Vwẹroso Osun rẹ Akpọ vẹ Odjuvwu

1. Erọnvwọn vọ yen phia kẹ Job?

ERỌNVWỌN eje rẹ ọshare ọvo ro vwo esegbuyota mamọ vwẹ awanre re se Job vwori va rọ abọ: emọ rọyen, omakpokpọ rọyen kugbe efe rọyen, jokparẹ arhọ rọyen ọvo. Vwọba, e miovwon odẹ rọyen. Eta buebun rẹ “igbeyan” rọyen ta kẹ, kuọrọn ẹwẹn rọyen. Ofu tobọ dje aye rọyen te ẹdia rọ da vuẹ nẹ, “hanrhe Ọghẹnẹ rere wo ghwu.” (Job 2:9; 15:4, 5; 19:1-3) Erọnvwọn nana re phia kẹ na sa nẹrhẹ ẹroẹvwọsuọ ri Job kpahen Ọghẹnẹ rẹ uyota na shekpotọ, je nẹrhẹ o vwo ẹwẹn ivivẹ sẹ Jihova cha chochọn rẹ ihwo ri vwo ẹguọnọ rọyen re je vwẹ ẹga Kẹ.

2-3. Die yen ẹwẹn rẹ avwanre sa djẹ ra, kẹ die yen avwanre se yono nẹ ọbe ri Job?

² Ọkievo, avwanre ji se hirharoku ẹdia egangan re sa nẹrhẹ ẹroẹvwọsuọ rẹ avwanre kpahen Jihova shekpotọ. Avwanre yerẹn vwẹ “ọke ọgangan rọ bẹn eyeren.” (2 Tim. 3:1) Ofu se dje avwanre je mrẹ bẹnbẹn re vwo chirakon siẹrẹ avwanre de hirharokuẹ edavwini sansan. Erọnvwọn tiọyena sa nẹrhẹ ihwo evo vwo ẹwẹn ivivẹ sẹ Jihova ghini vwo ọdavwẹ rayen.

³ Ọ da dianẹ ọtiọyen oma ji ru we, wo jẹ ofu dje wee. Job mrẹvughe nẹ Jihova sivwin ihwo re fuevun Kẹ. E ji se vwo oka rẹ ẹroẹvwọsuọ tiọyena kpahen Ọsẹ rẹ avwanre rọhẹ odjuvwu. E se vwo ru ọtiọyen, e jẹ a fuẹrẹn ẹkpo eghanghanre ivẹ vwẹ ọbe ri Job re vwẹ imuẹro kẹ avwanre: Ọrẹsosuọ, Jihova ọvo yen Osun rẹ akpọ vẹ odjuvwu. Ọrivẹ, Ọghẹnẹ rẹ avwanre ro me kpenu se sun obo re phia vwẹ akpọ na rere ọhọre rọyen vwo rugba, o ji se sivwin ihwo rọyen vrabọ rẹ ughwu, ọtiọyen ji te erọnvwọn ri se miovwon oyerinkugbe rayen vẹ ọyen.

ESHU DA RO OHRI RAYEN

4. Amono yen kpo omẹvwa re ruru vwẹ odjuvwu ra niyẹnrẹn rọyen vwẹ ọbe ri Job?

⁴ Ẹdẹ ọvo vwo te, “emọ rẹ Ọghẹnẹ” de koko vwẹ obaro ri Jihova vwẹ odjuvwu. Baibol na da ta: “Eshu da je ro ohri rayen.” (Job 1:6) Ọnana yen obọ rẹsosuọ vwẹ Baibol na e de djisẹ rẹ ohwo rọ vwọso Jihova na phiyọ “Eshu,” yẹrẹ “Ọrọvwọsua na.” Vwẹ ọke nana, Eshu rha dia ọmọ rẹ Ọghẹnẹ rọ fuevuun. Ọ da rhe dia ọvweghrẹn ri Jihova, ọtiọyen ji te orua Rọyen rọhẹ odjuvwu kugbe otọrakpọ obonẹ. Jihova womarẹ eta rọ tare vwẹ Jẹnẹsis 3:15 vwo djephia nẹ Eshu rha dia ọvo usun rẹ orua Rọyen rọhẹ odjuvwuu. Ọtiọyena, Eshu rha dia ẹbẹre ọvo rẹ ‘aye naa,’ kọyen orua rẹ emekashe ri Jihova rehẹ odjuvwu​—rẹ “ọmọ” na cha wan oma rọyen rhee.

