42 MARIA
Aahilipa murima wiira iiwelele
MUTEKO xeeni muulupale Yehova otonko awe onvaha pinaatamu oottheka? Nrowe nithokorerye ntakiheryo na mwali muyuda, aihaniwa Maria. Nihiku nimosa, okathi aari awe owannyawe oNazarethi wa oGalileya, owo aahixukuriwa ni nlaikha Gabriyeli!
Nlaikha naahimuhimeerya wiira: “Yehova oohakalala ni nyuwo Maria. Owo ori ni nyuwo”. Woopaceryani, Maria “aahitikinihiwa vanceene”. Owo uupuwela wiira khaaphwanela ottottopeliwa siisaale. Nlaikha Gabriyeli naahimulipiha nihimyaka so: “Muluku ohooreerelani murima.” Nuumala-vo, owo aahimuleela muteko aavahiwe awe ni Yehova. Nlaikha nlo naapacenrye nihimyaka so: “Munoorupala ni munoomuyara mwaana mwaamulopwana”. Nave naahimuhimeerya wiira: “Owo onrowa okhala muulupale, onimwiihaniwa Mwaana a Muluku Muulupalexa.” Mwaana Maria aarowa awe omuyara, aarowa okhala Mwene omuranttelaka mwene Davidi.
Maria aahaana olipa murima wiira owerye opaka nikoho nookhalela para nlaikha nle. Owo aahinoivariwa ni iira ohinatthi otheliwa, nave khaatonko orupa ni mulopwana. Owo aakonhe so: “Vanrowa wiiraneya sai”? Nlaikha Gabriyeli naahimutthokiherya wiira ikuru soowaarya sa Yehova, sammukhapelela, nave sammukhaliherya omuyara mwaana oohittheka, yoowo aarowa okhala oowaarya ni aarowa wiihaniwaka Mwaana a Muluku. Nlaikha nle naahimuleela etthu Yehova amwiirenle awe mmusi awe iitthaniwa Elizabeti. Itthu iyo saahimukhaliherya vanceene Maria. Maria aahimmye so: “Miyo ka murumeyi a Yehova! Yiireye ni miyo ntoko sihimme anyu”. Owo aaninweha Yehova ntoko mutthu oophenta, nave aaniiweha yena okhala mutthu oowiiwelela. Maria aaniroromela wiira apaka ele Yehova aaphavela awe, okathi wootheene Yehova ammukhapelelaka. Mwaha wa ororomela iwo Maria khaapinse weemererya muteko ole, hata waari wooxankiha.
Nuumala nlaikha orowa, Maria aahirowa omuxukurya Elizabeti. Athiyana ale oowanli yaahilipihana alipelelaka itthu saarowa owiiraneela. Maria aahooniherya waamini ni etthu yaamukhalihenrye okhala oolipa murima. Vaavo aalavula awe, mwa okathi vakhaani paahi, aahiromola soolepa sinivikana 20 sa Soolempwa sa Eheeperi. Maria aari muthiyana aarina waamini wuulupale, nave aaniiwexexa ikeekhai soowiixerya sa Nuulumo na Muluku. Nto Maria aanimusuwela oratteene Yehova, nave saahikhala itthu sinceene saamwiiriha ororomela sooleiherya sawe. Maria aahikhala vatthokoni va Elizabeti miyeeri soowiiraka miraru. Maria aahaana olipa murima wiira omutthokiherye Yosefe yoowo aamunoivanri, wiira yena aahirupala ni moota eyo yiiraneyale aya. Wanipacerya, Yosefe vaahinvila okupali etthu Maria aahimmye awe, masi nlaikha na Yehova naahimuleela ekeekhai voohimya sa mwaha ole.
Nuumala Yosefe ni Maria othelana, wiira waattamelaka okathi Maria aarowa awe oyara. Nto Yosefe ni Maria yaahirowa oBetelehemu, okhala wiira Seesari aahiruma wiira atthu ootheene yaahaana orepeliwa. Okhala wiira aahirupala, weetta mukwaha wa ikiloomu 150 vapuuruni vaari vooxankiha para Maria. Hata vari siiso, owo aaheemererya. Owo aahimuyara mwanawe mwaamulopwana, nave aahimwaatalela opuro waalya inama. Masi khaahiyale okhala oolipa murima. Owo aahipaka itthu sootheene aawerya awe wiira omukhapelele mwanawe ole amphenta awe vanceene.
