მუჭო მოხვარუნა იეჰოვა მოთვინებას?

1. მუშენ მოსაჭირუნა მოთვინება დო მი მიმეხვარებუნა? (1 პეტ. 5:10).

ᲗᲔ ᲑᲝᲚᲝ დღალეფს იეჰოვაშ მსახურეფ ქიანაშ პრობლემას ხვადუნა, ათეშენ მოთვინება ოსაჭირუნა. მაგალთო, ნამთინე ქრონიკულ ლახალათ იტანჯებ, ნამთინეს საჸოროფო ადამიანქ დუღურ დო ნამთინე ხოლო წინააღმდეგობას ხვადუ ოჯახიშ წევრეფშე ვარდა მთავრობაშე (მათ. 10:18, 36, 37). თქვა მუდგა სირთულეს ვა ხვადუდათინ, რჯერდან, იეჰოვა აუცილებერო ქიმგეხვარებუნა, გეგმირჩქინათ მოთვინება დო ქუდოსქიდათ თიშ ართგურქ (წეკითხით 1 პეტრეშ 5:10).

2. სოვრეშე ბღებულენთ ქრისტიანეფ მოთვინებაშ ძალას?

² მოთვინება რე უნარ, ნამდა სირთულეეფიშ, თხოზინიშ დოვარ ცდუნებეფიშ დროს ვა ვოდინუათ იმენდ. მოთვინებაშ გიმორჩქინა ხვალე იეჰოვაშ მოხვარათ შემლებუნა; ძალას, „ნამუთ ჩვეულებრივშე უმოს რე“, ზუსტას თინა მარზენა (2 კორ. 4:7). თე სტატიას გუვარჩიენთ ოთხ საშვალებას, მუდგათ იეჰოვა მოხვარუნა მოთვინებაშ გიმორჩქინას. თის ხოლო ქობძირუნთ, მუჭო შემლებუნა თე ოთხ საშვალებაშ გიმორნაფა.

ᲚᲝᲪᲕᲐ

3. მუშენ შემლებუნა ფთქუათ, ნამდა ლოცვა მართალო სასწაულ რე?

³ იეჰოვა ართ განსაკუთრებულ საშვალებას ირინუანს, მუდგათ მოხვარუნა მოთვინებას. არასრულყოფილებაშ უმკუჯინუო, ღორონთიქ მუჩეს საშვალება, ლოცვათ ქუდურაგადუათ თის (ებრ. 4:16). დეფიქრით: ჩქი შემლებუნა ნებისმიერ დროს დო ნებისმიერ საკითხშე დურაგადუათ ღორონთის ლოცვათ. ვა უღჷ მნიშვნელობა, სო ვორეთ დო მუ ნინაშა ბლოცულენთ; მუდგა შეზღუდულ მდგომარეობა ვა მიღუდანინ, გოკონ-და, ციხეს ვოხედათინ ხოლო, თინა ირიათო ქიმირჩქილუანს ჩქინ ლოცვას (იონ. 2:1, 2; საქ. 16:25, 26). თიმწკუმა ხოლო, მუჟამსით ვეკმარაგადენა, მუს ბგინაფლენთ, იეჰოვას იშენით შეულებ ქინანჭას, მუშ რაგად მოკონა (რომ. 8:26, 27). ლოცვა მართალო სასწაულ რე!

4. მუშენ შემლებუნა თიშ რაგად, ნამდა მოთვინებას ქიმმეხვარანინ თეშ თხუალა მეურე ღორონთიშ ნებას?

