Mavọ Wọ Sa Vwọ Họnre Vwọso Erọnvwọn ri Se Mu Ẹwẹn Wẹn Reyọ?

1-2. Mavọ yen obo re ghanre se vwo mu ẹwẹn rẹ avwanre reyọ?

ỌKE vọ yen wọ họnre vwọso erọnvwọn ri se mu ẹwẹn wẹn reyọ o krinọọ na? Ọ sa dianẹ emuọvo mu ẹwẹn wẹn nẹ obo ru wo ruẹ, ẹkẹvuọvo wọ guọnọ brorhiẹn rẹ obo re ma ghanre. Kerẹ udje, vwẹ ẹwẹn roro nẹ ọke wọ vwọ djẹ imoto, ifonu wẹn de hworo. Ọ sa dianẹ use na pha ghanghanre, jẹ wọ de rhi noso nẹ use na se mu ẹwẹn wẹn reyọ vwo nẹ imoto ru wọ djẹ. Ẹkẹvuọvo, obo re ma ghanre yen wọ vwọ tẹnrovi imoto ru wọ djẹ na.

² O vwo erọnvwọn buebun rẹ avwanre ruẹ re pha ghanghanre. Ẹkẹvuọvo, avwanre riẹnre nẹ ra vwọ tẹnrovi irueru rẹ ẹgaa ri Jihova yen obo re ma ghanre. (Mat. 6:33) Idibo ri Jihova pha kerẹ ihwo re nabọ jomaotọ djẹ imoto, ayen davwẹngba vwo vughe erọnvwọn ri se mu ẹwẹn rayen vwo nẹ oborẹ ayen tẹnrovi, rọ dia idjerhe rọhẹ obaro rayen na.​—Isẹ 4:25; Mat. 6:22.

3. Ukẹcha vọ yen a sa mrẹ siẹrẹ a da ta ota kpahen erọnvwọn ri se mu ẹwẹn rẹ avwanre reyọ?

³ O vwo orọnvwọn vuọvo rẹ avwanre guọnọre nẹ o mu ẹwẹn rẹ avwanre reyọ nẹ ẹga ri Jihovaa. Dedena, ẹdia sansan herọ ri se mu ẹwẹn rẹ avwanre reyọ. (Luk 21:34-36) Rere avwanre se vwo muomaphiyọ ẹga ri Jihova, e jẹ a ta ota kpahen (1) obo ri se mu ẹwẹn rẹ avwanre reyọ, (2) obo ri Jesu ruru vwọ họnre vwọso obo ri se mu ẹwẹn rọyen reyọ, kugbe (3) oborẹ avwanre sa vwọ họnre vwọso obo ri se mu ẹwẹn rẹ avwanre reyọ nonẹna.

DIE YEN SE MU ẸWẸN RẸ AVWANRE REYỌ?

4-6. Erọnvwọn vọ yen sa fobọ mu ẹwẹn rẹ avwanre reyọ?

⁴ Avwanre ihwo eje vwo erọnvwọn buebun vwẹ akpeyeren re guọnọ ẹroevwote. Kerẹ udje, e se vwo ebẹnbẹn rẹ omakpokpọ, ihwo rẹ orua, ọtiọyen ji te obẹnbẹn romobọ rẹ avwanre ra cha vwẹrote. Vwọrẹ uyota, erọnvwọn nana pha ghanghanre, e je cha reyọ ọke rẹ avwanre. Kẹ erọnvwọn nana se mu ẹwẹn rẹ avwanre reyọ? E, i se ru ọtiọyen ọ da dianẹ eyen ọvo yen kọn ro iroro rẹ avwanre, je reyọ ọke vẹ ẹgba rẹ avwanre.

⁵ Vwọba, buebun rẹ avwanre hirharokuẹ oseghe rẹ usuon, uweren ọgangan, ega vẹ ozighi re dia oka rẹ ẹdẹ oba na. (2 Tim. 3:1) Siẹrẹ avwanre de rhiẹromrẹ erọnvwọn tiọyena, iroro avwanre sa djẹ kpo ayen ọ da nẹrhẹ a ro ẹnwan kọke kọke.

