Ru “Ona rẹ Uyono” Wẹn Yovwinphiyọ Vwẹ Aghwoghwo Na

1. Ona vọ yen a guọnọre nẹ avwanre tẹn, kẹ diesorọ? (2 Timoti 4:2) (Ni ifoto na.)

JESU vuẹ idibo rọyen nẹ: “Ovwan gba yanran re yono ihwo . . . vwọ dia idibo . . . , yono ayen rere ayen ru erọnvwọn eje ri mi jurhi rọyen kẹ ovwan.” (Mat. 28:19, 20) Iji nana djerephia nẹ ofori nẹ Inenikristi eje dia iyono. Vwọrẹ uyota, Jihova siẹ “ihwo eje ri vwo omamọ ẹwẹn,” emekashe na je vwẹ ukẹcha kẹ avwanre vwọ guọnọ ihwo tiọyena. (Iruo 13:48; Jọn 6:44; Ẹvwọ. 14:6) Dedena, o ji fo re vwo ru ẹkẹn ro te avwanre. E je ni udje rẹ ọyinkọn Pọl vẹ Banabas phi phiyotọ. Baibol na tare nẹ ọke ayen vwo ghwoghwota vwẹ sinagọg rọhẹ Aikoniọm, ayen “da ta ota vwẹ idjerhe rọ nẹrhẹ ihwo buebun segbuyota, te ihwo ri Ju te ihwo ri Grik.” (Iruo 14:1) Aphro herọọ nẹ Pọl vẹ Banabas nabọ tẹn “ona rẹ uyono” na re. (Se 2 Timoti 4:2.) O ji fo Inenikristi eje je vwọ tẹn ona rẹ uyono tiọyena.

2. Diesorọ iniọvo evo vwo no nẹ ayen che se ru ona rẹ uyono rayen yovwinphiyọọ?

² Iniọvo evo se no nẹ ayen cha sa tẹn ona re uyonoo kidie ayen igbori yẹrẹ ayen yono ẹbe sherii. Eshare evo re djunute vwẹ Baibol na ji ni oma rayen ọtiọyen. (Ẹyan. 4:10; Jer. 1:6) Ofu rẹ ona rẹ uyono rẹ iniọvo evo ji se dje ayen kidie ayen ghwa mrẹ erhuvwu rẹ iniọvo efa mrẹ vwẹ iruo aghwoghwo naa. Uyota nẹ ọ dia ihwo eje rẹ avwanre mrẹre yẹrẹ ta ota kẹ vwẹ iruo aghwoghwo na yen cha kerhọọ. Ọ dia ẹgba rẹ avwanre yen nẹrhẹ ihwo kerhọ kẹ avwanree. Kirobo re djunute siẹvure na, Jihova vẹ emekashe na yen ruo rere avwanre sa vwọ mrẹ ihwo ri vwo ẹwẹn esiri. Dedena, o ji fo e vwo ru asan ẹgba rẹ avwanre muru a sa vwọ vwẹ ovuẹ na phia vwẹ idjerhe ro de si ihwo urhuru. Vwẹ uyono nana, a cha ta ota kpahen idjerhe erha re sa vwẹ ukẹcha kẹ avwanre vwo ru ona rẹ uyono avwanre yovwinphiyọ vwẹ aghwoghwo na.

