მუშენ შემლებუნა ვორდათ ბედნერეფ, მუჟამსით ბჯოგუთ

1. მუ თქუ იესოქ დო მუშენ რე თიშ სიტყვეფ გასაკვირ?

„ᲑᲔᲓᲜᲔᲠᲔᲤ რეთჷ, მუჟამსით ხალხის ჯოგუთ“ (ლუკ. 6:22). თე სიტყვეფ, ნამუთ იესოქ გვალას ქადაგებაშ დროს თქუ, მარჩქილეეფს ალბათ მანგარო გაკვირენდ. მის ოხიოლ, მუჟამსით ჯოგუნა?! იმწკუმა, მუშენ თქუ იესოქ თენა? თე კითხვაშე პასუხიშ მეღება ჩქინო მნიშვნელოვან რე, მუშენდა, რახანს იესოშ მიმაჸუნალეფ ვორეთ, ბრელს ბჯოგუთ. თე სტატიას გუვარჩიენთ, მუშენ ბჯოგუთ ხალხის დო თეშ უმკუჯინუო, მუშენ შემლებუნა ვორდათ ბედნერეფ.

ᲛᲣᲨᲔᲜ ᲑᲯᲝᲒᲣᲗ ᲮᲐᲚᲮᲘᲡ

2, 3. მუ რე თიშ ართ-ართ მიზეზ, მუდგაშ გურშენ ნამდვილ ქრისტიანეფს თხოზუნა დო მუჭო ოკო იმოქმედას თეშ რჩქინაქ მოწინააღმდეგეეფიშ მიმართ ჩქინ დამოკიდებულებაშა? (იოან. 16:2, 3).

² თიშენ ბჯოგუთ, ნამდა იეჰოვას ფცენთჷ თაყვანს. თინეფიშ გურშენ, მით მუშ მიმაჸუნალეფს თხოზუდესკონ იჸიდ დო ნამთინეს გვალო დოჸვილუნდეს, იესოქ თქუ: „ვართ მუმას იჩინენა დო ვართ მა“ (წეკითხით იოანეშ 16:2, 3). მი რე თეშენ ბრალს? სატანა, ნამუთ „თე ქიანაშ ღორონთ“ რე (2 კორ. 4:3, 4). თინა ირნერო ოცად, ხალხის სიმართლე დუფულას იეჰოვაშ გურშენ დო ახნარენს, ქეწინააღმდეგან ღორონთის იჩინენან დო უჸორან თინეფს (იოან. 8:42–44). მუჭო ოკო იმოქმედას თეშ რჩქინაქ მოწინააღმდეგეეფიშ მიმართ ჩქინ დამოკიდებულებაშა? თიშ რჩქინა, ნამდა თე ადამიანეფ ღორებულ რენა, მოხვარუნა, იშო ხოლო ვეგიბჯოგუათ თინეფ.

³ გუვარჩუათ ჟირ ჯიმაშ შემთხვევა, მიდგაქ შხვადოშხვანერ წინააღმდეგობეფს შეხვადეს. პაველ,a ნამუთ თიცალ ქიანას ცხოვრენს, სოდეთ ჩქინ საქმე ვარიებულ რე, იეჰოვაშ ართგურო მსახურებაშ გურშენ ოჭოფეს, მანგარო გოლახეს დო თუთეფით კარცერს ქიმთახუნუეს. თინა იჩიებ: „არგამათ ვორწყექ, ნამდა თე თხოზინიშ უკახალე სატანა დო თიშ დემონეფ გერენა დო თეშნერო წმინდა თაყვანიშცემაშ წინააღმდეგ მეულა. თის ხოლო ვორწყექ, ნამდა ციხეს მუშენან თინეფიშ უმენტაშის ვა ბჯოგუთინ, უბრალოთ მუნეფიშ საქმეს ორთუნა“. მაჟია ჯიმა, ნამუთ ხორვატიას ცხოვრენს დო ნამდგას მშობლეფ რწმენაშ გურშენ უდუნდებელო ოქცუდეს, თეცალ მუდგარენს იჩიებ: „ქიმეფხვად, ნამდა სინამდვილეს ჩქიმ ნტერ სატანა რე დო ვართ ხოლო ჩქიმ მშობლეფ“ (ეფეს. 6:12).

