Oboresorọ E Vwo Vwo Iphiẹrophiyọ Vwẹ 2023​—Die Yen Baibol na ta Kpahọn?

Ihwoeje rhẹro emu erhuvwu nẹ o che te ayen vẹ orua rayen obọ vwẹ ọtonphiyọ rẹ ukpe ri 2023 na. Diesorọ e vwo vwo iphiẹrophiyọ?

Baibol na kẹ ohwo iphiẹrophiyọ

Baibol na vwẹ iyẹnrẹn esiri vwọphia rọ vwọ ta nẹ ebẹnbẹn re hirharokuẹ asaọkiephana, eyen ebẹnbẹn rẹ ọmọke, i ji che vwoba kẹrẹkpẹ. Vwọrẹ uyota, evuẹ rehẹ Baibol na, “e si ayen phihọ otọ kẹ eyono rẹ avwanre, rere vwẹ . . . uchebro ro nẹ ẹbe ọfuanfon na rhe avwanre se vwo iphiẹrohọ.”​—Rom 15:4.

• Wọ sa vwọ riẹn erọnvwọn efa kpahen ive ri Baibol na, se uyovwinrota na, “A Real Hope for a Better Tomorrow.”

Iphiẹrophiyọ rọ sa chọn wẹ uko asaọkiephana

Iphiẹrophiyọ ri Baibol na sa họhọ “ọtan rẹ avwanre churu erhi rẹ avwanre mu.” (Hibru 6:19) Iphiẹrophiyọ yena se ru avwanre gan. Ọ sa chọn avwanre uko vwo yerin ghene ebẹnbẹn re hirharokuẹ enẹna, vwo vwo iroro abavo vẹ omavwerhovwẹn rọ cha tọn. Kerẹ udje:

• Mrẹ oborẹ iphiẹrophiyọ ri Baibol na vwọ vwẹ ukẹcha kẹ ọshare ọvo rọ da udi vroma. Ni ividio na, ‘Ofu Akpọ Mẹ Dje Vwe’.

• Mrẹ oborẹ iphiẹrophiyọ ri Baibol na sa vwọ chọn avwanre uko vwẹ ọke rẹ ohwo re vwo ẹguọnọ kpahen de ghwu. Ni ividio na, Uchebro Vwọ kẹ Ihwo ri Vwere Uvweri.

Ru iphiẹrophiyọ wẹn gan

Ihwo buebun rhẹro emu erhuvwu nẹ o che te ayen obọ, jẹ ayen riẹnre sẹ ọ cha phia-a. Ive ri Baibol na fẹnẹre. Diesorọ? Kidie obọ ri Jihova Ọghẹnẹa “rẹ uyota na,” yen ive ri Baibol na nurhe. (Taitọs 1:2) Jihova ọvo yen vwo ẹgba ro vwo ru ive rọyen eje gba; obo ri jere ejobi rọ guọnọ ru, “ọye o ruẹ.”​—Une rẹ Ejiro 135:​5, 6.

Avwanre durhie uwe nẹ wọ mrẹ erere vwo nẹ iphiẹrophiyọ ri Baibol ra sa vwẹroso na rhe. Wọ sa bọn ẹroẹvwọsuọ wo vwo kpahọn gan siẹrẹ wọ da jomaotọ “hiẹ Ẹbe Ọfuanfon na.” (Iruo rẹ Iyinkọn Na 17:11) Wẹ komobọ mrẹvughe womarẹ wọ cha vwọ davwen uyono ri Baibol avwanre ni. Ton 2023 na phiyọ vẹ omamọ rẹ iphiẹrophiyọ kpahen obaro na!