⁴ იეჰოვა ბიბლიაშ საშვალებათ მარწმუნენა, ნამდა „მუდგა ვა ფთხუათინ, თიშ ნებას ქიმურენ-და, თინა მირჩქილენა“ (1 იოან. 5:14). საინტერესო რე, ქიმურენო ღორონთიშ ნებას თიშ თხუალა, ნამდა მოთვინებას ქიმმეხვარან? ქო! მუშენ შემლებუნა თეშ რაგად? მუშენდა, მუჟამსით განსაცდელს მოთვინებათ ურზუთ, თეთ საშვალებას ვარზენთ იეჰოვას, პასუხ ქიმეჩას მუშ გიმაძიცალს, სატანას (იგავ. 27:11). თეწკუმა ართო, ბიბლია მირაგადუნა, ნამდა იეჰოვას შურ დო გურით ოკო, „მუშ ძალათ ქიმეხვარას თინეფს, მით მთელ გურით ომსახურ თის“ (2 მატ. 16:9). ათეშენ, შემლებუნა ბოლოშა ბჯერდან, იეჰოვას ქოთ ძალა უღჷ დო ქოთ სურვილ, ნამდა მოთვინებას ქიმმეხვარან (ეს. 30:18; 41:10; ლუკ. 11:13).

5. მუჭო შეულებ ლოცვას, მომღან შინაგან სიმშვიდე? (ეს. 26:3).

⁵ ბიბლია იჩიებ, ნამდა, მუჟამსით ჩქინ ოწუხებელიშ გურშენ ქიბლოცენთ, ღორონთ ქომუჩანა „თიცალ მშვიდობას, მუნერით კოჩის აზრო ხოლო ვა მალე დო დოთხილანს [ჩქინ] გურს დო გონებას“ (ფილ. 4:7). დეფიქრით, მუშმაშხვა მუდგარენ რე თენა. თინეფ, მით ვამსახურუნა იეჰოვას, სირთულეეფიშ დროს შხვადოშხვა საშვალებათ ოცადუნა სიმშვიდეშ მენჭირნაფას. მაგალთო, ნამთინე მედიტაციათ ოცად, ჩეთხინუას გლახა ფიქრეფ დო დირთინუას სიმშვიდე. მარა თეცალ მეთოდეფიშ გიმორნაფათ შილებე ადამიანქ მუშ გონება სულიერ საფრთხეშ თუდო ქიგიორინუას დო გვალო დემონეფს ქაშუჸოთას მუშ დუდ (ქეშუდარით მათეშ 12:43–45). მუთუნს ვა მაღინე კოჩშა თიცალ სიმშვიდე, მუნერსით იეჰოვა ლოცვაშ შედეგო მარზენა. თე სიმშვიდეს ღორონთ ხვალე თინეფს არზენს, მით ბოლოშა ონდუნა თის. მუდგა გლახა მდგომარეობას ვა რდანინ, თინა თეცალეფს, „ირიათო მშვიდას დარინუანს“ (წეკითხით ესაიაშ 26:3). ართ-ართ საშვალება, მუდგათ იეჰოვა თეს ორთჷ, თინა რე, ნამდა გუმოშინანა გურიშემაკინალ ბიბლიურ აზრეფს, ნამუთ შურ დო გურს მიმშვიდენა დო მოძირანა, მუჭო უჸორთ თის დო მუჭო ოკო, მიმეხვარან (ფსალმ. 62:1, 2).

6. მუშ კეთება შემლებუნა, ნამდა მუთ შილებენ ჯგირო გეგმიბრინუათ ლოცვაშ ძღვინ? (ქოძირით სურათ).

⁶ მუშ კეთება შემლებუნა. პრობლემეფიშ დროს „ჩქინ ოღალ“ იეჰოვას ოკო ქიმვანდათ დო ქიბლოცათ, ნამდა სიმშვიდე ქომუჩან (ფსალმ. 55:22). თეს გეძინელ, ქოფთხუათ სიბრძნე, ნამდა ქიმეფხვადათ, მუჭო მიფქცუათ სირთულეეფიშ დროს (იგავ. 2:10, 11). მართალ რე, იეჰოვას ოკო ფთხუათ, გარზებას ქიმმეხვარან, მარა ლოცვაშ დროს ვართ მადლობაშ რაგადიქ ოკო გუმოჭყორდან (ფილ. 4:6). თაშ ნამდა, ქიდეკვირით, მუჭო ელაირენა თინა სირთულეეფიშ დროს დო ქუწით მადლობა მოხვარაშენ. პრობლემეფს ვემეჩათ საშვალება, თეშ გეგნგოღალაფუან ყურადღება წუხებაშა, ნამდა ვა ძირათ თი კურთხევეფ, ნამუთ უკვე გიღუნა იეჰოვაშე (ფსალმ. 16:5, 6).

