“Nene Uyota Na”

1. Erere vọ yen a mrẹ siẹrẹ a da ta ota kpahen obo ra wan mrẹ “uyota na” vughe?

“MAVỌ wo ru mrẹ uyota na vughe?” Aphro herọ-ọ nẹ wọ kpahenphiyọ onọ yena abọ buebun re. Ọnana ọvo vwẹ usun rẹ enọ ra ka nọ siẹrẹ a da guọnọ vughe iniọvo rẹ avwanre fiotọ. Oma vwerhen avwanre siẹrẹ avwanre de nyo oborẹ iniọvo rẹ avwanre wan vughe Jihova ji vwo ẹguọnọ rọyen, ọtiọyen ji te ọke rẹ avwanre da vuẹ ayen kpahen oborẹ uyota na ghanre kẹ avwanre te. (Rom 1:11) Otaẹtakuẹgbe ọtiọna je cha avwanre uko vwo roro kpahen obo rọ ghanre te ra vwọ dia Oseri ri Jihova. Ọnana je nẹrhẹ e vwo owenvwe ọgangan re vwo “nene uyota na,” kọyen re vwo yeren akpọ nene idjerhe ra da sa mrẹ ebruphiyọ ri Jihova ji vwo aroesiri rọyen.​—⁠3 Jọn 4. 

2. Die yen a cha ta ota kpahen vwẹ uyono nana?

² Vwẹ uyono nana, a cha fuẹrẹn erọnvwọn evo re sorọ rẹ avwanre vwo vwo ẹguọnọ rẹ uyota na. A je cha ta ota kpahen obo re se vwo djephia nẹ e vwo ẹguọnọ rẹ okẹ ọghanghanre nana ọkieje. Aphro herọ-ọ nẹ uyono nana cha nẹrhẹ ọdavwaro re vwo kpahen oborẹ Jihova ruru ro vwo si avwanre rhe ukoko na kodophiyọ. (Jọn 6:44) Ọ je cha nẹrhẹ e vwo owenvwe ọgangan re vwo ghwoghwo uyota na kẹ ihwo efa.

OBORESORỌ AVWANRE VWO VWO ẸGUỌNỌ RẸ “UYOTA NA”

3. Ọrhọ yen emu ọvo rọ ma ghanre rọ nẹrhẹ avwanre vwo ẹguọnọ rẹ uyota na?

³ Erọnvwọn buebun yen mu avwanre vwo vwo ẹguọnọ rẹ uyota na. Ọ rọ ma ghanre, avwanre vwo ẹguọnọ ri Jihova Ọghẹnẹ rọ dia esiri rẹ uyota na. Womarẹ Ota rọyen Baibol na, a rhe riẹn Jihova kerẹ Ọmemama ro me vwo ẹgba rọ ma odjuvwu vẹ akpọ, kugbe Ọsẹ ro vwo ẹguọnọ rọ je vwẹrote avwanre. (1 Pita 5:⁠7) Avwanre riẹnre nẹ Ọghẹnẹ rẹ avwanre ohwo “rọ ria ehrọre vẹ arodọvwe, ọ fobọ muophu-u ọ vẹ ẹguọnọ vẹ uyota.” (Eyan. 34:⁠6) Jihova vwo ẹguọnọ rẹ orhiẹn ọsoso. (Aiz. 61:⁠8) Ọ da siẹrẹ ọ da mrẹ nẹ avwanre rioja, o muegbe o ji vwo owenvwe ro vwo si ojaẹriọ eje no vwẹ ọke ro fori. (Jer. 29:11) Avwanre ji nẹ kiọkiọkiọ vwọ hẹrhẹ ọke yena! Ọnana yen emu ọvo rọ sorọ rẹ avwanre vwo vwo ẹguọnọ ri Jihova mamọ!

4-5. Diesorọ rẹ ọyinkọn Pọl vwọ vwẹ iphiẹrophiyọ rẹ avwanre vwo dje ọtan?

