იეჰოვა ახალგაზრდობაშე მოგურუანს

ონდო თე ამბეს გუვაგრძელენდენ, ჩქიმ ისტორიას დუდშე ქიგეჩიებუთ. დებაბდჷ მაჟია მსოფლიო ომიშ დროს, კალგარს, კანადას. 1940-იან წანეფიშ ბოლოს, ახალგაზრდა პიონერქ, დონალდ ფრეიზერქ, ქუდუხაკუ ჩქინ კარს. ჩქიმ დიდაქ ბიბლიაშ გურაფა ქიდიჭყჷ. თის მანგარო ქეჸოროფ ჭეშმარიტებაქ, მარა ილახანდუნ თიშ გურშენ ხშირას ვეგლართედ კრებაშა. თეშ უმკუჯინუო, იშენით შეიალებუ სულიერო წიმი ულაქ დო 1950 წანას დინათ. სანარღოთ, თეშ უკულ ჟირ წანა ხოლო ვა რდჷ მიკულირ დიაჩქიმქ ღურუნ. თი დროს მუაჩქიმ ვა რდჷ იეჰოვაშ მოწმე, მარა ვარია ვა უთქუალ მოწმეეფშა, დასაფლებაშ დღას მოხსენება წეკითხესკო.

დასაფლებაშე მუსხირენ დღაშ უკულ, ართ ხანშამიშულირ ცხებულ დაქ, ელისიქ, კრებაშა ქუდმაპატიჟ. თე და მიჩინენდჷ, მუშენდა, მუჟამსით დიაჩქიმს კრებაშა გილართედ, მა ხოლო გილაპჸუნდჷ. მუაჩქიმს ქოფთხი გოტება. თიქ ჯგირია თქუ დო უკულ მიწუ, მა ხოლო მოლურქია, ოღონც ხვალე ართშა-ვა; ოკოდ, მადლობა ქუწუკო თი ჯიმას, ნამდგაქ დასაფლებაშ დღას მოხსენება აკეთ. თიმ ონჯუას თეოკრატიულ მსახურებაშ სკოლა დო სამსახურებრივ შეხვალამა იტარებუდ. პირველ კრებაშ შეხვალამაქ მუაჩქიმშო თიცალ საინტერესოქ იჸუ, ნამდა მეტ ვეშილებედ. თინა გაკვირებულ რდჷ, მუშმაჯგირა მოხსენებეფით გიშეშეს ჯიმალეფ დო მანგარო მოწონდჷ, მუდგას თინეფ იჩიებუდეს. თიქ გინოჭყვიდ, თე შეხვალამას ირ მარას ქიდესწრუკო, მარა უკულ ჭიე-ჭიეთ არძა შეხვალამაშა დასწრება ქიდიჭყჷ.

თიმ დროს თეოკრატიულ მსახურებაშ სკოლაშ შეხვალამა იჭყაფუდ თი და დო ჯიმალეფიშ სახელეფიშ ეშაკითხირით, მით ენოჭარილ რდესჷ თე სკოლას დო თინეფ აუდიტორიაშე პასუხენდეს, ვორექია. ართ ონჯუას მა ხოლო ქოფთხი ჯიმას, ანწიან შეხვალამას ჩქიმ სახელ ხოლო გეშეკითხით-მაქ. თიქ ქუმოცქუ, მარა ვა უკითხირ, ქუმარჩქილედ დო ვარ, თენა მუს ნიშნენდუნ.

აზრის ვა ვორდჷ, ნამდა თენა თეოკრატიულ სკოლას მოხსენებათ გიშულას ნონიშნებუე. მა უბრალოთ მოკოდ, შეხვალამას ჩქიმ სახელ ხოლო ეშეკითხესკო. უკულიან შეხვალამას ჯიმაქ ქოთ გეშეკითხჷ ჩქიმ სახელ დო მა ამაყას უპასუხ: „ვორექ!“. და დო ჯიმალეფს თეშ გაგებაქ ახიოლეს დო კრებაშ შეხვალამაშ უკულ ქუმოცქუეს. მუსხირენ მარაშა ქოთ ქომუჩეს დავალება, ნამუთ ჩიებაშ დაჭყაფუს მიფშინე.

