გიღუდან სამყაროშ უზენაეს მმართველიშ იმენდ

1. მუქ აღოლ იობის?

ᲦᲝᲠᲝᲜᲗᲘᲨ ართგურ მსახურქ, იობიქ, ნამუთ ანთასობით წანაშ წოხოლე ცხოვრენდჷ, მიოდინუ ირფელ – სქუალეფ, ჯანმრთელობა დო ქონება; თეიშახ თის ირკოჩ პატის ცენდჷ, მარა თე ირფელიშ უკულ ხალხიშ თოლს პატიქ გეუოლ. მუშ გლახა მეგობრეფქ ხოლო თიცალ მუდგარენ უწუეს, ნამდა უმოსო გოუსოფეს გურ. თე ირფელქ იობიშ ოსურშა ხოლო თიშმანწარას იმოქმედ, ნამდა თის უწუ, დოჭყე ღორონთ დო დოღურია (იობ 2:9; 15:4, 5; 19:1–3). თეზმა გურიშ გასოფალ ამბეს შეულებუდ იობის ღორონთიშ ნდობა მეუდინუკო დო ოფიქრებაფუკო, ნამდა ღორონთ ვა თხილანს თინეფს, მიდგას თინა შურ დო გურით უჸორა დო ომსახურუნა.

2, 3. მუ შილებე იფიფქრათ სირთულეეფიშ დროს დო მუს დიბგურუანთ იობიშ წიგნშე?

² რახანს მანგარ გლახა დო ძნელ გინაღალარ დროს ფცხოვრენთ, მინშა შილებე თიცალ სირთულეეფს ქეშეფხვადათ, ნამუთ გეგმოცადუნს, ქუვონდუთ დო ვარ იეჰოვას (2 ტიმ. 3:1). მუჟამსით პრობლემეფს გეწი-გეწი შეფხვადუთ, შილებე გურქ მანგარო გეკმაჭირან დო იფიფქრათ, ნამდა მეტ ვაგმარზინენა. თეცალ სირთულეეფიშ გურშენ ნამთინექ იეჰოვაშ ჸოროფაშა გემშეღ ეჭვ დო ფიქრენს, ნამდა ღორონთის ვაკო თიშ მოხვარა.

³ დუდის თაშ თქვა ხოლო ქოგინაფლენდით-და, გურ ვეგიტახათ. იობიქ ქიმეხვად, ნამდა იეჰოვა დღას ვა ურთინუანს ოჭიშის მუშ ართგურეფს. ჩქი ხოლო შემლებუნა ქიდიბგურუათ, თეშნერო ბოლოშა ვონდუდათ ჩქინ ზეციერ მუმას. თექ ქეშმალებუანინ, მორთ გუვარჩუათ იობიშ წიგნ დო ქობძირათ, ნამ ჟირ მნიშვნელოვან მუდგარენშა მარწმუნენა თინა. დიო თინა გუვარჩუათ, მუჭო იძირე თე წიგნშე, ნამდა ხვალე იეჰოვა რე სამყაროშ უზენაეს მმართველ დო უკულ ქობძირუნთ, ნამდა იეჰოვას დასურო უღჷ ძალა, გაკეთას თინა, მუდგას იჩიებ დო მუშ ხალხ თიცალ სულიერ დო ფიზიკურ ზიანშე დოთხილუას, ნამუთ ვეგშესწორებე.

„ᲡᲐᲢᲐᲜᲐᲥ ᲮᲝᲚᲝ ᲥᲘᲛᲔᲠᲗᲷ ᲗᲔᲥ“

4. მი დო მიქ ეკიშაყარ ზეცას ღორონთიშ წოხოლე, მუჭოთ თეს წიგნ „იობ“ მირაგადუნა?

