„სიმართლეშ ღორონთ“ ირო ასრულენს მუშ სიტყვას

1. მუშენ შემლებუნა ვონდუდათ იეჰოვას? (ფსალმ. 31:2–5).

ᲩᲥᲘ ფცხოვრენთ მსოფლიოს, ნამდგას სატანა მართუნს, სოდეთ ტყურა დო ღალატ მანგარო რე მოდვალირ. ათეშენ ხალხის ართიანიშ ნდობა აფჷ დინაფილ. მაგალთო, ბიზნესმენეფ უპატიოსნო შარეფით ოცადუნა კონკურენტეფიშ ჩათხინაფას; ნამთინე ხოლო რეკლამეფით აღორენს ხალხის, ნამდა მუშ პროდუქცია ქიმიასაღას; ინა ვარ, ნამთინე მუშ ხოლოშიან მეგობარიშ სიტყვას ხოლო ვანდჷ. მარა წერმიდგინით, მუნერ გურიშემაკინალ რე თიშ რჩქინა, ნამდა ჩქი ირო შემლებუნა ვონდუდათ იეჰოვას, „სიმართლეშ ღორონთის“ (წეკითხით ფსალმუნეფიშ 31:2–5). იეჰოვა დღას ვა თქუანს ტყურას, მუშენდა სიმართლე თიშ პიროვნებაშ ნაწილ რე. ათეშენ შემლებუნა დარწმუნებულ ვორდათ, ნამდა თინა გაკეთენს ირფელს, მუდგას თქუანს.

2. მუს გუვარჩიენთ თე სტატიას?

² თე სტატიას გუვარჩიენთ, მუ მიზეზეფიშ გურშენ შემლებუნა იეჰოვას მთელ გურით ვონდუდათ. უკულ ქობძირუნთ, მუჭო განადგურენს „სიმართლეშ ღორონთ“ ეშმაკიშ ქიანას დო მუს ორთჷ ამდღა, ნამდა შეასრულას მუშ დუდშეიან გეგმა. თენა ქიმმეხვარებუნა, უმოს გაბედულეფ ვორდათ დო უშქურანჯუო დუვამოწმათ იეჰოვაშ გურშენ.

ᲛᲣᲨᲔᲜ ᲨᲔᲛᲚᲔᲑᲣᲜᲐ ᲕᲝᲜᲓᲣᲓᲐᲗ ᲡᲘᲛᲐᲠᲗᲚᲔᲨ ᲦᲝᲠᲝᲜᲗᲘᲡ

3. მუშენ შემლებუნა ბოლოშა ვენდათ იეჰოვას?

³ ჩქი შემლებუნა ვონდუდათ იეჰოვას, მუშენდა თინა რე გუმაჭყაფალ. თიქ გაჭყჷ ცა დო დიხა დო თიქ მაჩუქეს სიცოცხლე (დაბ. 1:1; ფსალმ. 36:9; გიმოცხ. 4:11). თიშით მიღუნა ირფელ, მუთ სიცოცხლეშო მოსაჭირუნა, მაგალთო, ჰაერ დო წყარ. იეჰოვა ასე ხოლო სრულას აკონტროლენს მთელ სამყაროს დო მომავალს ხოლო გაკონტროლენს თის. ათეშენ შემლებუნა ბოლოშა მივანდათ ჩქინ სიცოცხლე დო მომავალ ჩქინ გუმაჭყაფალს, ნამუთ არძაშ უმოს ბრძენ დო არძაშ უმოს ძალიერ რე.

4. სოვრეშე მიჩქუნა, ნამდა იეჰოვას უჸორთ?

