43 YOSEFE
Owo aari paapa oolipa murima
WIIRA MUTTHU okhale paapa ooloka, onipirisari olipa murima. Masi Yosefe aari kalapinteero a oNazarethi, olipa wawe murima waaheehereriwa ohinatthi okhala paapa. Owo aanisuwela wiira Maria, mwali yoowo aarowa awe omuthela, aahirupala. Masi mwaana aarowa oyariwa khahiyo aari awawe. Maria aahimuleela itthu sootheene sa moota aarupanle awe. Nto nuumala oleeliwa, Yosefe khaiwexenxe ni vaahinvila okupali. Nto aarowa opaka exeeni?
Biibiliya onihimya wiira “Yosefe aari naxariya.” Owo aari mulopwana a xariya ni oororomeleya, yoowo aiwelela malamulo a Yehova. Nave-tho aari mulopwana ooreera murima ni oomoriwa ikharari. Okathi aasuwenle awe wiira Maria aahirupala, Yosefe aahuupuwela oratteene etthu yaareerela awe opaka. Wiira omukhapelele Maria ni ohimuulihihe muru, owo aahithanla omuhiya Maria moohisuweliwa. Okathi ole atthu yaanoivarana yaathokoreriwa ntoko atthu oothelana. Masi Yehova aahimukhaliherya. Owo aahiruma nlaikha nawe wiira nalavule ni Yosefe. Nlaikha nno naahimuleela Yosefe wiira: “Muhoove omukuxa mwaarinyu Maria”. Nlaikha nne naahimulipiherya Yosefe wiira etthu Maria aahimmye awe yaari ekeekhai. Mwaana aarupaliwe aari tthiri a Muluku, nave aarowa okhala Mesiya!
Yosefe aahaana omukhapelela mwaana a Muluku. Owo aari muteko muulupale
Yosefe “aahitthara malakiheryo a nlaikha na Yehova”. Aahooniherya olipa murima ni aahipaka ele aarummwale awe ni Yehova. Owo aahaana omukhapelela oratteene mwaarawe ni mwaana yoowo aarina efaita yinceene waavikana anamwane akina. Yosefe aanipirisari olipa murima vanceene.
Nuuvira okathi vakhaani, Seesari Augusto aahiruma wiira atthu ootheene a elapo ele arepeliwe. Nto eyo yaahimwiiriha Yosefe orowa oYerusalemu wiira arepeliwe. Nnaamwi Biibiliya ohihimyaka akhala wiira Nlamulo naavekela wiira Maria aahaana orowa oYerusalemu wala nnaari, Yosefe aahipaka itthu sootheene aawerya awe wiira okhale ni mwaarawe. Tivonto aaheetta mukwaha woorakama, nnaamwi “okathi owo Maria aahala vakhaani oyara.” Nuumala ophiya oYerusalemu, Maria aahimuyara mwanawe yoowo aitthaniwa Yesu.
Nnaamwi yahaakhanle athaaciri, Yosefe aanivara muteko munceene wiira okhapelele emusi awe. Okathi yena ni Maria yanvaherenrye aya mwanaya otemplo oYerusalemu, awo yaavanhe mukuttho yoowo yeemereriwa ovaha atthu oohaawa. Nuuvira okathi vakhaani, nlelo akhalaka empa yaari oBetelehemu, awo yaahixukuriwa ni asomi a itheneeri, woonasa wene yaakhuma oBabiloonia, yaawo yaahooliwe ni etheneeri. Asomi awo yaahinvaha mwaana ole iperesenti sinceene. Nuuvira okathi vakhaani, nlaikha na Yehova naahimuleela Yosefe wiira mwene ootakhala aihaniwa Herodi aaphavela omwiiva mwaana ole. Nlaikha nne naahimuleela Yosefe ni emusi awe wiira yaahaana otthyawela wExiitu.
Moolipa murima, Yosefe aahimukuxa mwaarawe ni mwaana ole, anakhuma nuuhiyu ni variipale ene arowaka wExiitu. Aarowa owerya sai okhapelela emusi awe ori ene wExiitu? Moohaanyiherya, yena aahixukhurela mihakhu aavahiwe awe ni asomi ale a itheneeri. Nuuvira okathi, Yehova aahimuleela Yosefe wiira okuxe emusi awe otthikeleke elapo awe. OBetelehemu waalamuleliwa ni mwene ootakhala, nto Yosefe aahiiwelela malakiheryo aavahiwe awe ni Muluku, onarowa oNazarethi ni emusi awe.
