სწორას უჯინით სირთულეეფს

1, 2. მუ რე საჭირო, სირთულეეფს ქუგურზათინ? (ქოძირით სურათ).

ᲡᲥᲐᲜ რწმენაშ გურშენ უსამართლოთ ხომ ვა გოქცუნა, ოჯახ ხომ ვა გოწინააღმდეგ ვარდა მთავრობა ხომ ვა რთხოზჷ? გლახა ჯანმრთელობა ხომ ვაიღ ვარდა ხანშამიშულაწკუმა დაკავშირებულ პრობლემეფს ხომ ვაბრძოლუქ? შხვა სირთულე ხომ ვაიღ, მაგალთო, საჸოროფო ადამიან ხომ ვა გაფჷ ღურელ? იეჰოვაშ ბრელ მსახურცალო, შილებე სქან ცხოვრება ხოლო „გაჭირებათ დო ტანჯებათ“ რდასჷ ეფშა (ფსალმ. 90:10).

² სირთულეეფს ქუგურზათინ, სწორას ოკო უჯინათ თინეფს. თეშ უჯგუშო გაგებელო დეფიფქრათ თეცალ მაგალითშე: არძა შოფერს უჩქჷ, ნამდა შარას შილებე დაბრკოლებეფს ქეშეხვადას. მანქანა ვა დაზიანასინ, შოფერ თინეფს ჯგირო ოკო ორწყედას, მუშენდა დაბრკოლება მუნერ რენ თიშა რე დამოკიდებულ, მარძგვანშე გინურთანსო, კვარჩხანშეო, გეუწყნარუანსო დოვარ ჭიჭე ხანით გვალო გაჩერდუ. მარა მანქანაშ სარკე თირამ ვარდა ლეტამ ქორენ-და, დაბრკოლებას ჯგირო ვა ძირუნს დო სწორას ვეგნაჭყვიდირე, მუ ოკო აკეთას. სირთულეეფ, ნამდგას ცხოვრებას შეფხვადუთ, თეცალ დაბრკოლებეფს მოგენს. რწმენაქ ვედმეზიანანინ, საჭირო რე, ჩქინ სულიერ სარკე სუფთა რდასჷ, მუთ თის ნიშნენს, ნამდა იეჰოვაშ თოლით უჯინათ სირთულეეფს. თე სტატიას გუვარჩიენთ, 1) მუს ნიშნენს სწორას უჯინათ სირთულეეფს, 2) მუჭო მეცილებუნა თინეფიშ მიმართ არასწორ დამოკიდებულება დო 3) მუ ოკო ვაკეთათ, ნამდა სირთულეეფიშ მიმართ სწორ დამოკიდებულება მიღუდან.

ᲡᲬᲝᲠᲐᲡ ᲣᲯᲘᲜᲐᲗ ᲡᲘᲠᲗᲣᲚᲔᲔᲤᲡ

3. მუშა ვემაჩილითენა დუდ სატანაშ უბადო ქიანას?

³ სატანაშ უბადო ქიანას სირთულეეფშა დუდ ვემაჩილითენა. რახანს არასრულყოფილეფ ვორეთ დო თე ქიანას სატანა ეშმაკ მართუნს, არძა შეფხვადუთ სირთულეეფს. ხვალე თენა ვარინ, მუთ უმოს ხოლოს რე თე ქიანაშ მოსპუალა, თით უმოს პრობლემეფს შეფხვადუთ, იჸუაფუნო თენა სტიქიურ უბედრობეფ დოვარ უბადო ადამიანეფიშ მოქმედებაშ შედეგეფ (მათ. 24:8; 2 ტიმ. 3:13). იეჰოვაქ თე პრობლემეფ ამდღა გეგნოჭკირასინ, თეშ გიშურს, ითამ სატანას თე ქიანაშ მართუას ოხვარუდას. თაშ ნამდა, ონდო თე ქიანას სატანა მართუნს, პრობლემეფს ირო შეფხვადუდათ იჸი (ეკლ. 9:12).

4. ხოლო მუშენ მიღუნა ქრისტიანეფს სირთულეეფ?