⁴ ბიბლიას პკითხულენთ, ნამდა ართ დღას, მუჟამსით ღორონთიშ სქუალეფქ იეჰოვაშ წოხოლე ეკიშაყარეს, „სატანაქ ხოლო ქიმერთჷ თექ“ (იობ 1:6). თენა რე პირველ ადგილ ბიბლიას, სოდეთ ღორონთიშ მთავარ მოწინააღმდეგე „სატანათ“ მიშინუაფ. თიშ უმკუჯინუო, ნამდა თე დროს სატანა უკვე ვა რდჷ ღორონთიშ ართგურ ანგელოზ დო იეჰოვაშ ოჯახიშ ზეციერ დო მიწიერ ნაწილს ონტერუდ, ღორონთიქ იშენით ქიმეჩ უფლება, თე ეკოშაყარუას ჸოფედუკო. დაბადებაშ 3:15-ის ენოჭარილ სიტყვეფშე იძირე, ნამდა იეჰოვას სატანა უკვე ვემიორჩქუდ მუშ ოჯახიშ ზეციერ ნაწილიშ წევრო. თინა ვა რდჷ თე მუხლის მოშინაფილ „ოსურკოჩიშ“, შხვანერო ქოფთქუათინ, ღორონთიშ სულიერ ოჯახიშ ნაწილ, ნამდგაშეთ „გამნარყიქ“ ოკო მორთუკო.

5. მუს ბგებულენთ სატანაშ დო იეჰოვაშ გურშენ იობიშ წიგნის მოშინაფილ შეხვალამაშე?

⁵ იეჰოვას ოკო, მიჩქუდან, მუქ მოხვად ზეცას თე შეხვალამაშ დროს, ათეშენ თე შემთხვევა ბიბლიას ქენაჭარაფუ. სატანაშ სიტყვეფშე იძირე, ნამდა თინა უგურე ტყურაშეკმაწამებელ რე (იობ 1:9; ქეშუდარით გიმოცხადებაშ 12:10). თე შეხვალამაშე ხოლო ართ მნიშვნელოვან მუდგარენს ბგებულენთ, მუთ გურშა ემქექუანა: იეჰოვა მუშ ულიებ ძალას ირიათო სწორას დო სამართლიანო ირინუანს. თეწკუმა ართო, თის ხოლო ვორწყეთ, ნამდა ირფელიშშემალებე ღორონთ გინმოჭყვიდუნს, მის მუსხიშ კეთებაშ უფლება მეჩას.

ᲘᲔᲰᲝᲕᲐ ᲒᲘᲜᲛᲝᲭᲧᲕᲘᲓᲣᲜᲡ, ᲛᲣᲡᲮᲘᲨ ᲙᲔᲗᲔᲑᲐᲨ ᲣᲤᲚᲔᲑᲐ ᲛᲔᲩᲐᲡ ᲨᲮᲕᲔᲤᲡ

6. მუჭო ოძირუ იეჰოვაქ, ნამდა აკონტროლენდჷ ზეცას შეხვალამას? (იობ 1:7, 8).

⁶ წეკითხით იობიშ 1:7, 8. ზეცას შეხვალამაშ დროს ჩიება იეჰოვაქ წიმიჭყჷ დო სატანას კითხჷ: „ქუმუკინდეო თოლ ჩქიმ მსახურ იობის?“. თეშნერო იეჰოვაქ ქაძირუ, ნამდა მუშ ხეს რდჷ თიშ გინოჭყვიდუა, მუჭო იშჷ თე შეხვალამა. თე კითხვაშე თიქ ხოლო ქიძირ, ნამდა იეჰოვას ჯგირო უჩქუდ, სატანა იობის გეუხედუნ. მორთ ასე ქობძირათ, მუჭო გეგმირინუანდ იეჰოვა მუშ დიდებულ ძალას იობიშ მახვარებელო.

7. მუ თქუ სატანაქ ღორონთიშ მსახურეფშენ? (იობ 1:10, 11).

⁷ წეკითხით იობიშ 1:10, 11. იეჰოვა რე სამყაროშ უზენაეს დო ირფელიშშემალებე მმართველ. თის ირო უჩქჷ, მუშ კეთება იჸუაფ არძაშ უჯგუშ დო მუშ ძალას დო ძალაუფლებას არძა სიტუაციას სწორას ირინუანს (იერ. 32:17; დან. 4:35). მარა სატანაქ იეჰოვაშ გურშენ თქუ, ნამდა თინა არასწორო ირინუანდჷ მუშ ძალას. თინა ამტკიცენდჷ, ნამდა ღორონთ ადამიანეფს, თინეფ შქას, იობის, თიშენ ურთუდ ჯგირს, ნამდა კინ მუს ქემსახურესკო. სატანაქ თინა ხოლო ქოთქუ, ნამდა ადამიანეფ ღორონთის მუნეფიშ სამოგებოთ ომსახურუნა. მუჭო უპასუხ იეჰოვაქ სატანაშ ტყურეფს?