VWO ỌDAVWẸ RẸ IHWO RU WỌ TA OTA KẸ

3. Die yen nẹrhẹ eta ri Jesu se te ubiudu rẹ ihwo na?

³ Baibol na tare nẹ Jesu “riẹn obo rehẹ evun rẹ ohworakpọ.” (Jọn 2:25) Eta nana djerephia nẹ Jesu riẹn oborẹ ihwo roro kugbe obo ri mu ayen vwo ruẹ oborẹ ayen ruẹ. Kidie nẹ Jesu riẹn ọdavwẹ rẹ ihwo na, ọnana da nẹrhẹ eta rọyen te ubiudu rayen. Ọ riẹnre nẹ owẹnvwe rẹ Ota rẹ Ọghẹnẹ hwe ihwo na, vwọba, iloro ẹga na ji krun eghwa nyẹ ayen womarẹ irhi vẹ ẹkuruemu sansan rẹ ayen vwo mu. (Mat. 9:36; 23:4) Jesu ta ota kpahen erọnvwọn nana ri kpokpo ẹwẹn rẹ ihwo na vwẹ Enu rẹ Ugbenu na. Ihwo buebun nabọ kerhọ kẹ Jesu kidie erọnvwọn buebun rọ ta ota kpahen na shekpahen ayen.

4. Mavọ yen e se vwo djephia nẹ e vwo ọdavwẹ rẹ ihwo? (Ni ifoto na.)

⁴ E se djephia nẹ e vwo ọdavwẹ rẹ ihwo ra mrẹre siẹrẹ a da davwẹngba vwo vwo ẹruọ obo ri kpokpo ayen. Ofu rẹ akpọ rẹ Eshu nana rọ pha brabra na se dje kohwo kohwo rẹ avwanre ghwoghwota kẹ. Vẹ ọyena vwẹ ẹwẹn, a sa vwẹ ukẹcha kẹ ihwo rehẹ ekogho rẹ avwanre de ghwoghwo. Kerẹ udje, o vwo iyẹnrẹn ọvo o krinọ naa ro se kpokpo ẹwẹn rẹ ihwo rehẹ ekogho rẹ avwanre? O vwo obo re nẹrhẹ oshọ muẹ esẹ vẹ ini kpahen obo re sa phia kẹ emọ rayen vwẹ isikuru? Iruo bẹn ẹmrẹ vwẹ asan wọ dia? De vwẹ ẹwẹn roro oborẹ akpeyeren hepha vwọ kẹ ihwo nana ri vwo iphiẹrophiyọ vuọvo kpahen oborẹ Baibol taree ri hirharokuẹ “ọke ọgangan” nana.​—2 Tim. 3:1; Aiz. 65:13, 14.

5. Kerẹ oyono, idjerhe vọ yen Jesu vwọ fẹnẹ ihwo ri Farisi na? (Matiu 11:28-30)

⁵ Jesu vwo ọdavwẹ rẹ ihwo ro ghwoghwota kẹ, ayen mrẹ ọnana vwo nene obo ro nene ayen yerin wan. Ọ fẹnẹ ihwo ri Farisi na dibidibi, re vwẹ ẹro okueku vwo nẹ ihwo kerẹsiẹ a da mrẹ nẹ ayen fiẹ emuọvoo! (Mat. 23:13; Jọn 7:49) Ẹkẹvuọvo, Jesu dje uruemu esiri ji brọghọ phiyọ ihwo oma. Kidie nẹ Jesu ọyen ohwo ‘dẹndẹn rọ je vwomakpotọ,’ ọnana da nẹrhẹ ọ dia uvi rẹ oyono. (Se Matiu 11:28-30.) O ji fo re vwo dje uruemu esiri ji brọghọ phiyọ ihwo rẹ avwanre ghwoghwo ota kẹ oma.

