Mu Igbeyan Vwo Phi Ẹdia rẹ Ọruvwohwo Kparobọ​—Obo ri Baibol na sa Vwọ Vwẹ Ukẹcha Phia

Vwẹ 2023, ihwo ri tona rẹ omakpokpọ mrẹvughe nẹ ẹdia rẹ ọruvwohwo ọyen ebẹnbẹn ọgangan ofori nẹ e ru orọnvwọn kpahen. O vwo obo re se ru kpahen ẹdia rẹ ọruvwohwo?

• Dr. Vivek Murthy rọ diẹ U.S. surgeon general tarẹ nẹ, “Ẹdia rẹ ọruvwohwo vẹ e vwo sioma nẹ ihwo, sa so imuoshọ vwọ kẹ omakpokpọ avwanre je nẹrhẹ e jẹ omavwerhovwẹn e vwo.” Ọ da je ta: “O vwo oborẹ avwanre se ru kpahen ẹdia nana.” Die yen e se ru? “Avwanre se ru erọnvwọn itete vwọ bọn oyerinkugbe avwanre vẹ ọ rẹ ihwo efa gan.”a

Ọ die e vwo sioma nẹ ihwo ọvo yen nẹrhẹ a dia ẹdia rẹ ọruvwohwo-o. Ihwo evo sa dia ẹdia rẹ ọruvwohwo ọ da tobọ dianẹ ayen vẹ ihwo buebun herọ. O toro obo re so ẹdia ọruvwohwo rẹ avwanre hepha na-a, Baibol na sa cha avwanre uko. Ọ vwẹ uchebro rẹ aghwanre vwọ kẹ avwanre re sa vwẹ ukẹcha phia vwọ họnre vwọso ẹdia rẹ ọruvwohwo womarẹ a vwọ bọn oyerinkugbe rẹ avwanre vẹ ihwo efa gan.

Odjekẹ ri Bailbol re sa Vwẹ Ukẹcha kẹ Avwanre

Nabọ nene ihwo efa ta ota. Ọnana churobọsi wọ vwọ ta ẹwẹn wẹn kẹ ayen je nabọ kerhọ rayen. Wọ da nabọ djephia nẹ wo vwo ọdavwẹ kpahen ihwo efa, oyerinkugbe wẹn vẹ ayen kọ cha re ganphiyọ.

• Odjekẹ ri Baibọl: “Ovwan guọnọ erhuvwu romobọ rẹ ovwan ọvo-o, ẹkẹvuọvo ovwan je guọnọ erhuvwu rẹ ihwo efa.”​—Filipae 2:4.

Vwẹ ugbeyan mu ihwo efa. Davwẹngba vwẹ ugbeyan vwo mu ihwo ri vien we vẹ i ri wo vienri, i ri nẹ ẹkuotọ efa rhe yẹrẹ i ri vwo ẹkuruemu re fẹnẹ ọ wẹn.

• Odjekẹ ri Baibọl: “Ovwan ji rhie ubiudu rẹ ovwan phiyọ ghwroro.”​—2 Kọrẹnt 6:13.

Wọ da guọnọ evuẹ efa vwọ kpahen oborẹ wọ sa vwọ bọn omamọ rẹ oyerinkugbe vẹ ihwo efa, se uyovwinrota na “Satisfying Our Hunger for Friendship.”