მანგარო მნერვიანენდჷ. თიმ დროს ბიბლიაშ კითხირიშ დავალება შურო ვა რდჷ დო მოსწავლეეფ 6–8 წუთიან მოხსენებას ორთუდეს. მოხსენებაშ მომზადებას მუაჩქიმქ მიმეხვარ დო ჸუდეს თიშ კეთებას ეჩშა მავარჯიშ. ბოლოს, მოხსენებაშ კეთებაშ უკულ, ზედამხედველქ ხოლო ჯგირ რჩევა ქომუჩ. წანეფიშ დინახალე, იეჰოვა მუაჩქიმიშ, გამოცდილ და დო ჯიმალეფიშ დო მუშ ორგანიზაციაშ საშვალებათ მოგურუანდჷ.

ᲒᲣᲠᲐᲤᲐᲥ ᲒᲔᲒᲠᲫᲔᲚ

მსახურებაშა გილულა ქიდიპჭყინ, ელის, ნამუთ ჟიშე მიფშინე, მოგურუანდჷ, მუჭოთ იფქადაგიკო. თიმ დროს მობინადრეს დიო სუმ ბიბლიურ მუხლის ეშუკითხენდით დო უკულ წიგნის ვარზენდით. კარდოკარ ქადაგებაშ დროს ჩქიმ ოჩერედ ქიმიშუნ, ელის დიო მუშ დუდის გაჩინებაფუანდჷ მობინადრეს, ქადაგებაშა გინილენდჷ დო უკულ პირველ მუხლის მა მოკითხირაფუანდჷ. თეშ უკულ მა ვაგრძელენდჷ ჩიებას, დოსქილადირ ჟირ მუხლის ეშუკითხენდჷ დო პუბლიკაციას ხოლო მა ვარზენდჷ. ჭიჭე ხანშა მა ხოლო ქიდიბგურე, მუჭო დიპჭყიკო მობინადრეწკუმა ჩიება. 1954 წანაშ ბოლოშო, მუაჩქიმქ დინათუნ, უკვე თინა მოგურუანდჷ ქადაგებას. მართალ რე, მუაჩქიმს ხვალე უხვადუდ ჩქიმ რდუალა, მარა თინა ირფელს ორთუდ, იეჰოვა ქომიჸოროფუკონ. თინა კრებაშ შეხვალამეფს დო მსახურებას მანგარ სერიოზულო მეურდჷ. დღას ვა რდჷ ოკითხე, სო იპჸუაფუდით შეხვალამეფიშ ონჯუას დო საბატონ დო ჟეშხა ოჭმარეს, ქადაგებაშ დღალეფს.

სკოლას საშვალო დონეშ მოსწავლე ვორდჷ, მარა თექ ვითოჟირწანიან გურაფაქ მანგარო ეწმოდირთჷ ცხოვრებას. მაგალთო, სკოლას ჯგირო ქიდიბგურე მათემატიკა დო ინგლისურ ნინაშ გრამატიკა. თიმწკუმაიან მიკნაულა ინგლისურიშ გაკვეთილეფ დო თავისფალ თემეფიშ ჭარუა, ამდღარშახ მანგარო მოხვარ სამწერლო განყოფილებას ჩქიმ დანიშნულებაშ შესრულებას.

ხშირას მოკითხუნა, სოვრეშე ეთორჸუნსია მუსიკაშ ჸოროფა. ჩქიმ მშობლეფს უჸორდეს მუსიკა. შქვით წანერ ვორდინ, პიანინოშა გემშამიჸუნეს. გვარიან ხანს ქიგლეფშჷ, მარა ჩქიმ მასწავლებერ ფიქრენდჷ, ნამდა თეშ ნიჭ ვამღუდ. ათეშენ თიქ მუაჩქიმს ელუჩ, გეგშამიჸუნესკო. ვამკვენს თიშ, მუშენდა თიმწკუმა იშენდოიშენ გურ ვეგემძუდ გურაფაშა.