⁴ ჩქი სირთულეეფ თიშენ ხოლო მიღუნა, ნამდა იესოშ მიმაჸუნალეფ ვორეთ. იესო ხშირას ურაგადუდ მუშ მოწაფეეფს, ნამდა თინეფს მუნეფიშ რწმენაშ გურშენ თხოზუდესკონ იჸიდ (მათ. 24:9; იოან. 16:2). თეშ რჩქინა მოხვარუნა, თხოზინიშ დროს რწმენაქ ვედმესუსტან (1 თეს. 3:3, 4). პრობლემეფს ძალიერ რწმენათ ქოურზუთ-და, თენა თის ამტკიცენს, ნამდა ვეგნომრთაფუნა ულიებ სიცოცხლეშ შარაშე. თეთ თის ხოლო ვოძირანთ, მიშ მხარეს გივორეთ იეჰოვა დო სატანა შქას წუმოჭკირილ ონირზებელ საკითხის, მუშენდა სატანა იჩიებ, ნამდა ადამიანეფ ღორონთის ხვალე მუნეფიშ სამოგებოთ ომსახურუნა დო პრობლემეფიშ დროს ვა დოსქიდუნა თიშ ართგურეფ. თეშ დამტკიცებელო თინა ვასვანჯუანს ღორონთიშ ხალხის დო შხვადოშხვა სირთულეს შეუხვამილუანს ცხოვრებას (იობ 1:9–11). მარა, მუჟამსით პრობლემეფიშ უმკუჯინუო, ართგურეფ ფსქიდუთ, ვოძირანთ, ნამდა მიჸორა იეჰოვა დო გურს უხარენთ თის (იგავ. 27:11).

5. მუს ბგურაფლენთ ეკლესიასტეშ 7:13, 14-შე? (ქოძირით სურათეფ).

⁵ იეჰოვა ვემოჩილითუანა არძა სირთულეს. იეჰოვა დღას ვექციებ უბადოთ დო ვართ გიმოფცადუნა უბადობათ (იაკ. 1:13). იმწკუმა მუშენ ჭარჷ სოლომონქ, „გაჭირებაშ დრო“ ღორონთშე რენია? (წეკითხით ეკლესიასტეშ 7:13, 14). ხშირას ბიბლიაშე თეშ იძირე, ნამდა იეჰოვა ორთჷ მუდგარენს, მარა სინამდვილეს თინა იგულისხმებ, ნამდა იეჰოვა უბრალოთ უშვენს მუდგარენს, შხვანერო ქოფთქუათინ, მუთუნს ვართჷ, თიქ ვა მოხვადასინ. სოლომონიშ სიტყვეფს ხოლო თენა იგულისხმებ. მუჭო მოხვარუნა თიშ სიტყვეფ, სწორას უჯინათ სირთულეეფს? პირველ, ჩქინ არასრულყოფილებაშ დო სატანაშ ქიანას ფცხოვრენთინ თიშენ, ოკო ველუდათ, ნამდა ცხოვრებას „ჯგირობუაშ დრო“ ხოლო მაღვენუნა დო „გაჭირებაშ დრო“ ხოლო. ათეშენ „ჯგირობუაშ დროს“ შემლებუნა მადლობა უწუათ იეჰოვას თი ირფელ ჯგირშო, მუდგას ჩქინო ორთჷ დო თე პერიოდ თიშე საჩუქარო მიბრჩქინათ. მაჟია, სოლომონიშ სიტყვეფ თის ხოლო გუმოშინანა, ნამდა ადამიანეფს ვა მიჩქუნა, მუს მომღანა ჭუმანერ დღა – ჯგირობუას დოვარ გაჭირებას. თენა ნიშნენს, ნამდა ქოთ ჯგირს გიოტირხუ შურო ველუნ თიცალ პრობლემეფ დო ქოთ – გლახას.

6. მუშენ შილებე უშვენდას იეჰოვა სირთულეეფს? (ებრ. 12:7, 11).