8, 9. მუშ უფლება მეჩჷ დო მუშ უფლება ვემეჩ იეჰოვაქ სატანას დო მუშენ? (იობ 1:12; ქოძირით სურათ).

⁸ წეკითხით იობიშ 1:12. იეჰოვაქ უფლება ქიმეჩ სატანას, დამტკიცუკო მუშ ნარაგად, მარა თინა ხოლო ქუწუ, მუშ უფლებას ვარზენდჷ. ღორონთიქ თის გასაგებო უწუ: „პირადო თის [იობის] ხე ვემკუცაცუა!“. იეჰოვაქ თე შეხვალამაშ არძა დამსწრეშ წოხოლე უზოჯ სატანას, თეშ იშო ვეგნორთუკო. სატანას ხოლო შხვა შარა ვა უღუდ, ოკო მიაჸუნუკო თის, მუთ იეჰოვაქ უზოჯ. ამდღა ხოლო თაშ რე; სატანას ხვალე თიზმა აკეთებე, მუზმაშ კეთებაშ უფლებას იეჰოვა არზენს. თეშნერო იეჰოვაქ მუშ ძალაუფლება დო ძალა გიმირინუ იობიშ ოთხილარო დო დამტკიც, ნამდა მოჸოროფე დო სამართლიან ღორონთ რე.

⁹ თიშ უმკუჯინუო, ნამდა სატანაქ იობის ირფელ მიდუღ, თის მუთუნქ ვეგშურთჷ, იობ იშენით მუშ ზეციერ მუმაშ ართგურ რდჷ (იობ 1:22). მარა სატანა თეს ვეგეჯერდუდ.

10. მუშენ მეჩჷ იეჰოვაქ სატანას უფლება, უმოსო გეგმოცადუკო იობ? (იობ 2:2–6).

¹⁰ წეკითხით იობიშ 2:2–6. თეშ უკულ, სატანაქ უმოს უდუნდებელო ქიმუდირთჷ იობის. თინა იჩიებუდ, ნამდა, საქმე თიშ ღურა-თელაშა ქიმიშ-და, დუდიშ გინატებელო იობ დოჭყენდჷ ღორონთის. თენა ტყურა რდუნ თიშ დამტკიცებელო იეჰოვაქ უფლება ქიმეჩ სატანას, დალახუკო თინა, მარა ხოლო ართშა ქუწუ, მუშ უფლებას ვარზენდჷ: „თიშ სიცოცხლეს ვეშეხუა!“. სატანას შხვა შარა ვა უღუდ, თინა ოკო აკეთუკო, მუთ ღორონთიქ უზოჯ. ხოლო ართშა ქიძირ, ნამდა მართალო იეჰოვა რე უზენაეს მმართველ, მუშენდა სატანას ვეგნართედ თიშ ნარაგადშა დო ღორონთიქ უფლება მეჩუნ თიშე უმოსო ვაცილებედ იობშა.

ᲘᲔᲰᲝᲕᲐ ᲬᲔᲠᲢᲘᲚᲡ ᲒᲘᲐᲨᲥᲕᲐᲜᲡ ᲘᲝᲑᲘᲨ ᲢᲐᲜᲯᲔᲑᲐᲡ

11. მუჭო ხვამჷ იეჰოვაქ იობ? (იობ 42:10–13).

¹¹ წეკითხით იობიშ 42:10–13. იობიქ დამტკიც, ნამდა მუთუნით ვა ურთინუანდ ოჭიშის ღორონთის. ათეშენ იეჰოვაქ ვემეჩ უფლება სატანას, ხოლო მუდგაინ ქოღოლუკო თის. ღორონთიქ წერტილ ქიგიაშქვჷ მუშ ართგურ მსახურიშ ტანჯებას. სატანას თე შემთხვევას ხოლო ვა უღუდ თიშ ძალა, ნამდა ვა დაჸუნუკო იეჰოვაშ გადაწყვეტილებას დო ეცილუკო ღორონთის იობიშ თხილუას დო ხვამას.