6. Mavọ yen e se vwo brọghọ ji dje uruemu esiri vwọ kẹ ihwo re vwọso yẹrẹ sẹn ovuẹ avwanre?

⁶ Die yen ofori nẹ e ru siẹrẹ ihwo evo da vwọso yẹrẹ sen ovuẹ rẹ avwanre? Ọ dia Jesu de tanẹ a kpairoro vrẹ ayen ọvoo. Ọ tare nẹ ‘e ru erhuvwu vwọ kẹ ihwo ri vwo utuoma kpahen avwanre,’ ‘bruba kẹ ihwo re hanrha avwanre,’ je tobọ ‘nẹrhovwo kẹ ihwo ri yinvwaro kpahen avwanre.’ (Luk 6:27, 28) Ọ cha lọhọ re vwo ru ọtiọyen e de no nẹ o vwo oboresorọ ihwo na vwọ sen ovuẹ rẹ avwanre. Uyota nẹ, ihwo evo ghene herọ re vwọsua. Jẹ, vwọ kẹ efa ọ sa dianẹ ofu dje ayen fikirẹ obẹnbẹn rẹ orua yẹrẹ o vwo ẹdia ọvo ro kpokpo ayen ẹwẹn rẹ avwanre riẹnree. Ọkievo, ọ je sa dianẹ avwanre bru ayen ra vwẹ ọke ro forii. O toro obo rọ wanree, e je nene uchebro rọ tare nẹ, “e jẹ eta rẹ [avwanre] dia vwevwerhen ọkieje, kirobo re phi ughwanka phiyọ, rere [avwanre] vwọ riẹn obo ro fori nẹ [avwanre] kpahen vwọ kẹ ohwo ọvuọvo.” (Kọl. 4:6) E de vwo ẹruọ rẹ obo ri kpokpo ihwo na ji dje erorokẹ vwọ kẹ ayen, ophu re che mu avwanree, ka cha gbẹn idjerhe rẹ obo ra sa vwọ vwẹ ukẹcha kẹ ayen je dia omamọ rẹ iyono.

MU OBO RU WO YONO KPAHEN OTA RẸ ỌGHẸNẸ

7. Idjerhe vọ yen Jesu vwo djephia nẹ ọ vwẹroso Ota rẹ Ọghẹnẹ ọke ro vwo yono ihwo? (Jọn 7:14-16)

⁷ Jesu vwẹroso erianriẹn romobọọ. O mu obo ro yono kpahen Ota rẹ Ọghẹnẹ, ọ je reyọ vwo ruiruo vwẹ idjerhe rọ nẹrhẹ ọ lọhọ kẹ ihwo rọ ta ota kẹ ayen vwo vwo ẹruọ je karophiyọ obo ro yono. Baibol na tare nẹ Jesu yono ihwo “kerẹ ohwo ro vwo ogangan,” ọ hoho isiẹbe naa. Ọyena “gbe ayen unu.” (Mak 1:22.) Isiẹbe rẹ ọke ri Jesu vwanriẹn eta rẹ iyono ri titiri siẹrẹ ayen de yono. Vwọ fẹnẹ ayen, Jesu rionbọ kpo Ota rẹ Ọghẹnẹ odedede. Kerẹ Ọmọ rẹ Ọghẹnẹ rọ dia odjuvwu vwẹ obuko re, ọ rha sa reyo aghwanre rọyen rọ basaan vwo dje kẹ ihwo rọ ta ota kẹ na nẹ ọyen riẹn vrẹ ayen, rere ayen vwo no gegerege. Jẹ, o ru ọtiọyeen. O mu obo ro yono kpahen Ota rẹ Ọghẹnẹ kugbe ọhọre rọyen. (Se Jọn 7:14-16.) Jesu nabọ phi uvi rẹ udje phiyotọ vwọ kẹ idibo rọyen.

8. Mavọ yen ọyinkọn Pita vwẹrokere udje ri Jesu wan?

⁸ Idibo ri Jesu mu oborẹ ayen yono kpahen Ota rẹ Ọghẹnẹ. Kerẹ udje, roro kpahen eta rẹ ọyinkọn Pita tare vwẹ Pẹntikọst 33 C.E. Pita ghwe yono ẹbe sherii. Dedena, ọke rọ vwọ reyọ Ota rẹ Ọghẹnẹ vwo dje fiotọ kẹ ihwo na aroẹmrẹ rẹ Jesu ru orugba rayen, ọnana de te ayen ẹwẹn mamọ. (Iruo 2:14-37) Die yen nẹ obuko rọyen rhe? Vwẹ ẹdẹ yena “e de bru ihwo ri rhiabọreyọ ota rọyen vẹ omavwerhovwẹn phiyame, ihwo ri te omarẹ 3,000 da vwomaba ayen.”​—Iruo 2:41.