⁴ Ọrhọ yen emu ọfa rọ sorọ avwanre vwo vwo ẹguọnọ rẹ uyota na? Uyota na fierere vwọ kẹ avwanre gbidiki. Roro kpahen udje ọvo. Iphiẹrophiyọ re vwo kpahen obaro na ọyen ọvo vwẹ usun rẹ uyota ri Baibol na. E se vwo dje oborẹ iphiẹrophiyọ yena ghanre te, ọyinkọn Pọl de si: “Kọye hẹ ọtan rẹ avwanre churu erhi rẹ avwanre mu ro vwo je bo.” (Hib. 6:19) Kirobo rẹ ọtan yọnrọn okuna rere o vwo je bo ghwrẹ ye, eriyin yen iphiẹrophiyọ rẹ avwanre re mu kpahen Baibol na ji se ruẹ avwanre gan vwẹ ọke re de hirharokuẹ edavwini.

⁵ Vwẹ ẹdia nana, Pọl ta ota kpahen iphiẹrophiyọ rẹ odjuvwu rẹ Inenikristi ra jẹreyọ niri ghanghanre. Ẹkẹvuọvo, eta rọyen na ji shekpahen Inenikristi ri vwo iphiẹrophiyọ rẹ ayen vwọ dia bẹdẹ vwẹ iparadaisi vwẹ otọrakpọ na. (Jọn 3:16) Vwọrẹ uyota, iphiẹrophiyọ rẹ arhọ ri bẹdẹ re rhi vwo na nẹrhẹ akpeyeren rẹ avwanre rhi vwo otọ.

6-7. Erere vọ yen Yvonne mrẹre ro vwo yono uyota ro shekpahen obaro na?

⁶ Roro kpahen obo re phia vwọ kẹ oniọvo aye ọvo re se Yvonne. Ọ dia ukoko na yen e de vwiẹ-ẹ, ọke rọ vwọ hẹ omotete oshọ rẹ ughwu muro mamọ. Ọ karophiyọ ota ọvo ro se mrẹ rọ cha sa chọrọ ẹro-o: “Ọke cha rẹ odẹ rọ cha na rha cha dia-a.” Ọ da ta: “Eta nana djẹ vwẹ ovwerhẹn, ki mi roro kpahen obaro na. ‘Vwọrẹ imuẹro, o vwo erọnvwọn efa re me sa vwẹ akpeyeren mẹ vwo ru.’ ‘Diesorọ mi vwo yeren akpọ?’ Me guọnọ ghwu-u!”

⁷ Ọke vwọ yanran na rọ vwọ hẹ emeghene, Yvonne da yan kanre Iseri ri Jihova. Ọ da ta: “Ọnana da nẹrhẹ mi rhi vwo iphiẹrophiyọ nẹ me sa dia bẹdẹ vwẹ iparadaisi vwẹ otọrakpọ na.” Idjerhe vọ yen uyota rẹ oniọvo rẹ avwanre yonori na vwo fierere kẹ? Ọ da je ta: “Mi rhe vrẹn vwẹ ason fikirẹ udubruvwe rẹ oborẹ akpeyeren mẹ cha dia vwẹ obaro na, yẹrẹ djoshọ rẹ ughwu ọfa-a.” Kirobo wọ sa vwẹ ẹwẹn roro, Yvonne nabọ ni uyota na ghanghanre, oma je vwerhọn rọ vwọ vuẹ ihwo efa kpahen iphiẹrophiyọ ro vwo kpahen obaro na.​—⁠1 Tim. 4:⁠16.

8-9. (a) Vwẹ itẹ ọvo rẹ Jesu kperi, mavọ yen efe rẹ ọshare ọvo mrẹre ghanre kẹ te? (b) Mavọ yen uyota na ghanre kẹ wẹ te?

⁸ Uyota ri Baibol na ji shekpahen iyẹnrẹn esiri rẹ Uvie rẹ Ọghẹnẹ. Jesu vwẹ uyota ro shekpahen Uvie na vwo dje efe re sinu. Vwẹ Matiu 13:​44, Jesu da ta: “Uvie rẹ odjuvwu họhọ igho rẹ ohwo tọn phihọ otọ: rẹ ohwo ọfa mrẹre o de sionu; o de kpo vẹ aghọghọ ra shẹ obo ro vwori ejobi, ọ da rhe dẹ oto na kẹ oma rọye.” Jokaphiyọ nẹ ọ dia ọshare na guọnọ efe na jovwo-o. Ẹkẹvuọvo rọ vwọ mrẹ, ọ da vwẹ erọnvwọn buebun vwo ze rere ọ sa vwọ dẹ. Vwọrẹ uyota, ọ shẹ obo ro vwori eje. Diesorọ? Kidie ọ riẹn ọghanrovwẹ rẹ efe na. Ọ ghanre vrẹ ekuakua ro vwo ze na.

