Ebẹnbẹn rẹ Ọruvwohwo Sua rọ Hẹrabọ Phiyọ​—Die Yen Baibol na Tare

Ehiahiẹ ọvo e ruru o krinọ-ọ vwẹ ẹbẹre sansan vwẹ akpọ na tare nẹ,a ohwo ọvo usun rẹ ihwo ẹne yen mrẹ oma rayen vwẹ ẹdia rẹ ọruvwohwo.

• “Kohwo kohwo se vwo uruemu re vwo sioma nẹ otu, o toro ikpe yẹrẹ asan rẹ ohwo na hepha-a.”​​—Chido Mpemba, ro nene World Health Organization’s Commission wian vwọ kpahan Social Connection.

Ihwo evo rorori nẹ ihwo re kpakore yẹrẹ ihwo ri sioma nẹ otu ọvo yen mrẹ oma rayen vwẹ ẹdia rẹ ọruvwohwo. Ẹkẹvuọvo, ighene, ihwo ri vwo omakpokpọ, ihwo ri feri vẹ ihwo re rọvwọnre je sa mrẹ oma rayen vwẹ ẹdia rẹ ọruvwohwo. Uruemu re vwo sioma nẹ otu vẹ ọruvwohwo sa so imuoshọ kẹ omakpokpọ rẹ ohwo.

• Dr. Vivek Murthy rọ dia U.S. surgeon general da ta: “Ẹdia rẹ ọruvwohwo bra vrẹ e di vwo muomaphiyọ shesheri. A reyọ ọruvwohwo vwo dje imuoshọ ro se te ohwo oma siẹrẹ e de phopho isigati 15 ẹdọke.”

Obo ri Baibol na tare

Ọmemama rẹ avwanre guọnọre nẹ e sioma reyọ vwo nẹ ohri rẹ ihwo-o. Ọhọre rẹ Ọghẹnẹ vwọ kẹ ihworakpọ ọyen e vwo vwo omamọ rẹ oyerinkugbe vẹ ihwo efa ọkieje.

• Odjekẹ ri Baibol: “Ọghẹnẹ da ta, Oyoma rere ọshare ọvo vwọ dia sogonoo.”​​—Jẹnẹsis 2:18.

Ọghẹnẹ guọnọre nẹ avwanre vẹ ọyen vwo omamọ rẹ oyerinkugbe. Ọ tare nẹ avwanre da davwẹngba vwo sikẹrẹ, ko sikẹrẹ avwanre.​​—Jems 4:8.

• Odjekẹ ri Baibol: “Omavwerhovwẹn dia vwọ kẹ ihwo re riẹnre nẹ ayen guọnọ odjekẹ rẹ Ọghẹnẹ, kidie Uvie rẹ idjuvwu na ọrayen.”​​—Matiu 5:3.

Ọghẹnẹ guọnọre nẹ avwanre kuomagbe ihwo efa vwọ ga ọyen. E de ru ọtiọyen, ọ cha nẹrhẹ oma vwerhen avwanre.

• Odjekẹ ri Baibol: “E jẹ avwanre roro kpahen ohwohwo, rere e se vwo phi oruru phiyọ ohwohwo oma re vwo vwo ẹguọnọ, ji ruiruo esiri, e jẹ avwanre kpairoro vrẹ emẹvwa rẹ [avwanre-e] . . . , ẹkẹvuọvo e rhe phiuduphiyọ ohwohwo awọ.”​​—Hibru 10:​24, 25.

Vwọ kẹ evuẹ efa ri shekpahen oboresorọ o vwo fo nẹ a davwẹngba vwọ kẹnoma kẹ ẹdia rẹ ọruvwohwo, se uyovwinrota na “Loneliness in a World of Mass Connection.”