⁶ Ọ sa dianẹ avwanre vughe ihwo rẹ akpeyeren rayen weneri fikirẹ erọnvwọn tiọyena. Aphro herọọ nẹ, ofu rẹ obo re phia kẹ ayen na dje ayen hwe. A ma ihworakpọ ayen vwọ rioja ọke grongroon. Ọnana yen sorọ ihwo evo vwo roro nẹ ayen che se yeren akpọ kirobo rẹ ayen guọnọree fikirẹ ebẹnbẹn sansan rẹ ayen chirakon rọyen! Fikirẹ ọtiọyena, ihwo evo ke ghwọrọ ọke phiyọ ehaẹha kugbe erọnvwọn ra vwọ diotọ rere ayen se vwo si ẹwẹn nẹ ebẹnbẹn rayen na. Die yen avwanre se ru avwanre da mrẹ oma rẹ avwanre vwẹ ẹdia nana? E jẹ a mrẹ obo re se yono mie Jesu, rọ sa vwẹ ukẹcha kẹ avwanre vwọ họnre vwọso obo ri se mu ẹwẹn rẹ avwanre reyọ vwo nẹ ẹga ri Jihova.

DIE YEN JESU RURU VWỌ HỌNRE VWỌSO OBO RI SE MU ẸWẸN RỌYEN REYỌ?

7. Erhọ yen erọnvwọn evo ri rhe se mu ẹwẹn ri Jesu reyọ?

⁷ O vwo erọnvwọn buebun ri rhe se mu ẹwẹn ri Jesu reyọ, kerẹ eta ri shekpahen oseghe rẹ usuon kugbe ebẹnbẹn rẹ ihwo na. Ọke rọ vwọ hẹ otọrakpọ, ihwo buebun herọ re muọga, e ke rha dia ivwiogbere. (Mat. 14:14; Mak 14:7) Ayen rioja rẹ oshenyẹ vwẹ obọ rẹ ihwo ri Ju, ọtiọyen ji te ihwo ri Rom. Ọke rẹ ihwo na vwọ mrẹ nẹ Jesu vwo ẹgba vẹ ogangan ro vwo ru igbevwunu, kẹ ayen guọnọ reyọ vwo mu ovie. (Jọn 6:14, 15) Vwọba, kidie nẹ ẹro rẹ Eshu ọ hẹ Jesu, ọ da reyọ uphẹn rẹ Jesu vwọ dia osun rẹ akpọ na vwọ davwọn ni. (Mat. 4:8, 9) Ọke rẹ Jesu vwọ vuẹ idibo rọyen nẹ e che jẹ ọyen ehwee, ọvo usun rẹ igbeyan re ma kẹrẹ re se Pita da vuẹ nẹ: “Wọ ta oka rẹ ota ọtiọyena kpahen oma wẹ-ẹn Ọrovwori.”​—Mat. 16:21, 22.

8. Die yen Jesu ruru vwọ họnre vwọso obo ri se mu ẹwẹn rọyen reyọ?

⁸ Die yen Jesu ruru vwọ họnre vwọso obo ri se mu ẹwẹn rọyen reyọ? Ẹsosuọ, ọ reyọ ẹro rẹ Jihova vwo nẹ emu vwo no. (Jọn 8:28; 14:9) Ọrivẹ, o muomaphiyọ iruo aghwoghwo vẹ eyono na. (Mat. 9:35) Ọrerha, o vwo oniso rẹ obo re ma ghanre. (Jọn 4:34) Ọ sen edavwini rẹ Eshu, ọtiọyen ji te uchebro rẹ Pita vwọ kẹ, rẹ Pita niri nẹ erhuvwu yen ọyen ru vwọ kẹ Jesu. (Mat. 4:10; 16:23) Jesu vwẹ uphẹn kẹ oborẹ ihwo ta, oborẹ ayen ruẹ kugbe oborẹ ayen roro nẹ o mu ẹwẹn rọyen vwo nẹ eruo rẹ ọhọre rẹ Ọghẹnẹẹ. Uyota nẹ, o vwo erọnvwọn buebun ri se mu ẹwẹn rẹ avwanre reyọ vwọ vrẹ i ri Jesu. Siẹrẹ a da vwẹrokere Jesu vwo ru erọnvwọn re djunute vwẹ obenu na, ka sa họnre vwọso obo ri se mu ẹwẹn rẹ avwanre reyọ.