⁶ სირთულეეფს სწორას ქუჯინეთ-და, ქობძირუნთ, ნამდა თეთ იეჰოვა მოგურუანა, ჩქინ დუდის ვარინ, მუს მივენდათ. იეჰოვა ორწყე, მუ სირთულეეფს ფხვადუთ, აწუხენს, იპტანჯებუთინ დო ირიათო მოხვარუნა. მართალ რე, მინშა თინა უშვენს, ნამდა მანგარ რთულ სიტუაციას, თაშ ქოფთქუათინ, „წკურუმია რობუს“ მოფხვადათ, მარა თე დროს ხოლო ფხელმძღვანელენა, მარწმუნენა მუშ ჸოროფაშა დო გარზებელო ძალას მარზენა (ფსალმ. 23:4). თეწკუმა ართო, სირთულეეფ მოძირანა, მუ მაფუნა ოთირალ დო მოხვარუნა, იეჰოვაშ ელარნათ დიფთირათ უჯგუშ პიროვნებათ (წეკითხით ებრაელეფიშ 12:7, 11). მაგალთო, იობის თანდაბლობაშე აფუდ ომუშებელ. მართალ რე, იეჰოვას ვეგუტახაფ იობშა უბედრობეფ, მარა თიქ დუშვჷ თინეფ დო თინეფიშ საშვალებათ იობის ბრელ მნიშვნელოვან მუდგარენ დაგურუ (იობ 42:1–6). ცხოვრებას მუდგა სირთულეს ვეშეფხვადათინ, შემლებუნა დარწმუნებულეფ ვორდათ ართ მუდგარენშა – იეჰოვა მუდგას უშვენსინ თინა, ვეგშისწორებენ ფერ ზიანს დღას ვა მომღანა. სირთულეეფს ქოურზუთ დო ართგურეფ ქოფსქიდუთ-და, თეშო იეჰოვა აუცილებერო დუმაჯილდოვენა (რომ. 8:35–39).

7. მუშენ შეილებუნა გიღუდან ხიოლ თხოზინიშ დროს ხოლო?

⁷ თხოზინიშ დროს ხოლო შემლებუნა ხიოლ მიღუდან. რწმენაშ გურშენ ქორთხოზუნან-და, ვეფიქრათ, ნამდა იეჰოვაშ გურ გაფუნა დინაფილ. სინამდვილეს, თიშენ რთხოზუნა, ნამდა ომორჩილუთ თის დო თიშ მოწონა გიღუნა (მათ. 5:10–12). თხოზინიშ მიმართ სწორ დამოკიდებულება ქუგაღვენუნან-და, მოციქულეფცალო ვადინუანთ ხიოლს დო კმაყოფილ იჸუაფუთ თქვან დუდით, მუშენდა ქრისტეშ გურშენ რთხოზუნა (საქ. 5:40–42). თეს გეძინელ, თქვან ართგურობაშ მიმაჯინუ, შხვეფს ხოლო შილებე მაკორინან, გეჩინებაფუან იეჰოვა დო განადიდან თინა (1 პეტ. 2:12). თეწკუმა ართო, იეჰოვაქ შილებე ხვალე განსაცდელიშ უკულ ვარინ, განსაცდელიშ დროს ხოლო ვამგარკან კურთხევეფ, მუჭოთ თენა იოსებიშ შემთხვევას აკეთ (დაბ. 39:3, 23).

8. ხოლო მუ მარზენა მოთვენაშ ძალას?

⁸ სირთულეეფ ირო ვეგეგრძელებ. იობიშ შემთხვევა გუმოშინანა, ნამდა არძანერ სირთულეს უღჷ ბოლო. მუჭოთ მიჩქუნა, იეჰოვაქ „იობ ბოლო წანეფს ხოლო უმოსო დოხვამუ“ (იობ 42:12). იეჰოვა ჩქი ხოლო მოპირუნა, ნამდა ამდღარ ცხოვრებას, ნამუთ კუნტა რე დო პრობლემეფით რე ეფშა, დომთირანა ხვამათ ეფშა ულიებ სიცოცხლეთ, მუდგაშა თეშით ხოლო ვემიართე ამდღარ წვალებურ ცხოვრებას. თეშ რჩქინა მარზენა ძალას, ბოლოშა მიფთვინათ (მათ. 24:13).

ᲛᲣᲭᲝ ᲨᲘᲚᲔᲑᲔ ᲛᲔᲪᲘᲚᲐᲜ ᲡᲘᲠᲗᲣᲚᲔᲔᲤᲘᲨ ᲛᲘᲛᲐᲠᲗ ᲐᲠᲐᲡᲬᲝᲠ ᲓᲐᲛᲝᲙᲘᲓᲔᲑᲣᲚᲔᲑᲐᲥ

9. მუჭო შილებე მეცილან სირთულეეფიშ მიმართ არასწორ დამოკიდებულებაქ?

