რდათჷ გურგოჩამილეფ დო მიქციებუთ ჭკვერულო

1, 2. მუ რე გურგოჩამილობა დო მუჭო მიმეხვარებუნა თე თვისება?

ᲓᲦᲐᲡ ქუმუქციებინუნანო თქვანდა უპატიცემულოთ? არასწორ მუდგარენ ხომ ვემუჭარაფუნა თქვანდა? გლახათ ხომ ვა მორქციებუნა ვარდა თიცალ სიტუაციას ხომ ვა ჸოფეთ, მუჟამსით შიშიქ ქენგაჭკირეს? თაშ ქორდ-და, ჯგირო გარჩქვენუნა, მუნერ რთულ რე თეცალ დროს სწორას მოქციება. ბიბლია მოძირანა, ნამ თვისება მიმეხვარებუნა თეცალ დო ხოლო შხვა რთულ სიტუაციეფიშ დროს; თენა რე გურგოჩამილობა.

² გურგოჩამილობა რე უნარ, ქოძირე თინა, მუთ ართ მეჯინათ ვეძირე. თინა მოხვარუნა, ქინვანჭათ, მუშენ შილებე მოხვადუკო მუდგარენქ ვარდა მუ გერე მიდგარენიშ მოქმედებაშ უკახალე, შედეგო შემალებენა ჭკვერულო მიფქცუათ. მაგალთო, გურგოჩამილობა მიმეხვარებუნა, საჭირო დროს „ნინა ქეწიპჭოფათ“ დო მიჩქუდან, მუჟამ უჯგჷ, ვა ფთქუათ მუთუნ (იგავ. 10:19; ფსალმ. 4:4). თე თვისება თის ხოლო მიმეხვარებუნა, ნამდა რისხუას ვევაჸუნათ, ვაპატუათ შხვეფს, მუჟამსით გლახათ მოქცუნა დო მზათ ვორდათ რჩევაშ მიოღებელო (იგავ. 19:20). გურგოჩამილობაშ გიმორჩქინათ იეჰოვას უხარენთ გურს. თეწკუმა ართო, ჩქინ გიმორჩქინელ გურგოჩამილობა, ქოთ ჩქი მომღანა ჯგირობუას დო ქოთ შხვეფს. თე თვისება განსაკუთრებულო თი სიტუაციეფს მიმეხვარებუნა, მუჟამსით მიღუნა ცდუნება, გევაჸუნათ ემოციეფს დო ჩქინ სიტყვეფით დოვარ მოქმედებეფით გურ გენკიპჭკუმათ. მორთ გუვარჩუათ სუმ ბიბლიურ შემთხვევა, სოვრეშეთ ქობძირუნთ, მუჭო მიმეხვარებუნა გურგოჩამილობა, ვორდათ თანდაბალეფ, ვა ვოდინუათ სიმშვიდე დო ბოლოშა მივენდათ იეჰოვას.

ᲒᲔᲒᲛᲘᲠᲩᲥᲘᲜᲘᲗ ᲗᲐᲜᲓᲐᲑᲚᲝᲑᲐ ᲓᲝ ᲕᲐᲠᲗ ᲮᲝᲚᲝ ᲡᲘᲐᲛᲐᲧᲔ

3. მი რდჷ ნაამან?

³ სწორას მიფქცუათინ, ოკო ჩეფთხინუათ თვისება, ნამუთ თეს მოცილუნა – სიამაყე (1 პეტ. 5:5). სიამაყეშ ჩათხინაფას გურგოჩამილობა მიმეხვარებუნა. თენა ჯგირო იძირე ნაამანიშ შემთხვევაშე, ნამუთ სირიას, ისრაელიშ ჩრდილოეთჸურე, ცხოვრენდჷ. ნაამანს დიდ ძალაუფლება უღუდ, თინა სირიაშ ჯარიშ დუდკოჩ რდჷ. მარა თე კოჩის საშინელ კანიშ ლახალა, კეთრ, ოჭირუდ (2 მეფ. 5:1).

4. მუჭო გიმირჩქინ ნაამანქ გურგოჩამილობა?