⁴ ჩქი შემლებუნა ვონდუდათ იეჰოვას, მუშენდა თის უჸორთ. იეჰოვაქ ადამიანეფ თიშენ გაჭყჷ, ნამდა ოკოდ, სიცოცხლეთ თინეფქ ხოლო გეხარესკო. ათეშენ მუშ ამნახანტო გუმოჭყეს დო მუჩეს საშვალება, გეგმიბრჩქინათ მუშ სქვამ თვისებეფ, მაგალთო ჸოროფა დო სიკეთე (დაბ. 1:26). თეს გეძინელ, მუჩეს ნებაშ თავისუფლება დო ხვალე ჩქინო გაჭყჷ სქვამ ჸუდე, დედამიწა (ფსალმ. 115:16). იეჰოვაქ ჩქინ პირველ მშობლეფს მეჩჷ სასიამოვნო საქმე, თინეფქ მთელ დედამიწა სამოთხეთ ოკო გინაშქვესკო (დაბ. 1:28; 2:15). ადამქ დო ევაქ სიცოცხლეთ გეხარესკო დო ბედნერეფ რდესკონ თიშ გურშენ, ღორონთიქ ხვეიანო მეჩჷ ირფელ. იეჰოვაშ თე საქმეშე არგამათ ქიძირ, ნამდა თიშ „ჸოროფა ართგურ დო სადღამუშო რე“ (ფსალმ. 103:17).

5. ა) მუ აკეთ იეჰოვაქ მუშ განზრახვაშ შეიოსრულებერო ადამ დო ევაშ დაუმორჩილებლობაშ უმკუჯინუო? ბ) ნამ რე თი ნამთინე დუნაპირებ, ნამუთ ღორონთიქ უკვე შეასრულ? (ქოძირით ჩარჩო „ღორონთ ირო სიმართლეს იჩიებ“).

⁵ ჩქი შემლებუნა ვონდუდათ იეჰოვას, მუშენდა თინა ირო ასრულენს მუშ სიტყვას. იეჰოვას დედამიწა „ტყურათ ვა გუჭყაფუნ, დახორინალო გაჭყჷ“ (ეს. 45:18, 19). მარა, მუჟამსით ადამქ დო ევაქ ღორონთიშ წინააღმდეგ მიდართეს, ღურაშ შარას ქიგიოდირთეს. ათეშენ თეშ იძირედ, ნამდა ღორონთიშ დუდშეიან გეგმა ვეშისრულებედ. მარა იეჰოვაშ განზრახვაშ შესრულებაშა მუთუნს ვეწარნე, თინა ირო ასრულენს მუშ სიტყვას (ეს. 46:10, 11). თიშ დუდშეიან გეგმა, ნამდა დედამიწა მართალ ადამიანეფიშ ეფშაფედუკო, ვათირე. ზუსტას ათეშენ მეჩჷ თიქ ადამ დო ევას გამრავლებაშ უფლება; ათეშენ გიშეჸიდ მუშ ხვალეგუნაჭყეფ სქუაშ ჭყოლოფათ თინეფიშ გამნარყ დო ქიმეჩ ულიებ სიცოცხლეშ მეღებაშ საშვალება (იოან. 3:16).

ᲡᲘᲛᲐᲠᲗᲚᲔᲨ ᲦᲝᲠᲝᲜᲗ ᲐᲡᲠᲣᲚᲔᲜᲡ ᲛᲣᲨ ᲓᲣᲓᲨᲔᲘᲐᲜ ᲒᲔᲒᲛᲐᲡ

6. მუ იწინასწარმეტყველ იეჰოვაქ თიშ უკულ, მუთ ადამქ დო ევაქ თიშ წინააღმდეგ იდეს?

⁶ ადამ დო ევა ღორონთიშ წინააღმდეგ ოულარო ახნარ „ჯვეშ გვერქ, ნამდგას ეშმაკ დო სატანა ჯოხო“a (გიმოცხ. 12:9; დაბ. 3:4, 5; იოან. 8:44). ათეშენ იეჰოვაქ განაჩენ გეგშუღ თის დო გაცხად, ნამდა საბოლათ სატანას განადგურენდ (დაბ. 3:15). მუჭოთ თე წინასწარმეტყველებაშე იძირედ, თეიშახ ბრელ ქიდეკინენდჷ სატანაშ მხარეს დო გეიაჸუნუდ თის, მარა იჸუაფუდეს თიცალეფ ხოლო, მით იეჰოვაშ ართგურეფ ქუდოსქიდუდეს.

7. მიქ ეკაჸუნ სატანას დო მუ იჸუაფ თინეფიშ ბოლო?