⁹ მუდგა სირთულეს ვეშეფხვადათინ, თინეფს სწორას ვა უჯინით-და, შილებე ხოლო უმოსო გუვაუფრაშათ ჩქინ სიტუაცია. მაგალთო, შილებე იფიფქრათ, ნამდა თე სირთულე იეჰოვაქ შემხვამილუეს. თექ აღოლ იობის ხოლო. მუდგარენ პერიოდის თინა ფიქრენდჷ, ნამდა უბედრობეფ იეჰოვაქ გიოტახ დუდის. თექ თიშა ქიმიჸუნ, ნამდა ოცადუდ, „მუშ დუდ ღორონთშე უმოს მართალო“ გემკარჩქინუკო (იობ 32:2). ნაომი ხოლო დუდშე მუშ პრობლემეფს იეჰოვას აბრალუაფუდ (რუთ 1:13, 20, 21). იობ დო ნაომი თეცალ არასწორ დამოკიდებულებას ვეთირანდეს-და, იეჰოვაწკუმა ურთიერთობას გილელუანდეს (იგავ. 19:3). მარა იეჰოვაქ ქიმეხვარ თინეფს, სწორას ქუჯინესკო დო ქოძირესკო, ნამდა თე უბედრობეფ მუს ვეგუტახაფ თინეფშა დო ბოლოს ართგურობაშენ ხოლო დაჯილდოვ.

10. მუშე შილებე მაფიქრუაფუდან სირთულეეფიშ დროს?

¹⁰ შილებე დარწმუნებულ ვორდათ, ნამდა სირთულეეფ იეჰოვას ვეშუხვამილუაფ ჩქინდა, მარა ეჭვიქ გომრჩქინდან, შურო ქაინტერეს დო ვარ თის, მუ მდგომარეობას ვორეთ. თეცალ არასწორ ფიქრეფქ შილებე გურ გომტახან დო ძალა მიდამღან (იგავ. 24:10). ჩქინცალო, მეფე დავითის დო წინასწარმეტყველ აბაკუმს ხოლო უღუდეს სირთულეეფ დო მინშა ფიქრენდეს, ქირჩქილუანდ დო ვარ ღორონთ თინეფიშ ოთხუალს (ფსალმ. 10:1; აბაკ. 1:2). მარა თინეფს თეშ გურშენ ლოცვა ვემუტებუნა; იეჰოვაქ ხოლო ქუპასუხ თინეფიშ ლოცვას დო დარწმუნ, ნამდა ქიმეხვარებუდ. თინა ჩქინ შემთხვევას ხოლო თაშ გაკეთენს (ფსალმ. 10:17).

11. სირთულეეფს სწორას ვა უჯინეთ-და, მუ შილებე იფიფქრათ?

¹¹ სირთულეეფს იეჰოვაშ თოლით ვა უჯინეთ-და, თინეფს ქეშეფხვადუთინ, შილებე გამკვირდან დო იფიფქრათ, ნამდა თექ ჩქი ოკო ვა მაღოლესკო (1 პეტ. 4:12). იესოშ მოწაფეეფს ხოლო უჭირდეს თი აზრიშ მეღება, ნამდა თინა მანგარ წინააღმდეგობეფს ქეშეხვადუდ დო ბოლოს დოჸვილუნდეს (ლუკ. 18:33, 34). მართალ რე, იესო არგამათ ურაგადუდ მოწაფეეფს, მუ ელუდ წოხოლე, მარა პეტრე ფიქრენდჷ, ნამდა ღორონთ ვა დუშვენდ, იესოქ თაშ დეტანჯუკო. იესოს უჩქუდ, ნამდა თეცალ აზროვნება ეცილებუდ თის ღორონთიშ ნებაშ შესრულებას, ათეშენ გაუდღან პეტრეს (მარ. 8:31–33). მოწაფეეფს იესოშ ღურაშ უკულ ხოლო უჭირდეს თიშ ენონჭაფა, მუშენ აჸუ იესოს თე ირფელქ გინაღალარქ. მარა თეშ გურშენ იესოს ხე ვა უღალ თინეფშა; გათელებაშ უკულ თიქ მუშ მოწაფეეფს წმინდა წერილეფიშ საშვალებათ გეუნწყჷ, მუშენ იტანჯჷ დო თეშნერო ქიმეხვარ, სწორას უჯინესკო თე საკითხის (ლუკ. 24:25–27, 32, 44–48). თი ირფელშენ დაფიქრება, მუთ იესოქ თინეფს დაგურუ, მეხვარებუდ, მემზადესკო თი სირთულეეფშო, ნამდგას მალას იესოშ გურშენ ქეშეხვადუდეს. ჩქი ხოლო თიშე დაფიქრება, მუს იჩიებ წმინდა წერილეფ თხოზინიშ დო სირთულეეფიშ გურშენ, მიმეხვარებუნა, მივემზადათ თინეფშო.

