41 ZAKARIYA NI ELIZABETI
“Atthu a xariya vamaithoni va Muluku”
ZAKARIYA aanilipelela nihiku na efaita yinceene. Owo aamukhalana eparakha, yeeyo yaarowa oturuka okumi awe. Okhala wiira Zakariya aari a osuulu wa Aroni, nto owo aari namukuttho. Naahiphiya nihiku aarowa awe opaha nsenso valtaari a eweero mutemplo. Zakariya ni mwaarawe aihaniwa Elizabeti, yaanithokorerya nihiku nlo okhala na efaita.
Zakariya ni Elizabeti, saahivira iyaakha sinceene athelanne ene, nave Yehova aahaareeliha mwa inamuna soovirikana. Yaaniphavela etthu yeeyo yaakhala ntoko wiira khivaniweryaneya ophwanya. Awo yaaphavela okhalana anamwane. Okathi ole, waayara anamwane, yaari etthu ya efaita para arumeyi a Muluku. Zakariya ni Elizabeti yaahuuluvala vanceene. Biibiliya onnaahimya okhala “atthu a xariya vamaithoni va Muluku”. Awo yaahithipelela onvekela Muluku, amuroromelaka wiira aamwaawiriyana, hata yaakhala ntoko wiira khiyaarina nlipelelo.
Zakariya aahikela mutemplo, nto atthu yaari vate yaanivekela. Ori ene mutemplo-mme, nlaikha na Yehova naahimukhumelela Zakariya, neemela ohoolo wa altaari aapahiwa nsenso. Nlaikha nlo naahimuleela Zakariya wiira Muluku aahiwiriyana mavekelo aya ni Elizabeti aamukhalana mwaana. Mwaana owo aahaana wiihaneliwa nsina noowi Yohani. Owo aamunnuwa ni aarowa okhalana “owerya onlikana ni wa Eliya”. Owo anvara muteko muulupale, a waakhaliherya atthu otthikela wa Yehova.
Nuumala oleeliwa moolumo ale, Zakariya aahivekela esinaale yeeyo yaarowa omukupaliha vakhala wiira moolumo ale yaari eekeekhai. Nlaikha nlo naahimuttaruxa ni moolumo ala: “Miyo ka Gabriyeli. Ti yoomi kineemela ohoolo wa Muluku.” Moohaanyiherya owo khaarina mathowa a ohikupali etthu nlaikha nle na Muluku naahimmye aya. Gabriyeli aahimuleela Zakariya wiira khaarowa olavula mpakha wiiraneya sooleiherya iye. Nto okathi Zakariya aakhumme awe mutemplo, owo aalavula ni matata wiira aatthokiherye atthu ele yaamwiiranenle.
Anamathelana amosa oowuuluvala ni yahaarina anamwane, yaahaakhela muhupi waakhuma wa Muluku, yoowo waaturunke okumi aya
Moohaanyiherya, Zakariya aahiwerya omutthokiherya mwaarawe aihaniwa Elizabeti etthu yaamukhumelenle. “Nuuvira mahiku vakhaani,” Elizabeti aahirupala. Nto aahiviriha miyeeri 5 ohikhumme owannyawe, mweeri waattharelana aahixukuriwa ni mmusi awe aihaniwa Maria, mwaana a Eli, a oNazarethi. Nuumala Maria okela vatthokoni vaya, mwaana aari mmirimani mwa Elizabeti, aahittikinyeya. Osareyale ene ikuru soowaarya, Elizabeti aahimuhimya Maria okhala “maama awe pwiya aka!” Elizabeti, aahisuwela wiira Maria ammuyara mwaana, yoowo aarowa okhala Mesiya. Ohiya omukhalela nrima, Elizabeti aahimulipiha Maria ni muteko aarowa awe ovara muhoolo.
Nuumala Elizabeti oyara, amusi awe ni mavisiinyu awe, yaahithukumana ni yaaniphavela onvaha mwaana ole nsina na paapa awe. Masi Elizabeti aahisuwela wiira nlaikha Gabriyeli naahimuleela iyawe wiira: Muhaana “onvaha nsina noowi Yohani”. Nto Elizabeti aahikhootta moonelo ole, onahimya wiira: “Nnaari, masi aihaniweke Yohani”. Amusi awe khiyaaphavenle onwiriyana Elizabeti. Nto yaahimukoha Zakariya nsina aaphavela awe onvaha mwaana ole. Nlelo ohiweryaka olavula, Zakariya aahilepa vathaapwani moolumo ani: “Nsina nawe ti Yohani”. Niinaano-ru, Zakariya aahipacerya olavula.