მუსხირენ თუთაშა მუაჩქიმქ ახალ მასწავლებერ დოგორ. თიწკუმა ქოთ პიანინოს ბგურაფლენდჷ დო ქოთ ბირას დო ჟირხოლო ჯგირო გიშმალედ. ბაღანობას სოპრანო ვორდჷ. ჯგირ ხონარ მიღუდ დო ბრელ კონკურს მაფჷ მუნაგებ. მიზანო მიღუდ, მუსიკა თეშ ქიდიბგურეკო, ნამდა მასწავლებერო გინიბრთიკო. თენა საშვალებას ქომუჩანდ, სრულ დროთ მსახურებას ქიდიპჭყანდინ, დუდიშ ეიოჯუმალარ სამუშა მიღუდუკო. თე მიზანწკუმა ძალამ ხოლოს ვორდჷ, მუჟამსით ქიმეფხვად, ნამდა ბრელ დრო მეუღუდ გამოცდეფშო მომზადებას, ნამუთ ოხუდ მუსიკას, თიშ ისტორიას, კომპოზიციეფს დო თაშ. ათეშენ გურაფა მივოტე დო 1963 წანას პიონერობა ქიდიპჭყჷ.

ᲞᲘᲝᲜᲔᲠᲝᲑᲐᲡ ᲮᲘᲝᲚ ᲛᲝᲣᲦ

პიონერობაშ დოჭყაფაშე ართ წანაშ უკულ, სპეციალურ პიონერო დებნიშნჷ კაპუსკასინგის, ონტარიოს. მსახურებას ჩქიმ პარტნიორ რდჷ დანიელ სკინერ. თინა ჟირ ჩქიმ მახანა ქორდჷ. დანიელქ ბრელ მუდგარენ დუმოგურუ თიშ გურშენ, მუჭო რე გენწყილ კრება. კრებაშ სამსახურებრივ კომიტეტის დებნიშნინ, 20 წანერ ვორდჷ. გამოცდილება ვამღუდ, ათეშენ ბრელ მაფუდ დაგურაფალ. მანგარო მოხიოლ, ნამდა ჩქინ ორგანიზაცია ახალგაზრდა ჯიმალეფიშ მომზადებას კინ დიდ ყურადღებას აქციენს. თე ჯიმალეფ ქიმინდომენან-და, ჭიჭე ასაკშე ხოლო მანგარო გიმადირთუნა იეჰოვას.

კაპუსკასინგის მსახურება ვა რდჷ გვალო ადვილ. ზოთონჯის ტემპერატურა -44 გრადუსშახ ანთხუდ, მარა შედარებით ტიბ დღალეფს შილებედ -33 გრადუსშახ ეიკინუკო. დენი დო მა დახე ირდიხაშა კუჩხით გილეფშით. თექ მსახურებაქ მანგარ ხიოლ მომიღ. ხიოლიშ ართ-ართ მიზეზ რდჷ და ლინდა კოულიშ გაჩინებაფა, ნამდგას უკულ ლინდა სპლეინქ ქიგიადვჷ.

ლინდა დუდგინოდვალირ მაქადაგებელ რდჷ დო ქიანაშ კინ მეკითხირეფ უღუდ. თინა რდჷ კეთილ, გურხვე დო უჸორდჷ ადამიანეფწკუმა ურთიერთობა. თიშ დიდა, გოლდი, ართგურ და რდჷ. ლინდაშ მუმა, ალენ, დუდშე მოწინააღმდეგე რდჷ, მარა, თიშ წინააღმდეგობაშ უმკუჯინუო, გოლდის ლინდა დო თიშ ჟირ ჯიმა, ჯონ დო გორდონ, ირიათო გილაჸუნდჷ კრებაშა დო მსახურებაშა. ოთხხოლოს, გოლდის, ლინდას, ჯონს დო გორდონს, ნამსახურებ აფუნა პიონერო. წანეფიშ უკულ ალენქ ხოლო გინირთჷ იეჰოვაშ მოწმეთ. თინა ბრელს ხანდენდჷ კრებაშო.