⁹ Uyota na je ghanre kẹ wẹ? Aphro herọ-ọ nẹ ọ ghanre kẹ wẹ! Avwanre riẹnre nẹ o vwo orọnvwọn vuọvo rẹ akpọ na vwọ kẹ avwanre ra sa vwọ vwanvwe aghọghọ rẹ avwanre mrẹ ra vwọ ga Jihova enẹna-a, vẹ iphiẹrophiyọ rẹ arhọ ri bẹdẹ re che vwo vwẹ obaro na vwẹ otọ rẹ usuon rẹ Ọghẹnẹ. Uphẹn re vwori re vwo vwo oyerinkugbe ọkpẹkpẹkpẹ ra riavwerhen rọyen na ghanre vrẹ korọnvwọn korọnvwọn re che vwo ze. Obo re ma vwerhen avwanre oma ọyen re vwo ruẹ obo ri “je.”​—⁠Kọl. 1:10.

10-11. Die yen mu Michael vwo ru ewene ride vwẹ akpeyeren rọyen?

¹⁰ Buebun rẹ avwanre vwẹ erọnvwọn re ma ghanre kẹ avwanre vwo ze rere e se vwo vwo aroesiri ri Jihova. Ihwo evo kpairoro vrẹ akpọ rode rẹ ayen rhe yerin jovwo. Evo kpairoro vrẹ ẹvwọtua rẹ efe. Efa kpairoro vrẹ oka rẹ akpọ rẹ ayen yerẹn jovwo riẹriẹriẹ ọke rẹ ayen vwọ mrẹ Jihova vughe nu. Ona yen oborẹ Michael ruru. Ọ dia ukoko na yen e de vwiẹ-ẹ. Ọke rọ vwọ hẹ eghene o de yono obo ra fa ikarati. Ọ da ta: “Ọyen obo re ghanre kẹ vwẹ mamọ mi vwo vwo omakpokpọ. Ọkiọvo mi no nẹ e che se phi vwe kparobọ-ọ.” Ẹkẹvuọvo rọ vwọ tuẹn eyono ri Baibol na phiyọ, Michael de rhi vughe ẹro rẹ Jihova vwo ni ozighi egbe. (Une 11:⁠5) Michael vwọ ta ota kpahen aye gbẹ ọshare re dia Iseri ri nenire yono Baibol na, ọ da ta: “Ayen nama vwẹ ọke vuọvo vwọ vuẹ vwẹ nẹ me dobọ rẹ ikarati ẹfa ji-i, ukperẹ ọtiọyen ayen de muomaphiyọ eyono rẹ uyota ri Baibol rẹ ayen yono uvwe na.”

¹¹ Michael vwo yono kpahen Jihova phiyọ na, jẹ ẹguọnọ ro vwo kpahọn kodophiyọ. Obo ri me te ẹwẹn yen oborẹ Jihova dje erorokẹ kẹ idibo rọyen wan. Ọke vwọ yanran na, Michael da rhe mrẹvughe nẹ ofori rẹ ọyen vwo ru ewene vwẹ akpeyeren rọyen. Ọ da ta: “Me riẹnre nẹ ọ cha bẹn kẹ vwẹ mamọ mi vwo siobọnẹ ikarati ẹfa. Ẹkẹvuọvo me je riẹn nẹ oma cha vwerhen Jihova kpahen ọnana, o ji muvwẹro nẹ a vwọ ga yen obo re ma ghanre vrẹ korọnvwọn korọnvwọn re vwo ze.” Michael dje ọdavwaro phia kpahen uyota ọghanghanre rọ mrẹre na, ọnana de muo vwo ru ewene ride vwẹ akpeyeren rọyen.​—⁠Jems 1:⁠25.