⁷ სატანას ღორონთიშ წინააღმდეგ აბუნტებულ ანგელოზეფქ დო ადამიანეფქ ხოლო ეკაჸუნეს. რახანს თინეფქ მინდომეს, ეცილესკო ღორონთიშ განზრახვაშ შესრულებას, სატანაშ გამნარყიშ ნაწილო გინირთეს. მარა ღორონთის მერჩქინელ აფჷ დრო, მუჟამსით სატანას დო თიშ მიმაჸუნალეფს განადგურენს (დან. 2:44; რომ. 16:20).

8. მუ აკეთ იესოქ 1914 წანას? (ქოძირით სურათეფ).

⁸ მუ მარწმუნენა, ნამდა ღორონთ შეასრულენს მუშ განზრახვას დო მოსპუნს სატანას დო თიშ მიმაჸუნალეფს? 1914 წანას იესოქ ომ ქიდიჭყჷ სატანაშ დო თიშ დემონეფიშ წინააღმდეგ დო თინეფ ზეცაშე დედამიწაშა გეგთარღვჷ (გიმოცხ. 12:7–9). მართალ რე, ომ ზეცას მიშჷ, მარა თე ომიშ შედეგეფ დედამიწაშ მახორუეფქ ხოლო ქიგინეს. ბიბლია იჩიებ: „ვავა დიხას დო ზღვას! თქვანდა გიმორთჷ ეშმაკიქ, მანგარო გარისხებულქ, მუშენდა უჩქჷ, ნამდა ჭიჭე დრო აფჷ დოსქილადირ“ (გიმოცხ. 12:12). 1914 წანაშე მოჸუნაფილ სატანას მთელ ყურადღება დედამიწაშა აფჷ გინოღალირ დო ოცად, მუთ შილებენ უმოს ადამიან გეიჸუნუას. ათეშენ დედამიწას მდგომარეობა ირდღას იუფრაშებ. მართალო „ვავაქ“ გიოტირხჷ დედამიწას! მარა, მალას იესო ანთას წანათ დობორკუნს სატანას დო სადღამუშოთ განადგურენს თინეფს, მით თიშ მხარეს გიჸინა (გიმოცხ. 6:2). თინა არძას ქუგაგებაფუანს, ნამდა ირფელ, მუდგას სატანა იეჰოვაშ გურშენ იჩიებ, ტყურა რე (ფსალმ. 45:4–6). არძა ქიგეგენს, ნამდა იეჰოვა რე სიმართლეშ ღორონთ (ეზეკ. 38:23).

World War I: U.S. National Archives photo; bomb: USAF photo; pandemic: blvdone/stock.adobe.com; riot: inhauscreative/E+ via Getty Images

ᲡᲘᲛᲐᲠᲗᲚᲔᲨ ᲦᲝᲠᲝᲜᲗ ᲨᲐᲧᲐᲠᲐᲜᲡ ᲡᲘᲛᲐᲠᲗᲚᲔᲨ ᲛᲝᲸᲝᲠᲝᲤᲔᲔᲤᲡ

9. მის შაყარანს ამდღა იეჰოვა?

⁹ იეჰოვა „ქრისტეწკუმა [შაყარანს ირფელს] ზეცას დო დედამიწას“ (ეფეს. 1:10). ფრაზას „ირფელ ზეცას“ იგულისხმებ ცხებულეფ, მით იეჰოვაქ გიშაგორ, ნამდა ქრისტეწკუმა ართო იმეფესკო ზეცას. „ირფელ . . . დედამიწას“ იგულისხმებუნა თი ადამიანეფ, მით დედამიწას სამოთხეს იცხოვრენა. იეჰოვაშ თაყვანიშმცემელეფიშ თე ჟირხოლო ჯგუფ აქტიურო ღებულენს მონაწილებას სატანაშ ტყურეფიშ გიმოარგამებას დო ოხვარ ალალგურიშ ადამიანეფს სიმართლეშ გაგებას.

10. მუშ საშვალებათ ათავისფალენს იეჰოვა ხალხის ტყურა რელიგიაშ ტყურეფშე? (გიმოცხ. 14:6, 7).