4. მუს ბგურაფლენთ იესოშ დო სტეფანეშ შემთხვევეფშე? (ქოძირით სურათ).

⁴ ჩქი ჩქინ მოწინააღმდეგეეფ ვა ბჯოგუნან, გვალო ბლოცულენთ თინეფშო (მათ. 5:44). თეშ ჯგირ მაგალითის მარზენა იესო დო თიშ ართ-ართ მოწაფე, სტეფანე. რომაელ ჯარიშკოჩეფქ იესო ძელს ქიმკაჭკადესინ, თინა ლოცულენდჷ: „მუმა, ქაპატი თინეფს“ (ლუკ. 23:34). იესო იეჰოვას თხინდჷ, ქაპატუკო თე ჯარიშკოჩეფს, მით უბრალოთ დავალებას ასრულენდეს. შილებე იესო თი ხალხის ხოლო გულისხმენდუკო, მით მუშ ნტერეფქ ეიჸუნუეს დო თიშ ჸვილუას ითხინდეს. იესოს უჩქუდ, ნამდა თე ხალხის ვარჩქილედ, მუს ორთუდეს. იეჰოვაქ ქიმირჩქილუ იესოშ ლოცვა. სოვრეშე მიჩქუნა თენა? ბრელქ, მით მონაწილებას ღებულენდჷ იესოშ გასამართლებას დო ჸვილუას, უკულ ინარღჷ ცოდეფ, ირწმუნ თინა დო დინათ (საქ. 2:36–41). სტეფანეშ შემთხვევას ხოლო თაშ რდჷ. იესოცალო, თინა ხოლო თხინდჷ ღორონთის, ქაპატუკო მუშ მაჸვილარეფს (საქ. 7:58–60). იეჰოვაქ თიშ ლოცვას ხოლო უპასუხ. მუჭოთ მიჩქუნა, არძაშ ნაკლებ ართ კოჩიქ, მით იწონუანდჷ სტეფანეშ ჸვილუას, ტარსოსელ სავლექ, ქრისტიანო გინირთჷ დო მანგარო ნარღენდჷ თი ირფელს, მუთ ურჩქინჯობათ აფუდ ნაკეთებ (1 ტიმ. 1:13).

5. მუს გურაფლენთ სეზარიშ შემთხვევაშე?

⁵ იეჰოვა ჩქი ხოლო მირჩქილენა, მუჟამსით ჩქინ მოწინააღმდეგეეფშო ბლოცულენთ. გუვარჩუათ ვენესუელას მახორუ ართ ჯიმაშ, სეზარიშ, შემთხვევა. მუამუშ ჩილ დო სქუას რწმენაშ გურშენ უდუნდებელო ოქცუდ. სეზარ იჩიებ: „დიაჩქიმ ჯგირ მეუღლე დო დიდა რდჷ. მართალ რე, თის სამეფოშ საქმე პირველ ადგილშა გეურდჷ, მარა ქომონჯის ხოლო ვარკენდჷ ყურადღებას დო სქუალეფს ხოლო მოგურუანდეს ჩქინ მუმაშ პატიცემას. თის ხოლო მოგურუანდეს, ნამდა ღორონთიშ ნებას ვაწინააღმდეგუდ-და, მუმა მუდგას მიწინდეს, ირფელს ქუდუჯერითკო“. წანეფიშ მიკულაშ უკულ თიშ მუმაქ დითირუ დამოკიდებულება. სეზარ იჩიებ: „ართ დღას შურ დო გურით იბლოც დო უკულ მუაჩქიმს პკითხჷ, ხომ ვაკოდ, ბიბლიაშ გურაფა ქუდუჭყიკონ. ჸუჯის ვა უჯერდჷ, მუჟამსით ქოია მიწუ. ხიოლით ცას ვონჭუდ“. საბოლათ სეზარიშ მუმაქ დინათ. მართალ რე, არძა შემთხვევას თაშ ვა ხვადუ, არძა ვეჭყანს ბიბლიაშ გურაფას დო ვენათუ, მარა ჩქინ გემუან სიტყვაშ დო ჯგირ საქციელიშ ჭყოლოფათ, ნამთინე ითირანს დამოკიდებულებას დო გვალო რდუნ თიცალ მოწინააღმდეგე ვა რე, მუდგაშ ძირაფა მანგარო მოხიოლუნა. იმენდ მიღუნა, ნამდა „მთელ დედამიწაშ მოსამართლე“, მოჭყოლოფე ღორონთ, იეჰოვა, ნამთინეს, მით ამდღა მოწინააღმდეგუნა, გაჩინებაფუანს მუშ დუდის (დაბ. 18:25).