12-13. Mavọ yen uyota ri Baibol na cha Mayli uko wan?

¹² A sa vwọ riẹn oborẹ uyota na ghanre te, Baibol na da vwẹ uyota na vwo dje urhukpẹ ro lo vwẹ ebri. (Une 119:105; Ẹfe. 5:⁠8) Mayli ro nẹ Azerbaijan rhe dje ọdavwaro okokodo phia kpahen ukẹcha rọ mrẹ vwo nẹ Ota rẹ Ọghẹnẹ rhe. Uwevwin re de kpo ẹga sansan yen ọ dia ghwanre. Ọsẹ rọyen kpo ẹga rẹ Alufa, oni rọyen ko rhe kpo ẹga rẹ ihwo ri Ju. Ọ da ta: “Dede nẹ o muvwẹro nẹ Ọghẹnẹ herọ, jẹ o vwo enọ evo ri kpokpo uvwe ẹwẹn. Ki mi roro, ‘Diesorọ Ọghẹnẹ vwọ ma ihworakpọ, diesorọ ohwo vwọ rioja vwẹ ẹdẹ rẹ akpọ rọyen eje nu, ọ me rha ton vwevunrẹ ẹtẹrhẹ rẹ erhanre bẹdẹ?’ Ko gbe vwe unu, ọ vwọ dianẹ ihwo tanẹ, korọnvwọn korọnvwọn rọ phia ọyen ọhọre rẹ Ọghẹnẹ na, kẹ ‘Ọghẹnẹ yen sua oborẹ avwanre ruẹ, jẹ oma vwerhọn rọ vwọ mrẹ nẹ avwanre rioja kerẹ ohwo rọ vwẹ idọbebi vwọ ha eha?’ ”

¹³ Mayli davwẹngba rọ vwọ guọnọ ẹkpahọnphiyọ vwọ kẹ enọ rọyen na. Ọke vwọ yanran na, o de rhiabọreyọ uyono ri Baibol je mrẹ uyota na vughe. Ọ da ta: “Ẹkpahọnphiyọ rọ ghwotọ rẹ Baibol na vwọphia vwọ kẹ enọ mẹ chọn vwẹ uko vwo wene akpeyeren mẹ. Idjedje ro fiotọ ro ji muẹro rẹ Baibol na vwọphia chọn vwẹ uko vwo vwo ẹwẹn ri dọe.” Kerẹ Mayli, avwanre kpẹvwẹ Jihova, “Ohwo ro se [avwanre] nẹ ebri rhe vwo kpo urhukpẹ rẹ igbunu rode na.”​—⁠1 Pita 2:⁠9.

14. Die yen e se ru rere ẹguọnọ re vwo kpahen uyota na vwọ ganphiyọ? (Ni ekpeti na “Erọnvwọn Efa ra Vwẹ Uyota ri Baibol na Vwo Dje.”)

¹⁴ Enana ghwa idje evo ri dje oborẹ uyota na ghanre te. Aphro herọ-ọ nẹ idje rẹ ihwo efa je herọ rẹ wo se roro kpahen. Vwẹ uyono romobọ wẹn, wọ je sa hiẹ guọnọ erọnvwọn efa re sorọ rẹ avwanre vwo vwo ẹguọnọ rẹ uyota na. Ẹguọnọ re vwo kpahen uyota na vwọ ganphiyọ ye, ka je cha guọnọ idjerhe re se vwo dje ẹguọnọ na phia.

OBORẸ AVWANRE VWO DJEPHIA NẸ E VWO ẸGUỌNỌ RẸ UYOTA NA

15. Ọrhọ yen idjerhe ọvo re se vwo djephia nẹ e vwo ẹguọnọ rẹ uyota na?