1965 წანას კანადაშ ბეთელშა ართთუთიან სამეფოშ მსახურებაშ სკოლაშა მემწვიეს, სოდეთ ბრელ მუდგარენ დიბგურე. სკოლას ჯიმალეფქ ელამჩეს, გალაადიშ ბლანკ შევავსიკო. მისიონერობაშო დღას ვამფიქრებ; მიმორჩქუდ, ნამდა თეშო ვეგმობდირთუდ, მარა იშენით შევავსჷ ბლანკ დო ქოთ მემწვიეს გალაადიშ 42-ა კლასშა. გალაადის მასწავლებერეფ ხშირას მიჭარუნდეს შეფასებეფს, მუჭო ბგურაფლენდით. პირველ შეფასებას ელამჩეს, სკოლაშ პერიოდის, მუთ შილებე მეტ ქუგამგებუდკო ორგანიზაციაშ გურშენ. თენა მართალო ჯგირ რჩევა რდჷ 21 წანერ ახალგაზრდაშო.

გალაადიშ სკოლაშ ართ-ართ კურს მედიაწკუმა ურთიერთობას ოხუდ, მუდგაშათ მიშეშ რადიო, ტელევიზია დო პრესა. მანგარო მოპწონდჷ თე კურს. თიმწკუმა ვა ფხვადუდ, მუზმათ გეგმმოდირთუდ თე მომზადება მომავალს. თეშ გურშენ ჭიჭე ხანშა ქიგეჩიებუთ.

ᲡᲔᲜᲔᲒᲐᲚᲡ ᲛᲡᲐᲮᲣᲠᲔᲑᲐ

გალაადიშ თებაშე მუსხირენ დღაშ უკულ მა დო ჩქიმ პარტნიორქ, მაიკლ ჰოულიქ, ჩქინ დანიშნულებაშ ადგილშა, სენეგალშა, აფრიკაშა, მიდაბრთით, სოდეთ მისიონერეფო ვორდით დანიშნულ. თი დროს თი ქიანას, სოდგარენ 100 მაუწყებელ რდჷ.

მუსხირენ თუთაშა ფილიალშა ქუდომძახეს, სოდეთ მარაშე ართშა ოკო იმსახურიკო. თე „ფილიალ“ მისიონერეფიშ ჸუდეშ ხვალე ართ ოთახ რდჷ, მარა ჯიმა, ემანუელ პატერაკის, ნამუთ თექ მსახურენდჷ, ირიათო გუმოშინანდჷ, ნამდა ზუსტას თე „ჭიჭე“ ფილიალ რდჷ იეჰოვაშ ორგანიზაციაშ წარმომადგენელ სენეგალს. ართ დღას ჯიმა პატერაკისიქ გინოჭყვიდ, გურიშემაკინალ წერილეფ ქიმეპჭარითკო მისიონერეფს. თიმ დროს წერილეფიშ ასლეფიშ კეთება ვა რდჷ ადვილ დო ძვირ ხოლო ღირუდ, ათეშენ, თითოეულ მისიონერშო ობეშტალ მანქანათ ცალ-ცალკე პჭარუნდით წერილეფს. თენა ქიანაშმადიდა ხანდას ითხინდჷ, მუშენდა ართ შეცდომა ხოლო ოკო ვა დუშვითკო.

მა ფცხოვრენდინ თი მისიონერეფიშ ჸუდეშა დართალო იმნწყუაფუდინ თეშ, ჯიმა პატერაკისიქ კონვერტ ქუდმოკინუ დო მიწუ: „დეივიდ, საზოგადოებაქ წერილ მოიჯღონ“. კონვერტ გომწყინ, ჩქიმ ნაჭარა წერილქ ქამოსქიდ ხეს. თე შემთხვევაქ ქუდმოგურუ, ნამდა ადგილობრივ ფილიალ, მუდგა ჭიჭე ვა რდასინ, თენა ორგანიზაციას პატის ვეუჸოთანს.

კრებაშ და დო ჯიმალეფს დევემეგობრჷ დო ხშირას საბატონ ონჯუას ადგილობრივ და დო ჯიმალეფწკუმა ვატარენდჷ დროს. მართალო ჯგირ დრო რდჷ. ამდღარშახ ჯგირო ვორეთ ართიანწკუმა. სენეგალს ფრანგულ ქიდიბგურე, მუშენდა თინა თექიან ოფიციალურ ნინა რე. თე ნინაქ შხვადოშხვა ფილიალეფიშ მონახულებაშ დროს მანგარო გიმმოდირთჷ.