5. Die yen e se yono vwo nẹ obo ra tare vwẹ omẹvwa re ruru vwẹ obodjuvwu?

⁵ Jihova tare nẹ a vwẹ obo re phiare vwẹ odjuvwu vwọba Baibol na. Eta rẹ Eshu na djerephia nẹ ọyen ovwuvumwemwu ro miovwo ihwo. (Job 1:9; ni Ẹvwọphia 12:10.) Obo re phiare vwẹ odjuvwu rẹ Jihova tare nẹ a vwọba Baibol na kẹ avwanre imuẹro nẹ ọ reyọ ogangan rọyen vwo ruiruo vwẹ idjerhe abavo. O ji djephia nẹ Ọromevwẹgba na yen brorhiẹn rẹ oborẹ ihwo efa se ru te.

JIHOVA YEN BRORHIẸN NA

6. Idjerhe vọ yen Jihova vwo djephia nẹ ọyen yen ohwo ro me vwo ẹgba? (Job 1:7, 8)

⁶ Se Job 1:7, 8. Jihova yen vwẹrote obo re phiare vwẹ omẹvwa yena. Ọ da nọ Eshu: “Wo vwo oniso rẹ odibo mẹ Job re?” Vwọrẹ uyota, Jihova riẹnre nẹ Eshu guọnọ muẹkpahen Job. E gbe jẹ a mrẹ oborẹ Jihova cha reyọ ẹgba rọyen vwọ chochọn ri Job.

7. Vwo nene obo rehẹ Job 1:10, 11, die yen Eshu tare nẹ o mu ihworakpọ vwọ ga Jihova?

⁷ Se Job 1:10, 11. Jihova yen Osun ro me kpenu vwẹ akpọ vẹ odjuvwu, ọ reyọ ẹgba vẹ ogangan rọyen vwo ruiruo vwẹ idjerhe rọ guọnọre. (Jer. 32:17; Dan. 4:35) Dedena, Eshu tare nẹ Jihova reyọ ẹgba Rọyen vwo ruiruo vwẹ idjerhe ro forii. Kọyen, Eshu tanẹ Ọghẹnẹ jẹ udi kẹ ihworakpọ kerẹ Job, rere ayen sa vwọ vwẹ ẹga Kẹ. Eshu je tanẹ ihwo re vwẹ ẹga kẹ Jihova ruẹ ọtiọyen fikirẹ obo rọ sa vwọ kẹ ayen. Kẹ, die yen Jihova ruru?

8-9. Iji vọ yen Jihova vwọ kẹ Eshu kpahen obo ro se ru, kẹ diesorọ? (Job 1:12) (Ni ifoto na.)

⁸ Se Job 1:12. Jihova da vwẹ uphẹn kẹ Idẹbono nẹ ọ davwen Job ni sẹ obo rọ tare na ghini uyota, ẹkẹvuọvo o gbere ughwru vwọ kẹ. Ọghẹnẹ da vuẹ phephẹn nẹ: “Wọ vwẹ obọ wẹn te ọshare na [Job] komobọọ!” Jihova da vwẹ iji vwọ kẹ Eshu kpahen obo ro se ru. Ọtiọyena Eshu rhe vwo ẹgba vuọvo ro vwo ru vrẹ obo ra vuẹrẹẹ, asan ri Jihova vwẹ uphẹn kẹ te, etiyin o che ru ba. Eriyina Jihova da reyọ ẹgba vẹ ogangan rọyen vwọ sivwin Job je chochọn rẹ odẹ Rọyen. Ọtiọyen ọ ji ruẹ nonẹna.

⁹ Ọdavwini rẹsosuọ rẹ Eshu shefia kakare. Ọkieje yen Job vwọ fuevun kẹ Ọsẹ rọyen rọhẹ odjuvwu. (Job 1:22) Ẹkẹvuọvo, edavwini efa je herọ rẹ Ọrọvwọsua na cha vwọ davwen Job ni.