9. Diesorọ e vwo mu uyono avwanre kpahen Ota rẹ Ọghẹnẹ siẹrẹ e de yono?

⁹ O vwo orọnvwọn vuọvo ro yovwin vrẹ Baibol na rọ sa nẹrhẹ ihwo ruẹ ewene vwẹ akpeyereen. (Hib. 4:12) Ọtiọyena, ofori a vwọ reyọ Baibol na vwo ruiruo siẹrẹ e de yono ihwo. Avwanre guọnọ “ghwoghwo ota na,” ukperẹ erianriẹn romobọ rẹ avwanre. (2 Tim. 4:2) Isẹ 2:6 tare nẹ: “Ọrovwohwo na re kẹ ohwo aghwanre; unu rọye ọye erianriẹn vẹ ẹruọ nẹ cha.” Ọtiọyena, siẹrẹ a da reyọ Baibol na vwo yono, kọ ghwa họhọ nẹ a vwẹ uphẹn kẹ Jihova nẹ ọ ta ota kẹ ohwo na. (Mal. 2:7) Avwanre guọnọre nẹ ihwo riẹn nẹ obo rehẹ evunrẹ Baibol na yovwin vrẹ aghwanre rẹ ihworakpọ. Ẹwẹn ọfuanfon rẹ Ọghẹnẹ yen e vwo sio, ọ je kẹ ohwo erianriẹn ra guọnọre e se vwo ru obo re vwerhen Ọmemama rẹ avwanre oma, ji yeren uvi rẹ akpọ rọ vọnre vẹ omavwerhovwẹn.​—2 Tim. 3:16, 17.

10. Mavọ yen a sa vwọ kpọ iroro rẹ ohwo re yono kpo obo rehẹ evunrẹ Baibol na?

¹⁰ Ọke rẹ wo de muegbe rẹ wo vwo ru uyono ri Baibol, gbẹn idjerhe sansan rẹ wọ sa vwọ kpọ iroro rẹ ohwo ru wo yono na kpo obo rehẹ evunrẹ Baibol na. Ofori ohwo ru wo yono na vwọ riẹn nẹ dede nẹ ihoho vẹ ividio se toroba erianriẹn avwanre, jẹ Baibol na yen ọbe kiriguo rẹ avwanre yono. Ọtiọyena se ẹkpo ri Baibol kiriguo rehẹ asan rẹ ovwan yono na, wọ je vwẹ ukẹcha kẹ ohwo na vwo vwo ẹruọ rayen. Davwẹngba rere ohwo rẹ wo yono na vwo vwo ẹruọ rẹ ẹkpo ri Baibol re yono na, ọ da tobọ dianẹ wọ rionbọ kpo ihoho yẹrẹ ividio. A guọnọ eta yẹrẹ isese rẹ ẹkpo ri Baibol buebun e ki se ru ọtiọyeen. Ẹkẹvuọvo, vwẹ ọke kẹ ohwo rẹ wo yono na ọ sa vwọ nabọ vwo ẹruọ rẹ ẹkpo ri Baibol ọvuọvo, ọ da tobọ dianẹ ọ guọnọ ẹvwanriẹn se. Vwẹ idjerhe ọtiọyena, ka sa tanẹ uyono ri Baibol avwanre ghini ruẹ, ọ diẹ uyono rẹ ẹbe, ihoho yẹrẹ ividio yen avwanre ruẹẹ.​—1 Kọr. 2:13.

11-12. (a) Mavọ yen avwanre se vwo vwo edirin rẹ ihwo ra vwẹ Baibol yono? (Iruo 17:1-4) (Ni ifoto na.) (b) Die yen ihwo evo ghwa riẹn kpahen Baibol naa, kẹ mavọ a sa vwọ vwẹ ukẹcha kẹ ayen?