Ori ene oNazarethi, Yosefe aanivara muteko awe wa okalapinteero wiira omukhapeleleke Maria, Yesu ni anaawe 6 yaawo aayanre awe muhoolo mwaya. Masi etthu yootepexa okhalana efaita, okhala wiira Yosefe khaahiyale okhaliherya emusi awe okhalana waataana woolipa ni Yehova. Awo yaanikhalana yoolema ya orowa osinagoga wiira yiixutte sa Yehova, nave yaaniirela mpantta ifesta seiyo saanvuwiha Yehova. Ekwaha yookiserya Biibiliya onimuromola awe Yosefe okathi yoole yaarowenle aya efesta, anuupuwela wiira Yesu aahirimeela orine ene iyaakha 12. Nkahaya muupuwele moota paapa ole ooloka aaxankale awe! Masi Yesu khaarimenle ni “aaniwiiwelela” anamuyari awe.
Biibiliya khonihimya okathi Yosefe okhwiiye awe, masi vannooneya oratteene wiira ohinatthi okhwa aahimwiixuttiha Yesu itthu sinceene. Yesu ohiya paahi osuweliwa ntoko “mwaana a kalapinteero”, masi-tho aasuweliwa okhala “kalapinteero”. Nto vannooneya wiira paapa awe aahimwiixuttiha ovara oratteene muteko ole. Yosefe oovaha ntakiheryo, nenno Yehova oniphavela awe wiira axipaapa ootheene avaheke, eyo piiyo, anamuyari akhaleke ookhapelela, oororomeleya ni alipa-oowiixuttiha ooreera murima yaawo anivara oratteene muteko avahiwe aya ni Muluku.
Musome yoowiiraneya ela mbiibiliyani, soolepa sinittharelana:
Nikoho para ovaanela:
Yosefe oonihenrye sai olipa murima?
Mutokose itthu sikina
1. Okhala wiira Maria aari mwaana a Heli, xeeni Luka 3:23 onihimya awe wiira Yosefe aari “mwaana a Heli”? (Owehaweha 08/2017 epaax. 32 etti. 4)
2. Etthu xeeni woonasa wene yaamwiirinhe Yosefe ohirupa ni Maria ohinatthi oyariwa Yesu? (Owehaweha 15/12/2003 epaax. 5 etti. 5)
3. Etthu xeeni enooniherya wiira Yosefe aanikhalela nthiti ovara muteko? (Mutakiheke Waamini Waya ipaax. 166-167 itti. 15-18) A
Efootu A
4. Xeeni ninhimya ahu wiira Yosefe woonasa wene aakhwiiye nlelo Yesu ori ene mmiravo? (Owehaweha 07/2017 epaax. 11 etti. 8, enoota)
Muupuwelele itthu mwiixuntte anyu
Ahooleli a itthoko aniixutta exeeni ni ntakiheryo na Yosefe sa wiiwelela malakiheryo a Yehova, hata eyo evekelaka wiimananiha? (Math. 1:20, 24; 2:13-15, 19-21)
Yosefe onniixuttiha exeeni sa omuhela Yehova opuro woopacerya vatthokoni vahu? (Luka 2:41) B
Eteseenyu B
Munrowa otakiha sai olipa murima wa Yosefe?
Muupuwele yoowiiraneya yootheene
Yoowiiraneya ela enikiixuttiha exeeni sa Yehova?
Yoowiiraneya ela enivarihana sai ni yoolakela ya Yehova?
Etthu xeeni kiniphavela aka omukoha Yosefe nuumala ohihimuxiwa?
Mwiixutte itthu sikina
Eviitiyu enittharelana, nwehe moota Yosefe onipaka awe ele onirummwa awe ni Yehova.
Ninrowa omutakiha sai Yosefe ni Maria akhala wiira kuvernu onookumiherya nlamulo, nnoona ahu wiira khahiyo naxariya ni nnooxankiha okumi ahu? Musome mwaha oni:
Niireke munnaakuva wiiwelela? (Owehaweha 10/2023 ipaax. 8-10 itti. 9-14)