1968 წანას მა დო ლინდაქ დებნიშნით. თეშ უკულ მუსხირენ თუთას გვერდგანაკვეთიან სამუშას ბგორუნდჷ სენეგალს, ნამდა მა დო ლინდას თექ პიონერო მსახურებაშ გაგრძელებაქ შემალებუესკო. მარა დამსაქმებელეფს უსხუნუდეს, ადგილობრივ ხალხ დასაქმესკო. საბოლათ, კანადაშა დიბრთით, დეფქორწინით დო სპეციალურ პიონერეფო დებნიშნით ედმუნდსტონს, ნიუ-ბრანზუიკის. თენა რე ჭიჭე ქალაქ კვებეკიშ პროვინციაშ გოხოლუას.

ᲞᲘᲝᲜᲔᲠᲝ ᲛᲡᲐᲮᲣᲠᲔᲑᲐ ᲜᲘᲣ-ᲑᲠᲐᲜᲖᲣᲘᲙᲘᲡ ᲓᲝ ᲙᲕᲔᲑᲔᲙᲘᲡ

ჩქინ მეულაშახ ედმუნდსტონს ადგილობრივ მაუწყებელეფ შურო ვა რდესჷ დო ხვალე მუსხირენ ბიბლიაშ მაგურაფალ ცხოვრენდჷ. კათოლიკურ რელიგიას თიცალ გავლენა უღუდ, ნამდა დახე ირფელს თინა აკონტროლენდჷ. დახე არძა კარს უღუდ ნაჭარა: „იეჰოვაშ მოწმეეფქ ვა მორთან!“. თიმ პერიოდის თეცალ ნაჭარეფს, ამდღარიშ გინაწონს, იშენდოიშენ დიდ ყურადღებას ვა ვაქციენდით. თაშ ნამდა, თე ნაჭარა უღუდ დო ვარ ჩქი არძა კარშა მიფშით. ირ მარას კათოლიკურ ეკლესია ადგილობრივ გაზეთის თეცალ განცხადებას უტენდჷ: „ვაცხადენთ ნადირუას იეჰოვაშ მოწმეეფშა!“. თე ქალაქის ხვალე ოთხ იეჰოვაშ მოწმე ვორდით: ვიქტორ დო ველდა ნორბერგეფ დო ლინდა დო მა, ათეშენ დიდ ამბე ვაკოდ თიშ მეხვალამას, მიშ ამბე აფუდეს თინეფს.

დღას ვაგმოჭყორდუ რაიონულ ზედამხედველიშ პირველ მოულა. თინა ართ მარას რდჷ ჩქინწკუმა დო ბოლოს მიწუეს: „ონდო თაქ რეთინ, არძაშ უმოს, მუთ გაკეთინენან, შილებე თინა რდასჷ, ნამდა დოუთირუათ ხალხის არასწორ წარმოდგენა იეჰოვაშ მოწმეეფიშ გურშენ“. ჩქი ხოლო თენა ქიდეპკინით მიზანო დო ქოთ ქიმვოჭირინეთ თის. ჭიე-ჭიეთ ხალხიქ ქოძირ, მუჭო გენესხვავებუდეს თანდაბალ იეჰოვაშ მოწმეეფ დუდძირგალ კათოლიკურ სამღვდელოებაშე. თე ქალაქის ასე ჭიჭე კრება რე.

ედმუნდსტონს სოდგარენ ართ წანას ქუვორდით, უკულ ქალაქ კვებეკის ართ დიდ კრებას დუმანიშნეს, ნამდგას მოხვარა ოსაჭირუდ. მანგარ სასიამოვნო რდჷ ამშვ თუთას თექ სტუმარიშ მოჸოროფე და დო ჯიმალეფწკუმა ართო რინა. თეშ უკულ გილმალ მსახურეფო დუმანიშნეს.

14 წანას ქუვორდით რაიონულ მსახურებას კვებეკიშ პროვინციას. თენა მართალო მანგარ ჯგირ დრო რდჷ. კვებეკის ქადაგებაშ საქმე მანგარ ჯგირო მიშჷ. ჩვეულებრივ მუდგარენ რდჷ, ართ კრებას მუსხირენ ოჯახ გურაფლენდუკო ბიბლიას დო ონათალო იმზადებუდუკო.

