A je sa Vwẹ Ẹro Ọghanghanre Vwo nẹ Uyota?

Wo niro nẹ a vwọ riẹn obo re dia uyota vẹ ọfian rhoma bẹnphiyọ? Nonẹna, ọhọhọre nẹ ihwo vwo imuẹro kpahen erọnvwọn fikirẹ oborẹ oma ruẹ ayen vẹ oborẹ ayen komobọ rorori, ukperẹ ayen vwo muo kpahen uyota vẹ obo re ghene phia. Ihwo buebun vwẹ akpọneje vwo imuẹro nẹ kakusọn rẹ uyota rahẹ akpọ na-a.

Ọ dia ọke avwanre nana ọvo yen ihwo de vwo oka rẹ ẹwẹn tiọna-a. Omarẹ ikpe 2,000 re wanre, Pọntiọs Pailet rọ dia osun ri Ro da vwẹ ẹwẹn ivivẹ nọ Jésù: “Die yen uyota?” (Jọn 18:38) Dede nẹ Pailet hẹrhẹ Jésù nẹ ọ kpahenphiyọ ọnọ rọyen na-a, jẹ onọ na pha ghanghanre. Baibol na kẹ avwanre ẹkpahọnphiyọ rọ sa vọn evun, ọ je sa cha avwanre uko vwọ riẹn obo re dia uyota vẹ efian vwẹ akpọ rẹ ẹwẹn rẹ ihwo de tighi na.

Uyota tobọ hẹ akpọ na?

E. Baibol na vwẹ ota na “uyota” vwo dje obo ri muẹro, ọtiọyen ji te uruemu ro shephiyọ. O yonori nẹ Jihovaa Ọghẹnẹ yen Esiri rẹ uyota eje womarẹ o vwo se “Ọghẹnẹ rẹ uyota” na. (Une rẹ Ejiro 31:5) Baibol na vwo uyota ro nẹ obọ rẹ Ọghẹnẹ rhe, ọ vwẹ uyota yena vwo dje urhukpẹ, ọ vwọ dianẹ ọ sa sẹro avwanre vrabọ rẹ akpọ rẹ ẹwẹn rẹ ihwo de tighi na.​—Une rẹ Ejiro 43:3; Jọn 17:17.

Mavọ yen wọ sa vwọ mrẹ uyota na?

Ọ dia obo ri shephiyọ kẹ Ọghẹnẹ re vwo rhiabọreyọ uyota ri Baibol na, jẹ ọ dianẹ ke roro kpahọn tavwe-en. Ukperẹ ọtiọyen, o durhie avwanre nẹ a vwẹ ẹgba rẹ iroro rẹ avwanre vwọ fuẹrẹn ni ukperẹ a vwọ vwẹroso oborẹ oma ruẹ avwanre wan. (Ro 12:1) Ọghẹnẹ guọnọre nẹ wọ vwẹ “iroro wẹn eje” vwo vughe ji vwo ẹguọnọ rọyen, o de ji jiro kẹ avwanre nẹ e ru obo re se ru eje, o vwo mu avwanre ẹro nẹ iyono ri Baibol na uyota.​—Matiu 22:​37, 38; Iruo rẹ Iyinkọn Na 17:11.

Ono yen ton ofian ẹvwọrọn phiyọ?

Baibol na tare nẹ ofian ẹvwọrọn tonphiyọ vẹ ọvweghrẹn rẹ Ọghẹnẹ, Idẹbono rọ dia Eshu, ri Baibol na seri “ọsẹ rẹ efian na.” (Jọn 8:44) O gun efian nyẹ Ọghẹnẹ vwọ kẹ ihworakpọ rẹsosuọ. (Jẹnẹsis 3:​1-6, 13, 17-19; 5:5) Rhanvwe ọke yena rhe yen Idẹbono vwọ hrahra efian kpahan Ọghẹnẹ ji siẹ uyota ro shekpahọn nẹ.​—Ẹvwọphia 12:9.

Diesorọ ofian ẹvwọrọn vwo titi nonẹna?

Vwẹ ọke avwanre ri Baibol na seri “ẹdẹ re koba na,” Idẹbono suẹn ihwo buebun ghwrẹ enẹna vwọ vrẹ obo ri jovwo. Ọke buebun yen ihwo vwọ vwọrefian womarẹ ayen vwọ phiẹn ihwo efa ji ruẹ ayen obo ri je ayen. (2 Timoti 3:​1, 13) Evwọrefian jehẹ ẹga evo nonẹna. Vwo nene obo ri Baibol na ta kpahen ọke avwanre na, ihwo “cha ghwẹ iyono vwo gidi oma, re cha vuẹ ayen oborẹ ayen guọnọ nyo,” ayen de brorhiẹn rẹ ayen vwọ “kerhọ rẹ uyota na-a.”​—2 Timoti 4:​3, 4.

Diesorọ uyota vwọ ghanre?

Ihwo guọnọ uyota ayen kẹ sa vwẹroso ohwohwo. Ẹroẹvwọsuọ ra dia-a, oyerinkugbe rọhẹ uvwre rẹ igbeyan vẹ ihwo efa cha sa ga-an. Baibol na tare nẹ Ọghẹnẹ guọnọre nẹ e mu ẹga rẹ avwanre kpahen uyota. Ọ da ta: “Ihwo re ga [Ọghẹne], ke ga vwọrẹ ẹwẹn kugbe uyota.” (Jọn 4:24) Wo se vwo yono oborẹ uyota ro nẹ Baibol rhe sa vwọ vwẹ ukẹcha kẹ wẹ vwo vughe ẹga rẹ efian je kẹnoma kẹ, se iyovwinreta sansan rehẹ uyovwinrota na “Efian Rẹ Ihwo Guẹn Rọ Nẹrhẹ E Roro Nẹ Ọghẹnẹ Vwo Ẹguọnọ-ọ.”

Diesorọ Ọghẹnẹ vwọ guọnọ nẹ me riẹn uyota na?

Ọghẹnẹ guọnọre nẹ wo vwo usivwin, jẹ ofori nẹ wọ riẹn uyota ro shekpahọn rere wo se vwo ru ọtiọyen. (1 Timoti 2:4) Wo de yono kpahen iwan rẹ Ọghẹnẹ ri shekpahẹn obo ri yovwinri vẹ obo re brare ji yeren akpọ nene ayen, ku wo vwo oyerinkugbe ọkpẹkpẹkpẹ vẹ Ọghẹnẹ. (Une rẹ Ejiro 15:​1, 2) Rere ihwo sa vwọ riẹn uyota na, Ọghẹnẹ de ji Jésù rhe otọrakpọ na. Ọghẹnẹ guọnọre nẹ avwanre kerhọ rẹ iyono ri Jésù.​—Matiu 17:5; Jọn 18:37.

Ọghẹnẹ che si efian ẹvwọrọn no?

E. O tuẹn Ọghẹnẹ oma siẹrẹ ihwo de ruẹ ihwo efa obo ri je ayen wọmarẹ ayen vwọ phiẹn ayen. O veri nẹ o che siẹ ihwo re vwẹ efian vwo ru ẹkuruemu nẹ otọrakpọ na. (Une rẹ Ejiro 5:6) Ọke rẹ Ọghẹnẹ de ru ọyena nu, o mi ji ru ive rọyen nana gba: “Ugbunu rọ ta uyota cha dia bẹdẹ.”​—Isẹ 12:19.