⁴ ნაამანიშ ოსურს მოინალეთ ჸუნდჷ ისრაელ ბაღანა ძღაბ, ნამდგაქ თის უწუ, ნამდა ისრაელს რდჷ წინასწარმეტყველ, ნამდგას თიშ ქომონჯიშ სქილიდაფა შეულებუდ (2 მეფ. 5:2, 3). ნაამანქ შილებედ იფიქრუკო: „ჯგირ მუ ოკო მიწუას თე მოინალე ბაღანაქ, ნტერეფიშ სქუაქ?!“. მარა ნაამანს თაშ ვა მუქციებ, თიქ გურ ქუგუჩ თე ბაღანაშ ნარაგადის, სიამაყეშ მანგიორო, თანდაბლობა გეგმირჩქინ დო ქელერჩქილუ თიშ ნარაგად, ქიმერთჷ სირიაშ მეფეშა დო ქოთხუ, ისრაელშა გოუტუკო ოსქილიდაფშა (2 მეფ. 5:4, 5).

5. მუჭო მექცუეს ისრაელშა ენულირ ნაამანს?

⁵ ნაამანქ კეთრშე სქილიდაფაშ იმენდით ისრაელიშ მეფეშ, იეჰორამიშ, სასახლეშა ქიმერთჷ. მარა იეჰორამქ იფიქრჷ, ნამდა სირიაშ მეფე ჩხუპიშ წუმაჭყაფალო მიზეზის გორუნდჷ, მუშენდა თიცალ მუდგარენიშ კეთებას ითხინდჷ, მუთ ვეკეთებედ. წინასწარმეტყველ ელისექ თენა ქიგეგუნ, იეჰორამს მეუჩინ, ნაამან ჩქიმდა გოუტევა (2 მეფ. 5:6–9). ნაამანქ მიდართჷ ელისეშა, მარა უკულ ირფელქ თეშ ვა მოხვად, მუჭოთ მუ ელუდ. ელისექ თეშ ხოლო ვეგმორთჷ თიშ შეიოხვალამშა დო დარაგადაფშა დო მსახურიშ პიჯით ქიმუჩინ, მუ ოკო აკეთუკო, ნამდა დოსქიდუკო ლახალაშე (2 მეფ. 5:10).

6. ა) მუშენ შილებე ნაამანს ელისეშ მსახურიშ ნარაგადშე გლახა რეაქცია ნოღვედუკო? ბ) მუჭო გიმირჩქინეს ნაამანიშ მსახურეფქ გურგოჩამილობა დო მუქ მაჸუნ თეს შედეგო? (2 მეფ. 5:13, 14).

⁶ დუდშე თე ირფელშე ნაამანს მანგარ გლახა რეაქცია უღუდ; თიქ გერისხჷ დო გურმულირქ მიდართჷ (2 მეფ. 5:11, 12). მუშენ უღუდ თეცალ რეაქცია? შილებე ფიქრენდუკო, ნამდა უპატიცემულოთ მექცუეს; ბოლო-ბოლო თინა ხომ სირიაშ ჯარიშ დუდკოჩ რდჷ. თეს გეძინელ, შილებე ფიქრენდუკო, ნამდა ელისეშ მეჩამილ მითითებეფშე სირიაშ უპატიცემულობა იძირედ. მუჭოდგა ვა რდუკონ, თე კოჩ თი დონეშა რდჷ მეულირ, ნამდა უკვე სქილიდაფა ხოლო ვაკოდ დო ჸუდეშა ირთუდ. მარა თიშ მსახურეფქ საქმეს გურ ქუგუჩეს დო თხუეს, დოთირუკო მუშ გადაწყვეტილება. ნაამანქ მუშ სიამაყეს მერუ, თანდაბლობა გეგმირჩქინ დო მიაჸუნ ელისეშ მითითებეფს, შედეგო დოსქიდ ლახალაშე (წეკითხით 2 მეფეეფიშ 5:13, 14).

7. მუს ბგურაფლენთ ნაამანიშ შემთხვევაშე? (იგავ. 22:4; ქოძირით სურათ).