¹⁵ Avwanre se djephia nẹ e vwo ẹguọnọ rẹ uyota na siẹrẹ avwanre da vwẹ ọkieje vwo yono Baibol na vẹ ẹbe efa ra fan nẹ Baibol na rhe. O toro uche ikpe ra hẹ evunrẹ ukoko na re-e, erọnvwọn buebun je herọ re che yono kpahen. Uwevwin Orhẹrẹ rẹsosuọ ra ka teyenphia da ta: “Iyono rẹ efian vọn akpọ na nonẹna, ọnana kọ nẹrhẹ ọ bẹn re se vwo vughe uyota na. Wọ da guọnọ mrẹ uyota na vughe, ku wo che gbẹrophiyotọ hiẹ guọnọ. . . . Wọ da guọnọ vwo, ku wọ cha davwẹngba vwo yono kpahọn. Wo jẹ uyota ri Baibol ọvo ru wọ riẹnre te kẹ wẹ-ẹ. . . . Ẹkẹvuọvo vwẹ ọkieje vwọ hiẹ guọnọ uyota ri Baibol efa.” Uyono ghwa lọhọ-ọ, ẹkẹvuọvo o che fierere siẹrẹ e de ru ọtiọyen.

16. Ona rẹ uyono ri Baibol vọ yen me fierere kẹ wẹ? (Isẹ 2:​4-6)

¹⁶ Ọ dia avwanre eje yen oma rẹ isese vẹ eyono vwerha-an. Jẹ Jihova guọnọre nẹ a “nabọ . . . vwẹ erhiori guọnọ” uyota ri Baibol na rere e se vwo vwo ẹruọ rọyen kodophiyọ. (Se Isẹ 2:​4-6.) Avwanre cha mrẹ erere ọkieje siẹrẹ a da davwẹngba vwo ru ọtiọyen. Corey vwọ ta ota kpahen isese ri Baibol rọyen, ọ da tanẹ owọrota ri Baibol ọvuọvo yen ọyen tẹnroviẹ. Ọ da ta: “Mi se eta rehẹ obotọ na eje, se ẹkpo ri Baibol efa ra rionbọ ra ji ruẹ ehiahiẹ. . . . Ona nana chọn vwẹ uko vwo yono emu buebun!” Te ọ dianẹ ona nana yẹrẹ ọfa yen avwanre vwo ruo, e djephia nẹ e ni uyota na ghanghanre siẹrẹ a da rhuẹrẹ ọke je davwẹngba vwo yono kpahọn.​—⁠Une 1:​1-3.

17. Die yen o mudiaphiyọ re vwo yeren akpọ vwo nene uyota na? (Jems 1:⁠25)

¹⁷ Vwọrẹ uyota, avwanre riẹnre nẹ e di vwo yono kpahen uyota na ọvo teri-i. Uyota na se vwo fierere kẹ avwanre, ko fori nẹ e yeren akpọ nene, kọyen a reyọ obo re yonori vwo ruiruo vwẹ akpeyeren. E de se ru ọtiọyen, uyota na kọ sa kẹ avwanre uvi rẹ omavwerhovwẹn. (Se Jems 1:25.) Mavọ yen o se vwo mu avwanre ẹro nẹ avwanre yeren akpọ nene uyota na? Oniọvo ọshare ọvo vwẹ iroroẹjẹ nana vwọphia nẹ ohwo sa fuẹrẹn oma rọyen ni rere ọ sa vwọ riẹn asan ro de ruẹ yovwẹn, vẹ asan ro de fo nẹ o de ru ewene. Ọyinkọn Pọl da ta: “Uche asan rẹ avwanre riẹn te na e gbe jẹ a yọnrọn ọyena gan.”​—⁠Fil. 3:⁠16.

18. Diesorọ ro vwo fo a vwọ davwẹngba vwo “nene uyota na”?

¹⁸ Di roro kpahen erere ro no cha siẹrẹ a da davwẹngba rẹ avwanre eje vwo “nene uyota na”! Ọ dia uyota na de nẹrhẹ avwanre di yeren omamọ akpọ ọvo-o, ẹkẹvuọvo ọ je nẹrhẹ e ruẹ obo re vwerhen Jihova vẹ iniọvo rẹ avwanre oma. (Isẹ 27:11; 3 Jọn 4) Vwọrẹ uyota, ena yen erọnvwọn ri me yovwin kparobọ ri mu avwanre vwo vwo ẹguọnọ rẹ uyota na je reyọ obo re yonori vwo ruiruo vwẹ akpeyeren.