¹⁰ იეჰოვა სიმართლეშ მოჸოროფე ადამიანეფს სამქადაგებლო საქმეშ საშვალებათ შაყარანს. თეცალ დიდ დო მასშტაბურ სამქადაგებლო საქმე ისტორიას ვა შჷ (წეკითხით გიმოცხადებაშ 14:6, 7). მართალ რე, იეჰოვა სახიოლო ამბეშ გაცხადებელო ადამიანეფს ირინუანს, მარა ქრისტიანულ კრებას ალალგურიშ ადამიანეფიშ ეკოშაყარუაშ საქმეს ანგელოზეფ ხოლო ღებულენა მონაწილებას. ქადაგებაშ საქმე გიმაარგამენს თი ტყურეფს, ნამდგას ოგურუანს „დიდ ბაბილონ“, ტყურა რელიგიაშ მსოფლიო იმპერია. თე „იმპერიას“ საუკუნეეფ რე, სატანა ირინუანს, ნამდა ტყურეფ გუსიმუას იეჰოვას (გიმოცხ. 18:2, 4). მალას არძა ტყურა რელიგია სადღამუშოთ გენადგურებ დო თინეფ, მიდგას უჸორა სიმართლეშ ღორონთ, განადიდენდან იჸი თის, მუდგას ქოთ იმსახურენს (გიმოცხ. 17:16).

11. მუჭო გიშეფჩინათ იეჰოვაშ ნამდვილ თაყვანიშმცემელეფ?

¹¹ სიმართლეშ მოჸოროფეეფ შქას რენა ირნერ სოციალურ ფენაშ, კულტურაშ დო ეროვნებაშ ადამიანეფ (გიმოცხ. 7:9, 10). „სახიოლო ამბე“ ქიმირჩქილუესინ, თინეფქ ქიმეხვადეს, ნამდა სიმართლეს ქიმიოგორუეს დო ხიოლით ქაკათეს იეჰოვაშ ხალხის (მარ. 13:10). დროშ მიკულაწკუმა ართო უმოსო გეგმიარგამ, მი რენა ღორონთიშ ნამდვილ თაყვანიშმცემელეფ დო მი – ვარ. მალაქიაქ იწინასწარმეტყველ: „თიმწკუმა კინ ქოძირუნთ განსხვავებას მართალ დო უბადო შქას, ღორონთიშ მსახურ დო თიშ შქას, მით ვამსახურ თის“ (მალ. 3:18). იეჰოვაშ მსახურეფ მუნეფიშ ცხოვრებათ დო ქადაგებაშ საქმეს მონაწილებაშ მეღებათ ოძირანა, ნამდა სიმართლეშ ღორონთიშ თაყვანიშმცემელეფ რენა.

12. მუჭო უნწყუნს ქადაგებაშ საქმე ხეს იეჰოვაშ დუდშეიან გეგმაშ შესრულებას?

¹² „სამეფოშ გურშენ სახიოლო ამბეშ“ ქადაგებათ ქოთ იესოშ მითითებას მეპჸუნთ დო ქოთ წინასწარმეტყველებაშ შესრულებას ბღებულენთ მონაწილებას (მათ. 24:14; 28:18–20). თე საქმეშ ჭყოლოფათ მთელ მსოფლიოს ადამიანეფ ქრისტეშ მოწაფეეფო გინირთუნა დო უღუნა საშვალება, სადღამუშოთ ემსახურან სიმართლეშ ღორონთის. მართალო მუშმადიდა პატი რე, ნამდა შემლებუნა, ჩქინ წილ გემშებღათ იეჰოვაშ დუდშეიან გეგმაშ შესრულებაშა!

ᲛᲝᲛᲐᲕᲐᲚᲡ ᲘᲛᲔᲜᲓᲘᲨ ᲗᲝᲚᲘᲗ ᲣᲯᲘᲜᲘᲗ

13. განსაკუთრებულო მის თხოზჷ სატანა დო მუშენ?

¹³ სატანა ეშმაკ მანგარ გარისხებულ რე, მუშენდა უჩქჷ, ნამდა მუშ ქიანაშ მოსპუალაშახ „ჭიჭე დრო [რე] დოსქილადირ“ (გიმოცხ. 12:12, 13). თინა განსაკუთრებულო ღორონთიშ სამეფოშ მიწიერ წარმომადგენელეფს თხოზჷ, მუშენდა თინეფ „მეჸუნა ღორონთიშ მცნებეფს დო იესოშ გურშენ დამოწმებაშ საქმე ოვალუნა“ (გიმოცხ. 12:17; 14:12). სატანა თხოზჷ არძას, მით ხუჯის უკინენს თინეფს დო თინეფიშ საქმიანობას.