⁷ მუს ბგურაფლენთ თე შემთხვევაშე? გურგოჩამილობას გიმიბრჩქინანთ, მუჟამსით მარჩქილენა, ნამდა ირფელ შილებე თეშ ვა რდასჷ, მუჭოთ ჩქი მიმორჩქუნა ვარდა ვორწყეთ. ათეშენ მნიშვნელოვან რე, ჯგირო დეფიფქრათ, ონდო მუდგარენიშ კეთებას გინოპჭყვიდუნთ. გურგოჩამილობას თიმწკუმა ხოლო გიმიბრჩქინანთ, მუჟამსით ემოციეფს ვა ვარზენთ საშვალებას, გლახა გადაწყვეტილება მიმოღებაფუან. თე თვისება მიმეხვარებუნა, თანდაბალეფ ვორდათ. თანდაბალ კოჩის არჩქილე, ნამდა ირფელ ვა უჩქჷ. მინშა შილებე შხვეფიშ, განსაკუთრებულო იეჰოვაშ მოხვარაქ დემესაჭირან, ნამდა ქიგებგათ, სინამდვილეს მუშა რე საქმე. მართალ რე, ნაამან ვა რდჷ იეჰოვაშ თაყვანიშმცემელ, მარა თიქ თანდაბლურო მურჩქილუ შხვეფს დო თეშნერო გურგოჩამილობა გიმირჩქინ. მაგალთო, თიქ ქუმურჩქილუ მუშ ოსურიშ მოინალე ძღაბის, მუშ მსახურეფს დო, მუთ არძაშ უმოს მნიშვნელოვან რე, იეჰოვაშ წარმომადგენელს, წინასწარმეტყველ ელისეს. ნაამანქ გიორჯგინ სიამაყეს დო თანდაბლურო მიქცუ, მუდგაშ ჭყოლოფათ მიღჷ თიცალ გადაწყვეტილება, ნამდგაქ ჯგირ შედეგ მოუღ. თე შემთხვევაშე თის ბგურაფლენთ, ნამდა მუდგარენიშ რაგადშახ დოვარ კეთებაშახ ჯგირო ოკო დეფიფქრათ. მაგალთო, შილებე მიდგაინქ ბიბლიაშე თიცალ რჩევა ქომუჩან, ნამდგას ვა ვოთანხმუთ ვარდა ორგანიზაციაშე თიცალ მითითებეფ მიბღათ, ნამდგას ბოლოშა ვენვანჭუთ. თეცალ სიტუაციეფიშ დროს საჭირო რე, დეფიფქრათ: „მუდგაშ რაგად ვარდა კეთება მილამუნ თევრეშე სიამაყე გიმორჩქინდუნო დოვარ თანდაბლობა?“ (წეკითხით იგავეფიშ 22:4).

ᲕᲐᲓᲘᲜᲣᲐᲗ ᲡᲘᲛᲨᲕᲘᲓᲔ ᲓᲝ ᲕᲔᲘᲐᲸᲣᲜᲐᲗ ᲒᲣᲠᲘᲨᲛᲝᲣᲚᲐᲡ

8. მუ დროს შილებე გამჭირდან, ვა ვოდინუათ სიმშვიდე?

⁸ გურგოჩამილობა მიმეხვარებუნა, ვა ვოდინუათ სიმშვიდე დო ვევაჸუნათ გურიშმოულას, მუჟამსით ირფელ თეშ ვა ხვადუ, მუჭოთ ჩქი ველუდით. მართალ ქოფთქუათინ, ირო ადვილ ვა რე, სიმშვიდე ვადინუე, განსაკუთრებულო თიცალ სიტუაციეფიშ დროს, მუჟამსით მუდგარენ გლახას მირაგადუნა ვარდა უსამართლოთ მოქცუნა დო მიღუნა გურიშმოულაშ მიზეზ (ეფეს. 4:26). ქობძირათ, მუჭო გიმირჩქინეს დავითიქ დო აბიგაილქ გურგოჩამილობა რთულ სიტუაციაშ დროს.

9. მუჭო მექცუ ნაბალქ დავითის?

⁹ ქიგიფშინათ მუქ მოხვად, მუჟამსით მეფე საულშე ნტებულ დავით დო თიშ მსახურეფ ფარანიშ უდაბნოს რდესჷ დო ართ ქონებიერ კოჩიშ, ნაბალიშ, შხურეფს დო ჭყიშეფს თხილანდეს (1 სამ. 25:1, 15, 16). შხურიშ ხოკუაშ დროს, მუჟამსით, მუჭოთ წესინ, დიდ დიარას ონწყუნდეს, დავითიქ მსახურეფ ქიმუშქვჷ ნაბალს, ჯგირობუა უზალ დო თანდაბლურო თხუ, ჭიჭე ოჭკუმალ ქიმუჯღონუკო (1 სამ. 25:6–8). მარა ნაბალქ უმარდულობა გეგმირჩქინ თი ირფელშო, მუთ დავითის დო თიშ მსახურეფს თიშო აფუდეს კეთებულ. თიქ ჸინჩას უპასუხ დავითიშ მოშქუმალირ კოჩეფს დო ხვალე თენა ვარინ, დავით დო თიშ მსახურეფ ართიანს ქიმიოლანძღჷ (1 სამ. 25:10, 11).

