47 MARIA, MUROKORAWE LAAZARO
Owo aari mutthu oovaha
MARIA, aanimuxukhurela vanceene Yesu. Yesu aahimpakela itthu sooreera Maria, omuhela muhina munnawe aihaniwa Marta ni murokorawe aihaniwa Laazaro. Yesu aaniphenta vanceene emusi ele. Ikwaha sinceene Yesu aphiya oBethania, owo aanimaka vatthokoni vaya ni aaniwiixuttiha ekeekhai ya Yehova ni Yena. Okathi Laazaro aakhwiiye awe, Yesu aahimuhihimuxa.
Maria aaphavela wooniherya oxukhurela wawe. Mwaha waivaavo, aahilakela onvaha Yesu eperesenti ya efaita yinceene. Owo “aahikuxa makhura oowunkhela, etthu yoowiiraka nimeya na eliituru, yaawo yaapakiwe ni narto oohitakaaheriwa etthu ni a musurukhu munceene.” Para okathi ole, wiira namuteko owerye othuma ekarafa emosa ya makhura ale, aahaana otakaaha musurukhu aakhela awe eyaakha ntero. Biibiliya, khonihimya moota Maria aawenrye awe ophwanya makhura ale a efaita yinceene, masi woonasa wene, ele ti yaari etthu ya efaita Maria aarina awe.
Maria aaphavela onvaha Yesu eperesenti ya vameekhaaya, masi aanisuwela wiira atthu akina yaamunveeha aahiiso omuulihiha muru vakhala wiira ampaka eyo
Nihiku nimosa, okathi Yesu aaxantari awe oBethania, Maria aahoona wiira ole waari okathi wooreerela wiira onvanhe eperesenti ele. Maria aahimwaattamela Yesu otthukula ekarafa ya makhura ale oowunkhela ni mooreerela murima, aahiitthela mmuru ni inawu sa Yesu. Nuumala-vo, owo aahirula nleeso, onamuukuttha makhura ale ni ikharari sawe. Okathi ole, ayuda akina yuupuwela wiira khivaareerela muthiyana orula nleeso. Hata vari siiso, Maria khaaxankale mwaha wa moonelo ole. Owo aahilakela ovara muteko ole wahooneliwa vatthu, okhala wiira aaphavela omuttittimiha vanceene Yesu.
Wunkhela wa makhura ale, waahisareya opuro ole. Khahiyo wiira atthu ootheene yaahihakalala mwaha wa etthu ele Maria aapanke awe, maana Yuda Isikaryoti khaasiveliwe. Nave aahiwiiriha atthu akina ohisiveliwa mwaha wa eperesenti ele. Owo aahikoha so: Xeeni makhura ala oowunkhela yahaatumihiwa aya itenaario 300, vano musurukhu ene akaweliwa alipa-oohaawa?” Nkuupuwelani moota Maria aariipiwe awe murima. Owo anvanhe Yesu eperesenti ele ni murima awe wootheene. Arummwa yaawo yaattittimihiwa vanceene, yaahinanariwa ni khiyaasiveliwe ni etthu ele Maria aapanke awe. Woonasa wene, Maria aahuuliwa muru vanceene.
Masi Yesu aahimwaakiha Maria aaleelaka awiixutti ale wiira: “Mmuhiye”. Nuumala Yesu olavula moolumo ale, atthu ale yaahimaala. Nave-tho Yesu aahincererya oriki: “Ola ookiirela etthu yooreera.” Yesu aahitthokiherya wiira Maria ooniherya moota amphenta awe yena. Maria khaasuwela moota aapanke awe eyo, masi moohipisa, Yesu aamwiiviwa. Omuttikitthela makhura ale oowunkhela, yaari enamuna ya olokiherya murutthu wa Yesu okathi aarowa awe wiiviwa. Yesu aahitthikela-tho olavula moolumo ale ookhweya masi ari ene oolipiha oriki: “Muthiyana ola oopaka eniwerya awe.” Wanikisa waya, owo aahihimya oriki: “Kinooleelani ekeekhai wiira, khula opuro onrowa aya olaleiwaka ihapari sooreera olumwenku wootheene, atthu anoolavulaka ele opanke awe muthiyana ola, wiira uupuweleliweke”. Yesu aahiweha wiira Maria aari muthiyana oophenta ni oolipa murima mwaha wa miteko sawe. Okhala wiira aari mutthu oovaha, owo aahaana ottottopeliwa ohiya okhulumuliwa.
