Pelepatu mpaka ayiwone kuti Yesu jwaliji jwakulekangana mnope ni Yakobo soni Yohane. Nambope atamose yaliji myoyo, jwalakwe jwatendaga yindu mwakuwusimana mtima ni jemanjaji soni ŵandu ŵane.

12. Ana ni chichi chachamkamuchisye Yesu kuti atendeje yindu mwakuwusimana mtima ni achimjakwe?

¹² Yesu nganajembecheyaga kuti ŵakulijiganya ŵakwe chatendeje yindu mpela jwalakwejo. Jwalakwe jwamanyililaga chenene kuti yaŵaŵendile Yakobo ni Yohane yalosyaga msimu wa mpikisano wawakwete ŵakulijiganya ŵakwe ŵajinji. (Mak. 9:34) Yesu jwapikanichisyaga ŵakulijiganya ŵakweŵa ligongo nombenajo jwakulile ku dela jele ŵandu ŵajinji ŵayiwonaga kuti kukola udindo soni kuŵa ŵakumanyika yili yakusosekwa mnope. Atamose yaliji myoyo, jwapitilisye kutenda yindu mwakuwusimana mtima ni jemanjaji mwamti jwakamuchisyaga kuti akombole kumalana ni ndamo ja kunyada soni jakuliwona kuŵa ŵakusosekwa mnope. Ndamo syele ŵakwete kwa yaka yejinji.—Mak. 10:​42-45.

13. Ana kuŵa ŵakuwusimana mtima mpaka kutukamuchisye chamti uli kupitilisya kuŵa paujakwe ni achimjetu? (Aefeso 4:2)

¹³ Yampaka atende kuti apitilisye kuŵa paujakwe. Atendeje yindu mwakuwusimana mtima soni aŵeje ŵakundilila kwa abale ni alongo ŵawo atamose yili mkuti akwete ndamo syasikwasakalisya. (Mis. 14:29) Wosopewe tukwete ndamo sine syele nganisiŵa syakusakala nambo sigambile kuŵa mbali ja umundu wetu mwamti tukusasangalala naga ŵandu ŵane akutenda yindu ni m’weji mwakamulana ni mwatuŵelele. (Aŵalanje Aefeso 4:2.) Nombe m’weji tukundeje kutenda yindu ni ŵane mwakamulana ni mwaŵelele jemanjajo. Kupwatika pelepa, tuganichisyejesoni kulingalinga kwampaka atende mundu jwa sooni soni jwanganonyela kuŵecheta kuti akombole kukunguluka ni ŵane. Nambosoni, tukusasosekwa kutenda yindu mwakuwusimana mtima ni mundu jwakusanonyela kuŵecheta mnope soni kusimanikwa pa gulu jilijose ja ŵandu. Yili yisyene kuti nganiyiŵa yikomboleche kuti jwalijose aŵe mjetu jwapamtima. Nambope, tukusosekwa tukumbuchileje kuti yili yakomboleka kukamula masengo ni Mklistu jwalijose atamose jwatukusalekangana najo yindu yatukusanonyela.

14. Ana kuŵa ŵakulinandiya mpaka kututendekasye kutenda chichi?

¹⁴ Kuŵa ŵakulinandiya mpaka kututendekasye kuti tuloleje mnope ndamo syambone syakwete abale ni alongo. Kutenda yeleyi mpaka kukamuchisye kuti unasi wetu ukasokonechela naga tukusalekangana yindu yatukusanonyela. Mwachisyasyo, yili yisyene kuti Yakobo ni Yohane ŵatesile yindu mwakulikwesya paŵaŵendile kuti chiŵape udindo wekulungwa mu Uchimwene wa Mlungu. Nambope, yaŵaŵendileyi yalosisye kuti ŵakulupililaga kuti Uchimwenewu uchiyika. Mwamti Yesu jwayamichile ligongo lya chikulupi chawo. Nombe m’weji patukulola ndamo syambone syakwete achimjetu, tukusaŵa tuli mkujigalila chisyasyo cha Yesu soni Atati ŵakwe ŵali Yehofa.

15. Ana ni ŵani ŵampaka atukamuchisye kuti tupitilisye kuŵa paujakwe ni ŵandu ŵatukusalekangana nawo yindu yatukusanonyela?

¹⁵ Chindu chine chakusosekwa mnope champaka tutende chili kumŵenda Yehofa kuti atukamuchisye kuti tupitilisye kuŵa paujakwe ni Aklistu achimjetu ŵatukusalekangana nawo yindu yatukusanonyela. Alinjeje kuganichisya yindu yampaka atende mjawo soni yampaka yatumbilikasye. Kaneko, amŵendeje Yehofa mkanipaŵe kuti chiŵakamuchisye kuŵa ŵakuwusimana mtima. Akumbuchileje kuti Yehofa Mlungu Juŵatupanganyisye akusamanyilila kuti ŵanduwe tukusatenda yindu mwakulekangana ni ŵane. Myoyo papopesile, akulupilileje kuti Yehofa akwamanyilila chenene soni kuti chiŵakamuchisye kuti akombole kupilila. Soni pakuyiwona kuti yikwasawusya kuŵa ŵakuwusimana mtima amŵendeje Yehofa kuti ŵape msimu weswela wampaka wakamuchisye kutenda yindu mwalunda.—Luk. 11:13; Agal. 5:​22, 23.