6. მუჭოთ მარკოზიშ 13:13-შე ბგებულენთ, ხოლო მუშენ ბჯოგუთ ხალხის?

⁶ თიშენ ბჯოგუთ, ნამდა იესოშ მხარეს გივორეთ. იესოქ თქუ, ნამდა ნამდვილ ქრისტიანეფს მუშ „სახელიშ გურშენ“ გიჯოგუანდეს (წეკითხით მარკოზიშ 13:13). მუს გულისხმენს იესოშ „სახელ“? თეშა მიშურს თიშ რეპუტაცია დო თეს გეძინელ, თიშ უფლება, ნამდა რდასჷ ღორონთიშ სამეფოშ მეფე. ჩქი თინეფს ბჯოგუთ, მიდგას ადამიანურ მმართველეფიშ იმენდ უღჷ დო ვართ ხოლო იესოშ, მით იეჰოვაქ მუშ სამეფოშ მმართველო გიშეგორ. მარა ხალხის ირო ვა ბჯოგუდათ იჸი. იესო, ნამუთ 1914 წანაშე ღორონთიშ სამეფოშ მეფე რე, მალას არძა ადამიანურ მმართველობას მოსპუნს, ნამუთ ოწინააღმდეგ თის.

7, 8. ხოლო მუ მიზეზიშ გურშენ ბჯოგუთ ხალხის? (იოან. 15:18–20; ქოძირით სურათეფ).

⁷ თიშენ ბჯოგუთ, ნამდა ირნერო ვოცადუთ, ვა ვაგურათ სატანაშ ქიანას მახორუეფს. იესოქ თქუ, ნამდა მუშ მიმაჸუნალეფს გიჯოგუანდეს, მუშენდა თინეფ ვა რენა „თე ქიანაშ ნაწილ“ (წეკითხით იოანეშ 15:18–20). პირველ საუკუნეს მახორუ ქრისტიანეფცალო, ირფელს ვორთუთ, ნამდა ჩქინ აზროვნებათ, საქციელით დო ჩიებათ ვა ვაგურათ სატანაშ ქიანას მახორუეფს. თეშ გურშენ ბრელ ჩქინ და დო ჯიმას, სამუშას იჸინო დოვარ სკოლას, გიაძიცენა დო გლახათ ოქცუნა (1 პეტ. 4:3, 4). მარა ნამთინე მოწინააღმდეგე ითირანს დამოკიდებულებას დო ასე უკვე გეძიცაშ მანგიორო, პატის ფცენა, მუთ მანგარო მოხიოლუნა.