ᲦᲝᲠᲝᲜᲗᲘᲨ ᲡᲘᲢᲧᲕᲐ

7. მუჭო შეულებ ბიბლიაშ კითხირს, მიმეხვარან მოთვინებას?

⁷ იეჰოვა მუშ სიტყვაშ საშვალებათ ხოლო მოხვარუნა მოთვენას. ბრელ ბიბლიურ მონაკვეთ მარწმუნენა, ნამდა იეჰოვა აუცილებერო ქიმმეხვარებუნა. გუვარჩუათ თეშ ართ მაგალით. მათეშ 6:8 იჩიებ: „თქვან მუმას თეიშახ უჩქჷ, მუ გოსაჭირუნა, სოიშახ თხინდათ“. თე სიტყვეფ თქუ იესოქ, მით არძაშ უჯგუშო იჩინენს იეჰოვას. ათეშენ, ართ წუთის ხოლო ოკო ვა მოეჭვუდან, ნამდა იეჰოვას უჩქჷ, მუ მოსაჭირუნა დო ქიმმეხვარებუნა, მუჟამსით მიჭირა. ბიბლიას ბრელ თეცალ აზრ რე მოჩამილ, ნამდგაშ კითხირს შეულებ ქომუჩან ძალა, ბოლოშა ქიმიფთვინათ (ფსალმ. 94:19).

8. ა) ქიმიჸუნით მოთვინებას ოხუნ ფერ ართ-ართ ბიბლიურ პრინციპ. ბ) მუ მიმეხვარებუნა საჭირო ბიბლიურ პრინციპეფიშ გოშინას?

⁸ მოთვინებას ბიბლიურ პრინციპეფ ხოლო მოხვარუნა. თინეფ მარზენა სიბრძნეს, ნამდა ჭკვერულ გადაწყვეტილებეფ მიბღათ (იგავ. 2:6, 7). მაგალთო, ბიბლია ელამჩანა, ნამდა ღორონთის მივენდათ დო ზედმეტო ვეპწუხათ თიშე, მუქ შილებე მოხვადას ჭუმან (მათ. 6:34). ბიბლიაშ კითხირიშ დო ფიქრიშ ჩვევა ქომღუნან-და, უმოსო გუმაშინედან იჸი საჭირო ბიბლიურ პრინციპეფ, მუჟამსით მუდგაინ მაჸინა გინაჭყვიდირალ ვარდა პრობლემაშ წოხოლე ქიგებდირთუთ.

9. მუჭო მიმანგარენა ბიბლიას მოჩამილ შემთხვევეფ თიშ რწმენას, ნამდა იეჰოვა ქიმმეხვარებუნა?

⁹ ბიბლიას მოჩამილ რე თიცალ ადამიანეფიშ შემთხვევეფ ხოლო, მით ონდუდეს იეჰოვას დო ღებულენდეს თიშე მოხვარას (ებრ. 11:32–34; იაკ. 5:17). მუჟამსით თეცალ მაგალითეფშე ფიფქრენთ, უმოსო ვონდუთ იეჰოვას დო ბჯერა, ნამდა თინა რე „ჩქინ დუდიშგითაფორაფალ დო ძალა, რსხება, ნამდგას ხეთე მიბღენთ გაჭირებაშ დროს“ (ფსალმ. 46:1). მუჟამსით ფიფქრენთ თიშე, მუჭო ონდუდეს ღორონთიშ მსახურეფ ულირს თის დო სირთულეეფიშ უმკუჯინუო, მუჭო აგრძელენდეს თიშ ართგურ მსახურებას, თენა მირჩქინანა სურვილს, ჩქი ხოლო მივაჸუნათ თინეფიშ მაგალითის (იაკ. 5:10, 11).