10. მუჭო გიმირჩქინეს აბიგაილქ დო დავითიქ გურგოჩამილობა? (1 სამ. 25:32, 33; ქოძირით სურათ).

¹⁰ დავითიშ ადგილს ქოჸოფედითკონ, თქვა მუჭო იგინანდით დუდის? ვა რე გასაკვირ, მუშენ გერისხჷ დავითიქ. თინა მანგარ ემოციურ კოჩ რდჷ დო თე შემთხვევას თეშ გერისხჷ, ნამდა ნაბალიშ ჸვილუა გინოჭყვიდ (1 სამ. 25:13, 21, 22). დავით ნაბალიშ ოჸვილშა მიშჷ, მუჟამსით შარას თიშ ოსურქ, აბიგაილქ, ქეშეხვად, ნამუთ გურგოჩამილ ოსურ რდჷ. მუჭო გიმორჩქინდჷ თიშ გურგოჩამილობაქ? თიქ ქიმეხვად, ნამდა, მართალ რე, დავითიქ გერისხჷ, მარა თინა ვა რდჷ გლახა გურიშ კოჩ. ათეშენ მუთ შეულებუდუნ ირფელ გაკეთ დავითიშ დამშვიდებელო. მაგალთო, თიქ ხეძღვინით ქიმერთჷ დავითშა დო თანდაბლურო რჩევა ხოლო ქიმეჩ (1 სამ. 25:18, 23–31). თე დროს დავითიშ გურგოჩამილობაქ ხოლო გემკორჩქინდჷ, თიქ ქელერჩქილუ აბიგაილიშ ნარაგად დო ქიმეხვად, ნამდა თე საკითხის იეჰოვაშ დო აბიგაილიშ დამოკიდებულება ართიანს მეურდჷ. შედეგო დავითიქ დემშვიდ დო ვაკეთ თინა, მუთ უკულ ონარღებელ აჸიდ (წეკითხით 1 სამუელიშ 25:32, 33).

11. მუჭო მიმეხვარებუნა გურგოჩამილობა, ვევაჸუნათ გურიშმოულას? (იგავ. 19:11).

¹¹ მუს ბგურაფლენთ თე შემთხვევაშე? გურგოჩამილობა მიმეხვარებუნა, გურიშმოულაშ მიზეზ მიღუნან თიმწკუმა ხოლო მშვიდას მეუდირთათ საკითხის. თეს გეძინელ, თე თვისებაშ ჭყოლოფათ ქობძირუნთ, მუქ შილებე მაჸუნას ჩქინ სიტყვეფს დო საქციელს (წეკითხით იგავეფიშ 19:11). აბიგაილიშ სიტყვეფქ დავით გაკურცხინუ დო ქუგაშინ, მუს ფიქრენდჷ იეჰოვა თე საკითხშენ, მუდგაშ შედეგო შეიალებუ გაკონტროლუკო მუშ ემოციეფ. თეშნერო, მუჟამსით მუდგარენ გურს მიტახუნა ვარდა მარისხენა, ჯგირ იჸუაფ, ვევაჸუნათ ემოციეფს დო უდუფიქრებუო ვემიფქცუათ (იაკ. 1:19). თეწკუმა ართო, დრო გეგმურთათ ლოცვას დო თიშე ფიქრის, მუჭო უჯინე იეჰოვა თე საკითხის. თენა მიმეხვარებუნა, დიბრთინუათ სიმშვიდე.

12. მუჭო შილებე შხვეფქ მიმეხვარან, გეგმიბრჩქინათ გურგოჩამილობა დო ვა ვოდინუათ სიმშვიდე?