ABALE NI ALONGO PAKUSIMANA NI YAKUSAWUSYA

16. Ana ni yakusawusya yapi yampaka tusimane nayo naga abale ni alongo akusimana ni yakusawusya yineyakwe?

¹⁶ Ligongo chichi chili chakusawusya? Naga abale ni alongo akusimana ni yakusawusya paumi wawo kapena akulagasika nganisyo ni yineyakwe, mpaka atende yindu yampaka yitusakalisye. Mwachisyasyo, mpaka asacheje ali atemi pajikape, mpaka atumbileje chitema, mwinesoni mpaka aŵechete kapena kutenda yindu yampaka yitukuŵasye. (Yob. 6:​2, 3) Ligongo lyangamanyilila yakusawusya yakusimana nayo jemanjajo mpaka tujembecheyeje kuti nganaŵa atesile yindu yampaka yitukuŵasye.

17. Ana yaŵatesile Yesu kwa Batimeyo juŵaliji jwangalola yikutujiganya chichi?

¹⁷ Yampaka tulijiganye kutyochela kwa Yesu pangani jakulosya chanasa soni umbone mtima. Yesu jwalosyaga chanasa soni umbone mtima ŵandu ŵaŵasimanaga ni yakusawusya atamose yili mkuti kuli kutanda kusimana nawo. Mwachisyasyo, aganichisye muŵatendele yindu ni mundu jwangalola lina lyakwe Batimeyo. Jwalakwe paŵagambile kupikana kuti Yesu ayiche, jwatandite kugumila mwamachili ni chakulinga chakuti Yesu amanyilile kuti akumŵilanga. Nambo ŵane mwa ŵandu ŵaŵaliji pelepo ŵamsalile Batimeyo kuti atame jii. Mmalo mwakutama jii, jwalakwe jwapitilisye kugumila mnope ligongo jwasachililaga kuti Yesu amposye. Ana yaŵatesile Batimeyo yatumbilikasisye ŵane mwa ŵandu ŵaŵaliji pamalogo? Komboleka. Nambo atamose yaliji myoyo, Yesu “chamkamwile mnope chanasa” mwamti jwaliji jwakusachilila kumkamuchisya Batimeyo. (Mat. 20:34; Mak. 10:​46-52) Yesu jwamyamichile Batimeyo ligongo lya chikulupi chaŵakwete soni ŵamposisye mwamti jwatandilesoni kulola.

18. Ana akusosekwa kutenda yindu mwamti uli ni mjawo jwakusimana ni yakusawusya? (1 Atesalonika 5:14)

¹⁸ Yampaka atende kuti apitilisye kuŵa paujakwe. Aŵeje ŵachanasa soni amlosyeje mjawojo umbone mtima. Ndamo syelesi sichakamuchisya kuti ‘aŵecheteje mwakwalimbikasya’ abale ni alongo ŵakusimana ni yakusawusya. (Aŵalanje 1 Atesalonika 5:14.) Akumbuchileje kuti mjawo jusyesyene akusaŵa jwakoseka kwakamuchisya mnopenope pa “ndaŵi jakusawusya.” (Mis. 17:17) Mjawo mpela jweleju ngakusagamba kwalosya chanasa pakusimana ni yakusawusya nambo akusatenda yampaka akombole kuti ŵakamuchisye soni kwalimbikasya ni maloŵe gambone.

19. Ana mpaka tulosye chamti uli umbone mtima soni chanasa? (Alolesoni yiwulili.)

¹⁹ Ana mpaka tutende chichi kuti tulosye ndamo ja chanasa soni ja umbone mtima? Yili yisyene kuti nganituŵa tukombwele kumasya yakusawusya yakusimana nayo mjetu. Nambope, yampaka tutende yili kupikanichisya mwakupikanila soni yakusawusya yakusimana nayo. (Mat. 7:12; 1 Pet. 3:8) Pandaŵi jakulondesya yindu yakusimana nayo, ampikanileje mwakusamala. Soni naga yili yakomboleka, apateje maloŵe gambone gampaka gamlimbikasye. (Mis. 12:25) Aŵambaleje kulilosya kuti akumanyilila chenene yakusawusya yakusimana nayo nambo yili mkuti ngakumanyilila. (Mis. 18:13) Konjechesya pelepa, atendeje najo yindu mwakuwusimana mtima soni akajembecheyaga kuti chatendeje yindu mwangalemwesya.—Aef. 4:32.

20. Ana wawojo akusaka kuŵa mundu jwamti uli kwa achimjawo?

²⁰ Wosopewe tukusasangalala mnope ligongo lyakola achimjetu mu gulu ja Yehofaji. Nambope, mpaka yiŵe chenene kuti tukumbuchileje kuti tuli ŵangali umlama mwamti pane mpaka tuŵechete kapena kutenda yindu yele panyuma pakwe mpaka tutande kuligamba nayo. Ŵajinjiwe tukusatenda yindu pakujigalila yindu yakusakala yatusimene nayo paumi. Ni ligongo lyakwe tukusasangalala mnope naga abale ni alongo akupitilisya kukunguluka ni m’weji kwineku ali mkutulosya ndamo mpela kulinandiya, kuwusimana mtima, chinonyelo, soni kututendela yindu mwachanasa. Myoyo, kwende wosopewe tutende yiliyose yampaka tukombole kuti tulosyeje ndamo syelesi kwa achimjetu.