Yehova aahinvaha Zakariya ikuru soowaarya, nto owo aahipacerya olaleya iprofesia. Zakariya aahaavaha atthu a Muluku nlipelelo noowi Yehova aamurowa waamorela ikharari ni owoopola. Owo aahimmye wiira mwanawe aihaniwa Yohani, aamurowa ohoolo wa Yehova, wiira olokiherye iphiro sawe. Eyo ti etthu Yohani aapanke awe. Yesu ohinatthi opacerya olaleerya sa omwene wa Muluku, Yohani Mpatisa aahaakhaliherya atthu wiira yiilokiherye para yeemererye muhupi wa Yesu.
Orwa wa Mesiya, waamwaakhaliherya atthu a Muluku, oweha moota yaakhanle aya oowaathokorerya ale yahaamukokhorela Yehova ni ale yaalupattha atthu a Muluku. Khalai, arumeyi anceene a Muluku yaari oolipa murima, nave yaaniwana ikhotto ni awanani a Yehova. Masi nuuvira okathi, Yehova khaaphavela-tho wiira arumeyi awe ewaneke ikhotto. Hata vari siiso, awo nlelo yaanipirisari olipa murima. Ale yaamweemererya Mesiya, yaahaana olaleya sa Yehova Muluku ni ihapari sooreera saamuhimya Yesu Kristu, ntoko Zakariya ni Elizabeti yiirale aya.
Musome yoowiiraneya ela mbiibiliyani, soolepa sinittharelana:
Nikoho para ovaanela:
Zakariya ni Elizabeti yoonihenrye sai olipa murima?
Mutokose itthu sikina
1. Nnaamwi Zakariya ni Elizabeti yaari atthu oottheka, xeeni Biibiliya onihimya awe wiira yaaneetta oratteene? (Luka 1:6; Perspicaz vol. 1 “Ohikhalana mulattu” etti. 2)
2. Biibiliya onihimya exeeni sa nlaikha Gabriyeli? (Perspicaz vol. 1 “Gabriyeli” itti. 2-3) A
Efootu A
Eteseenyu A
3. Nlaikha Gabriyeli naahimuleela Zakariya wiira onvahe mwanawe nsina noowi Yohani. Nintaphulela exeeni nsina noowi Yohani? (Perspicaz vol. 2 “Yohani” etti. 1)
4. Niireke Zakariya khaawerya olavula ni wiiwa? (Owehaweha 15/03/2008 epaax. 30 etti. 6)
Muupuwelele itthu mwiixuntte anyu
Ayuda a okathi wa Zakariya yaaneemererya wiira mulopwana omwalaneke ni mwaarawe vakhala wiira khoniyara. Alopwana oothela aniixutta exeeni ni ntakiheryo na Zakariya? B
Efootu B
Elizabeti aahimwiiwelela iyawe, nnaamwi amusi awe ni mavisiinyu awe yaamukhanyererya opaka etthu ekina. (Luka 1:58-61) Athiyana ootheliwa aniixutta exeeni ni ntakiheryo na Elizabeti?
Munrowa otakiha sai olipa murima wa Zakariya ni Elizabeti?
Muupuwele yowiiraneya yootheene
Yoowiiraneya ela enikiixuttiha exeeni sa Yehova?
Yoowiiraneya ela enivarihana sai ni yoolakela ya Yehova?
Etthu xeeni kiniphavela aka omukoha Zakariya ni Elizabeti nuumala ohihimuxiwa?a
Mwiixutte itthu sikina
Nwehe etthu eniiraneya okathi Zakariya ontthikela awe olavula, wiira onvuwihe Muluku. Nwehe eviitiyu eni:
Maria aahirowa omuxukurya Elizabeti, nto aahilipihiwa. Eyo enniixuttiha exeeni? Musome mwaha oni:
“Yehova “onimoovahani ikuru” — moota xeeni?” (Owehaweha 10/2023 ipaax. 14-15 itti. 10-14)
a Vakhala wiira Zakariya ni Elizabeti akhwiiye mwaakha wa pentekoositi a 33 Nuumala Kristu Orwa, anrowa ohihimuxiwa wiira akhaleke valaponi.