10. Diesorọ Jihova vwọ vwẹ uphẹn kẹ Eshu nẹ ọ rhoma davwen Job ni? (Job 2:2-6)

¹⁰ Se Job 2:2-6. Vwẹ obọfa, Eshu da davwẹngba mamọ rere Job sa vwọ sen ọyọnregan rọyen. Eshu tare nẹ Job da mrẹ ọdavwini rọ cha reyọ urhuarhọ rọyen, o che chukoku Ọghẹnẹ. A sa vwọ mrẹ otọ rẹ ota na, Jihova da vwẹ uphẹn kẹ Eshu nẹ ọ davwen Job ni. Vwọba, Jihova da vwẹ iji vwọ kẹ Eshu nẹ: “Wọ reyọ arhọ rọyeen!” Ọtiọyena Eshu rhe vwo ẹgba vuọvo ro vwo ru vrẹ obo ra vuẹrẹẹ. Obọfa, avwanre mrẹ ẹgba rẹ Ọromekpenu na vwẹ obo ro ruru vwẹ edavwini ri Job kidie Eshu se ru vrẹ oborẹ Jihova vuẹrẹẹ.

JIHOVA PHIOBA PHIYỌ OJAẸRIỌ RI JOB

11. Mavọ yen Jihova hwosa kẹ Job ro vwo phioba phiyọ edavwini rọyen nu? (Job 42:10-13)

¹¹ Se Job 42:10-13. Job rhi vwo djephia nẹ o vwo ọke vuọvo rọ cha vwọ sen ọyọnregan rọyeen, Jihova da dobọ rẹ edavwini rẹ Eshu eje ji. Jihova da jowọ ro vwo phioba phiyọ oja rẹ odibo rọyen rọ fuevun na. Obọfa, Ọrọvwọsua na vwo ẹgba vuọvo ro vwo gbe vwọso oborẹ Jihova ruru naa. Eshu rhe vwo uphẹn rọ vwọ davwen odibo ri Jihova Job ni ọfaa.

12. Djudje oborẹ Jihova ru kẹ idibo rọyen re vwẹroso ẹgba usivwin rọyen.

¹² Vwẹ ọke rẹ oba na, idibo ri Jihova buebun rhiẹromrẹ ẹgba usivwin rọyen re. Kerẹ udje, vwẹ 1945, Iseri ri Jihova ri bun te 230 yen vrabọ rẹ ughwu, ọke rẹ isodje ri Nazi vwọ gba ayen vwọ yan oyan rẹ ughwu vwo nẹ ọko rẹ oja ri Germany vwo kpo abadi na. Ayen eje da vwẹ unu ọvo ta oborẹ ayen rhiẹromrẹ, ji sio phiyotọ: “Ọke ọgangan yen avwanre wanvrẹ ra vwọ davwen avwanre ni vwẹ obuko re, avwanre họhọ ihwo re fru nẹ ogidi erharhe, jẹ avwanre nyo ọnrhe rẹ ivwirhin vwẹ oma avwanree. . . . Ukperẹ ọtiọyen, avwanre da rhe vọn vẹ ẹgba kugbe ogangan ro nẹ obọ ri Jihova rhe.” Ayen da je ta: “E vwo siobọnu avwanre vwo nẹ unu rẹ ikpohrokpo [nu na] . . . orọnvwọn vuọvo yen avwanre vwo vwẹ ẹwẹn, ọyen avwanre vwọ vwẹ ẹga kẹ Jihova . . . rhirin rhirin. Ọyena yen osa ẹhwa rọ ma rho kparobọ.”​—Ni Daniẹl 3:27; 6:22.

13. Ẹroẹvwọsuọ vọ yen wo se vwo siẹrẹ wo de hirharokuẹ edavwini? (Ni ifoto na.)

¹³ Avwanre ji se hirharoku edavwini egangan vwẹ akpeyeren kerẹ ihwo re do phiyọ unu rẹ ikpohrokpo re vwo rudje. (1 Pita 5:8-10) Ọkievo, ofu rẹ akpọ se dje avwanre hwe tẹdia e de roro sẹ edavwini na che vwoba. Vwẹ ọke tiọyena, a da karophiyọ obo re phia vwọ kẹ Job, sa vwẹ ukẹcha vwọ kẹ avwanre. A sa nabọ vwẹroso ẹgba usivwin ri Jihova vwori ro vwo phioba phiyọ oja rẹ avwanre ria​—owenẹ o che ru ọtiọyen asaọkiephana yẹrẹ vwẹ akpọ kpokpọ rọ cha vwẹ obaro na. Ọ cha vwẹ uphẹn vwọ kẹ eyeren nana nẹ ọ dia vrẹ ọke ro bruphiyọ ro che vwo phioba phiyọọ!  

