Họnre Vwọso Ọruvwohwo Womarẹ wọ Vwọ Cha Ihwo Efa Uko​—Oborẹ Baibol na Tare

Ihwo buebun vwẹ akpọ na hẹ ẹdia rẹ ọruvwohwo, ayen ji no nẹ ayen vẹ ihwo efa cha sa dia ugbeyan re kpẹkpẹree. Idọktọ evo ri yono ẹbe kodo vwo imuẹro nẹ a da vwẹ ukẹcha kẹ ihwo, ọyen idjerhe ọvo ra vwọ họnra vwọso ọruvwohwo.

• “Ukẹcha ra vwọ kẹ ihwo re ghene guọnọ sa nẹrhẹ ayen yeren omamọ rẹ akpọ je họnre vwọso ọruvwohwo.”​—U.S. National Institutes of Health.

Baibol na vuẹ avwanre obo re se ru vwọ cha ihwo efa uko. A da reyọ obo rọ tare vwo ruiruo, ọ sa cha avwanre uko vwọ họnre vwọso ọruvwohwo.

Obo wo se ru

Dia ohwo rọ kokẹ. Nene ihwo ghwọrọ ọke kugbe, marho vwẹ idjerhe re de rhiẹromrẹ ohwohwo vwẹ otọ. Vwo owenvwe wọ vwọ ghare oborẹ wo vwori vẹ ihwo efa. Ayen che dje ọdavwaro phia wo de ru enana, ọnana me nẹrhẹ ovwan dia igbeyan.

• Odjekẹ ri Baibol: “Ovwan rha kẹ, ihwo ke je cha kẹ ovwan.”​—Luk 6:38.

Reyọ ẹgba wẹn vwọ cha ihwo uko. Guọnọ idjerhe wọ vwọ vwẹ ukẹcha kẹ ihwo ri rhiẹromrẹ ebẹnbẹn. Ọnana se churobọ si wọ vwọ kerhọ rayen vwẹ idjerhe rẹ ẹguọnọ yẹrẹ vwẹ oma kpahotọ vwọ wian ewian re sa nẹrhẹ oghwa rayen pharhe.

• Odjekẹ ri Baibol: “Ugbeyan choma rọ vwọ vwẹ ukẹcha phia vwẹ kẹdia kẹdia.”​—Isẹ 17:​17, Contemporary English Version.

Vwọ kẹ evuẹ efa vwọ kpahen oborẹ wọ sa vwọ sẹro rẹ omamọ rẹ oyerinkugbe vẹ ihwo efa, se uyovwinrota na “Family Life and Friendships.”