14. მუ მოხვადუ თიშ უკულ, მუთ სატანაშ მხარეს რენან თინეფ იეჰოვაშ ხალხის მიკართუნა? (ქოძირით სურათ).

¹⁴ „დიდ ბაბილონიშ“ განადგურებაშ უკულ სატანაშ მხარეს გერენან თინეფ იეჰოვაშ ხალხის მიკართუნა, მუდგას არმაგედონ ქუმაჸუნუ (გიმოცხ. 16:13, 14, 16). იესო დო ზეციერ ლაშქარ ირსხენა იეჰოვაშ თაყვანიშმცემელეფს დო სრულას გასუფთენა დედამიწას თი ირფელშე, მუთ სატანაშ ქიანაშე იჸუაფ დოსქილადირ (გიმოცხ. 19:19–21). მეტო ვეჸუაფ მეტყურე დო უბადო კათა (გიმოცხ. 21:8). საბოლათ დემტკიცებ, ნამდა იეჰოვა მართალო სიმართლეშ ღორონთ რე.

15. მუშენ შემლებუნა მომავალს იმენდიშ თოლით უჯინათ? (ეს. 65:16, 17; ქოძირით სურათ).

¹⁵ დღას ვა ჸოფე ხალხ თიცალ გორთილ, მუნერით ამდღა რე, მარა იეჰოვაშ ჭყოლოფათ თიშ ხალხის სარკო ართობა უღჷ დო თინა ამდღარშახ აგრძელენს სიმართლეშ მოჸოროფე ხალხიშ ართ ოჯახო ეკოშაყარუას. არგამა რე, მითინს ვაცილებე იეჰოვაშა, დოხვამუას მუშ ხალხ დო თი საქმე, ნამდგას თინეფ ორთუნა (წეკითხით ესაიაშ 65:16, 17). შემლებუნა დარწმუნებულეფ ვორდათ, ნამდა იეჰოვაშ არძა დუნაპირებ შისრულებ, მუშენდა რომაელეფიშ 8:38, 39-ს ენოჭარილ პავლეშ სიტყვეფ მარწმუნენა: „ვართ ღურას, ვართ სიცოცხლეს, ვართ ანგელოზეფს, ვართ ხელისუფლებეფს, ვართ თის, მუთ ასე რე დო მუთ ანწ იჸუაფ, ვართ ძალეფს, ვართ სიმაღალეს, ვართ სიტომბას, ვართ მუთუნნერ შხვა გუნაჭყეფუს ვენკვაჸოთინეთ ღორონთიშ ჸოროფაშე, ნამდგაქ ჩქინ უფალ ქრისტე იესოშ საშვალებათ იძირ!“.

16. ქანდუქო იეჰოვას მთელ გურით დო მუშენ?

¹⁶ ჩქი ირნერ მიზეზ მიღუნა, ვონდუდათ იეჰოვას, სიმართლეშ ღორონთის. თინა რე ჩქინ გუმაჭყაფალ. თის მანგარო უჸორთ დო ამდღა ხოლო შაყარანს ხალხის არძა ერშე, ნამდა მუშ მსახურეფქ ქიჸუან (ეს. 60:22; ზაქ. 8:23). მიჩქუნა, ნამდა თინა ირიათო ასრულენს მუშ განზრახვას დო მალას გეგმაარგამენს სატანაშ არძა ტყურას დო გეკარღვანს თიშ მაზაკვალურ გეგმეფს. დავითცალო ჩქი ხოლო ბლოცულენთ: „ხვამელ რდასჷ იეჰოვა ღორონთ,.. ხვალე თინა ორთჷ სარკო საქმეეფს! სადღამუშოთ გენედიდას თიშ დიდებულ სახელქ დო თიშ დიდებაქ გეიოფშას დედამიწა!“ (ფსალმ. 72:18, 19).