¹¹ Karophiyọ vwo “ghwoghwo ota na . . . vẹ edirin ọgangan” ọ da tobọ dianẹ ohwo rẹ wọ vwẹ Baibol yono mrẹ bẹnbẹn ro vwo rhiabọreyọ ẹkpo ọvo. Ẹyan-obaro rẹ ihwo ejobi cha sa dia abavoo. Ihwo evo ra vwẹ Baibol yono guọnọ ọke ayen se vwo vwo ẹruọ rẹ iyono evo rẹ avwanre niri nẹ e bẹnree. Pọl ghwoghwota kẹ ihwo ri Ju evo re dia Tẹsalonaika abọ buebun, ọ je reyọ Isiesi Ọfuanfon na vwo nene ayen jiroro kugbe tavwen evo ki vwo ẹruọ rẹ ẹkpo na.​—Se Iruo 17:1-4.

¹² Idjerhe ọfa avwanre se vwo dje edirin phia yen a vwọ kẹnoma kẹ eta ibuebun je nọ ayen enọ vwọ riẹn obo rehẹ evunrẹ ubiudu rayen. Davwẹngba vwọ nabọ kerhọ ji vwo ẹruọ rẹ oborẹ ayen ta. Wo de ru ọyena nu, gbe se je ta ota kpahen ẹkpo ri Baibol evo re sa vwẹ ukẹcha kẹ ayen vwo vwo ẹruọ rẹ ẹro rẹ Ọghẹnẹ vwo ni ota na. Vwọba, vwo oniso ọnana nẹ: Ihwo evo herọ re nama riẹn obo rehẹ evunrẹ Baibol na kakakaa. O che yovwin wo de dje Baibol ra teyenphiyọ ọbe vwọ kẹ ayen? Wọ sa rionbọ kpo ọmọbe na “Obo Re se Yono nẹ Baibol na Rhe,” rere ọ sa vwọ mrẹ evuẹ buebun rehẹ evunrẹ Baibol na. Wọ sa reyọ ẹkpo ri Baibol ọvo yẹrẹ ivẹ rọhẹ onọ 15 vwo dje oborẹ Baibol na ghanre te kugbe oborẹ Baibol na sa vwọ vwẹ ukẹcha kẹ avwanre vwọ mrẹ omavwerhovwẹn. Vwọrẹ uyota, wo de dje oborẹ Baibol na ghanre te kẹ ihwo wọ vwẹ Baibol yono, ona rẹ uyono wẹn kọ cha nabọ ghwotọphiyọ.

TẸNROVI OBORẸ AYEN SA VWỌ RIẸN JIHOVA

13. Ono yen ofori nẹ a tẹnrovi siẹrẹ e de yono ihwo efa? Djudje rọyen.

¹³ Ọdavwẹ rẹ avwanre ọyen a vwọ vwẹ ukẹcha kẹ ihwo vwọ riẹn Jihova ji sikẹrẹ. (Jems 4:8) Vwẹ idjerhe ọtiọyena, a sa vwẹ owian avwanre vwo dje ọ rẹ ohwo rọ nyẹ urhukpẹ mu orọnvwọn ọvo vwevunrẹ ebri rere ohwo ọfa sa vwọ mrẹ. Ọ da garẹ urhukpe na vi oma rọyen ohwo na cha sa mrẹ orọnvwọn naa. Ẹkẹvuọvo, ọ da garọ vi orọnvwọn ra guọnọ na, o rhe che hwọke ohwo na ke mrẹẹ. O ji fo re vwo ru ọtiọyen siẹrẹ e de yono ihwo efa​—kọyen a vwọ tẹnrovi oborẹ ihwo sa vwọ riẹn Jihova, ukperẹ oma rẹ avwanre.