10. მუშ კეთება შემლებუნა, ნამდა მუთ შილებენ ჯგირო გეგმიბრინუათ ღორონთიშ საჩუქარ, ბიბლია?

¹⁰ მუშ კეთება შემლებუნა. ირდღას წეკითხით ბიბლია დო ქიმკიწონით თი ბიბლიურ მუხლეფ, ნამდგაქ მიგეხვარეს. ბრელშო პრაქტიკულქ იჸუ ირდღაშიან მუხლით დღაშ დოჭყაფაქ. ზუსტას თექ მეხვარ ართ დას, მერის,a მიდგაშ დიდა დო მუმას კიბოშ დიაგნოზ გეუშქვეს. თინა ღურაშახ ულუანდჷ მშობლეფს. დეკვირით, მუჭო მეხვარ მერის ირდღაშიან მუხლიშ კითხირქ დო თიშე დაფიქრებაქ თე რთულ დროს. თინა იჩიებ: „ირ ოჭმარეს ირდღაშიან მუხლიშ კითხირით იპჭყანდჷ დო ფიფქრენდჷ თიშე, მუს ბგურაფლენდჷ თევრეშე. თექ მიმეხვარ, მთელ ყურადღება იეჰოვაშა დო თიშ დიდებულ დუნაპირებუეფშა გეგნიბღიკო დო ვართ ხოლო ჩქიმ პრობლემეფშა“ (ფსალმ. 61:2).

ᲗᲐᲜᲐᲛᲝᲠᲬᲛᲣᲜᲔᲔᲤ

11. მუშენ ელამკინანა გურშა თიშ რჩქინა, ნამდა ჩქინცალ სირთულეეფს საჯიმალო ხოლო ხვადუ?

¹¹ იეჰოვაქ მსოფლიო საჯიმალო ხოლო მუჩეს, ნამუთ მოთვინებას მოხვარუნა. თიშ რჩქინა, ნამდა ჩქინცალო „ოტანჯებელს [ჩქინ] საჯიმალო ხოლო ხვადუ მთელ ქიანას“, მარწმუნენა, ხვალე ვა ვორეთინ (1 პეტ. 5:9). ჩქინცალ სირთულეეფ ჩქინ თანაქრისტიანეფს ხოლო უღუდეს, მარა გიორჯგინეს. ათეშენ, შემლებუნა ბჯერდან, ნამდა ჩქი ხოლო ირფელს ქუგურზუთ (საქ. 14:22).

12. მუჭო მოხვარუნა თანაქრისტიანეფ დო ჩქი მუშ კეთება შემლებუნა თინეფშო? (2 კორ. 1:3, 4).

¹² და დო ჯიმალეფშე მეღებულ გურიშელაკინა ხოლო მოხვარუნა მოთვენას. პავლე მოციქულქ თენა ბრელშა გიმოცად მუშ დუდშა. თიქ მუშ წერილეფს სახელეფით მიშინუ თი და დო ჯიმალეფ, მით შინაპატიმრობაშ დროს ელურდჷ თის, დო დიდ მარდულობას ხოლო გიმოხანტუნდჷ თინეფიშ მიმართ (ფილ. 2:25, 29, 30; კოლ. 4:10, 11). ამდღა ხოლო და დო ჯიმალეფ გურშა ელამკინანა დო მოხვარუნა სირთულეეფიშ დროს. დო მუჟამსით თინეფს ოსაჭირუნა მოხვარა, ჩქი ხოლო ელურეთ იშო (წეკითხით 2 კორინთელეფიშ 1:3, 4).

13. მუქ მეხვარ და მაიას მოთვინებას?

¹³ საჯიმალოქ მანგარო ელუკინ გურშა რუსეთის მახორუ ართ დას, მაიას. 2020 წანას თიშ ჸუდე გოშმონეს დო უკულ სასამართლოშ წოხოლე მუშ რწმენაქ აჸუ დაცვებელქ. მაია იჩიებ: „თე რთულ დროს ემოციურო განადგურებულ ვორდჷ. მარა და დო ჯიმალეფ მირეკუნდეს დო წერილეფს პჭარუნდეს, სოდეთ მუნეფიშ ჸოროფას გიმოხანტუნდეს. ირო მიჩქუდ, ნამდა დიდ დო მოჸოროფე ოჯახ პჸუნდჷ, მარა თინეფიშ ელარნა ჩქიმ დუდშა გეგმოფცადინ თიშ უკულ ხოლო უმოსო დებრწმუნ თეშა“.