⁸ ცენტრალურ ამერიკას მახორუ ართ ჯიმას, იგნასიოს, სკოლას მუშ მასწავლებერ წანეფიშ დინახალე თიშ გურშენ გაძიცანდჷ, ნამდა ღორონთიშ მაღალზნეობრივ ნორმეფით ცხოვრენდჷ. ონდო სკოლას ათენდუკონ, იგნასიოს თე მასწავლებერქ კითხჷ, შხვეფიშ მხარეშე თეცალ გეძიცაშ დო გლახათ მოქციებაშ უმკუჯინუო, მუჭო შეიალებუ, ვეგნურთუკო ზნეობრივ პრინციპეფს. იგნასიოქ მასწავლებერს ეუნწყჷ, ნამდა ღორონთიშ კანონეფს თეშ უჯინედ, მუჭოთ გლახაშე მათხილარს. უკულ თიქ მასწავლებერ კრებაშა ხოლო ქუდაპატიჟ, მარა ველუდ, ქიმიშუნ. ათეშენ თის მანგარო გუკვირდჷ, მუჟამსით მასწავლებერქ კრებაშა ქუმორთჷ. თე კოჩშა თეშ იმოქმედ თი ჸოროფაქ, ნამუთ კრებას ძირჷ, ნამდა გაგრძელ შეხვალამეფშა დასწრება დო ბიბლიაშ გურაფა ხოლო ქიდიჭყჷ, მუდგაშ გურშენ, უმოს გვიანო, მუქ ხოლო ქეშეხვად წინააღმდეგობას, მარა თის ვემუტებ სულიერო წიმი ულა დო საბოლათ დინათ.

9, 10. ა) ხოლო მუთ ვა გუნა ქრისტიანეფ თე ქიანას მახორუ ხალხის? ბ) მუს ბგურაფლენთ პავლე მოციქულიშ მაგალითშე?

⁹ სატანაშ ქიანას თით ხოლო ვა ბგუთჷ, ნამდა პოლიტიკაშა ვემშურთ დო ჩხუპიშ დროს ნამთინიშ მხარე ვამკინებუნა, თეშნერო იფცვენთ ნეიტრალიტეტის (იოან. 18:36). ჩქი მეპჸუნთ რომაელეფიშ 13:1-ს მოჩამილ მითითებას დო ვომორჩილუთ მთავრობაშ დოდგინელ კანონეფს. მარა, მუჭოთ ქრისტიანეფ, მითინიშ მხარეს ვეპკინენთ პოლიტიკურ საკითხეფს, არჩევნეფს ვართ ჩქინ დუდის გივორინუანთ კანდიდატო დო ვართ შხვას ვარზენთ ხონარს, მუშენდა ჩქი იეჰოვაშ დო თიშ სამეფოშ ართგურეფ ვორეთ, ნამდგაშ მეფე იესო ქრისტე რე. მართალ რე, ბრელ ჩქინ და დო ჯიმა ნეიტრალიტეტიშ გურშენ ოჭოფეს, მარა თინეფ ციხეეფს ხოლო აგრძელენა ქადაგებას, მუდგათ მეჸუნა პავლე მოციქულიშ მაგალითის, მიდგას, თიშ უმკუჯინუო, ნამდა წანეფ გატარ შინაპატიმრობას დოვარ ციხეს, თექ ხოლო ვემუტებ ქადაგება (საქ. 24:27; 28:16, 30). მუჭო ახერხენდჷ პავლე თეს? თინა უქადაგუდ არძას, მით მურჩქილუანდჷ. თინეფ შქას რდესჷ ციხეშ ყარულეფ, სასამართლოს მუშენდესინ თინეფ, გამგებელეფ, მეფეეფ დო, შილებე, გვალო რომიშ იმპერატორიშ, ნერონიშ, წარმომადგენელეფ ხოლო (საქ. 9:15).

¹⁰ პავლეცალო, თი და დო ჯიმალეფ ხოლო, მით ციხეეფს ხენა, უქადაგუნა არძას, მით მურჩქილუანს. თინეფ შქას მოსამართლეეფს დო ყარულეფს. ართ ჩქინ ჯიმაქ, ნამუთ ნეიტრალიტეტიშ გურშენ ამშვ წანაშე უმოსის ხედჷ ციხეს, თქუ, ნამდა თე პერიოდის თეშ უჯინედ, მუჭოთ იეჰოვაშე მეღებულ დანიშნულებას ჯგირ გურიშ ადამიანეფიშ ოგორალო დო ვართ ხოლო დასაჯებას. მუ ბედნერეფ იპჸით, იეჰოვა ჯგირ გურიშ ადამიანეფს ჩქი ხოლო დუმოგორაფუანან-და! (კოლ. 4:3). მორთ გუვარჩუათ, ხოლო მუშენ შემლებუნა ბედნერეფ ვორდათ, თიშ უმკუჯინუო, ნამდა იეჰოვას ვომსახურუთინ თიშენ ხალხის ბჯოგუთ.