12. ქიმიჸუნით მაგალით, მუ აკეთ იეჰოვაქ მუშ მსახურეფშო, მით ონდუდეს თის.

¹² ბოლო დღალეფს ბრელქ გიმოცად მუშ დუდშა, მუჭო ირინუანს იეჰოვა მუშ ძალას მუშ მსახურეფიშ ორსხებელო. მაგალთო, 1945 წანას, „ღურაშ მარშიშ“ დროს, მუჟამსით გერმანიას საკონცენტრაციო ბანაკშე ანთასობით კოჩ ზღვაშა ოჸვილშა მეჸუნდეს, თე ხალხ შქას 230 იეჰოვაშ მოწმე ხოლო რდჷ, მარა თინეფშე ნამთინ ვა ღურე, არძაქ გეგნოსქიდ. თი ირფელიშ უკულ, მუთ თე ქრისტიანეფქ მიკორთეს, მიღეს რეზოლუცია, სოდეთ თეცალ მუდგარენ ჭარუდ: „ქიანაშხანიან წვალებაქ უკვე გეთუ დო თინეფს, მიდგაქ, თაშ ქოფთქუათინ, გოფურაფილ ფეჩქის ჭუალას გინუსქიდეს, ფურკიშ შურ ხოლო ვა განთხანა, პირიქით, იეჰოვაშე მეღებულ ძალათ რენა ეფშა . . . ასე, მუჟამსით ლომეფს გინუსქიდით, ხვალე ართ მუდგარენ მოკონა, ნამდა მარადიულო იეჰოვას ვემსახურათ. თეშე უმოს დიდ ჯილდო მუთუნ ვეჸუაფ“ (ქეშუდარით დანიელიშ 3:27; 6:22).

13. მუ შეილებუნა რჯერდან? (ქოძირით სურათეფ).

¹³ მინშა შილებე თიცალ სირთულე მიღუდან, ნამდა დუდის თეშ ბგინაფლენდათ, ითამ ლომეფწკუმა ვორდათ ენოჸოთამილ (1 პეტ. 5:8–10). მინშა შილებე თეშ იძირედას, ნამდა ბოლო ვა უღჷ ჩქინ პრობლემეფს დო თენა გურს მიტახუნდან. თეცალ დროს შილებე იობიშ მაგალითიშ გოშინაქ მიგეხვარან. ჩქი შემლებუნა ბოლოშა ბჯერდან, ნამდა იეჰოვას უღჷ ძალა, ჩამთხინუან ირნერ ოტანჯებელ. თენა შილებე გვალო ამდღა გაკეთას ვარდა მომავალს, ახალ ქიანას. იეჰოვას თე უბადო ქიანაშ მოსპუალაშო დრო აფჷ დოდგინელ დო თე დრო ართ დღათ ხოლო ვეგნიკინანს!

ᲘᲔᲰᲝᲕᲐᲡ ᲣᲸᲝᲠᲡ ᲛᲣᲨ ᲐᲠᲗᲒᲣᲠ ᲛᲡᲐᲮᲣᲠᲔᲤ

14, 15. მუ ოკო იეჰოვას მუშ ართგურ მსახურეფშო აკეთასინ დო მუშენ? (იობ 14:15; ქოძირით სურათ).

¹⁴ წეკითხით იობიშ 14:15. ჩქინ ზეციერ მუმას განსაკუთრებულო უჸორს მუშ ართგურ მსახურეფ. ღორონთშო თიცალ ძვირფასეფ რენა თინეფ, ნამდა შურ ოლჷ, მუჟამ დურთინუანს სიცოცხლეს მუშ თი ართგურ მსახურეფს, მით ღურელ რენა. თეშნერო თი სინწარე, მუთ კოჩიშ ღურას მოჸუნს, მითინს ვა დუმონკენს გურს (ეს. 65:17).