Nuumala Yesu olavula moolumo ale, atthu ootheene yaahimaala. Yuda aahikhuma ni aahilakela onvariha Yesu. Masi moohaanyiherya, moolumo Yesu aalavunle awe yaahimukhaliherya vanceene Maria. Nuuvira mahiku vakhaani, okathi moolumo Yesu aalavunle awe yiiraneya aya, Maria aahiiwexexa oratteene etthu yaataphulela aya moolumo ale. Owo aahootheriwa moohixariya, wiiviwa ni murutthu awe olokiheriwa ntoko siisaale aahimyale awe. Muthiyana ole ooreera murima ni oophenta, woonasa wene aahihaawa vanceene okathi Yesu aiviwe awe. Okathi ole wooriipiha murima, woonasa wene, Maria aahiphwanya nimaaliho ni moolumo ale Yesu aahimyale awe.
Nuuvira mahiku mararu Yesu okhwiiye ene, yaahiiraneya etthu yootikiniha maana Yesu aahihihimuxiwa! Nuuvira okathi, Yesu aahaakhumelela awiixutti awe anivikana 500 ni aahaaruma orowa waalaleerya ihapari sooreera “atthu a ilapo sootheene”. (Math. 28:19, 20) Yesu aahihimya wiira khula opuro saarowa aya olaleiwaka ihapari sooreera, atthu yaamwiixutta ntakiheryo na Maria mwaha wa ovaha wawe ni ophenta wawe! Woonasa wene, Maria aahihakalala mwaha wonvaha Yesu eperesenti ele ya efaita yinceene. Okumi awe wootheene, Maria khaatonko oliyala moota Yesu aamuttottopenle awe mwaha wa waamini wawe ni olipa wawe murima ni moolumo Yesu aalavunle awe ani: “Muthiyana ola oopaka eniwerya awe.”
Musome yoowiiraneya ela mbiibiliyani, soolepa sinittharelana:
Nikoho para ovaanela:
Maria, murokorawe Laazaro oonihenrye sai olipa murima?
Mutokose itthu sikina
1. Exeeni ninsuwela ahu voohimya sa mikhalelo sa Maria ni Marta? (Luka 10:39, 40; Yoh. 11:20; Mutakiheke waamini waya epaax. 173 itti. 5-6; epaax. 176 etti. 17) A
Eteseenyu A
2. Moota xeeni Yesu aari awe oovirikana ni awiixuttihi akina a okathi ole? (Owehaweha 01/09/1999 epaax. 30 itti. 1-4)
3. Xeeni makhura Maria aamwiitthenle awe Yesu yaarina aya efaita yinceene? (“makhura oowunkhela ni a musurukhu munceene”, enoota ya Biblia de Estudo eri Matheyo 26:7) B
Indian nard: © Haijie Lu, licensed under CC BY-NC 4.0. Source; dried jatamansi: wasanajai/stock.adobe.com; alabaster jar: © The Trustees of the British Museum. Licensed under CC BY-NC-SA 4.0. Source
Efootu B: Ekarafa ya alabastro yaaheliwa makhura oowunkhela aahiiso eperfuume, efilori ni mitathaari sa mwiri Nardostachys jatamansi, seiyo woonasa wene Maria aarumeelale awe wiira omwiitthele Yesu
4. Okathi wa khalai, waataphulela exeeni omwiitthela makhura mutthu mmuruni ni mmettoni? (Owehaweha 01/11/2010 epaax. 6 etti. 4, enoota)
Muupuwelele itthu mwiixuntte anyu
Yesu aahimmye wiira “Maria, oothanla epantta yootepa oreera”, aahiiso aahimuhela Yehova nipuro noopacerya mweekumini mwawe. (Luka 10:42) Olelo-va, ninrowa omutakiha sai Maria? C
Efootu C
Yesu aahimuttottopela Maria okhala wira aahipaka ele aawerya awe. Etthu xeeni Maria oniixuttiha awe sa Yehova? (Mar. 12:29, 30; 14:8)
Munrowa otakiha sai olipa murima wa Maria?
Muupuwele yoowiiraneya yootheene
Yoowiiraneya ela, enikiixuttiha exeeni sa Yehova?
Yoowiiraneya ela enivarihana sai ni yoolakela ya Yehova?
Xeeni munixukhurela anyu mwaha wa Maria othanliwa wiira alamuleleke ni Kristu wiirimu?
Mwiixutte itthu sikina
Anamwane aniixutta exeeni voohimya sa waapaka apatthani ni ntakiheryo na Maria, Marta ni Yesu? Nwehe eviitiyu eni:
Yesu aahixukhurela eperesenti ya musurukhu munceene aavahiwa awe ni Maria ni inoota piili sa muthiyana naamukhweli. Nto eyo enniixuttiha exeeni sa Yesu? Musome mwaha oni:
“Niireke munnooniherya oxukhurela?” (Owehaweha 15/04/1999 epaax. 16 itti. 3-7)