ᲓᲦᲐᲡ ᲕᲐᲒᲛᲝᲭᲧᲝᲠᲓᲣᲜᲐ ᲛᲝᲮᲐᲜᲓᲔ ᲓᲐ ᲓᲝ ᲯᲘᲛᲐᲚᲔᲤ

ფრანგულენოვან კანადელ და დო ჯიმალეფ ხეთეშე ქოიჸოროფუანა დუდის. თინეფ ალალეფ, მხიარულეფ დო მონდომებულეფ რენა. მარა არძაშო ვა რდჷ ადვილ ბიბლიაშ გურაფაშ დოჭყაფა, მუშენდა შილებედ ოჯახიშ წევრეფშე მანგარ წინააღმდეგობეფს შეხვადესკო. ნამთინე ახალგაზრდას მშობლეფ ურაგადუდეს: „ვარდა იეჰოვაშ მოწმეეფწკუმა ბიბლიაშ გურაფას მიოტენთ დო ვარა ჸუდეშე გაჸინა ოულარ“. მარა თინეფქ იშენით იეჰოვაშ ართგურეფქ ქუდოსქიდეს. დარწმუნებულ ვორექ, იეჰოვა მანგარო ამაყენდას იჸი თინეფით.

მართალ ვეპჸიქ, ვემიფშინუე თი ართგურ პიონერეფ დო სპეციალურ პიონერეფ, მით თიმ წანეფს კვებეკის მსახურენდეს. თინეფიშ უმენტაშ კანადაშ შხვადოშხვა კუნთხუშე რდჷ მოულირ. თინეფს ფრანგულ ნინაწკუმა ართო ადგილობრივ კულტურა დო თექიან ხალხიშ აზროვნება აფუდეს დაგურაფალ, მუდგაშათ მანგარ დიდ გავლენა უღუდ კათოლიკურ რელიგიას.

სპეციალურ პიონერეფს უმოსო თიცალ ადგილეფს ანიშნენდეს, სოდეთ ართ მაუწყებელ ხოლო ვა რდჷ. რახანს იეჰოვაშ მოწმეეფიშ გურშენ ადგილობრივეფს გლახა წარმოდგენა უღუდეს, ჩქინეფს თექ მანგარო უჭირდეს ოცხოვრებელიშ დო ხოლო უმოსო გვერდგანაკვეთიან სამუშაშ შიბა. ახალდაქორწინებულ წყვილეფ ხოლო შხვეფწკუმა ართო ცხოვრენდეს ართ ჸუდეს. თინეფ ოთხ, ამშვ ვარდა ბრუო კოჩიან ჯგუფეფო ცხოვრენდეს, ნამდა გირთესკო ხარჯეფ, მუშენდა ცალკე ქიცხოვრესკონ ხარჯეფს ვა განჭუდეს. თე დუდგინოდვალირ პიონერეფ მანგარს ხანდენდეს. მიდგაინწკუმა ბიბლიაშ გურაფას ქიდიჭყანდესინ, შურ დო გურს ინმოდვანდეს თე საქმეს. ასე კვებეკის ვა რე საჭიროება, შხვადოშე მორთან და დო ჯიმალეფქ ოქადაგებშა, თეშ გინაწონს, კვებეკელ პიონერეფ მეულა იშო, შხვა ტერიტორიეფშა ოქადაგებშა.

რაიონულ მსახურებაშ დროს კრებას იბძირუანდითინ, ვოცადუდით, საბატონ ოჭმარეს მოზარდეფწკუმა ართო ქიმსახურითკო. თეშ ჭყოლოფათ ჩქინ თოლით ვორწყედით, მუ სირთულეეფს ხვადუდეს თინეფ. თინეფშე ნამთინე ამდღა შხვა ქიანას მისიონერო მსახურენს, ვარდა შხვა მნიშვნელოვან პასუხიშმგებლობას ასრულენს.

თიმ პერიოდის ნამთინე კრება ვა განჭუდ თის, ნამდა ჩქინ ხარჯეფ დოფორუკო. ათეშენ მინშა თუთაშ ბოლოშო მუთუნ ველმოსქიდუდეს. თეცალ სიტუაციეფს იეჰოვას ოკო მივენდითკო, მუშენდა ხვალე თის უჩქუდ, მუ მდგომარეობას ვორდით დო მუ მოსაჭირუდეს. თის დღას ვემუტებუთ. თაშ ნამდა, თაშიო-თეშიო, ჩქი იშენით ირიათო ვახერხენდით კრებეფიშ მონახულებას.