ᲛᲣᲨᲔᲜ ᲨᲔᲛᲚᲔᲑᲣᲜᲐ ᲕᲝᲠᲓᲐᲗ ᲑᲔᲓᲜᲔᲠᲔᲤ, ᲛᲣᲟᲐᲛᲡᲘᲗ ᲑᲯᲝᲒᲣᲗ

11. მუჭო ამანგარენს ჩქინ რწმენას წინააღმდეგობეფ? ქიმიჸუნით მაგალით.

¹¹ მიჩქუნა, ნამდა თეთ ბიბლიურ წინასწარმეტყველება ისრულებ. ბიბლიას ენოჭარილ პირველ წინასწარმეტყველებას იეჰოვაქ იწინასწარმეტყველ, ნამდა სატანა დო თიშ გამნარყ, შხვანერო ქოფთქუათინ, თინეფ, მით თიშ მხარეს დეკინენდეს, გიჯოგუანდეს თინეფს, მით ქიჸოროფუანდ იეჰოვას დო ემსახურებუდ თის (დაბ. 3:15). თე წინასწარმეტყველება აუცილებერო შისრულებუდუნ, თეს იესოშ სიტყვეფ ხოლო ოძირანს. თინა ხშირას იჩიებუდ, ნამდა იეჰოვაშ მსახურეფს გიჯოგუანდეს, მუდგას ოთხხოლო სახარებაშ მაჭარალ მიშინუანს (მათ. 10:22; მარ. 13:9–12; ლუკ. 6:22, 23; იოან. 15:20). ქრისტიანულ-ბერძნულ წერილეფიშ შხვა მაჭარალეფქ ხოლო მიშინუეს, ნამდა თენა თაშ იჸუაფუდ დო ღორონთიშ მსახურეფს გიჯოგუანდეს (2 ტიმ. 3:12; იაკ. 1:2; 1 პეტ. 4:12–14; იუდ. 3, 17–19). ათეშენ ვამკვენა, მუჟამსით ფთხოზუნა დო მოხიოლუნა, ნამდა თეთ ბიბლიურ წინასწარმეტყველება ისრულებ. თენა თის ხოლო ამტკიცენს, ნამდა ნამდვილ ღორონთის ვომსახურუთ. ართ და, ნამუთ თიცალ ქიანას ცხოვრენს, სოდეთ ჩქინ და დო ჯიმალეფს თავისფალო ვეშულებუნა იეჰოვაშ მსახურება, თეცალ მუდგარენს იჩიებ: „მუჟამსით დუდ მეუძღვინ იეჰოვას, მიჩქუდ, ნამდა მუ ამდღა, მუ ჭუმან, წინააღმდეგობეფს ქეშეფხვადუდ. ათეშენ, წინააღმდეგობეფქ ქუმაშუნ, ვართ ფშქურნებ დო ვართ გაპკვირებ“. თე დას ბრელ ოწინააღმდეგუდ, თინეფშე ართ-ართ მუშ ქომონჯ რდჷ, ნამუთ ირნერო ამცირენდჷ თის. ინა ვარ, ბიბლია დო პუბლიკაციეფ ხოლო დოუჭვჷ. მარა თე დაქ შიშით იეჰოვაშ მსახურება მიოტუკონ თიშ მანგიორო, რწმენა გემანგარ (ებრ. 10:39). თინა იჩიებ: „რახანს ნაწინასწარმეტყველებ რდჷ, ნამდა ღორონთიშ მსახურეფს გამათხოზუდეს, ველუდ, ნამდა წინააღმდეგობეფს მა ხოლო ქეშეფხვადუთ. თექ ხოლო ართშა დუმარწმუნ, ნამდა სწორ შარას გივორდჷ“.

