Ofovwin rẹ Akpọ Eje Cha Phia Kẹrẹkpẹ?—Die Yen Baibol na Tare?

Vwẹ ikpe 30 re wanre na, ihwo buebun roro nẹ omamọ rẹ oyerinkugbe ọ hẹ uvwre rẹ ẹkuotọ sansan. Ẹkẹvuọvo, obo re phiare uvwre ọke evo rhire na wene iroro yena.

“Isreal vẹ Hezbollah vwọ tuẹn ofovwin phiyọ vwẹ ughwru rẹ Lebanon, oshọ ko muẹ ihwo nẹ ofovwin ri Gaza che djobọte ẹkuotọ efa re kẹrẹ ayen.”—Reuters, January 6, 2024.
“Ẹko rẹ ihwo sansan rẹ Iran suẹn họnra vwọso ekogho sansan, kpregede na, Iran da rhoma tuẹn eruo ri nuklẹ bọmbu phiyọ. Vwoba, Russia vẹ China biẹcha Iran. Enana eje sua oshọ vwọ kẹ ẹkuotọ efa [western countries].”—The New York Times, January 7, 2024.
“Ẹvwọsua ri Russia je suẹ oghwọrọ rode vwẹ Ukraine.”—UN News, January 11, 2024.
“Efe vẹ ekuakua rẹ ofovwin ri China ri buẹnphiyọ, oma etito ri Taiwan rọ ganphiyọ, kugbe jẹ ohwohwo ẹruọ rọhẹ uvwre ri China vẹ US se rhie idjerhe phiyọ vwọ kẹ ofovwin phẹrephẹre.”—The Japan Times, January 9, 2024.

Baibol na ta ota kpahen obo re phia vwẹ akpọ na nonẹna? Obo re phia enẹna che sun vwo kpo ofovwin rẹ akpọ eje?

Baibol na mraro rẹ erọnvwọn re phia nonẹna

Baibol na mraro rẹ ofovwin ọvo kiriguo ro phia nonẹna-a. Ẹkẹvuọvo, ọ tare nẹ ifovwin cha vọn asan eje vwẹ ọke rẹ avwanre na, rọ “reyọ ufuoma vwo nẹ akpọ na.”—Ẹvwọphia 6:4.

Ọbe ri Daniẹl mraro rọyen nẹ vwẹ “ọke rẹ . . . oba na,” ẹgba rẹ usuon sansan ke cha “họnre” omoma rayen vwọ kẹ ọrho. Ohọnre yena churobọ si “efe” yẹrẹ igho ẹghwọrọ obuebun kugbe ẹgba rẹ ayen che djephia.—Daniẹl 11:40, 42, 43.

Ofovwin rọ cha

Baibol na tare nẹ akpọ na che miovwin phiyọ tavwen o ki yovwin. Jesu tarọ phiyotọ nẹ “ukpokpogho rode cha dia, ra je rhe mrẹ oka rọyen rhanvwẹ ọke rẹ akpọ na vwọ tonphiyọ rhi te ọke nana-a.” (Matiu 24:21) “Ukpokpogho rode” yena che sun vwo kpo Amagidọn, re dje phiyọ “ofovwin rẹ ẹdẹ rode rẹ Ọghẹnẹ Ọromevwẹgba na.”—Ẹvwọphia 16:14, 16.

Ẹkẹvuọvo, Amagidọn che sivwin ihworakpọ, ọ dia ọ cha ghwọrọ aye-en. Womarẹ ofovwin yena, Ọghẹnẹ che phioba phiyọ usuon rẹ ihworakpọ, rọ ghwa ifovwin buebun rhire na. Wọ vwọ riẹn oborẹ Amagidọn cha vwọ ghwa ufuoma ri bẹdẹ rhe, se iyovwinreta na:

“Die Yen Ofovwin rẹ Amagidọn?”
“Amagidọn Iyẹnrẹn Esiri!”