¹⁵ თიშ უკულ ხოლო, მუთ იობიშ ტანჯებაქ გეთუ, თის იშენით სატანაშ უბადო ქიანას აჸუ ცხოვრებაქ გაგრძელებერქ. მარა, მუჭოთ ბიბლიაშე ბგებულენთ, იეჰოვაქ დასქილიდუ თინა დო თიშე უმოს ხვამა ქიმეჩ, ვინემ თეიშახ უღუდ ღორონთშე. მარა თესხი ხვამა ხოლო მუთუნ ვა რე თი ირფელიშ კარს, მუთ იობის მომავალს ელჷ. თეშნერო იეჰოვაქ ქუმოძირუეს, ნამდა თის ოკო, მუშ ართგურ მსახურეფ ბედნერეფ რდანჷ დო ცხოვრება ოხიოლუდან. თინა მუშ ართგურეფს ქიმეჩანს საშვალებას, გეხარან ბედნერ დო ხიოლით ეფშა ცხოვრებათ სამოთხეს დედამიწას (გიმოცხ. 21:3, 4). იეჰოვას შურ დო გურით ოკო, თენა მუშ მსახურეფშო აკეთასინ დო მითინს ვეწარნე თიშა, მუშენდა თინა სამყაროშ უზენაეს მმართველ რე. სირთულეეფიშ დროს გურშა ქელამკინანა თიშე ფიქრ, მუ სასწაულ მომავალს მოპირუნა იეჰოვა!

16. ხოლო მუ მიზეზ მიღუნა, ნამდა ვონდუდათ იეჰოვას, სამყაროშ უზენაეს მმართველს?

¹⁶ მართალ რე, იეჰოვაქ იობის ბრელ ხანიშ სიცოცხლე მეჩჷ, მარა საბოლათ თიქ იშენით დოღურ. მარა იეჰოვას, სამყაროშ უზენაეს დო ირფელიშშემალებე მმართველს, თიშ ძალა ხოლო უღჷ, ნამდა ღურას გიორჯგინას (კან. 32:39). თაშ ნამდა, თის გიშაგორილ აფჷ დრო, მუჟამსით მუშ საჸოროფო ადამიანეფს გათელენს დო მითინს ვაცილებე თეშა (რომ. 8:38, 39).

ᲑᲝᲚᲝᲨᲐ ᲛᲘᲔᲜᲓᲘᲗ ᲘᲔᲰᲝᲕᲐᲡ

17. სოვრეშე იძირე, ნამდა სატანას მუთუნ ვეგშალე ღორონთიშ ხალხწკუმა?

¹⁷ იობიშ წიგნიქ ბრელ მიზეზ ქუმოძირუეს, მუდგაშ გურშენ შილებე ბოლოშა ვონდუდათ იეჰოვას. მუშმაჯგირა რე, ნამდა სატანას ვეშიალებუ გადინუკო ღორონთიშ ხალხ. ამდღა იეჰოვას სოდგარენ ჩხორო მილიონ ადამიან ართგურო ომსახურ, მუთ თის ამტკიცენს, ნამდა მართალო თინა რე სამყაროშ უზენაეს მმართველ. ბრელშა იძირ, ნამდა იეჰოვაშ ხალხიშ წინააღმდეგ კეთებულ ნამთინ იარაღის ვემიაჭირინუ მუშ მიზანშა (ეს. 54:17). ქიანას უზარზალუანან ფერ მთავრობეფს დო რელიგიეფს მუთუნქ ვა გურთეს ღორონთიშ ხალხწკუმა, მიდგას ართ მეჯინათ მითინ ვემკურე. მუთუნს ვემიატებაფე ჩქინდა ღორონთიშ გურშენ სიმართლეშ რაგად დო ხალხშა თიშ გაცხადება, ნამდა სატანა მეტყურე დო კოჩიშმაჸვილარ რე. გვალო დობღურათინ ხოლო, მიჩქუნა, ნამდა, ბოლოშა ართგურეფ ქიპჸუაფუთ-და, იეჰოვა გუმათელენა (ოს. 13:14).