DIE YEN E SE RU VWỌ HỌNRE VWỌSO OBO RI SE MU ẸWẸN RẸ AVWANRE REYỌ?

9. Die yen o mudiaphiyọ re vwo “vwo ọmrẹvughe rẹ oborẹ ọhọre ri Jihova hepha”? (Ẹfesọs 5:17)

⁹ Vwẹ ẹro rẹ Jihova vwo no emu vwo no. Wo de ru ọtiọyen, ọnana sa vwẹ ukẹcha kẹ wẹ vwo “vwo ọmrẹvughe rẹ oborẹ ọhọre ri Jihova hepha.” (Se Ẹfesọs 5:17.) A sa riẹn obo re vwerhan Jihova oma siẹrẹ e de se Ota rọyen ji roro kpahọn. Ọ da tobọ dianẹ Baibol na ghwe djunutẹ ẹdia avwanre na kiriguoo, a je sa riẹn oborẹ Jihova guọnọre nẹ e ru. Vwẹ idjerhe vọ? Womarẹ a vwọ davwẹngba vwo vughe ẹro rẹ Jihova vwo nẹ emu, a me je vwomakpotọ vwo ru nene.

10. Mavọ yen e se vwo vwo ẹro rẹ Jihova vwo nẹ emu?

¹⁰ E se vwo ẹro rẹ Jihova vwo nẹ emu womarẹ e vwo yono Baibol na ji roro kpahen oborẹ o nene ihworakpọ yerin wan. (Jer. 45:5) E de se ikuegbe tiọyena, a sa nọ oma rẹ avwanre enọ kerẹ: ‘Die yen ọnana yono uvwe kpahen Jihova? Ewene vọ yen o fori nẹ mi ru me sa vwọ vwẹ ẹro rẹ Jihova vwo nẹ emu ji vwo no?’ Uyota nẹ, iroro rọyen kpenu vrẹ ọ rẹ avwanre dibidibi. (Aiz. 55:9) Ọtiọyena, e jẹ a vwẹrosuọ nẹ o che yono avwanre kpahen obo re se vwo ru ọhọre rọyen. (Une 143:10) Avwanre je cha rẹ nẹ ọ cha avwanre uko vwo vwo ẹruọ rẹ ẹro ro vwo nẹ emu, a me je vwẹrokere.​—1 Jọn 5:14.

11. Die yen Jihova guọnọ mie avwanre?

¹¹ Re vwo vwo ẹro rẹ Jihova vwo nẹ emu ye, ka cha riẹn nẹ Jihova guọnọre nẹ a kẹnoma kẹ obo ri se mu ẹwẹn rẹ avwanre reyọ, rere e se vwo djephia nẹ avwanre muegbe kẹ oba rẹ eyeren nana. (Mat. 24:44) Ọ guọnọre nẹ ẹnwan mu avwanre rọọ. (Mat. 6:31, 32) Ọtiọyena siẹrẹ oshọ de mu avwanre fikirẹ omakpokpọ, iruo, asan ra dia, yẹrẹ ebẹnbẹn romobọ kugbe e rẹ orua, Jihova cha vwẹ ukẹcha ro fori vwọ kẹ avwanre. Ọ guọnọre nẹ avwanre bru ọyen rhe vwọ kẹ aghwanre kugbe ẹgba ra guọnọre e se vwo yerin ghene ebẹnbẹn rẹ avwanre.​—Une 55:22; Isẹ 3:5-7.

