Comstock Images/Stockbyte via Getty Images
OVWAN RA RHẸRẸ!
Osun Vọ Yen Wọ Cha Jẹ?—Die Yen Baibol na ta Kpahọn?
Chekemerha ke che mu ekpeti rẹ usuon vwẹ ẹkuotọ sansan vwẹ akpọ na. Ihwo brorhiẹn rọ pha ghanghanre kpahen ihwo re cha dia osun rayen.
Die yen Baibol na tare?
O vwo asan rẹ ẹgba rẹ isun rẹ akpọ na teri
Baibol na ta ota kpahen asan rẹ ẹgba rẹ isun rẹ akpọneje teri.
“Wọ vwẹ ẹro wẹn so isu-un, ọmọ rẹ ohwo, ro vwo ọchuko ọvuọvo-o. Ọke rẹ ẹnwẹ rọye de no oma ko rhivwi kpo ekpẹn rọye; vwẹ ẹdẹ yena ọvuọvo na iroro rọ jẹre ejobi mi ghwru.”—Une rẹ Ejiro 146:3, 4, eta rehẹ obotọ na.
Ihworakpọ re dia isun, ri vwo omamọ rẹ ẹwẹn dede che ghwu vwẹ ẹdọvo. Ọtiọyena, ayen che se vẹ kẹ wẹ nẹ ihwo re vwọ kpahen ayen cha sẹro rẹ iruo esiri raye-en.—Aghwoghwo 2:18, 19.
Vwọrẹ uyota, Baibol na jẹ avwanre riẹn nẹ a ma ihworakpọ rẹ ayen vwo sun omoma raye-en.
“Ohwo sa vwẹ ogangan rẹ omobọ rọye kpọ oma rọye vi-i.”—Jerimaya 10:23.
O vwo ohwo rọ sa dia omamọ rẹ osun vwẹ ọke avwanre na?
Osun rẹ Ọghẹnẹ vwo mu
Baibol na vuẹ avwanre nẹ Ọghẹnẹ vwẹ Jesu Kristi vwo mu kerẹ osun ro me yovwin kparobọ, ra je sa vwẹroso. (Une rẹ Ejiro 2:6) Jesu yen Ovie rẹ Uvie rẹ Ọghẹnẹ, rọ dia usuon ro che sun nẹ odjuvwu rhe.—Matiu 6:10.
Wo che rhiabọreyọ usuon ri Jesu? Baibol na dje oboresorọ onọ nana vwọ ghanre:
“Fiọnfiọn awọ rọye [Jesu Kristi], ọ dia eriyin ophu de muo [Ọghẹnẹ], wọ da ghwọrọ vwẹ idjerhe na; kidie ophu rọye cha tua. Ebruba kẹ ohwo rọ djẹ si oma nu vwẹ evun Rọye.”—Une rẹ Ejiro 2:12.
Ọna yen ọke wo vwo brorhiẹn. Aroẹmrẹ ri Baibol djerephia nẹ Jesu ton usuon phiyọ vwẹ ukpe ri 1914, nẹ o rhe che kri-i, Uvie rẹ Ọghẹnẹ ko che wene usuon rẹ ihworakpọ na eje.—Daniẹl 2:44.
Wọ sa vwọ riẹn erọnvwọn efa kpahen oborẹ wo se vwo bicha usuon ri Jesu, se uyovwinrota na, “Ka Ẹbẹre rẹ Uvie rẹ Ọghẹnẹ Asaọkiephana!”