18. მუშენ ოკო ვა მოშქურუდან მუთუნშა?

¹⁸ იობიშ მაგალითშე ფიქრ მიმეხვარებუნა, მომავალს მუდგაქ ვა მოხვადასინ, მუთუნს ვა დუშქურდათ. დიდ გაჭირებაშ დროს შილებე თეშ იძირედას, ნამდა ღორონთიშ მსახურეფქ უმინჯურო ქუმწოსქიდეს დო სატანა დო თიშიანეფ მუთუნ ვარინ თეშ ორჯგინანა თინეფს, მარა, იობიშ შემთხვევას რდუნ თეშ, სიტუაციას იეჰოვა აკონტროლენდას იჸი დო თინა სატანას მუშ ხალხიშ განადგურებაშა ვემიაშქვანს. მუთუნ ვემეძ თი დროშახ, მუჟამსით იეჰოვა მოსპუნს თი ჭუას, ნამუთ სატანაქ მოუღ ადამიანეფს. თინა მუშ დემონეფწკუმა ართო 1 000 წანათ წკვარამშა იჸუაფ ინოჸოთამილ (ლუკ. 8:31; გიმოცხ. 20:1–3). ბოლოს სატანა დო არძა, მით თის ელუდირთუ, გენადგურებუნა (გიმოცხ. 20:10). მუჭოთ იეჰოვას აფუდ რაგადებულ, თის დუდ გეკაჭყანჭყუ – სადღამუშოთ მისპუ (დაბ. 3:15; რომ. 16:20).

19. მუ კურთხევეფ ელუნა თინეფს, მით ბოლოშა ონდუნა იეჰოვას? (ქოძირით სურათ).

¹⁹ ღორონთიშ მსახურეფს შურ მოლუნა თი დროშა, მუჟამსით სრულყოფილებას ქიმვოჭირინუანთ დო ნამდვილ ბედნერობას ქიბგინანთ. ბოლოშა წარმოდგენა ხოლო ვეშემლებუნა, მუშმაჯგირა დრო მელუნა წიმი. იეჰოვა მოპირუნა: „ვოჭყანქ ირფელ ახალს“ (გიმოცხ. 21:5). ანთასობით წანაშ უკულ პირველო სატანას დო თიშ დემონეფს ვეშიალებენა მუთუნ ქუდუშუან ვარდა გლახა გაკეთებუაფუან ადამიანეფს. თენა ჩქინო შურიშ მოდგუმა იჸუაფ. მუდგაინშენ ნერვიანობა დღას ვა გოიტახუნდან იჸი გურს. თინეფ, მით არმაგედონს გინასქიდუნა, მუნეფიშ თოლით ქოძირუნა, ნამდა მთელ მსოფლიოს ადამიანეფ ირნერ ლახალაშე დოსქიდუნა. თეწკუმა ართო, ქუმოხვადუ თინა, მუდგაშა შურ მოლუნა – ქიდიჭყაფუ ღურელეფიშ გათელება. საბოლათ, ქუმაჭარუნა თიცალ ცხოვრება, ნამუთ დუდშე აფუდ ღორონთის მოფიქრებულ.

20. მუ გაფუნა გინოჭყვიდილ?

²⁰ თე ბოლო დღალეფს შილებე ბრელ სირთულექ გემაზადან, მარა მორთით დუდეკინელო ქეშეფხვადათ ირფელს, ბოლოშა ქიმვენდათ იეჰოვას დო ბჯერდან, ნამდა ჩქინ უზენაეს ღორონთ ქელამდირთუნა. მორთით ჸოროფა დაუმტკიცათ ჩქინ ზეციერ მუმას დო ირკოჩის ქუგვაგათ, ნამდა სატანა მეტყურე რე. შემლებუნა ბჯერდან, ნამდა, ჩქინ უზენაეს ღორონთიშ ართგურეფ ქიპჸუაფუთ-და, სასწაულ მომავალ მაღვენუნა, მუშენდა იეჰოვას შურ ოლჷ, ხვამათ გეიოფშას მუშ მსახურეფ დო თეს ქოთ წყარ ვეკლურსინ თეშ გაკეთენს!