12. Ọrhọ yen idjerhe ọvo re se vwo yerin ghene ẹnwan rẹ obo re phia vwẹ akpọ na? (Matiu 5:3)

¹² Muomaphiyọ ẹga ri Jihova. Ọkievo erọnvwọn re phia vwẹ akpọ na se kpokpo avwanre ẹwẹn, jẹ o vwo obo re che se ru kpahọọn. Ukpe erọnvwọn tiọyena vwo mu ẹwẹn rẹ avwanre reyọ, e jẹ a tẹnrovi ẹga ri Jihova. Avwanre cha mrẹ omavwerhovwẹn siẹrẹ a da davwẹngba vwọ kọn owenvwe rẹ ọta rẹ Ọghẹnẹ phiyọ ubiudu rẹ avwanre​—kidie ọyen oboresorọ Jihova vwọ ma avwanre. (Se Matiu 5:3.) Avwanre se ru owenvwe nana ganphiyọ womarẹ e vwo yono Ota rọyen rọ dia Baibol na rere a sa vwọ riẹn Jihova phiyọ, ọtiọyen ji te re vwo vwobọ vwẹ irueru sansan vwẹ ẹga rọyen. E de ru ọtiọyen, oma cha vwerhen Jihova kidie avwanre vwẹ ọke avwanre ruiruo vwẹ idjerhe ro fori.​—Isẹ 23:15.

13. Mavọ yen a sa vwọ “vwẹ ọke rẹ [avwanre] vwo ruiruo vwẹ idjerhe ro me yovwin”?

¹³ Kerẹ Inenikristi, owenvwe rẹ avwanre yen ra vwọ “vwẹ ọke rẹ [avwanre] vwo ruiruo vwẹ idjerhe ro me yovwin.” (Ẹfe. 5:15, 16) Avwanre mrẹvughe nẹ ọ dia Baibol na di jiro kẹ avwanre nẹ a reyọ ọke rẹ avwanre vwo ruiruo vwẹ idjerhe ro me yovwin vwẹ akpeyeren avwanre ri kẹdi kẹdẹẹ. Ẹkẹvuọvo, o jiriro kẹ avwanre nẹ a jomaotọ kpahen obo ra cha reyọ ọke avwanre vwo ruiruo wan tavwen Jihova ki phioba phiyọ eyeren umwemwu nana. Mavọ yen a sa vwọ reyọ ọke rẹ avwanre vwo ruiruo vwẹ idjerhe ro me yovwin? Siẹre a da ghwọrọ ọke buebun vwo nẹ erharhe iyẹnrẹn kpokpọ ra vwọphia, enana se mu ẹwẹn rẹ avwanre reyọ, so ofudjevwe kẹ avwanre, ọnana me nẹrhẹ oruru rẹ avwanre kpahen ẹga ri Jihova shekpotọ. Ọtiọyena, ọyen obo ri yovwirin e de si uchọke re vwo se yẹrẹ nẹ iyẹnrẹn tiọyena kpotọ. Vwẹ idjerhe ọtiọna ka sa kẹnoma kẹ oshọ rẹ erọnvwọn tiọyena ghwa cha je mrẹ ọke vwo muomaphiyọ irueru rẹ ẹga ri Jihova. E jẹ a davwẹngba vwo ru bunphiyọ vwẹ iruo aghwoghwo na, kerẹ e vwo vwo orhivwinbrura buebun. Avwanre riẹnre nẹ ọyen obo re ghanre ra vwọ reyọ kuphẹn kuphẹn ro rhiephiyọ vwọ vwẹ ukẹcha kẹ ihwo vwo “vwo usivwin, ayen mi ji vwo erianriẹn ọgbagba rẹ uyota na.”​—1 Tim. 2:4.

14. Ukẹcha vọ yen a sa mrẹ siẹrẹ e de muomaphiyọ ẹga ri Jihova? (Ni ifoto na.)

¹⁴ A sa vwẹ ẹro abavo vwo nẹ ọke rẹ avwanre de yerẹn na siẹrẹ e de muomaphiyọ ẹga ri Jihova. Dede nẹ avwanre rhiẹromrẹ oseghe rẹ usuon, uweren ọgangan kugbe ega re vọn asan eje, oshọ mu avwanree, kidie avwanre riẹnre nẹ erọnvwọn nana eje eyen orugba rẹ aroẹmrẹ ri Baibol. Ọtiọyena ukperẹ oshọ vwo mu avwanre rọ, kẹ avwanre fiudugberẹ kpahen oborẹ Jihova che ru kẹ avwanre vwẹ obaro na. Avwanre se vwo ẹwẹn re dọe siẹrẹ a da vwẹroso Jihova nẹ ọ cha vwẹ ukẹcha kẹ avwanre vwo chirakon.​—Une 16:8; 112:1, 6-8.