ᲑᲠᲔᲚ ᲓᲘᲑᲒᲣᲠᲔ ᲐᲠᲗᲒᲣᲠ ᲯᲘᲛᲐᲚᲔᲤᲨᲔ

მუჭოთ ჟიშე მიფშინე, საზოგადოებაწკუმა ურთიერთობაშ კურსიქ, ნამუთ გალაადის მიკობრთჷ, მანგარო ეწმოდირთჷ. თიმ პერიოდის კვებეკის ბრელშა მაშუეს საშვალებაქ, ჯგირო დუვამოწმითკო რადიოშ, ტელევიზიაშ დო ჟურნალ-გაზეთეფიშ საშვალებათ. ხშირას მიხვადუდ თანამშრომლობა ლეონს კრაპოწკუმა. თინა ხოლო გილმალ ზედამხედველ რდჷ დო ჯგირო გიშალედ მედიაწკუმა თანამშრომლობა. მუჟამსით ნამდგაინ მედია საშვალებაშ უნჩაშობაწკუმა დარაგადაფშა მიფშით, ლეონსის თინეფწკუმა დუდ პროფესიონალო ვემუღუდუნ, ურაგადუდ: „ჩქი უბრალოთ ღორონთიშ მსახურეფ ვორეთ. ტელევიზიაშ დო რადიოშ ბრელ მუთუნ ვა მარჩქილენა, მარა ჩქინ ორგანიზაციაქ ფთხუეს, ნამდა ხალხის იეჰოვაშ მოწმეეფიშ კონგრესიშ გურშენ ქუგვოგებაფუათ დო მუთუნს ქუმგახვარებენან-და, მანგარ მარდულ გაჸით“. თეცალ თანდაბლურ მერინაშ შედეგ თინა რდჷ, ნამდა მედია საშვალებეფ მზათ რდესჷ ჩქინ მახვარებელო.

ჭიჭე ხანშა ფილიალქ ქუდმავალ, ქიფთანამშრომლიკო ჩქინ ახალ ადვოკატწკუმა, ჯიმა გლენ ჰაუწკუმა. ჩქი თიცალ საქმეეფშე მაჸიდეს ომუშებელ, ნამდგაქ შილებე მედიაშ ყურადღება მიქცუკო. ჯიმა გლენწკუმა თანამშრომლობაშ დროს, ქოთ გალაადის მიკნაულა კურსიქ დო ქოთ ჯიმა ლეონსწკუმა მეღებულ გამოცდილებაქ მანგარო ეწმოდირთჷ. ჩქიმო დიდ პატი რდჷ ჯიმა გლენწკუმა თანამშრომლობა. თინა მანგარ გაბედულო მეურდჷ თე საქმეს, მარა მუთ არძაშ უმოს მთავარ რე, თინა რდჷ ღორონთიშ კოჩ დო მანგარო უჸორდჷ იეჰოვა.

1985 წანას მა დო ლინდა დასავლეთ კანადაშ თი რაიონს დუმანიშნეს, ნამუთ მუაჩქიმიშ ჸუდეწკუმა ხოლოს რდჷ, თექ საშვალება ქომუჩეს, თიშ მიკოლუაფაქ ხოლო შემალებუესკო. სანარღოთ, სუმ თუთაშა თიქ დოღურ. თე რაიონს 1989 წანაშახ ვორდით დო უკულ, შურო ვეველუდითინ თეშ, შეერთებულ შტატეფიშ ბეთელშა მემწვიეს. თაშ გეთუ ჩქინ სოდგარენ 19-წანიან გილმალ მსახურებაქ. თე წანეფიშ დინახალე ოშობით ჸუდეს გემცადინუნა დო ანთასობით და დო ჯიმას უჩამ ჩქინდა გემუან ოჭკუმალ. თე და დო ჯიმალეფიშ მანგარ მარდულ ვორეთ.