JIHOVA VWO ẸGUỌNỌ RẸ IDIBO RỌYEN RE FUEVUN

14-15. Mavọ yen oma ru Jihova rọ vwọ hwosa kẹ idibo rọyen re fuevun? (Job 14:15) (Ni ifoto na.)

¹⁴ Se Job 14:15. Ọsẹ rẹ avwanre rọhẹ obodjuvwu vẹ ihwo re fuevun kẹ vwo uvi rẹ oyerinkugbe rọ pha ghanghanre. O vwo ẹguọnọ rayen mamọ te ẹdia rẹ ayen da tobọ ghwu dede ọ cha kpare ayen nushi. O che si ọmiaovwẹ rẹ ughwu ghwa rhe no.​—Aiz. 65:17.

¹⁵ Job ji yerin vwẹ akpọ rẹ Eshu suẹn rẹ oja rọyen vwo vwoba nu, ẹkẹvuọvo Baibol na vuẹ avwanre nẹ Jihova rhoma kẹ omakpokpọ, ọtiọyen ji te erọnvwọn efa buebun vwọ vrẹ obo ro vwori jovwo a ke davwọn ni. Ebruphiyọ buebun rọ vwọ kẹ na ghwa odjephia rẹ oborẹ Jihova che ru vwọ kẹ Job vwẹ obaro na. Jihova djerephia nẹ ọ guọnọre nẹ idibo rọyen re fuevun yeren omamọ rẹ akpọ ji vwo uvi rẹ omavwerhovwẹn. Uyota nẹ, Jihova cha kẹ idibo rọyen eje re fuevun uphẹn ayen vwọ riavwerhen rẹ akpọ vwẹ iparadaisi. (Ẹvwọ. 21:3, 4) Kerẹ Osun rẹ akpọ vẹ odjuvwu, o vwo owenvwe ro vwo ru ọtiọyen. Mavọ yen ọ vwerhen oma te ra vwọ riẹn nẹ Jihova cha hwosa kẹ avwanre e de chirakon rẹ edavwini!

16. Ọrhọ yen iroro ọfa ro se mu avwanre vwọ vwẹroso Jihova kerẹ Osun rẹ akpọ vẹ odjuvwu?

¹⁶ Job vwọ dia akpọ ọke grongron nu, o de rhi ghwu. Jihova vwo ẹgba rọ vwọ kparọ nushi, kidie ọyehẹ Ọromevwẹgba na, Osun rẹ akpọ vẹ odjuvwu. (Diut. 32:39) Ọtiọyena, o vwo ohwo vuọvo rọ sa dobọ rọyen ji nẹ ọ kpare ihwo ro vwo ẹguọnọ rayen ri ghwuru nushi vwẹ ọke ro jeree.​—Rom 8:38, 39.

VWẸROSO JIHOVA KAKARE

17. Die yen djerephia nẹ ẹgbaẹdavwọn re Eshu ro vwo hwe ihwo ri Jihova eje shefia?

¹⁷ Ikuegbe ri Job re si phiyọ Baibol na nẹrhẹ e vwo iroro buebun re sorọ avwanre vwọ vwẹroso Jihova kakare. Mavọ yen ọ vwerhen oma te nẹ ẹgbaẹdavwọn rẹ Eshu ro vwo hwe ihwo ri Jihova eje shefia! Nonẹna idibo ri Jihova ri te omarẹ oduduru irhirin se soseri kpahen ẹgba ro rhe Osun rẹ akpọ vẹ odjuvwu na. Nọke ra ruọke, yen avwanre vwọ mrẹ nẹ o vwo orọnvwọn vuọvo re duvwun vwọso idibo ri Jihova ro se yovwiin. (Aiz. 54:17) O vwo isun rẹ akpọ ri vwo ogangan ọtiọyen ji te ilori rẹ ẹga vuọvo ri se si Iseri ri Jihova nẹ otọrakpọ naa. O ji vwo emu vuọvo rọ cha sa dobọ rẹ uyota rẹ avwanre ghwoghwo kpahen Jihova jii, ọtiọyena ihwo ke sa mrẹ aphiphẹn rẹ Eshu nẹ ọyen ohwo rẹ ọghware ọ ke rha dia ozighẹ. Ughwu dede cha sa dobọ rẹ avwanre jii, kidie Jihova cha kpare ihwo re fuevun kẹ te ẹdẹ ughwu rayen nushi.​—Hos. 13:14.