15. Die yen “ọhọ” che mu avwanre vwo ru? (1 Pita 4:7)

¹⁵ Vwo oniso rẹ obo re ma ghanre. Ukperẹ ihwo buebun nonẹna vwọ tẹnrovi eyeren nana ro che vwoba kẹrẹkpẹ na, erọnvwọn rẹ ayen se vwo rovwoma kọyen ayen tẹnroviẹ. Dede nẹ erọnvwọn tiọyena ghwa dia obo re chọree, jẹ o ji fo nẹ a kẹnoma kẹ ẹro rẹ ihwo vwo no ayen rere a vwẹ “ọhọ” vwọ reyọ ayen ruiruo. (Se 1 Pita 4:7.) Ọrhọ yen otọ rẹ ota yena? Ọnana mudiaphiyọ nẹ e che vwo iroro ro fiotọ a sa vwọ vwẹ ẹro abavo vwo nẹ erọnvwọn tiọyen re vwo rovwoma na rere e se vwo bru erhiẹn rẹ aghwanre. Erhiẹn tiọyena che djephia sẹ avwanre vwo ẹro rẹ Jihova vwo nẹ emu, nẹ avwanre ji vwo oniso rẹ obo re ma ghanre.​—2 Tim. 1:7.

16. Die yen Jesu tẹnrovi ọke rẹ ughwu rọyen vwo siẹkẹrẹ?

¹⁶ Ọkieje yen Jesu vwo vwo oniso rẹ obo re ma ghanre. Jesu nabọ tẹnrovi obo rọ sa vwọ fuevun ji ru ọhọre rẹ Ọghẹnẹ vwẹ ọke rọ ma vwọ bẹn kẹ vwẹ otọrakpọ tavwen o ki ghwu. Ọtiọyena, o de muomaphiyọ ẹrhovwo ẹnẹ. Ukperẹ idibo rọyen vwọ nabọ diotọ je nẹrhovwo, ayen da vwerhẹn yanran kidie “oma bru ayen ku fikirẹ uvweri.”​—Luk 22:39-46; Jọn 19:30.

17. Diesorọ ihwo buebun vwọ reyọ ona ra vwọ reyọ intanẹti vwọ vwẹ evuẹ rhe ohwohwo vwo ruiruo, idjerhe vọ yen o se vwo mu ẹwẹn avwanre reyọ? (Ni ifoto na.)

¹⁷ Kerẹ idibo ri Jesu, ofu ji dje avwanre hwe ọkievo. Erọnvwọn re phia vwẹ ọke rẹ oba na sa so ẹnwan kẹ avwanre. Nonẹna ihwo buebun reyọ ona ra vwọ vwẹ evuẹ rhe ohwohwo vwẹ intanẹti ruiruo rere ayen sa vwọ kpairoro vrẹ ebẹnbẹn rayen. Ayen reyọ vwo nene igbeyan vẹ ihwo rẹ orua vwọ ta ota kuẹgbe, ghwa iyẹnrẹn, vwẹ ifoto ji vwo rhe ohwohwo, ọtiọyen ji te erọnvwọn efa. Ayen je reyọ vwo ruẹ ehaẹha sansan, ni ividio kugbe ifimu. Ẹkẹvuọvo, ihwo tiọyena sa ghwọrọ ọke vẹ ẹgba rayen eje phiyọ ona ra vwọ reyọ intanẹti vwọ vwẹ evuẹ rhe ohwohwo kidie ayen guọnọ riẹn erọnvwọn kpokpọ re phia. A sa vwọ vwẹ ẹro rẹ abavo vwo ni intanẹti, a sa nọ oma rẹ avwanre, ‘Me mrẹ omavwerhovwẹn siẹrẹ me da reyọ intanẹti vwo ruiruo, gbanẹ o mu ẹwẹn mẹ reyọ vwo nẹ obo re ma ghanre?’