14. მუ ოკო ვაკეთათ, და დო ჯიმალეფშე მოხვარა მიბღათინ? (ქოძირით სურათ).

¹⁴ მუშ კეთება შემლებუნა. მოთვინება ვა ვოდინუათინ, ხოლოშიან ურთიერთობა ოკო მიღუდან და დო ჯიმალეფწკუმა. მორდებაქ ვა მაშუან, ნამდა მოხვარა ქოფთხუათ უხუცესეფს, მუშენდა თინეფ რენა „დუდიშგითაფორაფალ ბორიას“ (ეს. 32:2). თინა ხოლო ფშუდან, ნამდა ჩქინ თანაქრისტიანეფ ხოლო ურზუნა სირთულეეფს. ათეშენ, მუჟამსით მუდგაინ ჯგირს გუკეთენთ თანაქრისტიანს, მიდგას მოხვარა ოსაჭირ, თენა დუდის უჯგუშო ქუმოგინაფუანა დო მიმეხვარებუნა, გივორჯგინათ თი სირთულეს, ნამუთ ჩქი მიღუნა (საქ. 20:35).

ᲩᲥᲘᲜ ᲘᲛᲔᲜᲓ

15. მუჭო მეხვარ მომავალიშ იმენდიქ იესოს დო მუჭო მოხვარუნა ჩქი? (ებრ. 12:2).

¹⁵ იეჰოვაქ მომავალიშ იმენდ ხოლო მუჩეს, ნამუთ მუთუნით ვეგემტყუნებ, დო თეშ რჩქინა ხოლო მოხვარუნა მოთვენას (რომ. 15:13). ქიგიფშინათ, მუჭო მეხვარ მომავალიშ იმენდიქ იესოს დედამიწას ცხოვრებაშ არძაშ უმოს რთულ დღაშ გინოღალას (წეკითხით ებრაელეფიშ 12:2). იესოს უჩქუდ, ნამდა მუშ ართგურობათ ხეს შეუნწყუნდ ღორონთიშ სახელიშ განწმენდას. თეს გეძინელ, თინა წერმიდგინენდჷ თი დროს, მუჟამსით გეხარენდ მუამუშწკუმა რინათ ზეცას დო იმმართველენდ მუშ ცხებულ ჯიმალეფწკუმა ართო ზეციერ სამეფოს. თეშნერო, ჩქი ხოლო, ღორონთიშ დუნაპირებ ახალ ქვეყნიერებაშე ფიქრ მოხვარუნა, მიფთვინათ თი სირთულეეფ, ნამდგას სატანაშ ქვეყნიერებას ფხვადუთ.

16. მუჭო მეხვარ ართ დას იმენდიქ მოთვენას დო ჩქი მუშ გურაფა შემლებუნა თიშ სიტყვეფშე?

¹⁶ ქობძირათ, მუჭო მეხვარ მომავალიშ იმენდშე ფიქრიქ რუსეთის მახორუ ართ დას, ალას, მიდგაშ ქომონჯ ოჭოფეს დო წინასწარ პატიმრობა მეუსაჯეს. თექ მოხვადუნ თიმწკუმა, ალაქ თქუ: „მომავალიშ იმენდშე ლოცვა დო ფიქრ მოხვარ, გურქ ვა გომტირხას. მიჩქჷ, ნამდა ირფელ თაშ ვეგეგრძელებ; იეჰოვა გიორჯგინანს სატანას დო ჩქი ხოლო კურთხევეფით ემოფშანა“.

17. მუჭო შემლებუნა ვოძირუათ, ნამდა მარდულ ვორეთ თი იმენდიშ, ნამდგას იეჰოვა მარზენა? (ქოძირით სურათ).