14. Mavọ yen wọ sa vwọ vwẹ ukẹcha kẹ ohwo ru wo yono vwọ tẹnrovi Jihova?

¹⁴ Siẹrẹ wo de ruẹ uyono ri Baibol, vwẹ ukẹcha kẹ ohwo rẹ wo yono vwo vwo owenvwe ro vwo ru obo re vwerhen Jihova oma. (Isẹ 27:11) Ọ diẹ wọ de vwẹ ukẹcha kẹ vwọ riẹn obo ri yovwirin vẹ obo re brare rọ kẹnoma kẹ, kerẹsiẹ ra da mrẹ nẹ ọ guọnọ vwomaba ukokoo. Wọ guọnọre nẹ o ru ewene rere o se vwo ru obo re vwerhen Jihova oma. Kerẹ udje, ọ da dianẹ ọ mrẹ bẹnbẹn ro vwo siobọnẹ orharhe uruemu ọvo, nọ enọ kerẹ: “Diesorọ Jihova vwo vwo utuoma kpahen uruemu nana? Diesorọ Jihova vwọ guọnọ nẹ wo siobọnẹ orọnvwọn ru wo vwo omavwerhovwẹn kpahen? Mavọ yen obo rọ guọnọre nẹ wo ru na vwo djephia nẹ o vwo ẹguọnọ wẹn?” Kọke kọke wọ da vwẹ ukẹcha kẹ ohwo na vwo roro kpahen Jihova phiyọ ye, ọnana kọ cha nẹrhẹ ọ riẹn oborẹ Ọsẹ rọyen vwo ẹguọnọ rọyen te. Vwọba, owenvwe ro vwo ru obo re vwerhen Jihova oma kọ cha ganphiyọ.

RU ONA RẸ UYONO WẸN YOVWINPHIYỌ ỌKIEJE

15. Die yen wo se ru rere ena rẹ uyono wẹn se vwo yovwinphiyọ?

¹⁵ Wọ sa rẹ Jihova vwẹ ẹrhovwo nẹ ọ vwẹ ukẹcha kẹ wẹ vwọ fuẹrẹn ena rẹ uyono wẹn rere wọ sa vwọ mrẹ asan ru wo de ru yovwinphiyọ. (1 Jọn 5:14) Avwanre se ru nene ẹrhovwo rẹ avwanre, siẹrẹ a da reyọ obo re yono avwanre vwevunrẹ emẹvwa vwo te ubiudu. Wọ sa vuẹ iniọvo re nabọ tẹn ona nẹ e vwomaba wẹ siẹrẹ wo de re ruẹ uyono ri Baibol. Ovwan de ruo nu, gba nọ mie ayen asan ro de fo nẹ wo ru yovwinphiyọ. Je karophiyọ nẹ, dede nẹ wọ riẹn asan rẹ ovwan yono na, ọ dia ọtiọyen ọ hepha vwọ kẹ ohwo ru wo yono naa. Davwẹngba vwọ reyọ ẹro rẹ ohwo ru wo yono na vwo nẹ oborẹ ovwan yono. Vwẹ ukẹcha kẹ vwọ mrẹvughe nẹ ovuẹ rẹ avwanre na ghini iyẹnrẹn esiri. Ọ sa nẹrhẹ ọ vẹ Jihova vwo oyerinkugbe ọkpẹkpẹkpẹ, je ghwa uvi rẹ omavwerhovwẹn bro rhe.​—Une 1:1-3.

16. Erere vọ yen che te avwanre obọ siẹrẹ e de ru ona rẹ uyono avwanre yovwinphiyọ?

¹⁶ A mrẹ vwo dje aghọghọ rẹ avwanre siẹrẹ e de yono ihwo kpahen Jihovaa! Vwẹ akpọ kpokpọ na, owian re che vwo yono ihwo ọ dia ọmọrhee. Ọtiọyena, e gbe jẹ avwanre vwo ọdavwẹ rẹ ihwo rẹ avwanre ghwoghwota kẹ, mu uyono rẹ avwanre kpahen Ota rẹ Ọghẹnẹ, je tẹnrovi Jihova avwanre vwo ghwoghwo iyẹnrẹn esiri na. E de ru ọtiọyen, ke se ru ona rẹ uyono avwanre yovwinphiyọ vwẹ iruo aghwoghwo na.