18. Diesorọ a vwọ guọnọ iroro ro fiotọ siẹrẹ a da sane erọnvwọn ra vwọ diotọ?

¹⁸ A je guọnọ iroro ro fiotọ siẹrẹ e de nẹ ifimu vẹ ividio vwevunrẹ itẹlivishọni, re vwo nẹ ividio ri ghwe groon re ru phiyọ Intanẹti, yẹrẹ e de te ividio gemu. Erọnvwọn nana sa kẹ ohwo omavwerhovwẹn, a je sa reyọ ayen vwo bru ọke fia. A guọnọ iroro ro fiotọ siẹrẹ a da sane erọnvwọn ra vwọ diotọ vẹ ọke ra cha ghwọrọ vwo nẹ ayen. Ihwo re reyọ ividio tiọyena vwọphia vwẹ intanẹti se phi ekpokpọ phiyọ rọ da nẹrhẹ ihwo ri nẹ ayen mrẹ i ri titẹ ozighi vẹ ọfanrhiẹn. Ọnana yen obo re phia kẹ oniọvo ọshare ọvo vwẹ Asia. Ẹsosuọ, obo ra ka vwọphia vwevunrẹ ifimu ọyen ọ ka ton eno rayen phiyọ vwẹ intanẹti. Ro vwo dje ividio na eneno, ọ da rhe mrẹ i ri titẹ ọfanrhiẹn. Ọke vwọ yanran na, o de rhi ni ihoho rẹ ihwo re banphiyọ. Ọ vwerhen oma nẹ womarẹ ukẹcha rẹ ekpako vẹ igbeyan re kẹrerẹ, ọ da jowọ ji si aplikeshọni rọ reyọ vwo nẹ ifimu tiọyena nẹ ifonu rọyen ji gbere ughwru phiyọ uchọke rọ vwọ reyọ vwo ruiruo. Obo re phia kẹ oniọvo na dje oboresorọ avwanre vwo vwo iroro ro fiotọ siẹrẹ a da sane erọnvwọn ra vwọ diotọ.

19. Die yen sa phia e de mu akpeyeren rẹ avwanre kpahen ehaẹha ọvo?

¹⁹ A je guọnọ iroro ro fiotọ e de kpo ehaẹha yẹrẹ e de re rovwoma. O fori nẹ avwanre eje rhuẹrẹ ọke phiyọ vwo rovwoma kidie ọyen obo ri yovwirin o ji che toroba omakpokpọ rẹ avwanre. Jẹ e de mu ẹwẹn kpahen ehaẹha gan nọ, ọnana se mie avwanre ọke ro fori re vwo ru obo re ma ghanre. (Fil. 1:10) Avwanre eje yen che brorhiẹn rẹ oborẹ avwanre che ru vẹ ọke re che vwo ruo. Wo de che brorhiẹn tiọyena nọ oma wẹn: ‘Ọke me ghwọrọ phiyọ ehaẹha vẹ omaerovwon djephia nẹ mi vwo iroro ro fiotọ? Mi ghini djephia nẹ me vwẹ obo re ma ghanre kobaro ji muegbe kẹ “oba rẹ emu na eje”?’

20. Erere vọ yen che te avwanre obọ a da họnre vwọso erọnvwọn ri se mu ẹwẹn avwanre reyọ?

²⁰ Avwanre mrẹ erere siẹrẹ a da họnre vwọso erọnvwọn ri se mu ẹwẹn avwanre vwo nẹ irueru rẹ ẹga ri Jihova. (Aiz. 48:17) E se yerin ghene ebẹnben rẹ akpeyeren womarẹ ukẹcha ri Jihova. Obo re phia vwẹ akpọ na cha sa djuguegue mu avwanree. Avwanre ji che mu akpọ avwanre eje kpahen ehaẹha ọvoo. Ọtiọyena, e jẹ a vwẹ ẹro ri Jihova vwo nẹ emu vwo no, muomaphiyọ irueru rẹ ẹga ri Jihova ji vwo oniso rẹ obo re ma ghanre. E de ru ọtiọyen, ka sa họnre vwọso obo ri se mu ẹwẹn avwanre reyọ je “yọnrọn uvi arhọ na kokoroko.”​—1 Tim. 6:19.