12. ჩქინ სიტუაციას არასწორო ქუჯინეთ-და, მუჭო შილებე დუდ იბგინათ?

¹² სირთულეეფს სწორას ვა უჯინით-და, შილებე მდგომარეობაქ თიშე უმოს უფრაშო მუმაძირან, ვინემ სინამდვილეს რე. იესოშ ართ იგავშე, ნამუთ მებინეხეს დო მუშეფს ოხუ, ჯგირო იძირე, მუჭო შილებე თექ მოხვადას. ნამთინე მუშაქ ძღირძღინ ქიდიჭყჷ, მუშენდა ფიქრენდეს, ნამდა მებინეხექ სამართლიანო ვა გუნაწილ თინეფს ნამუშერ. მარა მებინეხექ ართ-ართის უწუ: „ჯიმა, თქვანდა უსამართლოთ ვა მომქციებ“ (მათ. 20:10–13). მებინეხეს მართალო ვა მუქციებინ თინეფშა უსამართლოთ, უბრალოთ მუნეფ ელუდეს თიშე უმოსის, ვინემ ოკო ელუდესკო, დო ვემიღესინ, თენა უსამართლობათ მირჩქინეს. ამდღა იეჰოვაშ ნამთინე მსახურს ხოლო შილებე უსამართლობაშ გრძნობაქ გურჩქინდას. მაგალთო თიშენ, ნამდა მუდგარენ თეოკრატიულ დანიშნულებაქ ვემიაჩ ვარდა უღუდ დო მიოტებელქ აჸუ. მუ პრაქტიკულ ნაბიჯეფ ოკო გინობდგათ თიშო, ნამდა სწორას ქუჯინათ სირთულეეფს?

ᲛᲣᲭᲝ ᲛᲘᲤᲥᲪᲣᲐᲗ ᲡᲘᲠᲗᲣᲚᲔᲔᲤᲘᲨ ᲓᲠᲝᲡ

13. მუქ შილებე მოხვადას, მუჟამსით სირთულეეფს ხვადუქ?

¹³ შილებე ჯგირო გიჩქუდას, მუს იჩიებ ბიბლია სირთულეეფიშ გურშენ დო შხვეფშა ხოლო ეიქექუაფ გურშა თე ბიბლიურ აზრეფით, მარა, მუჟამსით სირთულეეფ პირადო სი გიგოტირხუ, შილებე გაიჭირდას, სწორას ქუჯინე თინეფს. მაგალთო, შილებე თინა ხოლო ქიფიქრე, იეჰოვა მასაჯენსია ვარდა ვერჩქილენია ჩქიმ ოთხუალს. მუ ნაბიჯეფ ოკო გინოდგე, ნამდა სწორას ქუჯინე სირთულეეფს?

14. მუშე შეილებუნა ილოცათ სირთულეეფიშ დროს? (ფილ. 4:13).

¹⁴ ქოთხით იეჰოვას, ქიმგეხვარან. ქეჩით იეჰოვას თქვან ოწუხებელიშ დო თიშ გურშენ, მუს გინაფლენთ. შეილებუნა კონკრეტულო თინა ხოლო უწუათ, მუჭო გოკონა, თე პრობლემა მოიგვარან; თეს გეძინელ, ქოთხუათ წმინდა შურ, ნამდა გუგამანგარან დო სიბრძნე, ნამდა შეგალებუან სწორ გადაწყვეტილებაშ მეღებაქ. მარა ართ მუდგარენ რშუდან: იეჰოვაქ შილებე თქვან ლოცვას გვალო შხვანერო უპასუხას (ეფეს. 3:20). შილებე თიქ ანგელოზეფ ვარდა და დო ჯიმალეფ გეგმირინუას თქვან მახვარებელო (ფსალმ. 34:7). ათეშენ ქიდეკვირით, მუჭო გოხვარუნა იეჰოვა დო მარდულ რდათჷ თეშო. რჯერდან, თინა ხვეიანო ქიმერჩანა მუშ წმინდა ძალას, ნამდა გიორჯგინათ ნებისმიერ სირთულეს (წეკითხით ფილიპელეფიშ 4:13).

15. მუ მიგეხვარებუნა სირთულეეფიშ გარზებას? (ქოძირით სურათ).