¹² მუჭოთ აბიგაილ გიმირინუ იეჰოვაქ, ნამდა ქიმეხვარუკო დავითის, შხვა თოლით ქუჯინუკო სიტუაციას, თეშ შილებე ამდღა ხოლო შხვეფ გეგმირინუას, ნამდა ქიმმეხვარან, გურგოჩამილო მიფქცუათ კონკრეტულ სიტუაციას. ათეშენ, მუჟამსით ირფელ თეშ ვემურს, მუჭოთ ჩქი ველუდით დო გურ მუმალენა, ჯგირ იჸუაფ თე დროს მუდგაინიშ კეთებაშახ ქუდურაგადუათ მოწიფულ ქრისტიანს, მით ქიმმეხვარებუნა, იეჰოვაშ თოლით ქუჯინათ საკითხის (იგავ. 12:15; 20:18). მინშა შილებე თქვა ქუმგაჩან საშვალებაქ, ქიმეხვარათ თქვან მეგობარს, ნამუთ მუდგარენიშ გურშენ გურმულირ რე. მუჭო მიქციებუთ თე დროს? ქიმიაჸუნუთო აბიგაილიშ მაგალითის? ქიმეხვარებუთო თის, საკითხის იეჰოვაშ თოლით ქუჯინას? დარწმუნებულ რდათჷ, იეჰოვა აკურთხენს თქვან მონდომას, ქიმეხვარათ შხვეფს გეგმირჩქინან გურგოჩამილობა დო ვადინუან სიმშვიდე.

ᲛᲘᲔᲜᲓᲘᲗ ᲘᲔᲰᲝᲕᲐᲡ ᲓᲝ ᲓᲣᲓ ᲕᲔᲛᲔᲩᲐᲗ ᲨᲘᲨᲘᲡ

13. მუჭო მიმეხვარებუნა გურგოჩამილობა, გივორჯგინათ შიშის?

¹³ მინშა შილებე თიცალ სიტუაციეფს ქეშეფხვადათ, მუჟამსით გურს შიშ ენომლუანა. თეცალ დროს გურგოჩამილობა მიმეხვარებუნა, ქიგიფშინათ, მუ ძალიერ ღორონთ პჸუნა დო თიშ კარს მუსხით უმნიშვნელო რე თი ირფელ, მუდგაშათ შილებე მოშქურუდან (ფსალმ. 27:1). იეჰოვას თიცალ დროს ხოლო შეულებ ჩქინ მოხვარა, მუჟამსით ართ მეჯინათ საშველ ვეძირე. თექ ჯგირო გემკორჩქინდჷ წინასწარმეტყველ იონაშ შემთხვევაშე. მართალ რე, თის მანგარო უჸორდჷ იეჰოვა, მარა თიშე რთულ დავალებაშ მეღებაშ დროს, შიშიქ ქენაჭკირ, ათეშენ გურგოჩამილობა ოსაჭირუდ, ნამდა შეასრულუკო თე დავალება.

14. მუშენ შილებე იონას აშქურინუკო იეჰოვაშე მეღებულ დავალებაშ შესრულებაშა?

¹⁴ იეჰოვაქ იონას ოშქურანჯ დავალება მეჩჷ – თიქ ოკო მიდართუკო ნინევეშა დო თექიანეფს იეჰოვაშ განაჩენ ოკო გაუცხადუკო (იონ. 1:1, 2). მუს იგინანდით თე დავალება თქვა მეიღებუდესკონ? წერმიდგინით, დიო ისრაელშე ასურეთიშ ქალაქ ნინევეშა კუჩხით გენორთუკონ, სოდგარენ ართ თუთა დესაჭირებუდ. თეს თინა ხოლო გიაძინუდ, ნამდა ასურელეფ მანგარ უდუნდებელეფ დო უბადოეფ რდესჷ, ინა ვარ, ნინევეს „ზისხირიშდუმაბუნალ ქალაქის“ ხოლო უძახუდეს (ნაუმ 3:1, 7). შილებე თე ირფელ რდუკო თიშ მიზეზ, ნამდა იონაქ დოშქურდჷ დო იეჰოვაშე მეღებულ დავალებაშ შესრულებაშ მანგიორო, შხვადო ინტჷ (იონ. 1:3).

15. მუქ მეხვარ იონას, ბოლოშა მიენდუკო იეჰოვას? (იონ. 2:6–9).

¹⁵ იონაქ გეშართჷ გემშა, ნამუთ ნინევეშა ვარინ, გვალო შხვადო მიშჷ. უკულ თეშ ქუმოხვად, ნამდა თინა ზღვას ქინაჸათეს, სოვრეშეთ იეჰოვაქ სასწაულებრივო ირსხჷ. თექ ქუგაშინ იონას, მუშმადიდა ძალაშ მენდულ რე იეჰოვა (იონ. 1:15, 17). თენა ჯგირ გაკვეთილ რდჷ იონაშო. თიქ ქიმეხვად, ნამდა ხვალე თიშე ოკო ვეფიქრუკო, მუდგაშ გურშენ ოშქურუდ ნინევეშა ინულაშ, თეშ მანგიორო, ყურადღება თიშა გეგნიღ, ნამდა იეჰოვას ირნერ ოშქურანჯ სიტუაციაშე შეულებუდ თიშ დარსხება (წეკითხით იონაშ 2:6–9). შედეგო, მუჟამსით იეჰოვაქ თის მაჟია შანს ქიმეჩ დავალებაშ შეიოსრულებერო, იონას უკახალე ვეკნუკინუ, მიდართჷ ნინევეშა დო თექიანეფს გაუცხად იეჰოვაშ განაჩენ, მუდგას ჯგირ შედეგიქ ქუმაჸუნ (იონ. 3:5).