12. მუქ მეხვარ ართ ჯიმას, ქუგურზუკო თხოზინს?

¹² მართალ რე, მიჩქუნა, ნამდა თხოზინს შეფხვადუთ, მარა ირო ვა რე ადვილ, ქუგურზათ თის. ართ ჯიმა იშინანს თი დროს, მუჟამსით ციხეს ხედჷ დო თეცალ მუდგარენს იჩიებ: „მინშა გურ თეშ მაფუდ დამონკებულ დო თიცალ გლახათ ვორდჷ, ნამდა იმნგარდჷ“. მუქ მეხვარ თის? თე ჯიმა იჩიებ: „ირიათო ბლოცულენდჷ. ირ ოჭმარეს ლოცვათ იპჭყანდჷ. თიმწკუმა ხოლო ბლოცულენდჷ, მუჟამსით დღაშ დინახალე შხვადოშხვა სირთულეს ფხვადუდ. უსამართლობაშენ გურ მუმალედუნ, ტუალეტის ენიპკილანდჷ დუდის დო ბლოცულენდჷ“. თეს გეძინელ, თე ჯიმა ფიქრენდჷ ჯვეშ დო თანამედროვე დროს მახორუ ღორონთიშ ართგურ მსახურეფიშ მაგალითეფშე. თე ირფელქ მეხვარ თის, ქუგურზუკო თხოზინს დო ქიგინუკო სიმშვიდე, ნამუთ იესოქ მუშ მიმაჸუნალეფს დეპირ (იოან. 14:27; 16:33).

13. მუ მიმეხვარებუნა, გივორჯგინათ გოჯოგაფას?

¹³ ხალხის ბჯოგუთ, მარა ჩქინ ჸოროფა უმოს ძალიერ რე. იესოს წამებაშ ძელს ხოლო ვა გორგილაფ იეჰოვაშ მიმართ ჸოროფა. თის მუშ მეგობრეფ ხოლო მანგარო უჸორდჷ (იოან. 13:1; 15:13). იეჰოვას დო და დო ჯიმალეფს ჩქი ხოლო თეშნერო ქიპჸოროფუანთ-და, შემალებენა, გივორჯგინათ გოჯოგაფას. მორთ გუვარჩუათ მოციქულ პავლეშ შემთხვევა, სოვრეშეთ ჯგირო ქობძირუნთ, მუჭო რე თენა შეიოლებერ.

14. მუქ მეხვარ პავლეს, გაბედულო ქეშეხვადუკო ღურას?

¹⁴ ონდო ჸვილუნდესკონ, ჭიჭე ხანით ადრე პავლექ მუშ ხოლოშიან მეგობარს, ტიმოთეს, მეჭარ: „ღორონთის მუშ წმინდა შურით ჩიჩიე გურ ვა მუჩამუნ, ძალა [დო] ჸოროფა . . . მუჩეს“ (2 ტიმ. 1:7). მუს გულისხმენდჷ პავლე თე სიტყვეფს? თის, ნამდა იეჰოვაშ მიმართ ძალიერ ჸოროფა შეიოლებაფუანს ქრისტიანს, არძაშ უმოს დიდ განსაცდელს ხოლო ქუგურზას (2 ტიმ. 1:8). არგამა რე, პავლეს თიშმანწარას უჸორდჷ იეჰოვა, ნამდა მზათ რდჷ, ღორონთიშ მსახურებაშ გურშენ დოღურუკო (საქ. 20:22–24).

15. მუჭო გიმირჩქინანა ამდღა და დო ჯიმალეფ ართიან შქას ჸოროფას? (ქოძირით სურათ).