18. Die yen sa nẹrhẹ avwanre fiudugberi kpahen obaro na?

¹⁸ Avwanre se ru esegbuyota avwanre ganphiyọ ji fiudugberi kpahen obaro na siẹrẹ e de roro kokodo kpahen ikuegbe ri Job. Uvwre rẹ ọke rẹ ukpokpogho rode na, Eshu vẹ ihwo rọ reyọ vwo ruiruo che no nẹ ayen yen me vwo ẹgba, nẹ ihwo rẹ Ọghẹnẹ evwiẹrẹ nẹ ayen vwo ọchukoo. Jẹ kirobo rẹ Jihova ruru vwẹ ọke ri Job, ọ cha reyọ ẹgba rọyen vwo ruiruo, ọ cha vwẹ uphẹn kẹ Eshu nẹ ọ ghwọrọ ihwo rọyen no kakaree. Ọke rẹ Jihova che vwo phioba phiyo ojaẹriọ eje rẹ Eshu so kẹ ihworakpọ sikẹrẹ re. E che mu Idẹbono vẹ emekashe rọyen phiyọ ukpotọ ro jẹ oba evwo ẹgbukpe 1,000. (Luk 8:31; Ẹvwọ. 20:1-3) Ukuotọ rọyen, ka cha ghwọrọ Eshu vẹ ihwo eje re vẹ ọyen gba hẹ obọ. (Ẹvwọ. 20:10) Kirobo rẹ Jihova tare, ka cha guọghọ uyovwin rẹ Eshu, je ghwọrọ ẹsiẹvo goi vwo nẹ otọrakpọ na kakare.​—Jẹn. 3:15; Rom 16:20.

19. Erere vọ yen che te ihwo re vwẹroso Jihova kakare obọ? (Ni ifoto na.)

¹⁹ Egọghẹnẹ rẹ uyota nẹ kiọkiọkiọ kpahen ewene re cha vwomaphia vwẹ akpọ kpokpọ na rẹ ayen cha vwọ dia ihwo re gbare ji yeren akpọ rẹ omavwerhovwẹn. A cha sa vwẹ ẹwẹn roro oborẹ akpeyeren cha dia vwẹ ọke yenaa. Jihova da ta: “Nighere! Mi ruẹ erọnvwọn eje phiyọ ekpokpọ.” (Ẹvwọ. 21:5) Die yen otọ rẹ ota rọyen na? Ọnana yen obọ rẹsosuọ vwẹ ikpe buebun rẹ ihworakpọ che vwo nẹ abọ rẹ umiovwo, utuoma, kugbe ohwekufia vwẹ otọ rẹ usuon rẹ Eshu vẹ emekashe rọyen. A cha mrẹ vwo dje omafuvwe rọyeen! A rha cha mrẹ nẹ ẹnwan rẹ akpọ nana cha djẹ avwanre ovwerhẹẹn. Ihwo re wanvrẹ Amagidọn cha mrẹ iruo rẹ igbevwunu vwẹ akpọ na eje. Vwọba, evrẹnushi rẹ ihwo rẹ avwanre vwo ẹguọnọ kpahen ri ghwuru kọ cha tonphiyọ. Kẹ avwanre cha riavwerhẹn rẹ akpọ vwo nene ọhọre rẹ Ọsẹ rẹ avwanre rọhẹ odjuvwu!

20. Die yen wo vwo vwẹ ẹwẹn wo vwo ru?

²⁰ Avwanre vwo fiudugberẹ hirharokuẹ edavwini ri chekọ vwẹ ọke rẹ oba na, e jẹ avwanre vwo vwẹ ẹwẹn ra vwọ vwẹroso Jihova kakare ji bicha usuon rọyen. E jẹ e dje ẹguọnọ kẹ Ọsẹ rẹ avwanre rọhẹ odjuvwu ji dje Eshu phiyọ ọvwọrefian. Ọtiọyena, ke se fiudugberi ni kiọkiọkiọ kpo obaro na vwẹ otọ rẹ usuon ri Jihova rọ dia Osun rẹ akpọ vẹ odjuvwu, rọ cha hwosa kẹ idibo rọyen re fuevun vwẹ idjerhe rẹ oghẹresan!