16. მუჭო მიმეხვარებუნა გურგოჩამილობა, მუჟამსით შიშ ენომლუანა? (იგავ. 29:25; ქოძირით სურათეფ).

¹⁶ მუს ბგურაფლენთ თე შემთხვევაშე? ვა მოკონა, მუთუნქ, მითუმეტეს კოჩიშ შიშიქ, მეცილან იეჰოვაშ მსახურებას (წეკითხით იგავეფიშ 29:25). იონას გურგოჩამილობაქ მეხვარ, დეფიქრუკო ულირშე დო ყურადღება სირთულეეფიშ მანგიორო, იეჰოვაშ მოხვარაშა გეგნიღუკო. თეშნერო, ჩქი ხოლო შიშის გივორჯგინათინ, ოკო დეფიფქრათ, მუჭო მუხვარებ იეჰოვას ჩქინდა ულირს დო მუჭო უთხილუთ შხვადოშხვა სიტუაციას. თეწკუმა ართო, შემლებუნა დეფიფქრათ თი და დო ჯიმალეფიშ მაგალითეფშე, მიდგაქ იეჰოვაშა მენდებათ გიორჯგინეს შიშის ვარდა შეასრულეს რთულ დავალებაa (ებრ. 13:6). მორთ იეჰოვაშა ბოლოშა მენდებათ გურგოჩამილობა გეგმიბრჩქინათ დო შხვეფს ხოლო ქიმვეხვარათ თეშ კეთებას.

ᲘᲠᲘᲐᲗᲝ ᲠᲓᲐᲗ ᲒᲣᲠᲒᲝᲩᲐᲛᲘᲚᲔᲤ

17. მუ მიმეხვარებუნა, ვორდათ უმოს გურგოჩამილეფ?

¹⁷ მუჭოთ ბძირით, გურგოჩამილობაშ ჭყოლოფათ შემლებუნა რთულ სიტუაციეფიშ დროს ჭკვერულო მიფქცუათ. მუ მიმეხვარებუნა, ვორდათ უმოს გურგოჩამილეფ? არძაშ უმოსო იეჰოვა მოხვარუნა გურგოჩამილობაშ გავითარებას. თინა თეშო მუშ სიტყვას დო მუშ წმინდა შურს ირინუანს (ნეემ. 9:20; ფსალმ. 32:8). იეჰოვა მარზენა რჩევეფს, ნამუთ მოხვარუნა, მიბღათ სწორ გადაწყვეტილებეფ დო ვაკონტროლათ ემოციეფ (ფსალმ. 119:97–101). გურგოჩამილობას გუვავითარენთ, მუჟამსით ჯგირო დეფიფქრებუთ, მუს იჩიებ ბიბლია დო იეჰოვას ლოცვას ქოფთხინთ, ქომუჩან მუშ წმინდა შურ. შედეგო კონკრეტულ სიტუაციას სრულ სურათის ქობძირუნთ დო მარჩქვენუნა, მუშ რაგად ვარდა კეთება იჸუაფუდ თე სიტუაციას იეჰოვაშო მოსაწონ (იგავ. 21:11).

18. მუშ კეთება გაფუნა გინოჭყვიდილ?

¹⁸ მორთ ირიათო ფთხუათ იეჰოვას, ნამდა ქიმმეხვარან გურგოჩამილობაშ გავითარებას დო ირო ფშუდან, მუ ძვირფას თვისება რე თენა (ფსალმ. 14:2). თაშ ვემიფქციებუთ-და, გამჭირდუნა გურგოჩამილობაშ გიმორჩქინა (იგავ. 21:16). მარა ჩქი გინოჭყვიდილ მაფუნა, მუდგა სიტუაციას ვა მოფხვადათინ, ირიათო გეგმიბრჩქინათ გურგოჩამილობა. თაშ მოქციება ირო ჯგირობუას მომღანა.