¹⁵ ჩქი მანგარო მიჸორა თი და დო ჯიმალეფ, მით თხოზინიშ უმკუჯინუო ართგურეფ სქიდუნა. ამდღა ნამთინე ჸოროფას თით ხოლო გიმირჩქინანს, ნამდა და დო ჯიმალეფიშ გურშენ უკახალე მუთუნშე ვეკნიკინანს, მუჭოთ თენა აკვილაქ დო პრისკილაქ პავლეშო აკეთეს (რომ. 16:3, 4). მაგალთო, რუსეთის ბრელ ჩქინ და დო ჯიმა მეურს სასამართლოშა თი თანაქრისტიანეფშა გურიშელაკინალო, მით ჭოფილ რენა. მუჟამსით ართ დაქ, ნამუთ ჭოფილ რდჷ, სასამართლოშა მუშ გურშენ მოულირ ქიანაშ და დო ჯიმა ქოძირ, თექ თიშმანწარას იმოქმედ თიშა, ნამდა ჭიჭე ხანს მუთუნქ ვარაგადუ. ზუსტას და დო ჯიმალეფიშ ჸოროფა რდჷ თინა, მუთ თე დას თიმ დროს მანგარო ოსაჭირუდ. მუ ბედნერეფ ვორეთ, ნამდა ართიან შქას თეცალ ძალიერ ჸოროფათ შემლებუნა, შხვეფშე გოჯოგაფას გივორჯგინათ.

16. მუშენ თქუ მოციქულ პეტრექ, ნამდა თინეფს, მიდგას ღორონთიშ სახელიშ გურშენ გლახათ მექციებუდეს, უღუდეს ხიოლიშ მიზეზ? (1 პეტ. 4:14).

¹⁶ მიჩქუნა, ნამდა გოჯოგაფაშ გარზებათ იეჰოვას უხარენთ გურს (წეკითხით 1 პეტრეშ 4:14). მოციქულ პეტრექ თქუ, ნამდა მიდგას ღორონთიშ მსახურებაშ გურშენ გლახათ ოქცუნა, ბედნერეფ რენა. მუს გულისხმენდჷ თინა? სირთულეეფს ურზუთინ თენა ოძირანს, ნამდა „ღორონთიშ . . . წმინდა შურ [მიღუნა]“. პეტრეს ჯგირო უჩქუდ, მუნერ ხიოლ მოუღ, მუჟამსით თხოზინს ურზუქ დო ღორონთიშ მოწონა გიღჷ. ახ. წ. 33 წანაშ ჟარნეჩდომავითა დღაშ დღახუშე ჭიჭე ხანშა, ტაძარს ქადაგენდესინ თიშ გურშენ, იუდეველეფქ პეტრე დო შხვა მოციქულეფ ოჭოფეს. მარა თიქ გაბედულო დეცვჷ მუშ რწმენა (საქ. 5:24–29). თიშ უმკუჯინუო, ნამდა გოროზგეს, თის დო შხვა მოციქულეფს იშენით ვემუტებუნა ქადაგება. თეშ მანგიორო, თინეფს ოხიოლუდეს, ნამდა პატიქ მიაჩეს, „თიშ [იესოშ] სახელიშ გურშენ დეტანჯესკო“. თაშ ნამდა, ჩქი ხოლო შემლებუნა ვა ვოდინუათ ხიოლ, მუჟამსით განსაცდელეფს ურზუთ (საქ. 5:40–42).

17. მუ უწუ იესოქ მუშ მოწაფეეფს ღურაშ წოხოლენ სერს?

¹⁷ ღურაშ წოხოლენ სერს იესოქ მუშ მოწაფეეფს უწუ: „მიდგას მა უჸორქ, თის ქიჸოროფუანს ჩქიმ მუმა [დო], მა ხოლო ქიპჸოროფუანქ“ (იოან. 14:21). შურ მოლუნა თი დროშა, მუჟამსით იეჰოვაშ მსახურებაშ გურშენ გოჯოგაფაშ მანგიორო, არძას უჸორდათ იჸი! (2 თეს. 1:6–8). თე დროშ მოულაშახ მოკონა, ფშუდან, ნამდა მიღუნა ბრელ მიზეზ, ვორდათ ბედნერეფ ბჯოგუთინ თიმწკუმა ხოლო.