¹⁷ მუშ კეთება შემლებუნა. დრო გეგმურთით თი დიდებულ მომავალშე ფიქრის, ნამდგას იეჰოვა მოპირუნა. წერმიდგინით თქვან დუდ ახალ ქიანას დო დეფიქრით კურთხევეფშე, ნამდგას მიღენთ. შედეგო ქოძირუნთ, ნამდა თი გაჭირება, მუთ ამდღა გინოიღუნა, „ბრელ ხანს ვეჸუაფ დო მუთუნ ვა რე თი დიდებულ დო ულიებ ხვამაშ კარს, ნამდგას საბოლათ მიბღენთ“ (2 კორ. 4:17). თეს გეძინელ, ირფელ გაკეთით, ნამდა თე იმენდიშ გურშენ შხვეფს ხოლო ქეჩუათ. წერმიდგინით თი ადამიანეფიშ მდგომარეობა, მით ვამსახურუნა იეჰოვას, ხვადუნა განსაცდელეფს დო მუთუნ ვა უჩქუნა იეჰოვაშ დუნაპირებ დიდებულ მომავალიშ გურშენ. ათეშენ, თინეფს მომავალშენ ჭიჭე მუდგარენს ვარა ქუწინთ-და, შილებე ქიმინდომან, ხოლო უმოს ქიგეგან ღორონთიშ დუნაპირებუეფიშ გურშენ.

18. მუშენ შემლებუნა ბჯერდან, ნამდა იეჰოვაშ დუნაპირებუეფ შისრულებ?

¹⁸ თიშ უკულ, მუთ იობიქ ბრელ გაჭირება გინიღ, იეჰოვას უწუ: „ასე მიჩქჷ, ნამდა სი ვეშეილებუნ ფერ მუთუნ ვა რე დო ვა არსებენს მუთუნ, სი ქიმინდომე დო ვეშგასრულებუასინ“ (იობ. 42:2). იობიქ ქიმეხვად, ნამდა იეჰოვაშ განზრახვეფშა მუთუნს ვეწარინე. თეშ რჩქინა ჩქი ხოლო ქომუჩანა მოთვენაშ ძალას. წერმიბდგინათ ოსურ, ნამდგას სერიოზულ ლახალა უღჷ დო ირფელშა გურ აფჷ ელაფირ, მუშენდა ბრელ ექიმშა მერთჷ, მარა ნამთინს ვამახვარებუ თიშა. ბოლოს თიქ ქიმიოგორუ ართ გამოცდილ დო სანდო ექიმს, მიდგაქ სწორ დიაგნოზ ქიგუშქვჷ დო თინა ხოლო ქუწუ, მუჭო შეულებ თიშ სქილიდაფა. მართალ რე, თიშ სქილადას დრო ოსაჭირ, მარა შურქ მადგჷ, მუშენდა უკვე უჩქჷ, ნამდა უჯგუშო იჸუაფ. მალას ჯგირო იჸინ თეშ იმენდ ოხვარ თის, ქუგურზას ლახალას. თეშნერო, ჩქი ხოლო სამოთხეს იფცხოვრენთინ თიშ რჩქინა მოხვარუნა, მიფთვინათ დო ქუგურზათ ირფელს.

19. მუ ოკო ვაკეთათ, ნამდა შემალებუან მოთვენაქ?

¹⁹ მუჭოთ ბძირით, იეჰოვა სირთულეეფიშ გარზებას მოხვარუნა ლოცვათ, მუშ სიტყვათ, თანაქრისტიანეფიშ ელარნათ დო მომავალიშ იმენდით. მორთ ირფელ გუვაკეთათ, ნამდა სრულას გეგმიბრინუათ თე საშვალებეფ, მუდგათ იეჰოვა მოხვარუნა მოთვენას. შედეგო, ირფელს ქუგურზუთ, ონდო სატანაშ ქიანა დო ირნერ გაჭირება მისპუ (ფილ. 4:13).