¹⁵ მიაჸუნით სულიერ განრიგის. შილებე გვალო თიზმაქ ვა გაკეთებუან, მუზმას ულირს ორთუდით, მარა ეცადით, მუთ შეილებუნან თინა ვარა გაკეთათ. ირნერო ეცადით, გონება ღორონთიშ აზრეფით გეიოფშათ, განსაკუთრებულო თიმწკუმა, მუჟამსით „გაჭირება დო უბედრობა“ გიგოტირხუნა დუდის (ფსალმ. 119:143). გაგრძელით ბიბლიაშ ირდღას კითხირ, გიმორკვიება დო ფიქრ. მუზმათ შეილებუნან იქადაგით, ქიდესწრით კრებაშ შეხვალამეფს დო მიღით თინეფს მონაწილება. თიმწკუმა ხოლო, მუჟამსით ფიქრენთ, ნამდა ხვალე რინა გოკონა, ქეცადით, ნაკლებო დოსქიდათ ხვალე დო უმოსო და დო ჯიმალეფწკუმა რდათჷ (იგავ. 18:1).

16. მუ ეჭვეფქ შილებე გოირჩქინდან სირთულეეფიშ დროს დო მუჭო შეილებუნა თინეფიშ ჩათხინაფა? (2 კორ. 10:4, 5).

¹⁶ ჩეთხინეთ ეჭვეფ. მუჟამსით სირთულე გიგოტირხუნა დუდის, შილებე, თაშ ქოფქთუათინ, „კოშკცალ მანგარ“ ეჭვეფქ გოირჩქინდან (წეკითხით 2 კორინთელეფიშ 10:4, 5). თეცალ ეჭვეფს „ღორონთიშ გურშენ რჩქინათ“ ჩეთხინუანთ, ნამდგას ბიბლიაშე დო თიშა გერსხილ პუბლიკაციეფშე ღებულენთ. მაგალთო, იეჰოვაშე მოწონა გიღუნან თენა ქუგოეჭვუნან-და, გეგმირკვით მოციქულ პავლეშ შემთხვევა. თიქ ბრელ სირთულეს შეხვად, მარა თე სირთულეეფ უმოსო არწმუნენდჷ, ნამდა ღორონთშე დო იესოშე მოწონა უღუდ (2 კორ. 11:23–27). იეჰოვაქ ულირს დაშებულ გაპატუესინ თენა ქუგოეჭვუნან-და, დოგორით დო გეგმოჭარით თი ბიბლიურ მუხლეფ, სოვრეშეთ იძირე, ნამდა იეჰოვა პატიენს ცოდეფს (ეს. 43:25). უკულ წეკითხით თე მუხლეფ დო ჯგირო დეფიქრით თინეფშე (ფსალმ. 119:97). იეჰოვა მუშ ართგურ მსახურეფს მართალო ქოთხილანს დო ვარ თეშა დუდის გეტახილ უბედრობაქ დუგაეჭვეს-და, გეგმირკვით, მუშენ უშვენს ღორონთ ტანჯებას დო მუჭო ფთხილანა სულიერო, მუდგაქ ვა მაღოლანინ (ფსალმ. 91:9–12). თეს გეძინელ, წეკითხით თი და დო ჯიმალეფიშ შემთხვევეფ, მიდგაქ გაურზეს ოტანჯებელს დო ვადინუეს ხიოლ.a

17. მუჭო ოკო მიფქცუათ სირთულეეფიშ დროს?

¹⁷ ასე ცხოვრებას ჯგირ პერიოდ ქოიღუნან-და, უმარდუდათ თეშო იეჰოვას დო თე პერიოდ გეგმირინეთ თიშა დაფიქრებელო, მუსხი მუდგარენს ორთჷ თინა თქვანო (ეკლ. 7:14). მარა, სირთულეეფ ქოიღუნან-და, სწორას ქუჯინით თინეფს დო ბოლოშა მიენდით იეჰოვას. თაშ ქიმიქციებუთ-და, თინა „შარას ხოლო ქუგოძირანა, ნამდა ბოლოშახ მითვინათ“ (1 კორ. 10:13). მუშ კეთება შემლებუნა, მუჟამსით ჩქინ და დო ჯიმალეფ ხვადუნა სირთულეეფს? მუჭო შემლებუნა მივეხვარათ თინეფს? თე კითხვეფშე უკულიან სტატიას მაღვენუნა ჩიება.