Nlaikha Gabriyeli naahinvekela Maria ovara muteko woovirikana ni miteko sootheene, Muluku aatonko awe waavekela apinaatamu
Maria aahaana olipa murima mwaha wa itthu saarowa omukhumelela mahiku ni iyaakha saattharelana. Okhala wiira mwene Herodi aaphavela omwiiva mwaana ole, Maria aahaana olipa murima wiira yena ni etthoko awe otthyawele wExiitu. Owo aahaana olipa murima wiira aahuwe anaawe 7 aahiiso ovikana, okhala wiira Yosefe ni Maria yaari atthu oohaawa. Nave aahaana olipa murima vaavo aakhweliwa awe iyawe amphentexa awe aitthaniwa Yosefe, yoowo aakhwiiye woonasa wene Yesu ohinatthi okhala Mesiya. Owo aapirisari olipa murima okathi Yesu aakhumme awe owaani wiira opacerye muteko awe woolaleerya. Masi-tho, owo aanipirisari olipa murima okathi Yesu ootheriwa awe, ophukeliwa ni wiiviwa. Wanikisa waya, owo aahaana olipa murima wiira okhale ni atthareli a mwanawe ni ovilela othanyiwa ni ayuda.
Tthiri Maria aahikhalana miritti sinceene! Aawenrye sai olipa murima wiira ovare miteko iyo sootheene? Biibiliya onihimya wiira nuumala Maria wiixutta etthu yeeyo yaalipiha waamini wawe, owo aahisuka vamurimani vawe. Eyo enooniherya wiira Maria aahikhalana waataana wooloka ni Muluku. Etthu yaamukhalihenrye waari osoma Nuulumo na Muluku, nave Malaikha, arumeyi a Yehova ni mwanawe yaahimukhaliherya vanceene. Wuupuwelela ikeekhai iyo waahimukhaliherya Maria oxintta mixankiho seiyo samphwanya mpakha wanikisa wa okumi awe.
Musome yoowiiraneya ela mbiibiliyani, soolepa sinittharelana:
Nikoho para ovaanela:
Maria oonihenrye sai olipa murima?
Mutokose itthu sikina
1. Etthu xeeni enooniherya wiira atthu aniromoliwa eliivuru ya Luka 2:1-3 yaahikhala tthiri? (Nvenye! 04/2011 epaax. 11 itti. 4-5) A
British Library, London, UK, from the British Library archive/Bridgeman Images
Eteseenyu A: Yooruma ya kuvernatoro muroma a wExiitu, mwaakha 104 Nuumala Kristu Orwa
2. Xeeni vaari aya vooxankiha para Maria weetta orowaka oBetelehemu? (Mutakiheke waamini waya ipaax. 153-155 itti. 4-7)
3. Okathi Yesu aari awe mwaana, Maria aahileeliwa wiira aamuhaawa “ntoko mutthu ohommwale ni xoowa oorakama”. Moolumo ala yiiraneyale sai? (Luka 2:35; Owehaweha 15/03/2008 epaax. 30 etti. 8)
4. Xeeni ninhimya ahu wiira Maria oovahiwa eparakha ya orowa okhalaka wiirimu? (Owehaweha 07/2018 epaax. 7 etti. 14) B
Eteseenyu B: Maria ni anaawe ari ene oYerusalemu mahiku a pentekoositi a 33 Nuumala Kristu Orwa
Muupuwelele itthu mwiixuntte anyu
Okathi Maria aaphavela awe olipihiwa, owo aahimuxukurya Elizabeti. (Luka 1:39, 40) Xeeni ninreerela ahu oveka nikhaliheryo, okathi nneehereriwa ahu aahiiso ninvahiwa ahu muteko nnoona ahu okhala wootepaxa oxankiha? C
Eteseenyu C
Nnaamwi Maria aanoivarinwe ni Yosefe, Yehova aahiruma nlaikha wiira olavule toko ni Maria ohiya ni Yosefe. Eyo enniixuttiha exeeni ni moota Yehova oniwoonela awe athiyana oororomeleya?
Munrowa otakiha sai olipa murima wa Maria?
Muupuwele yoowiiraneya yootheene
Yoowiiraneya ela enikiixuttiha exeeni sa Yehova?
Yoowiiraneya ela enivarihana sai ni yoolakela ya Yehova?
Xeeni munixukhurela anyu mwaha wa Maria othanliwa wiira alamuleleke ni Kristu wiirimu?
Mwiixutte itthu sikina
Muupuwele moota Maria aavanre awe muteko muulupale wiira aahuwe anaawe. Musome mwaha oni:
Ntakiheryo na Maria ninniixuttiha exeeni? (Owehaweha 01/01/2009 epaax. 5 etti. 5 mpakha epaax. 6 etti. 2)
Maria oonenle sai muteko aavahiwe awe ni nlaikha Gabriyeli? Nwehe eviitiyu eni: