Ihwo ri Suẹn si Ihwo Orhọ Kpahen Amagidọn​—⁠Die Yen Baibol na Ta Kpahọn?

Vwẹ urhiọke ri Monday vwẹ October 10, 2022, isodje ri Russia da sa ibọmbu ro irere ri Ukraine buebun. Ihwo ri Russia ru ọnana kidie a ghwọrọ agbada rọhẹ uvwre rayen vẹ Crimea ẹdẹ ivẹ re wanre. Ihwo ri suẹn vwọ vwẹ orhọesio phia kpahen Amagidọn rọ cha kẹrẹkpẹ nu, o kri-i, ọnana da phia.

• U.S. President Joe Biden da ta: “Avwanre ji rhi sikẹrẹ Amagidọn vwo nẹ ọke ri [U.S. President John F.] Kennedy kugbe Cuban Missile Crisis dẹvo-o. . . . Mi niro nẹ a da reyọ ekuakua rẹ ofovwin kerẹ ibọmbu vwo [ruiruo], e cha so Amagidọn.”​—October 6, 2022.

• Vwọ kpahen obo ri se nẹ obuko rẹ ibọmbu vẹ ekuakua rẹ ofovwin efa rhe, Ukraine President Volodymyr Zelensky da ta: “Mi niro nẹ ọnana cha dia Amagidọn, ọ cha so imuoshọ kẹ akpọneje.”​—BBC News, October 8, 2022.

Ekuakua rẹ ofovwin ghene sa so Amagidọn? Die yen Baibol na tare?

Ekuakua rẹ ofovwin cha so Amagidọn?

Ẹjo. Abọ ọvo goi yen ota na “Amagidọn” vwomaphia vwẹ Biabol na, vwẹ Ẹvwọphia 16:16. Ọnana dia ofovwin rọhẹ uvwre rẹ ẹgborho ivẹ-ẹ, ẹkẹvuọvo, ọnana ofovwin rọ cha dia vwẹ uvwre rẹ Ọghẹnẹ vẹ “ivie rẹ akpọ na ejobi.” (Ẹvwọphia 16:14) Ọghẹnẹ cha vwẹ ofovwin rẹ Amagidọn vwo phioba phiyọ usuon rẹ ihworakpọ eje.​—Daniẹl 2:44.

Wọ da guọnọ riẹn erọnvwọn efa kpahen Amagidọn, se uyovwinrota na Die Yen Ofovwin rẹ Amagidọn?

A cha vwẹ ekuakua rẹ ofovwin vwọ ghwọrọ ihworakpọ vẹ otọrakpọ na?

Ẹjo. Dede nẹ isun rẹ akpọ na sa reyọ ekuakua rẹ ofovwin vwo ruiruo vwẹ obaro na, Ọghẹnẹ cha vwẹ uphẹn kẹ ayen nẹ ayen ghwọrọ akpọ na-a. Baibol na da ta:

• “Akpọ na herọ bẹdẹ.”​—Aghwoghwo 1:4.

• “Ọvwata cha re ughwẹ rẹ otọ na, kọ dia enu rọye bẹdẹ.”​—Une rẹ Ejiro 37:29.

Ẹkẹvuọvo, aroẹmrẹ ri Baibol vẹ obo re phia asaọkiephana djerephia nẹ o rhe che kri-i, ihworakpọ che rhiẹromrẹ ewene rode vwẹ ikuegbe rẹ ihworakpọ. (Matiu 24:​3-7; 2 Timoti 3:​1-5) Mrẹ oborẹ Baibol na ta kpahen obaro na womarẹ uyono ri Baibol rẹ ọphẹ rẹ avwanre ruẹ.