Ihwo ra Vwẹrosuẹ Ihwo ri Suẹ-ẹn​—Die Yen Baibol na Tare?

Vwẹ ukpe ri 2024 na, e che mu ekpeti usuon vwẹ akpọ na eje vwọ vrẹ oborẹ a mrẹre jovwo re. Ẹkẹvuọvo, ihwo buebun ra vwẹrosuẹ ihwo ri suẹ-ẹn

• Ihwo rẹ America buebun tare nẹ “urhuru yen muẹ ihwo buebun ri suẹn vwo ru oborẹ ayen ruẹ” ukperẹ ayen vwo ru obo ri yovwinri vwọ kẹ ihwo rẹ ayen suẹn.a​—Pew Research Center, September 19, 2023.

Ighene buebun je vwẹroso ihwo ri suẹ-ẹn.

• “Imighene buebun nonẹna vwo ẹwẹn rẹ ayen vwọ guọnọ idjerhe rẹ ayen vwo si ebẹnbẹn no, ẹkẹvuọvo, vwẹ efuafuẹrẹn re ruru, ayen tare nẹ ihwo ri suẹn se ruẹ ọtiọye-en.”​—The New York Times, January 29, 2024.

• “Vwẹ efuafuẹrẹn ọvo re ruru, ighene buebun vwẹroso ihwo ri ru ividio vwẹ YouTube vwọ vrẹ ihwo ri suẹn.”​—The Korea Times, January 22, 2024.

Avwanre sa vwẹroso ihwo ri suẹn nẹ ayen che ru akpeyeren rẹ avwanre yovwin vwẹ obaro na? Ono yen a sa vwẹroso?

Jomaotọ vwọ kpahen ohwo rẹ wọ vwẹrosua

Ọyen obo ri yovwinri ihwo da jomaotọ vwọ kpahen ihwo rẹ ayen vwẹrosua. Baibol na tare nẹ “Ogbori se kemu kemu ejobi gbuyota, ẹkẹvuọvo ohwo ro vwo iroro obọ rọ ra ọye o nẹ.”​—Isẹ 14:15.

• Vwọ kpahen obo ra sa vwọ riẹn evuẹ rẹ dia uyota yẹrẹ efian, se uyovwinrota na “Sẹro rẹ Oma Wẹn Vwo nẹ Abọ rẹ Evuẹ rẹ Efian.”

Vwo kpobaro phiyọ, o vwo asan rẹ ihwo ri suẹn ri vwo omamọ rẹ ẹwẹn se ru te. Ọyen sorọ Baibol na vwo si avwanre orhọ:

• “Wọ vwẹroso ihwo ri suẹ-ẹn; o vwo ohworakpọ vuọvo ro se sivwin uwe-e.”​—Une rẹ Ejiro 146:​3, Good News Translation.

Osun rẹ wọ sa vwẹroso

Baibol djerephia nẹ Jesu Kristi yen osun ro me muwan ra je sa vwẹroso rẹ Ọghẹnẹ vwo mu. (Luk 1:​32, 33) Jesu yen Ovie rẹ Uvie rẹ Ọghẹnẹ rọ dia usuon ro che sun nẹ odjuvwu rhe.​—Matiu 6:10.

• Yono oborẹ wọ sa vwọ vwẹroso Jesu vẹ obo ro che vwo si ebẹnbẹn rẹ avwanre hirharokuẹ no. Se iyovwinreta na “Ono Yen Ovie rẹ Uvie rẹ Ọghẹnẹ?” vẹ “What Will God’s Kingdom Accomplish?”