Obo re sa kẹ Avwanre Iphiẹrophiyọ Vwẹ 2024​—Die Yen Baibol na Tare?

Ihwo buebun roro nẹ o vwo obo re cha rhuẹrẹ ebẹnbẹn rẹ akpọ na phiyọ vwẹ 2024 na-a. Dedena, iphiẹrophiyọ herọ kpahen obaro na. Tivọ yen a da sa mrẹ iphiẹrophiyọ tiọyena?

Baibol na kẹ avwanre iphiẹrophiyọ

Baibol na tare nẹ Ọghẹnẹ che si ebẹnbẹn ri nẹrhẹ akpọ no ohwo ọho vwo no. O rhe che kri-i, Ọghẹnẹ ko “che rien ameoviẹ eje vwo nẹ ẹro [avwanre], ughwu rha cha dia ọfa-a, uvweri yẹrẹ oviẹ yẹrẹ ọmiaovwẹ rha cha dia ọfa-a.”​​—Ẹvwọphia 21:4.

• Wo se vwo yono erọnvwọn efa kpahen ive ri Baibol ri shekpahen obaro na, se uyovwinrota na “A Real Hope for a Better Tomorrow.”

Obo ri Baibol na sa vwọ vwẹ ukẹcha kẹ wẹ enẹna

Baibol na kẹ avwanre iphiẹrophiyọ rọ sa vwẹ ukẹcha kẹ avwanre vwọ vwẹ ẹro abavo ni obaro na. (Rom 15:13) Uchebro ri Baibol na je sa vwẹ ukẹcha kẹ wẹ vwo yerin ghene ebẹnbẹn rẹ wo hirharokuẹ enẹna, ebẹnbẹn kerẹ ọbẹnvwẹ, oshenyẹ kugbe ọga.

• Mrẹ oborẹ iphiẹrophiyọ ri Baibol na vwọ vwẹ ukẹcha kẹ ọshare ọvo vwo vwo ufuoma vẹ omavwerhovwẹn dede nẹ orua rọyen igbere. Ni ividio na Juan Pablo Zermeño: Jihova Chọn Vwẹ Uko Vwo Yeren Omamọ Akpọ.

• Mrẹ oborẹ Baibol na sa vwọ vwẹ ukẹcha kẹ wẹ vwo yerin ghene ẹwẹn rẹ abe, omaemuophiyọ, ẹnwan vẹ ughwu rẹ ohwo re vwo ẹguọnọ kpahen. Se uyovwinrota na “Me sa Mrẹ Eta rẹ Uchebro Vwẹ Baibol Na?”

• Mrẹ oborẹ aye ọvo rọ dia isoja jovwo vwo djisẹ oma rọyen kerẹ ohwo rọ “djoma, ro ji vwo erorokẹ-ẹ,” vwo vwo iphiẹrophiyọ fikirẹ obo ro yono nẹ Baibol na rhe. Ni ividio na I Put Down My Rifle.

Ruo rere ukpe ri 2024 vwọ dia omamọ rẹ ukpe vwọ kẹ wẹ vẹ orua wẹn. Yono kpobarophiyọ kpahen oborẹ Baibol na sa vwọ vwẹ ukẹcha wẹ. Davwen uyono ri Baibol rẹ ọphẹ rẹ avwanre ni. Yono kpahen oborẹ Ọghẹnẹ cha vwọ kẹ wẹ “iroro re erhuvwu” enẹna vẹ iphiẹrophiyọ vwẹ “ọke rọ cha” vwẹ obaro na.​​—Jerimaya 29:11.