ᲨᲔᲔᲠᲗᲔᲑᲣᲚ ᲨᲢᲐᲢᲔᲤᲨᲐ ᲒᲘᲜᲣᲚᲐ

ბრუკლინშა გენობრთითინ, სამსახურებრივ განყოფილებას დუმანიშნეს. ირიათო მანგარ მარდულ იპჸიქ თი ირფელიშ გურშენ, მუთ თექ დიბგურე. მაგალთო, თექ დიბგურე, ნამდა ონდო არძა დეტალ ვა გარჩქვენუ, წინასწარ დასკვნეფ ოკო ვეგშეღე. უკულ 1998 წანას სამწერლო განყოფილებას დუმანიშნეს, სოდეთ ამდღარშახ ბრელ მუდგარენს ბგურაფლენქ. მუსხირენ წანას მიღუდ პატი, მუდგარენ საქმეეფს ქიმვეხვარიკო ჯიმა ჯონ ბარს, ნამუთ სამწერლო კომიტეტიშ კოორდინატორო მსახურენდჷ. დღას ვაგმოჭყორდუ თი პერიოდ დო თი ირფელ, მუთ თიშე დიბგურე. ჯიმა ჯონ ბარს მანგარ ჯგირ ქრისტიანულ თვისებეფ უღუდ.

მანგარ სასიამოვნო რე თი თანდაბალ და დო ჯიმალეფწკუმა თანამშრომლობა, მით სამწერლო განყოფილებას მსახურენა. თინეფ არძა საქმეშო ლოცვათ იეჰოვას თხინა მოხვარას დო საქმე ჯგირო გიშელენსინ, თეს მუნეფიშ უნარეფს ვემიოჭარანან, არჩქილენა, ნამდა ირფელქ იეჰოვაშ წმინდა შურიშ მოხვარათ იჸუ შეიოლებერქ.

ჩქიმო დო ლინდაშო თინა ხოლო დიდ პატი რდჷ, ნამდა მიღუდეს საშვალება, 110 ქიანას ართგურ და დო ჯიმალეფ ქიბძირეთკო. ჩქინ თოლით ბძირით, მუჭო უჸორა იეჰოვა მისიონერეფს, ფილიალიშ კომიტეტიშ წევრეფს დო შხვა სრულ დროთ მსახურეფს. თიშ ძირაფაქ ხოლო მანგარო ელამკინეს გურშა, მუნერ დუდგინოდვალირეფ რენა ადგილობრივ მაუწყებელეფ, მუ მანგარას გერენა რწმენას დო მუჭო გიორინუანა სამეფოშ ინტერესეფს პირველ ადგილს, თიშ უმკუჯინუო, ნამდა ნამთინე საომარ ტერიტორიეფს ცხოვრენს, ეკონომიკურო უჭირს ვარდა თხოზუნა. დარწმუნებულეფ ვორეთ, იეჰოვას მანგარო უჸორს თინეფ!

თე წანეფიშ დინახალე ლინდა ირნერო ელამრე, ნამდა შევასრულე ჩქიმ პასუხიშმგებლობეფ. თის მანგარო უჸორს ადამიანეფწკუმა ურთიერთობა დო ირო ოცად, მუდგაინით ქიმეხვარას შხვეფს. ლინდას მანგარ ჯგირო გიშალე ადამიანეფწკუმა ჩიებაშ დოჭყაფა. თიქ ბრელს მეხვარ იეჰოვაშ გაჩინებაფას. თეწკუმა ართო, მუსხირენ არააქტიურ და დო ჯიმას მეხვარ, დართუკო იეჰოვას. ლინდა მართალო საჩუქარ რე იეჰოვაშე. მა დო ლინდა მუთ უმოსო მიშურთ ხანშა, თით უმოსო ვაფასენთ თი ახალგაზრდა და დო ჯიმალეფიშ ხანდას, მით შხვადოშხვანერო ელამრენა (მარ. 10:29, 30).

ულირ 80 წანას გინვოჯინექინ, გურ მარდულობათ მაფშაფუ. მა ხოლო ფსალმუნმაბირეცალო ფიფქრენქ, ნამდგაქ ჭარჷ: „ჩქიმ ღორონთ, ახალგაზრდობაშე მოგურუანქ დო ამდღარშახ სქან სარკო საქმეეფშენ ვაცხადენქ“ (ფსალმ. 71:17). გინოჭყვიდილ მაფჷ, თაშ გუვაგრძელე ონდო შურ მიდგჷ!